A Nɔla Ma Chɔulaba Setana Nduyɛ Ma Tiu Ndu Ba!

1. (a) Le yɛɛ chɔulaba naŋ cho a Setana wo cho yɛ nyɛ sɔvɛ o teleŋndo hoo niŋ? (b) Vɛɛ naŋ looku yɛ sina maa ŋ nɔla miŋ chɔulaba a Setana nduyɛ miŋ tiu ndu ba?

SETANA cho chɔulabaa a Kilisiɔŋaa pɔyaŋnda, vɛlɛ a “saa cheleŋ” nda. (Chɔŋ 10:16) Yeemɛi Nyina Wɔɔŋndo cho ni, le mbo tɛɛmbuu buɛiyaa Chɛhowaa a bɔɔbɔɔ a mɛɛ o nɔla yɛ o teleŋ biŋgii lo hoo wo bɛŋgu. (Nuawɔ Chɔɔmɔŋndo 12:9, 12.) Ŋ nɔla pa miŋ chɔulaba Setana nduyɛ miŋ tiu ndu ba? Ei! Baabuiyo dimi aa, “La simul Masa Nyinaa Wɔɔŋnda. Te la simul ndu pɛ, o nyaanuŋ nya.”—Chem 4:7.

2, 3. (a) Vɛɛ kiɔɔ laalaŋndo nɔɔ maa Setana cho achal te hivi yɛ sabu Nyina Wɔɔŋndo lachi? (b) Vɛɛ ŋ looku yɛ sina maa Setana cho?

² Waŋnda tau che di maa suɛi lamamɔɔ te Setana cho pɛ achal. Le nda, a chue Setana a nyinaa wɔɔŋnda maa nyaa yoomaa kpeekpei le nda cho le. Waŋnda haa chua nda maa bundɔŋ nda dimi o yaulaŋ niŋ, a vidueila nda chɔm a nyaa weyaŋnda okɔɔ wa nda cho ni. Wanaa kaŋ yiyaŋ maa wana o wana kɔlkalu nɔ laalaŋ o nyinaa wɔɔŋnda niŋ te. Kɛ, a yiyaŋ pa maa Setana a nyinaa nduaa cho a buulaŋndo le mɛɛ bɛɛle ndalaŋ le tol tooloo ma wa bundɔŋ lachoowaŋ dimioo a nda okɔɔ yɛ? O cho lende le icho le! Kɛ icho tɛtɛlɛ le mi Setana suumiaa kɔlta wanaa kiisaŋ maa o cho achal te wa. (Kɔl. Diiŋ Ndɔɔ 4:4) Waa dimioo maa nyaa yoomaa cho o inyinaya wa cho achal te, cho nɛiyo opilɛ o nɛila bɔɔbɔɔ Setana cho waŋnda huiyo laŋ tɛɛŋ ni.

³ Naa buɛiyaa Chɛhowaa cho o wanaa nda cho haa huiyo wa tɛɛŋ te. Ŋ sina maa waŋndo kpeekpei Nyina Wɔɔŋndo cho ni. Setana ndoo soliŋ kɛuwo kpeku ni le suɛi o Ifi lo. (Kan Ch. 3:1-5) Mi Setana cha Chɛhowa chɔdɔ o suɛi Chobu ve choo. (Cho. 1:9-12, NW) Setana koŋ kindiŋ vɛlɛ le Chiisu tɔɔndaŋndo ni. (Mat. 4:1-10) Nduyɛ mɛɛ Masale Mɛlɛkaleŋ le kanduŋ o wɔsi 1914 ve niŋ, Setana koni kandu vɛlɛ “chɔuwo malɔɔ” Kilisiɔŋaa pɔyaŋnda choo ni. (Chɔɔmɔŋndo 12:17) Kilisiɔŋaa pɔyaŋaa 144,000 a tiŋ cho wɔ o lɛŋndeŋ choo. Nduyɛ Setana cho wɔ chɔulabaa a nda vɛlɛ a saa cheleŋnda le halikpeŋ mbo tɛɛmbuu tiindaŋ nda nɔ o Mɛlɛka niŋndo. Le batiuwaa sɔlaa o chɔuwo hoo niŋ, ŋ nɔ miŋ simul Setana nduyɛ miŋ lo o kala poŋ o tiindaŋ naa choo. Buŋgɛi hei cho yaasiaa nɛilaŋ la yaa le hei tosaa.

TUL KAA HEELAŊNDO LEYƐ

4. Vɛɛ Setana chɔm yɛ maa o nɔ kaa heelaŋndo o piaa cha?

⁴ Setana cho wana tuisiaŋ te. Nduyɛ, le mi nyɛ yoomaa toosiaŋ o inyinaya wo sɔla kɔllo le mbo simul kpuluŋgumayɛi Chɛhowɛi mbo simnuŋ mɛlɛka, chɔm maa Setana heeluŋ nduyɛ o nɔ yoŋgaa. Lelaŋ, nɛiyo opilɛ o naŋ nɔla miŋ simul Setana wo cho kaa heelaŋndo tullo leyɛ ni, nduyɛ miŋ kindiŋ le waa wanaa tuisiaŋ. (Nuawɔ Pitɛ Tasoo 5:5.) Kɛ yɛɛ cho yɛ heelɔŋndo? Baa kaa wɔɔŋndo o cho le lɔɔlɔɔ ni?

5, 6. (a) Baa kaa heelaŋndo wɔu le lɔɔlɔɔ? Tɛɛsiaa wɔ. (b) Heelɔŋ suu kuɛɛ wɔu yɛ, nduyɛ tamaseliila kuɛɛ cho yɛ o Baabuiyo niŋ a hei okɔɔ?

⁵ Yau tɛɛsiaa ŋsɔɔ pilɛ tɛɛsiaa heelɔŋndo maa “wana pila chuaŋnɔŋndo o sɔvɛ, a bɛɛleŋ numpila keŋnɔŋndo.” Nduyɛ “a kɔl hiniaa nɔɔ le mɛɛ numpila, ɔɔ wanaa balu numnda tosa o kɛndɔɔ yɛ, ɔɔ nɔ nyɛ sɔviɔɔ yɛ.” Keŋ cho suɛi wɔɔŋ te. Mi kiilanɔɔ Pɔɔl dimul Tɛsaloniaŋnda aa, “Le hei, naa bɛɛ mi ŋ kialu yoŋgaa a nya okɔɔ kundala wanaa laalaŋaa Mɛlɛkaa a piliaa tɛɛŋ. Mi ŋ kialu yoŋgaa a nya okɔɔ, a mɛɛ nya cho isisi yi yɛ, a mɛɛ nya cho hiouwɔɔ lachi a Mɛlɛka tiindaŋndo yɛ, mi che bɛɛ mi waŋnda va nya nyɛ palaa tuisioo choo tau, nduyɛ mi la va mɔnɛi biiyɔɔ tau ni.” (Tɛsaloniaŋ Diiŋ Ndɔɔ 1:4) Lelaŋ, yiyaŋ kɛndɔɔ nɔɔ a walta acheleŋnda okɔɔ, a heelɔŋndo tiŋ nɔɔ cho suɛi wɔɔŋ te. O bɛnda mi siɔmbulaŋ la bii naa le yuŋgu naa, naamu naa, ɔɔ kaŋnde naŋ sul niŋ ndeŋ te.—Walta Wa. 21:39.

⁶ O baa pilɔɔ choo, kaa heelaŋndo opum tosa mi chaŋyaŋ naŋ tambu, nduyɛ o tɛɛmbuu vɛlɛ chaŋyɛi nɛi naa Chɛhowaa tɛɛŋ. Heelɔŋ suu waa ndoo tosa ŋ tuisiŋ le miŋ chɛl sila bɛnda le naa wo le. (Chon. 141:5, NW) A tɛɛsiaa heelɔŋ suu waa naa aa, “bɛɛleŋ hiuwo nɔɔ le naapila,” ɔɔ “wanaa nɔ yoŋga bɛndoo le chɔmndo maa a bɛnda ma hiou acheleŋnda wa.” Chɛhowa tul kaa heelaŋ bɛndoo leyɛ. (Isi. 33:28; Emɔ. 6:8, NW) Kɛ mi kɔllo naŋ Setana tau te o che pɛ waŋnda lisaŋndo a heelɔŋndo, nduyɛ hei tosa mbo yiyaŋ a kaa heelaŋ ndu bɛɛ nɔ wo. Nuawɔ se mɛɛ Setana ndoo naŋ kɔl teleŋ Nimilɔɔ, Felo, a Abisalɔm luɛi o kaa heelaŋ bɛnda le wo niŋ yɛ! (Ɛs. 5:1, 2; Samiɔŋ Diiŋ Ndɔɔ 15:4-6, NW; Kan Ch. 10:8, 9) Heelɔŋndo vɛlɛ koni tosa ni mi Keŋ luɛi o kpundɔɔ niŋ. Mi Mɛlɛka pila sila ndu, kɛ le mɛɛ ndoo heeluŋ tau yɛ, mbo kɛɛ le sila koŋ chɛlɔɔ. Mbo kɛɛ kpoŋ le sila Chɛhowaa biyɔɔ, nduyɛ mi hei luei ndu o kpundɔɔ niŋ.—Kan Ch. 4:6-8.

7, 8. (a) Yɛɛ cho yɛ hɛliaŋ lekaa wo, nduyɛ vɛɛ o looku yɛ simnuŋ kaa heelaŋ? (b) Tɛɛsiaa wɔ mɛɛ heelɔŋndo paaliaŋ kɔl nyulu kundaa yɛ?

⁷ Waŋnda cho hau Kaa heelaŋndo chɔmndo ma wa luɛiyɔɔ o kpundɔɔ niŋ o nɛila bɔɔbɔɔ niŋ. O wala pilɔɔ choo kaa heelaŋndo a hɛliaŋ lekaa wo chal ni. Yau tɛɛsiaa ŋsɔɔ pum tɛɛsiaa hɛliaŋ lekaa wo maa, “yɛle tulaa leŋ nɔɔ le wanaa nya fula kaale pilɛ le wa” nduyɛ “laalaŋndo maa wanaa fula o kaayii cheleŋnde niŋnda nɔ kaalaŋ a suiliŋ ndaŋ yɛ yɛ. Nduyɛ maa kaaye ipum bɛnda mii hiau ipum.” Heelɔŋ lekaa wo luei hau waŋnda sɔŋgɔɔ, chɔulaŋ, a diuwaŋ bɛndoo nda tɛɛŋ.

⁸ A tonya, sɔɔŋ waa naa nɔ miŋ yɔŋnuŋ o kunda leKilisiɔŋndo niŋ te. Kɛ mi sɛɛŋgiaŋndaŋ la luɛi lepum chaaŋaa naa laalaŋnda tɛɛŋ. Nduyɛ heelɔŋndo tosa ŋ tiu kɔl naa ba le. Mi keŋ ndii yɔŋnuŋ Kilisiɔŋnda apum tɛɛŋ o wɔsiŋ kɛmɛ tasoŋ niŋ. Okoŋ, mi Chemisi poonyial nda nyuna tuu kpɛiyo hoo aa, “O yɛɛnɛ huŋ yɛ a sɔŋgɔlaŋ a sɛɛŋgiaŋnda yɔŋnuŋ laŋ nya tɛɛŋ ndaŋ?” (Chem 4:1) A tonya, yaamɔɔleŋ kɛsiŋndo o kɔllo niŋ di a heelɔŋndo tosa ŋ chiee isɔɔ le, vɛlɛ ŋ nɔ kaa kɛndɛ le. Nduyɛ mi hei saaŋgiaa acheleŋnda. (Tal. 12:18, NW) A tonya, mi heelɔŋndo paaliaŋ kɔl nyuloo o kundaa niŋ.

9. Vɛɛ Baabuiyo mala yɛ naa le hɛliaŋ lekaa wo chɔulabaa, a kaa heelaŋ bɛnda le wo? (Tofa fotueiyo o peele naŋ kandu leŋ choo.)

⁹ Te ŋ nɔ pɛ yiyaŋndo le naapila chuaa a sɔvɛ mbo hiau acheleŋnda, ŋ nɔ miŋ loonuŋ maa, “wana o wana cho wana yoŋga, Chɛhowa tul nda leyɛ.” (Tal. 16:5, NW) O bɛnda vɛlɛ miŋ tofa mɛɛ naŋ che wanaa naŋ nɔ kaale, lɛŋnde, ɔɔ naamu pilɛ le wa. Te o wa pɛ miŋ nɔ heelɔŋ lekaa wo, ɔɔ lɛŋnde naŋ fulaŋ leŋ o kɔl, mɛɛ ŋ kɛɛ tonya Mɛlɛkaa hoo aa, “waŋndo o pilɛ fɛɛŋ Mɛlɛka toosiaa. O wana pilɔɔ hoo niŋ, waŋnda kaalaŋ kpou la fula ni.” (Walta Wa. 17:26) O kpeekpei niŋ, kaaleŋ le pilɛ kpe naŋ nɔ ni. Kanifuule, Adama cho finya mamaa le waŋchieeya kpou ni. Lelaŋ, suɛi wɔɔŋnde icho ni le laalaŋndo maa kaaye ipum bɛnda mii hiau ipum. Yiyaŋ waa naa ke Setana yoomuaŋ le mbo paaliaŋ kaala naa a diompilɛ naa leKilisiɔŋndo. (Chɔŋ 13:35) Le miŋ chɔulaba Setana nduyɛ miŋ tiu ndu ba, mɛɛ miŋ faŋaŋ kaa heelaŋ bɛnda le wo kpou kɔɔli.—Tal. 16:18, NW.

FAŊAŊ HƆLTE NYƐSƆLAA BƐNDOO KƆƆLI A KAALAA NƆƆ LE CHIEEŊNDO

10, 11. (a) Le yɛɛ i wa yɛ suɛi tɛtɛlɛ le kaala chieeŋndo hoo nɔɔ? (b) Vɛɛ Dimaa ndoo looku yɛ chieeŋndo kaala?

¹⁰ Setana “cho masaa le chieeŋndo hoo” ni, nduyɛ o ba ndɔɔ bɛŋgu o cho ni. (Chɔŋ 12:31; Chɔŋ Tasoo 5:19) Lelaŋ, sɔɔŋ tau ŋ chieeŋndo hoo cho tosaa woŋ chɛlaŋ a nyɛ Baabuiyo dimi wo le. O cho sɔɔŋ chieeŋndo hoo tosa fau woŋ te wɔu le. Kɛ, ŋ nɔ miŋ kɛsiŋ o kɔl maa Setana soliŋ chieeŋndo hoo kpeku le yeemaŋ naŋ kpeeŋiaa, okoŋ, mbo kindiŋ le naa lueiyo o hakioo niŋ. Ɔɔ miŋ kaala chieeŋndo hoo, nduyɛ miŋ vi ŋdial le Chɛhowa piɛiyo.—Nuawɔ Chɔŋ Tasoo 2:15, 16.

¹¹ A tonya, mi kaala chieeŋndo piiliaŋ Kilisiɔŋnda o wɔsiŋ kɛmɛ tasoŋ niŋ. Le tamaseliiyo, mi Pɔɔl poonyiaa aa, “Dimaa muli kɔllo o yeemɛi nyɔɔŋ chieeŋ naŋ, mbo mɛi ya mbo kuaŋnuŋ.” (Tim. Diiŋ Ndɔɔ 4:10) Baabuiyo chɔm kpeekpei nyɛm suu Dimaa ndoo kaala woŋ te, ŋ tosa mbo mɛi Pɔɔl mbo kuaŋnuŋ ndo le. Kɛlɛŋgaa hɔlte nyɛsɔlaa bɛndoo Dimaa ndoo kandu nɔɔ ni mbo hiau sɔɔŋ iMɛlɛkayaŋ tolɔɔ kɔɔli. Te lende ndii wa ni, mɛɛ Dimaa ndoo bendu dila kɛndɛla Mɛlɛka ke ndu laŋ. Nduyɛ le yɛɛ? Baa chieeŋndo ndoo ke pa Dimaa nyɛ bɛnda mbo hiau tɔnɔla Chɛhowa wa ndu ke le waa latulu a Pɔɔllo?—Tal. 10:22, NW.

12. O nɛila kuɛɛ choo naŋ luɛi yɛ o yaŋɔɔle “yeemɛi sullo” niŋ?

¹² Nyɛ pilɛ koŋ kpe nɔla mbo yɔŋnuŋ naa. Naa Kilisiɔŋnda nɔ yeemɛi le naapila a yuŋgu naa mandaa. (Tim. Tasoo 5:8) Chɛhowa yeema naa miŋ tuei yoomu naa yeela. Lelaŋ, te ŋ tofa pɛ, ŋ nɔla miŋ che kpendekele nyɛm kɛndɛŋ ndoo toosiaa miŋ balu Adama nda Ifi silɔɔ woŋ. (Kan Ch. 2:9) Kɛ Setana nɔla mbo kpeeŋiaa naa le “yeemɛi sullo” nɔɔ. (Mat. 13:22) Wanaa bɔɔbɔɔ yiyaŋ maa kaniei nɔla mii chuu nda kɔl kɛndɔɔ, ɔɔ nyɛsɔlaa nɔɔ cho nyɛ kpeekpeiyo ni le waa wana sɔvɛ. Yiyaŋ waa naa nɔla mbo hui naa, nduyɛ o nɔla mbo tosa ŋ sɔla nyɛ sɔvɛ hiou kpou wo le, ndu cho yɛ chaŋyɛi nɛi a Chɛhowa ni. Mi Chiisu sila buɛiyaa nduaa aa, “Buɛi o buɛi cho mbo va le masaa ŋiɔɔŋ te. Kani fuule, te hoo o kaala ni, o tul o pilɔɔ leyɛ. Te hoo o diikuŋ ni, o diikuŋ o pilɔɔ le. Lelaŋ, wana lenduŋ kɔl o nyɛ sɔlaa, ma nɔla Mɛlɛka saaŋgial te.” (Mat. 6:24) Te ŋ simnuŋ pɛ chiaa le Sullo, mɛɛ ŋ kɛɛ Chɛhowa piɛiyo. Nduyɛ keŋ kpeekpei Setana yeema naa le tosaa ni! Kposoŋ bɛɛ, ŋ chɛl mi kaniei ɔɔ nyɛm i piandu woŋ tɛɛmbuu chaŋyɛi nɛi naa Chɛhowaa tɛɛŋ te. Le Setana chɔulabaa, mɛɛ miŋ kɛsi nyɛsɔlaa o fonda o bɛnda wo.—Nuawɔ Timoti Tasoo 6:6-10.

KƐƐ KAA IHINI NƆƆLƐIYO

13. Vɛɛ chieeŋndo hoo nɔ yɛ yiyaŋ wɔɔŋndo a nɔɔ okɔɔ vɛlɛ a hiniei?

¹³ Yaŋɔɔle Setana leŋ le cho vɛlɛ kaa ihini nɔɔlɛiyo ni. Hau, wanaa bɔɔbɔɔ che maa nɔɔ, a waa sakpo o wana nya cho o nɔɔ niŋndo lo, cho machuaa mɛɛ waŋndo wa naa o kpiɔɔ yɛ. Nduyɛ maa, sɔɔŋ masindɔŋ cho muŋ ni. Le tamaseliiyo, mi wana nyɛchaa waŋnda sina tau wo dimi aa, “I kendu le mi waŋndo chua lanɔɔ opilɛ ɔɔ chal pɔnɔɔ opilɛ o ba. I sina wana o wana cho sakpo ɔɔ yeema mbo wa sakpo o nɔɔ niŋndo le.” Mi wana nyɛchaa cheleŋ dimi aa, “I laalaŋ kpeekpei maa icho o kooma naŋ niŋ le waa a waŋndo opilɛ o nɔɔ niŋ o yoomu naa niŋ kpou le.” Setana nɔla mbo naŋ kɔl te wanaa sɔviaa tɛɛmbuu ke Mɛlɛkaa hoo pɛ. Nyina Wɔɔŋndo nɔ pɛŋ iyeema le mi kɛɛsiaa nɔleŋ le hiou lachi le. Le Setana chɔulabaa nduyɛ miŋ tiu ndu ba, ŋ nɔ miŋ bii kɛɛsiaa Mɛlɛkaa a nɔɔ okɔɔ.

14, 15. Vɛɛ naŋ looku yɛ kɛɛ kaa ihini nɔɔlɛiyo?

¹⁴ Ŋ wa o nɔɔ ɔɔ yembuaa naŋ cho ni, ŋ nɔ miŋ kindiŋ kpoke le kaa ihini nɔɔlɛiyo kiɔɔ. Baa chɔulabaa cho pa tɛtɛlɛ? Sako bɛɛ! Le tamaseliiyo, te feleŋgɔnɔɔ ŋ cho ni, a tuei niŋ chaaŋaa numnda o sukuu takpaa lɔɔ a mɛɛ nda tosa hiniei lepum yɛ, ɔɔ baltaŋ dɔuwɔɔ a hiniei okɔɔ. Fondaŋndaŋ lapum, te waŋndo luei pɛ balaŋ o kaa hoo niŋ, a che ndi maa fotueila tum fondola chuaambuaa o cho piɔuwo ni. Baabuiyo dimi aa, “Wana wou baa o niilu suundɛiyo niŋ ndo, ndu ndu, dialuŋ ndɔŋ muŋ o va muŋ nɔɔlaa ni.” (Kɔl. Tasoo 6:18) Naala wɔɔŋnda waŋnda sɔla o kaa ihini nɔɔlɛiyo niŋndo cho nda hau saŋgiaa nduyɛ ma wa piɔmndo sɔlaa. Feleŋguaa bɔɔbɔɔ cho o la nɔ le. Nduyɛ a tambu kɔl le mɛɛ nda tɛɛmbuŋ ndapila yɛ. Te o yɔŋ pɛ mi waŋndo luei balaŋ o kaa ihini nɔɔlɛiyo niŋ, o tuisiŋ ndupila saŋgaa choo. Nyɛm tosa mi waŋnda yelelaŋndoŋ tosa miŋ laalaŋ maa te o yɔŋ pɛ miŋ tɛɛmbuu sawa Mɛlɛkaa a hiniei okɔɔ, nyɛ o nyɛ yɔŋnuŋ naa le. Kɛ, icho tonya kposoŋ te. Yiyaŋ waa naa tosa mi waŋnda luei balaŋ o “yɔŋ wɔɔŋndo” niŋ.—Hibu. 3:13.

¹⁵ Te o yɔŋ pɛ ma wa tɔɔndaŋndo sɔlaa le kaa ihini nɔɔlɛiyo, yɛɛ ŋ nɔ yɛ ma tosa? Sina naa ŋ nɔ dialuŋ vilɛiyoŋ nda. (Luom. 7:22, 23) Piɛi Mɛlɛka le mbo ke num kpaayaa. (Fil. 4:6, 7, 13) Kpakpala sɔɔŋ tosa ma luɛi o kaa nɔɔlɛiyo niŋndo. (Tal. 22:3, NW) Nduyɛ te tɔɔndaŋndo komal num pɛ, kɛɛ ndu chɔ chɔ.—Kan Ch. 39:12.

16. Vɛɛ Chiisu ndoo muli yɛ mɛɛ Setana tɔɔndaŋ ndu, nduyɛ yɛɛ naŋ pɛɛku yɛ o tamaselii koŋ niŋ?

¹⁶ Tamaselii kɛndɔɔ pila Chiisu kɛsul naa ni le tɔɔndaŋndaŋ simullo. Nyɛ Setana chua buŋgɛi le ndu kioo wo pe ndu lehɔl te. Nduyɛ, o keela pɛŋ kɔllo mɛɛ nyɛ Setana chua hoo buŋgɛi le ndu kioo wo naŋ yɛ a mɛɛ o wɔu yɛ le. Kɛ, o lepilɛ niŋ kpe mbo dimi aa, “I cho i poonyiaa.” (Nuawɔ Maatiu 4:4-10.) Chiisu ndoo sina Diom Mɛlɛkaa, nduyɛ koŋ mala ndu ni le tosaa nyɛ bɛnda wo chɔ chɔ. Nduyɛ mɛɛ tɔɔndaŋndo komal ndu, mbo soliŋ Diom Mɛlɛkaa kpeku. Le Setana chɔulabaa nduyɛ miŋ tiu ndu ba, ŋ nɔ miŋ chɛl tɔɔndaŋ kaa ihini nɔɔlɛiyo le.—Kɔl. Tasoo 6:9, 10.

A NƆLA MA SƆLA BATIUWAA TE A BIUŊ PƐ

17, 18. (a) Nyɛm cheleŋ kuɛɛ Setana soliŋ yɛ kpeku le naa chɔulabaa, nduyɛ le yɛɛ kaamaa nɔ mbo bii naa le hei le? (b) Yɛɛ cho yɛ o kɛsiaa le Setana, nduyɛ vɛɛ hei dɛɛniaa yɛ num kɔllo le biuwɔŋndo?

¹⁷ Heelɔŋndo, hɔlte nyɛsɔlaa, a kaa ihini nɔɔlɛiyo cho nyɛm sala yaa Setana soliŋ kpeku le naa chɔulabaa woŋ ni. Nyɛm cheleŋ cho vɛlɛ puɛɛ. Le tamaseliiyo, Kilisiɔŋnda apum cho simullo sɔlaa wanaa cho o yuŋgula ndalaŋ niŋnda o ba, chaaŋaa ndaa o sukuu, ɔɔ mi masaa le lɛŋnda kuuna nda le wali dimiaa yooŋgu kɛndɔɔ tosaa. Kaamaa nɔ mbo bii naa le sɔɔŋ waa naa le. Lelaŋ Chiisu sila buɛiyaa nduaa ni aa, “Waŋnda kpou a tul nya niŋ leyɛ le mɛɛ nya cho buɛiyaa niaa yɛ. Kɛ nduyɛ, wana o wana hiou lachi a biuwoŋndo pɛ haaa mbo lo o koŋ mbo fuuluu o mɛɛlula nyɛ palaa koŋ pɛ, Mɛlɛka piŋi ndu.”—Mat. 10:22.

¹⁸ Vɛɛ naŋ chɔulaba yɛ Setana nduyɛ miŋ tiu ndu ba? Mi Chiisu dimul buɛiyaa ndaa aa, “La sim a dialuŋ kala. O koŋ kɔɔli, la nɔla mi la piŋi yoomula nyalaŋ.” (Luk. 21:19) Nyɛ o nyɛ wanachioo nɔla tosa le mbo yɔŋul naa lefafɛɛŋ te. Wana o wana nɔla mbo puu chaŋyɛi nɛi naa Mɛlɛka waa tɛɛŋ te, mɛɛ mi naapila chɛl. (Luom. 8:38, 39) Piɔm buɛiyaa Chɛhowaa bɛɛ tosa mi Setana sɔla batiuwaa le. Nduyɛ Chɛhowa cho tosa a sabu le ma sɔla fulasɛiniŋndo! (Chɔŋ 5:28, 29) O ba pilɔɔ choo, hiouwɔɔ lachi Setanaa cho tambei sɔla. Te chieeŋ dɛndɛ wɔɔŋndo hoo sɔla tambei pɛ, a cho Setana wou o sooŋ nɔ la mɛɛlu le wo niŋ le wɔsilaŋ 1,000. (Chɔɔmɔŋndo 20:1-3) Te wɔsila waa pilɛ la Chiisu cho wa o masaleŋ choo wo chuu pɛ, a cho Setana “soli naa o cho o biiyɔɔ niŋ nda” le teleŋ biŋgi le mbo mɛɛlu wanaa nɔ haki le wa hui. Okoŋ kɔɔli, Masa Nyinaa Wɔɔŋnda cho tambei sɔla. (Chɔɔmɔŋndo 20:7-10) Kpundɔɔ cho Setana lachi, kɛ num a nɔ kpundɛ waa naa le! Lelaŋ, simul Setana, nduyɛ ma lo o kala kpoŋ o tiindaŋ numndo choo. A nɔla ma chɔulaba Setana nduyɛ ma tiu ndu ba!