SUƐI LEBOLLE O KƆƆ | LE YƐƐ NAŊ CHƆM YƐ SANDEI?
Baa o Bɛnda lɛ le Sandei Chɔmndo Le?
O kɔɔna chua waŋnda le kanioŋ chɔmndo o Chepaŋ niŋndo Hitoshi tosa wallo ni. Mɛɛ Hitoshi wa yaula nda chɔm kanioŋ ndaŋ mɛɛndaŋndo nda wana ndɔ bɛndoo, mbo dimul ndu le ma yɔŋgu kona lachoowaa. Mi Hitoshi dimul wana ndɔ bɛndoo maa kɔl iyama ndɔɔ chɛl ndu mbo tosa wali lakafaa le. Yɛɛ wa yɛ fulamakɔɔlioo? Mi wana ndɔ bɛndoo kɔŋgɔlaŋ ndu maa o cho ndu soli o wallo niŋ. Okoŋ, ma soli ndu o wallo niŋ.
O teleŋ koŋ bɛŋgu, mi Hitoshi tambu kɔl tau le naa o cho vɛlɛ wali cheleŋ sɔla wa. Le tamaseliiyo, mɛɛ nda wa ndu nyuuniaa le wali cheleŋ, mbo dimi maa o nɔla mbo luei balaŋ o wali lakafaa niŋ te. Mi wana wa ndu nyuuniaa wo muli aa, “Yiyaŋ numndo choŋnuŋ teŋgeŋ!” Mi yuŋgu Hitoshi wo a chaŋyaŋ ndɔŋ dɛɛniaa ndu le mbo chɔm kɔl sikpaa le loo o sandei choo. Kɛ a koŋ kpou, mbo kandu kiisaŋndo nɔɔ. Okoŋ, mbo dimi aa, “Kɔndɔfillo cho ya, te o bɛnda pɛ mi hiou lachi a tiindaŋndo nɔɔ o Mɛlɛka niŋ.”
Nyɛ yɔŋnuŋ Hitoshi wo loonuŋ naa maa o cho wana o wana le che hau sandei nyɛ sɔvɛ le. Waŋnda apum che ndi pɛŋ maa bahawɛiyo i cho le sandei chɔmndo ni, taama taama o yulaleŋ tosaa niŋ. Mi chua cho wallo o Saut Afilika niŋndo dimi aa, “Wanaa sendu le wa kpu ya cho tɛɛŋ ni. Nduyɛ lepum, mi wa o tɔɔndaŋ kala kalaa bɛŋgu le waa maa nda.”
Niilu lakafaa opilɛ o pɛŋgɛla hau walaa wo cho choolaŋ ni. A kaala waŋchieeya nɔlaŋ okɔɔ Lɔbɔt Fidimaŋ pɛɛku ni. O Sukuu Bɛndu cho o Masachusɛt Amhast niŋndo o pɛɛku ni. Mbo dimi maa mi kaasoŋnda tau dimi choolaŋ o chemchemndaŋ tɔ bɛŋgu o baltaŋ niŋ. Mi Fidimaŋ dimi aa, “Mi kaamaa bii naa tau mɛɛ naŋ pɛɛku a hei okɔɔ.” I cho tonya maa wanaa bɔɔbɔɔ yeema mi waŋndo dimul nda choolaŋ te, kɛ mi nda dimi choolaŋ.
Le yɛɛ choolaŋ, wiileŋ, a niilu lakafaa cho yɛ hau o tiuwaa silɔ? Vɛɛ niilu lakafaa piiliaŋ yɛ hau waŋnda kpou? Nduyɛ i hiou kpou ve cho ni, vɛɛ naŋ looku yɛ miŋ kpakpala niilu lakafaa?