SUƐI LEBOLLE O KƆƆ | YILAŊNDOŊ A NYƐM CHO O CHOO CHOO NIŊNDOŊ OKƆƆ
Nyunalaŋ A Nyaa Yoomaa O Choo Choo Niŋ Okɔɔ
Kani bɛɛ kɔndɔfillo bii num niŋ a choo choo okɔɔ vɛlɛ a nyaa yoomaa cho loŋnda? Te o wa pɛ aa lende, mɛɛ a cho numpilɛ le. O cho niŋ wɔsilaŋ o waalaŋ niŋ waŋnda cho suɛi a hei okɔɔ. Apum laalaŋ maa bembaa naa cho o chieeŋ nyaa yoomaa inyinayaa niŋ ni, nduyɛ ŋ nɔ miŋ biilu nda. Mi apum yiyaŋ maa fonda kɔl nyuloo choo choo cho ni, maa loŋ maalikɛiya a wanaa kɛndiaa vi wa cho ni. Apum nda nda yiyaŋ vɛlɛ maa loŋ mɛlɛkaa o miiliɔŋndaŋ niŋ cho ni.
Mi wanaa bɔɔbɔɔ sɛɛŋgiaa maa ŋ nɔla miŋ sina nyɛ o nyɛ a choo choo okɔɔ le kanifuule, wana o wana fulawɔ loŋ mbo dimul naa a ndu okɔɔ le. Yiyaŋ waa lende cho tonya. Chiisu wa o choo choo niŋ o inyinaya, tuupa mbo huŋ o lɛŋndeŋ choo. Mbo dimul simlachiaa lepiɛiya o wɔsiŋ kɛmɛ tasoŋ niŋ kpendekele aa, “Mɛlɛka o vem ya wo, le nyɛ o hɛnaŋ ndo tosaa ya I chɛŋ ɛchɛnɛ mi huŋ ni. I hiŋ le hɛnaŋ ni ya pila tosa le.” Lelaŋ, mbo dimul kiilaa nduaa nyɛ ndoo sina niŋ paandu wo aa, “Chiɛi finya nuu nɔ yiyalaŋ tau.”—Chɔŋ 6:38; 14:2.
Mɛlɛka cho Finyaa Chiisu ni, diola ndɔlaŋ aa Chɛhowa. Nduyɛ choo choo cho “chiɛi” Chɛhowaa ni. (Sam 83:18) Lelaŋ, wana o wana nɔla mbo tɛɛsiaa mɛɛ choo choo cho yɛ mbo hiau Chɛhowa Mɛlɛka nda Chiisu Kiliti le. Ma soliŋ yilaŋndoŋ kpeku le wanaa laalaŋnda o sindɔɔ niŋ chɔmndo mɛɛ choo choo cho yɛ.
Buŋgɛi cho lachi ve tɛɛsiaa buŋgaŋ pum o Baabuiyo niŋ ŋ chɔm nyɛ puaa che o yilaŋuŋ bɔɔbɔɔ niŋndoŋ. Te a wa pɛ yilaŋndoŋ muŋ yaasiaa, loonuŋ maa ŋ chi nyɛm cho o choo choo niŋndoŋ te, kɛlɛŋgaa niŋ te miŋ pilaŋ muŋ. Lelaŋ, yɔŋi Mɛlɛka ndoo tɛɛsial naa nyɛm cho o choo choo niŋndoŋ o nɛi naŋ bii bila le wo niŋ mbo tɛɛsial naa muŋ o yilaŋndoŋ niŋ le miŋ bii bila. Yilaŋndoŋ muŋ cho num mala ma sina nyaa yoomaa cho o choo choo niŋ ma wa o “yiyalaŋ tau” niŋnda.