Tol Tamasi Wanaa Ndaa Suaa le Mɛlɛka wa Kɔɔli,—Maika
1. A nyuna kuɛɛ okɔɔ Maika ndoo yiyaŋ yɛ? Yɛɛ chɔm yɛ maa yooŋgoo hoo ve fondo fuu le?
1 Teleŋ kuɛɛ chieeŋ dɛnɛ wɔɔŋndo hoo cho yɛ chuwɔɔ? Wana ndoo suaa le Mɛlɛka wo Maika wa ni. Mi Maika bɛɛ ndoo yiyaŋ dɔɔ o nyunaa hoo choo teleŋ o wa yooŋgu Chɛhowaa dimioo le masɛi wa Isɔluɛi a Chudiaa ve. Yooŋgu o wa dimioo wo ve fondo fuu le. Teleŋ Maika wa yoomu wo, o wɔsi 740 ve niŋ tuupa mi Chiisu vialuŋ, mi nyɛ Chɛhowa ndoo dimi a Sameeliaa okɔɔ wo yɔŋnuŋ. (Mai. 1:6, 7, NW) O mɛɛlulaŋ kpɔŋ, mi Chulusalɛm bɛɛ sɔla tambei o wɔsi 607 ve niŋ tuupa mi Chiisu vialuŋ. (Mai. 3:12, NW) Mɛɛ naa bɛɛ ŋ cho Chɛhowa chumndo le mbo huŋ tɛɛmbuu chieeŋ wɔɔŋndo hoo yɛ, vɛɛ naa ŋ tuula yɛ Maika?
2. Vɛɛ naa ŋ biunuŋ yɛ te ŋ wa pɛ paale Chɛhowa leŋ chumndo nduyɛ, le yɛɛ?
2 Biunuŋ. Mi Maika poonyiaa aa, “Le ya, o Chɛhowa niŋ ya tiindaŋ ni. Ndu cho Mɛlɛka nuu ni. Lelaŋ, I cho ndu chum mi huŋ sɔla pioŋɔɔ.” (Mai. 7:7, NW) O kpeekpei niŋ, Maika chel paale Chɛhowa leŋ chumndo a siɛlɛi fuu le. Wana ndoo suaa le Chɛhowa wo o wa ni. Nduyɛ, o wa wali ndɔɔ tosaa a la bɛɛla. Mɛɛ naa bɛɛ ŋ cho paale Chɛhowa leŋ chumndo yɛ, mɛɛ kaala naa laŋ “la va niko maa wanaa cho a yɔŋgaŋ o Mɛlɛka lo kpou” wa. (Pitɛ Diiŋ Ndɔɔ 3:11, 12) Sabu Chɛhowa cho chumndo o tɛɛmbuu wɔ chieeŋndo hoo le wo cho ni, o yeema mi waŋnda mal yɔŋnda ndala wɔɔŋndaŋ. (Pitɛ Diiŋ Ndɔɔ 3:9) Ŋ nɔ mi ŋ chɛl sila cho o Baabuiyo niŋndo nduyɛ, mi ŋ tol tamasi wanaa ndaa suaa le Mɛlɛka wa kɔɔli.—Chem. 5:10.
3. Le yɛɛ naa ŋ nyɔɔlu yɛ Chɛhowa le mbo mala naa a nyina ndɔ diandaa?
3 Tiindaŋ o mala Chɛhowaa niŋ. Mi che bɛɛ Maika ndoo nɔ wali kala kalaa le tosaa, kɛ mbo tiindaŋ o mala Chɛhowaa niŋ le wali ndɔɔ tosaa. (Mai. 3:8, NW) Baabuiyo dɛɛniaa naa le mi ŋ tiindaŋ o mala Chɛhowaa niŋ kanifuule, o ke wanaa nɔ kpaaya le wa yoomuaŋ le ma tosa wali o ke nda wo. (Chon. 84:5, 7; Ais. 40:28-31, NW) Hei yɔŋnuŋ niŋ pa o yoomu numndo niŋ le wali Chɛhowaa tosaa? A piɛi pa lɔɔ lɔɔ o Chɛhowa lo le mbo mala num a nyina ndɔ diandaa?—Luku 11:13
4. Tamasi kɛndɛ yɛɛ Maika kɛsi yɛ le naa hau?
4 Teleŋ Maika wa yoomu wo, hɛnaŋ Mɛlɛkaa tosaa wa suɛi sɔwɛi o yoomu ndɔɔ niŋ ni. Mi che bɛɛ naa wanaa wɔɔŋnda wa ndu a balaa silɔ, kɛ mbo lo o laalaŋndo choo. Lende koni naa bɛɛ ŋ cho hau ni. Tɔɔndaŋndaŋ la komal naa lɔɔ lɔɔ le sinaa te ŋ lo niŋ pɛ o laalaŋndo choo. Lelaŋ, ŋ tiindaŋ o mala Chɛhowaa niŋ okoŋ, mi ŋ tosa hɛnaŋ ndɔɔ lefafɛɛŋ.—Mai. 4:5, NW.