Soliŋ Teleŋndo hoo Kpeku
Loonuŋya cho hoo Hunɔɔ wo Mala niŋ Naa le Balika Melaa Chɔmndo
1. Di yɛɛ keŋnuŋ yɛ naa a teleŋ loonuŋyaa hoo?
1 A Nyaakuɛiyo 14 loonuŋyaa cho wa ni. O boondei hei niŋ, ŋ soliŋ teleŋndo hoo kpeku miŋ chɔm balika melaa le kɛndɛi Chɛhowa tosal naa ve. Luku 17:11-18 chɔm naa kpendekele mɛɛ Chɛhowa nda Chiisu che balika melaa yɛ. Mi Chiisu siŋgi wanaa ŋlɛliaa ŋwaŋ tɔ, kɛ wana pilɛ kpe kindiŋ ni mbo mel ndu balikaa. Piɔm Chiisu huŋ sɔla le naa wo ke naa tɔnɔɔ tau. Koŋ cho ni, o cho hunɔɔ naalaŋ chii nduyɛ, miŋ sɔla yoomu fafɛɛŋndo o chilaŋ niŋ. Lelaŋ kpeekpei naŋ cho wa Chɛhowa balikaa mello lɔɔ lɔɔ ni le salala o ke naa laŋ ndaŋ. Vɛɛ naŋ chɔm yɛ balika melaa o lɔɔlaŋndaŋ bɛŋgu?
2. Vɛɛ naŋ chɔm yɛ balika melaa le piɔm Chiisu sɔla le naa wo?
2 Toosiaŋ le Balika Melaa Chɔmndo, Le balika melaa chɔmndo, mɛɛ miŋ chal fɛŋ miŋ yiyaŋ nyɛkɛndɛi. Nyɛ mala naa vɛlɛ miŋ chɔm balika melaa le piɔm Chiisu sɔla le naa wo cho ni, mɛɛ miŋ kindiŋ miŋ nua o bolii Baabui hɛliŋ le nuaa a teleŋ loonuŋyaa ve. A saaluŋ bolii Baabui hɛliŋ hei le nuaa ve o Baabui sɛnɛiyo niŋ. New World Translation, yooŋgula chɔɔlaalaŋ B12. (O puuluei niŋ o cho ni.) Icho vɛlɛ wa o yau naa ŋpagoo le wɔsioo, a yau naŋ chua tɛɛsiiyo lɔɔ lɔɔ wo. O bɛnda tau ma chal a yuŋgu numndo mi la nua bolii Baabuiye hei. Te ŋ wa pɛ yiyaŋndo o nyɛ Chɛhowa nda Chiisu tosal naa wo choo nduyɛ, miŋ wa suɛi a nda okɔɔ, o tosa miŋ hiou lachi a balika melaa chɔmndo le piɔm Chiisu sɔla le naa wo. Hei nyindu naa le kaa kɛndɔɔ chɔmndo.—Kɔl. Diiŋ Ndɔɔ 5:14, 15; Chɔŋ Tasoo 4:11.
3. Ɔɔ nɛila naŋ chɔm balika melaa laŋ?
3 Vɛɛ Naŋ Chɔm yɛ Balika Melaa? A nyɛ naŋ tosa wo naŋ chɔm balika melaa ni. (Kol. 3:15) Mi laŋunɔ Chiisu siŋgi a naa ŋlɛlɔɔ wo kindiŋ mbo nuuviaa Chiisu mbo kɔ mel ndu balikaa. Nduyɛ, mbo wa vɛlɛ suɛi a dialuŋ fulaa o wanaa cheleŋnda lo a mɛɛ Chiisu siŋgi ndu yɛ. (Luk. 6:45) Ŋ chɔm balika melaa le piɔm Chiisu sɔla le naa wo te ŋ wou pɛ sɛmbɔɔ tau le waŋnda veeloo ma hiŋ o loonuŋyaa. Nɛi cheleŋ naŋ chɔm vɛlɛ balika melaa wo cho ni, ŋ kindiŋ o nɛi o nɛi niŋ le miŋ tosa kɔɔfale malalaŋndeŋ ɔɔ miŋ yɔŋguŋ tau o wali pollo niŋ a boondii loonuŋyaa hei. Ichɔl naŋ cho wa loonuŋyaa biyɔɔ wo, ŋ nɔ miŋ wa a kɔl kɛndɛ le wanaa naŋ veelu wa demullo nduyɛ, miŋ wa a bɛɛndiaŋ le nyunala nda laŋ mulioo.
4. Yɛɛ naŋ tosa yɛ a boondii loonuŋyaa hei ŋ tembu kɔl te?
4 Baa loonuŋya mɛɛlaa cho wa hoo le naa ni? (Kɔl. Tasoo 11:26) Wana o wana sina le. Kɛ nyɛ naŋ sina wo cho ni, te o yɔŋ pɛ maa loonuŋya mɛɛlaa cho hoo le naa ni, mɛɛ ŋ ve lɛ niŋ chuuŋgiaŋ le piɔm Chiisu sɔla le naa wo le. A cho pa teleŋndo hoo kpeku soliŋ? Maa ŋ hiounuŋ lachi a Chɛhowa saŋgalaa a kɔl naa kpou le mɛɛ o yɔŋgu Po Ndɔɔ mbo huŋ wu le naa yɛ. Hei nɛŋi ndu kɔllo tau.—Chon. 19:14, NW.