Veelu Teŋgeŋndo
1. Teleŋ kuɛɛ naŋ cho yɛ kandɔɔ yaula veelaalaŋ yɔŋgoo le bɔŋaŋ naa naŋndee?
1 A chii nyɛdiaa teŋgeŋndo toosiaa le chaaŋaa numnda ɔɔ yuŋgu numndo. Nduyɛ ma chua teleŋndo tau le nyɛdiaa baakalaa hoo toosiaa. A ve a kɔllo wuye wuye le nda veeloo le? Lende koni wallo tosaŋ niŋ tau ni le toosiaa sɔɔŋ yɔŋguŋ niŋ o bɔŋaŋ naa palɛi yaawo naŋndee wo. Te lɔɔlaŋ la lo pɛ layaa tuupa mi bɔŋaŋ naa kanduŋ, ŋ cho kandɔɔ waŋnda yaula veelaalaŋ kioo le hunɔɔ o bɔŋaŋndo. Yɛɛ mala yɛ niŋ naa le waŋnda veeloo a dialuŋ fulaa?
2. Yɛɛ nyindu yɛ niŋ naa miŋ yɔŋguŋ tau le waŋnda yaulaŋ ndaŋ kioo?
2 Yiyaŋndo a tɔnɔla naŋ sɔla o bɔŋaŋnda naalaŋ ndo nyindu naa ni miŋ yɔŋguŋ le waŋnda veeloo a dialuŋ fulaa le bɔŋaŋ palɛi yaawo. (Ais. 65:13, 14, NW) Ŋ kɛsiŋ o kɔl maa veeloo waŋnda wɔsi o wɔsi le bɔŋaŋnda naalaŋ huŋ a fulamakɔɔli kɛndɔɔ. Wanaa naŋ cho veelu le bɔŋaŋ palɛi yaawo wa, apum cho hunɔɔ. O yɔŋ bɛɛ ma hiŋ kpou le, yɔŋgɔŋ naa le nda veeloo a dialuŋ fulaa huŋ a saŋgalaa o Chɛhowa lo nduyɛ miŋ wa kɛndɛi nduɛi tolɔɔ kɔɔli.—Chon. 145:3, 7, NW; Chɔɔmɔŋndo 22:17.
3. Vɛɛ naŋ ke yɛ niŋ waŋnda yaula veelaalaŋ ndaŋ?
3 Bɛnduaa kundaa o kundalaŋ niŋ nɔ ni ma kɛɛsiaa mɛɛ kundaa yɔŋgu niŋ waŋnda yaula veelaa laŋndaŋ o tanda ndaa niŋ yɛ. A nɔ ma kɛɛsiaa te o bɛnda pɛ le ma yɔŋgu laŋ ba o ba fee o wali pollo niŋ, ɔɔ ma mɛi o dio te a komal waŋndo o bɛɛ le. Te o bɛnda pɛ o lɔɔlaŋ mɛɛlulaŋ, ŋ yɔŋgu Bandu Mɛŋgɛlaa a “Tiondoo!” a yau veelaa latulu. Te Ndaama tasoo o paŋgei niŋ bii pɛ a teleŋ naŋ cho waŋnda veeloo wo, o wa le pɛɛkula Baabuilaŋ kandɔɔ le naŋ kindiŋ te, kɛ le nda yaula veelaalaŋ kioo. Te boondii veelɛi keŋ hiou pɛ, ŋ wa niŋ bɔɔ a nyaale le mɛɛ naŋ yɔŋguŋ le waŋnda veeloo a dialuŋ fulaa mi wanaa bɔɔbɔɔ huŋ miŋ sɔla pɛɛku sɔvɛɔ Chɛhowa o ba yɛ.