Tol Tamasi Wanaa Ndaa Suaa le Mɛlɛka wa Kɔɔli—Sɛfanaya
1. A boondii kuɛɛ Sɛfanaya ndoo wa yɛ wana suaa le Mɛlɛka wo? Nduyɛ, vɛɛ tamaselii ndɔɔ cho yɛ o kɛndɛ le naa hau?
1 A wɔsiŋ kɛmɛ le ŋɔmmɛu woŋ piɔuwo tɛɛŋ tuupa mi Chiisu vialuŋ, waŋnda Chuda, mɛlɛka lachoowaa Baal ndaa sooluu ni. Ndaa diiyɔ ko kinɛi Masa dɛnɛ wɔɔŋ pum diolaŋ Amɔŋ. Mɛɛ o vi, Chosaya pɔmbɔɔ wa niŋ Masaa ni. (Kol. Diiŋ Ndɔɔ 33:21–34:1, NW) A boondii keŋ Chɛhowa dimul Sɛfanaya ni le mbo dimul waŋnda yooŋgoo a paale ndɔ le kɔl tuuleŋ okɔɔ. Mi che bɛɛ Sɛfanaya wa waŋndo o pilɛ o chiɛi lemasaa niŋ Chuda, kɛ o vi ŋdial le masaa kaŋ yooŋgu Chɛhowaa dimullo a kaa wɔɔŋ nda wa choo wo le. (Sɛf. 1:1; 3:1-4, NW) Kɔl sikpa Sɛfanaya tosa hoo wo cho tamasi kɛndɔɔ le naa. Ŋ chɛl mi yuŋgu naa kuuna naa hɛnaŋ Chɛhowaa tosaa le. (Mat. 10:34-37) Yooŋgu yɛɛ Sɛfanaya ndoo dimullɛ waŋnda nduyɛ, yɛɛ wa yɛ fulamakɔɔlioo?
2. Yɛɛ naŋ tosa yɛ le miŋ sɔla kindaa o paale kɔl tuule Chɛhowaleŋ niŋ?
2 La Nuuviaa Chɛhowa, Chɛhowa koni tiuba ni mbo piŋi wana o paale ndɔ le kɔl tuuleŋ choo. Lelaŋ, mi Sɛfanaya dimul waŋnda Chuda maa o teleŋ lo hoo wo bɛŋgu, a nuuviaa Chɛhowa, a sandei, a tuisiŋndo. (Sɛf. 2:2, 3, NW) Lende koni icho hau ni. Maa Sɛfanaya, te ŋ wa pɛ waŋnda dɛɛniaa le ma nuuviaa Chɛhowa, naapila bɛɛ nɔ miŋ tosa nyɛ pilɛ koŋ kpe. Nduyɛ, miŋ sim o kala kpiŋ ŋ “feŋaŋ o nɛi Chɛhowaa choo le.” (Sɛf. 1:6, NW) Mɛɛ naŋ nuuviaa Chɛhowa yɛ cho ni, Baabuiyo pɛɛkoo nyɛkɛndɛi miŋ wa vɛlɛ piɛileŋ o ndu lo le mbo manda naa. Ŋ nuuviaa sandei te ŋ wa pɛ kaala kɛndɛlaŋ tosaa o yoomu naa niŋ. Ŋ nuuviaa tuisiŋndo te ŋ nɔ pɛ kaa diikaŋndo nduyɛ, miŋ wa lɔɔlɔɔ a bɛɛndiaŋ le nɛi chɔmaa kɔɔna Chɛhowaa tolɔɔ kɔɔli.
3. Le yɛɛ naŋ tiindaŋ yɛ maa waŋnda cho naa nilaŋ yaŋɔɔ o wali pollo niŋ?
3 Fulamakɔɔlila Kɛndɛlaŋ, Yooŋgu Sɛfanaya wa dimioo a kɔl tuu Chɛhowaa okɔɔ wo ve fondo fuu le. Mi waŋnda apum Chuda yaŋ ndu nilaŋ mɛɛ Chosaya wa naa yɛ. Chosaya ndoo ve wɔ o bɔɔ le mbo chɛl le Chɛhowa piɛiyo. O mɛɛlulaŋ, mi Chosaya sim lachi le piɛile ŋpiɔmndeŋ faŋaa o lɛŋnde leŋ niŋ. (Kol. Diiŋ Ndɔɔ 34:2-5, NW) O hau niŋ, mi kulloŋ ŋpum del o nɛiyo daŋgala, ŋpum o lɛŋnde bandilaleŋ choo, ŋpum o lɛŋnde ŋyɔleŋ tɛɛŋ, kɛ, mi ŋpum del o lɛŋnde kɛndɛleŋ choo miŋ kom. (Mat. 13:18-23) Ŋ tiindaŋndo maa Chɛhowa cho hiouwɔɔ lachi a naa salaa dɔuwɔɔ le sɛmbɛ naŋ cho dɔuwɔɔ le yooŋgu kɛndɛ leMasaa dimioo wo.—Chon. 126:6, NW.
4. Le yɛɛ naŋ kɛsiŋ yɛ o kɔl maa paale Chɛhowaleŋ le nɔ le hunɔɔ?
4 Waŋnda apum Chuda ndaa yiyaŋ ko maa paale kɔl tuule Chɛhowaleŋ le ve hunɔɔ le. Kɛ mi Chɛhowa chɔm waŋnda kpendekele maa paale ndɔ le bɛŋndeŋ le wa niŋ kpɛɛluŋ. (Sɛf. 1:12, 14, NW) Wanaa siiŋguu Chɛhowa maa naa ndaa viaŋnaŋ nda koni sɔla niŋ kindaa ni. (Sɛf. 3:12, 17, NW) Mɛɛ naŋ cho paale Chɛhowaleŋ chumndo yɛ, ŋ hiounuŋ lachi a Chɛhowa piɛiyo o diompilɛ niŋ naa chaaŋaa naa laalaŋnda chieeŋndo balɔɔ silɔ.—Sɛf. 3:8, 9, NW.