Soliŋ jw.org Kpeku o Wali Pollo Niŋ—“Simnuŋ Chaaŋ O Chɛhowa”

Fondaŋ “Pɛɛkula Baabuiyo” cho jw.org mbo nɔ nyɛm cho ŋ holaŋndoŋ le chuaambuaa ma veelu ndu aa, “Simnuŋ Chaaŋ O Chɛhowa”. Fondɛi hei nɔ chondoŋ, vidueilaŋ a sɔɔŋ nda tosa woŋ. A soliŋ niŋ pa fondɛi hei kpeku o woli pollo niŋ? Te a cho pɛ pɛɛku Baabuiyo tosaa a kala chua nɔ chuaambuaa wo, o bɛnda ma chɔm nda ndu. Naapum hei mala ndu le mbo tofa fondaŋnda cheleŋ o tɛɛŋgii nɛi.

Teleŋ naŋ wa Baa Waŋvilɛiya Miiŋgu lɛ niŋ Pa Yoomu? waŋnda kioo wo, mi puaapilɛnɔ pilɛ komal chuaa mbo ke ndu yauwo hoo okoŋ, mi chuaa kandu bɛɛ diomndaŋ veeloo leniŋ. Ndoo nɔ chuaambuaa pɔmbuaa chalaŋ a ndaa yeema sinaa nyɛ cho o yau koŋ niŋndo. Mi puaapilɛnɔɔ yaasiaa sɔɔŋ lebolloŋ o yau koŋ niŋ le teleŋ biŋgi okoŋ, mbo chɔmnda naa wana saaluŋ tɛɛŋgii nɛi ya o yau koŋ kɔɔ. Le yeemɛi chuaa chɔmnde, mbo chɔm ndu a chuauwaa nduaa viduei Kɛtɔɔ o hivi niŋ o nyɛ ndɔ mapuuloo choo wo.

Mi ndepilɛnɔɔ dimul chaŋ ndɔ nda tosa baalaa wo a yooŋgula cho o tɛɛŋgii nɛi le yuŋgulaŋ ndaŋ nduyɛ chaŋ ndɔɔ hoo nɔ chuauwa. Mi chaŋ ndɔ kɔ tofa o tɛɛŋgei hei a chuaa nduaa latulu. Okoŋ kɔɔli, mi chuaa dimul ndepilɛnɔɔ maa chuauwaa nduaa wa chiɛiyo balɔɔ a chondei hei solioo, “Preach the Word” (Prêche la parole), chondei i pilɛ o chonduŋ cho o pɛllo hoo bɛŋgu woŋ, “Simnuŋ Chaaŋ O Chɛhowa.”

Kindiŋ ma sina nyɛm cho ŋ holaa o jw.org woŋ, nduyɛ ma hivi o yɔŋ bɛɛ chondei i pilɛ, vidueiyo, ɔɔ sɔɔŋ nda tosa woŋ o nyɛ num mapuuloo choo. Koŋ chɔm kɛsɛ maa a cho o bɛɛndiaŋ le pɛl cho hoo jw.org wo soliŋndo kpeku o wali pollo niŋ. O cho bɔɔ nyɛ wali kɛndɛ le naa malaa miŋ hiou lachi le waa chiaa le Masanɔɔ Chiisu!—Walta Wanaa Chiisuaa 20:19.