Mala Wanaa Sumɛiya Ma Pɛɛku A Chɛhowa Okɔɔ

1. Vɛɛ Chiisu chɔm yɛ wanaa sumɛiya nyɛiye?

¹ Ndoo lo niŋ palɛi nyɛɛmbɔ mi Chiisu ndoo sɔla piɔmndo. Mɛɛ o wa faŋaŋndo Chɛliko chiee, mi puaa sumɛiya a ŋiɔɔŋ deŋi choo choo kpeleŋ aa, “Num Po Masaa Deevioo, tuinuŋ naa inyɛɛ fɔ.” Mi che bɛɛ naa Chiisu wa yiyaŋndo a simul kala kala wa ndu lachi wo, kɛ mbo sim, okoŋ mbo veelu nda nduyɛ, mbo siŋgi nda. (Mat. 20:29-34) Vɛɛ naŋ tuallɛ tamasi Chiisu wo kɔɔli le wanaa sumɛiya nyɛiye chɔmndo?

2. Yɛɛ naŋ nɔ yɛ miŋ kɛsiŋ o kɔl te ŋ wa pɛ wana sumɛiyo malaa?

² Wa Wana Malaa. Te o yɔŋ pɛ ma komal wana sumɛiyo, naapum o fondaŋ waŋnda cho tau wo, chɔm ndu diola numndaŋ ma dimul ndu maa a yeema ma mala ndu. Mɛɛ waŋnda apum chi wanaa sumɛiya wanaa sɔvɛ le yɛ, mi buulaŋndo wa wana sumɛiyo tiŋ o tasela ndɔɔ. Kɛ a koŋ kpou, kaa ichaŋya ŋ cho ndu chɔmndo vɛlɛ a yeemɛi ŋ cho chɔm o ndu niŋndo cho ndu tosa mbo naŋ kɔl. Kɛsiŋ o kɔl maa sumaa cho a suu laŋ yɛ yɛ. Hei sinaa mala num ma sina mala suu wana koŋ yeema wo. Te a chii pɛ ndu mala, naapum a dimul ndu maa wali dimiaa yooŋgu kɛndɔɔ o Baabuiyo niŋ ŋ tosa ni. A nuel ndu bolle Baabuileŋ mɛɛ Chondei 146:8 ɔɔ Aisaya 35:5, 6 cho naa yɛ. Te o chaa pɛ diomndaŋ veeloo o yaula wanaa sumɛiya niŋ, nyuna ndu te o yeema pɛ ma chuu ndu yaula wanaa sumɛiya, la mala ndu mbo chɔɔlu sina a Baabuiyo okɔɔ wo. A kua vɛlɛ jw.org ma chua diomnda waŋnda suaa ma yaŋ nilaŋndo le ndu malaa. Te kɔmpitɛɛ (ɔdinatɛɛl) ndɔɔ nɔ pɛ nyɛ veelu diomnda poonyiaala wa fulaa o tofaŋ kɔmpitɛiyo choo wo, a kua jw.org ma hivi yaula cho o fondaa hoo laŋ ma veelu ndu o puuluei niŋ aa, RTF (Rich Text Format, format RTF). Nduyɛ, o naŋ kɔl tau le ndu yaula suu waa naa chuu wo.—Tofa kɔfoo hoo, “Te a Wa Wana Sumɛiyo Malaa Pɛ . . .”

3. Vɛɛ naŋ nuuviaa yɛ wanaa sumɛiya o tanda naa niŋ?

³ Nuuviaa Wanaa Sumɛiya. Naapum lepilɛŋ koni naŋ komal wanaa sumɛiya o wali pollo niŋ chiɛiyo a chiɛiyo o bɛɛla ndalaŋ ni. Kanifuule, a bɔɔbɔɔ hini kɔl le suukaŋndo a mialaa huŋ o ndalo bɛɛ wa le. Le hei, mɛɛ miŋ kindiŋ kpoke le nda “nuuviaa” halikpeŋ miŋ dimul nda yooŋgu kɛndɔɔ. (Mat. 10:11) Baa a nɔ pa chaaŋ num nya tosa wallo ɔɔ o nya kua o sukuuwo mbo wa o sumɛi? Kindiŋ ma kandu suɛi o ndulo. Te tanda nyaa nɔ pɛ sukuu wanaa sumɛiya, ke nda yaula naala cho le wanaa sumɛiya laŋ ma kɛsi o fondaŋ nda kɛsi yaula ndalaŋ ndo. A sina pa wana nɔ wana sumɛiyo o yuŋgu ndɔɔ niŋndo? Baa kɔɔnala yɔŋgu malaa le wanaa sumɛiya wa ɔɔ chiɛilaŋ nda teŋgullo wo cho pa o tanda nyaa niŋ? Dimul wana ndɔɔ, wana cho wanaa cho luɛiyɔɔ chiɛiniŋ nda fondaa chɔmnd wo, vɛlɛ a wana cho nda boleŋndo maa Seiyaa Chɛhowaa cho bɔɔ a yeemɛi le wanaa sumɛiya malaa. Dimul ndu maa a cho hunɔɔ a yaula naala cho le wanaa sumɛiya wa vɛlɛ a diomnda nda chua niŋ o kasɛtiiyo choo le nilaŋ yaŋɔɔ wo ma huŋ ke nda. Chɔm ndu nyɛ Baabuiyo dimi wo maa o lo niŋ chobe mi Mɛlɛka huŋ faŋa sumaa lefafɛɛŋ. Naapum a chɔm ndu vɛlɛ vidueiyo jw.org o puuluei niŋ aa, “Without It, I Would Feel Lost” (“Sans elle, je serais perdu”). Vidueiyo hoo cho suɛi yɔŋnaŋnde chɔmndo mɛɛ finya sumɛi pilɛ sɔla tɔnɔɔ o Baabui wanaa sumɛiya niŋ yɛ. Te a chɔm pɛ sabu ŋ kuɛ loŋndo, koŋ tosa naapum ma chɛl num ma kɔ soo o wanaa sumɛiya lo.

4. Yɛɛ tamasi Chanɛt wo pɛɛku yɛ naa?

⁴ Mɛɛ ndepilɛnɔ sumɛi pilɛ diolaŋ aa Chanɛt kuɛ o chiɛi wanaa sumɛiya cho niŋndo, mbo kandu suukaŋndo a chua laandu pilɛ. Mbo dimul ndu aa, “Mi Chiisu siŋgi wanaa sumɛiya le chɔmndo nyɛ o cho hunɔɔ tosa le wanaa sumɛiya kpou wo.” Ma yaasisaa Sɔɔŋ Chɔɔmaŋndoŋ 21:3, 4 latulu nduyɛ mi Chanɛt tɛɛsial ndu mɛɛ hei yɔŋnuŋ niŋ o Masale Mɛlɛkaleŋ bɛŋgu yɛ. Mi chuaa mei tiŋ kpɛɛ mbo dimi aa, “Kani bɛɛ I tuiyɔ wana sumɛiyo suɛi waa naa dimioo le. Wanaa cha wa a bɔɔbɔɔ nɔ laalaŋndo maa waŋnda suma fondole kanifuule, isɔɔ ndapila tosa ni ɔɔ finyaa ndaa mamaa.” Mi Chanɛt chɔm chuaa hoo naa o kua mbo saaluŋ yau Pɛɛku Baabuiyo o intanɛtiiyo choo wa nduyɛ a cho niŋ Baabuiyo pɛɛkoo latulu lediiŋ o lɔɔ tɛɛŋ.

5. Mi che bɛɛ ŋ nɔla miŋ siŋgi wanaa sumɛiya maa Chiisu le, kɛ fulamakɔɔli yɛɛ yɔŋnuŋ yɛ te ŋ chɔm pɛ yeemɛi o nda niŋ?

⁵ O dimi niŋ, ŋ tiuba miŋ siŋgi wanaa sumɛiya mɛɛ Chiisu ndu siŋgi nda yɛ le. Kɛ ŋ tiuba miŋ mala wanaa mɛlɛka chieeŋndo hoo suumiaa kɔltaŋ nda vɛlɛ a wanaa suma kpeekpeiya, le ma sina tonya cho o Diom Mɛlɛkaa niŋndo. (Kɔl. Diiŋ Ndɔɔ 4:4) Mi Chiisu siŋgi wanaa sumɛiya a ŋiɔɔŋ Chɛliko ikɛi kanifuule, nyɛiye o tuinuŋ nda ni. (Mat. 20:34) Te naa bɛɛ chɔm pɛ yeemɛi waa lende o wanaa sumɛiya niŋ, ŋ tuɛi dikeŋnuŋ naa wo yeela le atiŋ malaa ma pɛɛku a Chɛhowa okɔɔ, wana cho hunɔɔ sumaa chii lefafɛɛŋndo.