Kɔfu Nyunaa

◼ Baa o bɛnda pa mi wanaa dimiaa yooŋgu kɛndiaa soliŋ Intanɛtiiyo kpeku lɔɔlɔɔ le wanaa nda sina le wa o lɛŋii cheleŋ niŋ yooŋgu kɛndɔɔ dimullo vɛlɛ a nda Baabuiyo pɛɛkoo?

Wanaa dimiaa yooŋgu kɛndiaa pum soliŋ niŋ Intanɛtiiyo kpeku le pɛɛkula Baabuilaŋ sɔlaa o lɛŋii nda kuuna wali naa dimiaa yooŋgu kɛndɔɔ ve niŋ ɔɔ naa wanaa dimiaa yooŋgu kɛndiaa cho a bɔɔ le wa. Lepum, mbo hiŋ a fulamakɔɔli kɛndɔɔ. Kɛ o wa bɛɛ lende, kpundɔɔ wa leniŋ te o yɔŋ pɛ mi wanaa dimiaa yooŋgu kɛndiaa lambaŋ poonyiaŋndo vellaa velle ɔɔ suukaŋndo a wanaa nda sina le wa o Intanɛtiiyo choo. (Tofa Yau Wali Naa leMasaa Suɛɛsɔɔ 2007 p. 3, o puuluei niŋ.) Yeemɛi nɛi cho le mi yooŋgu kɛndɛ leMasa Mɛlɛkaa komal wanaa yeema Chɛhowa piɛiyo wa ni. Kɛ naapum suukaŋndo o Intanɛtiiyo choo tosa mi puaapilɛnɔɔ ɔɔ ndepilɛnɔɔ kandu holiaŋ wɔɔŋndo vɛlɛ a wanaa kɛɛ tonyaa wa. (1 Kɔliŋ. 1:19-25; Kolo. 2:8) Le handɔɔ lechoo, o lɛŋii nda kuuna wali naa dimiaa yooŋgu kɛndɔɔ ve niŋ, suukaŋ kɛ kɛ tosaŋ o Intanɛtiiyo choo, mi masaa waa wa ndu hɔlteŋ kɔɔli. Nduyɛ hei tosa mi puaapilla a ndepiliaa cho o lɛŋnde leŋ niŋnda luɛi o kpundɔɔ niŋ. Lelaŋ, wanaa dimiaa yooŋgu kɛndiaa soliŋ Intanɛtiiyo kpeku le waŋnda nuuviaa o lɛŋnde cheleŋ niŋ le nda yooŋgu kɛndɔɔ dimullo le.

Mɛɛ dɔɔ mi lɛuvii cho o lɛŋnde leŋ niŋndo nɔ kɛɛsiaa cheleŋ, kɛ te ŋ dimul pɛ wana fula o lɛŋnde cheleŋ niŋndo yooŋgu kɛndɔɔ o baltaŋ niŋ, ŋ chum mbo miiŋguŋ o ndulo malaŋ naŋ chaŋ nɛilaŋ nuuviaa le mbo chɔɔlu yeemɛi nɔ le. Kɛ ŋ chɔm ndu mɛɛ o soliŋ jw.org kpeku le yooŋgula cheleŋ chɔɔloo sinaa yɛ ɔɔ mɛɛ o looku mbo saaluŋ lɛuvii lɛŋnde leŋ le cho o ba bɛŋgu ve. Ŋ dɛɛniaa ndu vɛlɛ le mbo kuɛ o Toŋgo leMasa Seiyaa Chɛhowaa cho ndu ikɛiyo. Toŋgola leMasa Seiyaa Chɛhowaa la cho o lɛŋnde ipum niŋ te. Te o yeema pɛ mi Seiyaa Chɛhowaa cho o lɛŋnde ndɔleŋ niŋnda komal ndu, ŋ poonyiaa o yauwo hoo choo o puuluei niŋ aa, Please Follow Up (Veuillez suivre l’intérêt) (S-43) miŋ ke wana poonyiaa o kundaa niŋ. Wana poonyiaa soliŋ kpeku a naa “Kundaa” yɔŋ yooŋgulaŋ o jw.org niŋnda mbo yɔŋ yooŋgu koŋ. Lɛuvii Seiyaa Chɛhowaa cho hɔlteŋ lɛŋnde wana chɔm hoo yeemɛiyo cho niŋndo sina simulta cho loŋ ndaŋ. Lɛuvii keŋ tiuba le wana koŋ malaa mbo piɛi Chɛhowa.—Tofa Yau Wali Naa leMasaa Suɛɛsɔɔ 2014 p. 7, a Yau Wali Naa leMasaa Bɛŋgufɔnɔɔ 2011 p. 2, o puuluei niŋ.

Te wana naŋ cho Baabuiyo pɛɛkoo suŋ suŋndo kuɛŋ pɛ o lɛŋnde cheleŋ niŋ, ɔɔ miŋ wa wana cho o lɛŋnde cheleŋ niŋndo Baabuiyo pɛɛkoo suŋsuŋ kɛ ŋ sina ndu le mɛɛ o Intanɛtiiyo choo kinɛi, o bɛnda miŋ tol kɛɛsiaala cho laŋ amaluaŋ ndaŋ kɔɔli. Kɛ o wa bɛɛ lende, ŋ hiau lachi a wana koŋ dɛɛniaa le yeemɛi nduɛi chɔɔloo haaa mi wana cho o lɛŋnde leŋ niŋndo komal ndu. O baa pilɔɔ choo, te waŋndo wa pɛ o lɛŋnde nda kuuna wali naa dimiaa yooŋgu kɛndɔɔ wo niŋ, ŋ nɔ miŋ wa yekeŋ te ŋ wa pɛ suɛi a sɔɔŋ Baabuiyo o yau poonyiaa niŋ, o foŋndo choo, ɔɔ o Intanɛtiiyo choo.—Maa. 10:16.