Hiouwɔɔ Lachioo Tosaa o Wali Pollo Niŋ—Pɛɛku Wanaa ŋ cho Baabuiyo Pɛɛkoo Wa ma Nɔ Kaa Pɛɛkaa Kɛndɔɔ

Le yɛɛ Hei Bɛnda Yɛ? Le mi wanaa naŋ cho Baabuiyo pɛɛkoo wa simnuŋ a kala poŋ o Chɛhowa piɛiyo niŋ, a nɔ ma wa pɛɛkoo lɔɔlɔɔ a Mɛlɛka okɔɔ, o cho ko sɔɔŋ tase nda pɛɛku o Diom Mɛlɛkaa niŋndoŋ te. (Hibu. 5:12–6:1) Sɛmbɔɔ yeemaŋ ni le pɛɛkoo. Le hei tosaa sɔɔŋ sɛnɛiyoŋ pɛɛkoo a nyɛ naŋ sina niŋndo okɔɔ vɛlɛ a yiyaŋndo mɛɛ wana soliŋ muŋ kpeku yɛ. (Pulɔ. 2:1-6) Chɔm wanaa naŋ cho Baabuiyo pɛɛkoo wa mɛɛ nda soliŋ yaula naala leKilisɔŋndaŋ kpeku le yaasiaa tosaa le nyunala Baabuiyo mulioo yɛ. Sɛmbɛ nda cho wou le nyɛ nda pɛɛku wo dɔuwɔɔ o wali niŋndo cho nda mala ma simul tɔɔndaŋnda komal niŋ nda o Chɛhowa piɛiyo niŋndaŋ.—Luku 6:47, 48.

Vɛɛ ŋ Tosa yɛ Hei?

Kindila sabu o bɛnda le Chɛhowa nyunaa le malaa o piɛileŋ niŋ tuupa mi la kandu pɛɛku kɛ kɛ tosaa wo.—Chɔŋ 14:26; 1 Kɔliŋ. 2:10.
Te a kandu waŋndo pɛɛkoo pɛ, dɛɛniaa ndu mbo bɛɛndiaa fondaŋ ŋ nɔ le ndu hunɔɔ pɛɛkoo wo tuupa ma hiŋ le pɛɛkoo. Chɔm ndu yau numndo nduyɛ ma pɛɛku ndu mɛɛ o keeku pulaleŋ o mulilaŋ bɛŋgu ɔɔ o sɔɔŋ kuluŋ cho o yauwo niŋndoŋ yɛ.
Dimul wana ŋ cho Baabuiyo pɛɛkoo wo mbo muli nyunaa mɛɛ o bii ndu bila yɛ. Pɛɛku nyaa wa ko te num nyuna pɛ nyunala cho o yauwo niŋndaŋ, ndu veelu diomndaŋ tulumasaa le mulioo mɛɛ la cho o yauwo niŋ yɛ le.
Dɛɛniaa wana ŋ cho pɛɛkoo wo mbo wa diomndaŋ veeloo o Baabuiyo niŋ lɔɔlɔɔ. Chɔm ndu kɛɛsiaa cho jw.org le diomndaŋ veeloo o Baabuiyo niŋndo. Kɛɛsiaa hoo chɔm nɛi tɛtɛlɛ o tosa heiyo. Le mi waŋndo nɔ kaa le diomndaŋ veeloo lɔɔlɔɔ o Baabuiyo niŋ, mɛɛ mi i wa ndu o kɔl le keŋ tosaa. Nduyɛ o cho fulamakɔɔli kɛndɔɔ sɔla tau.—Sam 1:2, 3.
Chɔm wana ŋ cho pɛɛkoo wo mɛɛ o soliŋ Naa Kɔɔna Seiyaa Chɛhowaa KƐSI Yaulaŋnda ɔɔ Naa Kɔɔna Seiyaa Chɛhowaa KƐSI YAULAŊ O INTANƐITIIYO Choo Wa kpeku le nyunala Baabuiyo mulioo yɛ. Chɔm ndu chomulta sim le yau kɛ kɛ fee naŋ soliŋ kpeku o bɔŋaŋnda naala leKilisiɔŋndaŋ ndo.

Kindiŋ Ma Tosa Hei o Paŋgei Hei Niŋ.

Te la chii suɛi lebol kɛ kɛ pɛɛku pɛ ɔɔ buŋgɛi, nyuna wana ŋ cho pɛɛkoo wo mbo miŋgi sondoo kei chobe o nyɛ o laŋga chii pɛɛku wo choo. Te a nɔ wana ŋ pɛɛku le, pɛɛku le sondoo keiyo chobe o buŋgɛi ŋ pɛɛku o Baabuiyo niŋndo ɔɔ Bandu Mɛŋgɛlaa le hiouwɔɔ lachioo tosaa a diomnda ŋ cho veeloo laŋ bila biyɔɔ.