Ŋ WAŊNUŊ MAA ŊKILISIƆŊ
Nɛɛ Waa Cho yɛ Chaaŋaa Numnda o Intanɛtiiyo Choo?
Chaŋyɛi cho ni, “sɔɔŋgaŋndo ikɛi kpɛɛluŋ, mi la nɔ kaalaa, vɛlɛ a bɛɛleŋ nyapila tɛɛŋ.” Le tamaseliiyo, mi chaŋyɛi kala kalɛi luɛi Chonataŋ nda Deeve tɛɛŋ, mɛɛ Deeve dii Koolaya. (1Sa 18:1) Mi suliŋnda numnda kɛndɛlaŋ la tosa, mi waŋndo yeema le mbo wa chaaŋ num. Lelaŋ, chaŋyɛi kala kalɛi tɔlnuŋ o nyɛ ŋ sina a waŋndo okɔɔ wo choo. Le waŋndo sinaa nyɛkɛndɛi, teleŋndo a sɛmbɔɔ yeemaŋ tau ni. Kɛ, mi wa tɛtɛlɛ le ma sɔla “chaŋyɛi” o intanɛtiiyo choo. Kanifuule o intanɛtiiyo choo, mi waŋnda apum kɛɛsiaa le sɔɔŋ waŋnda sina a nda okɔɔ le woŋ dimioo. Ma tosa hei le halikpeŋ ma hɛnaŋ a nda. Mi hei wa tɛtɛlɛ le ma veŋ kaala ndala wɔɔŋndaŋ. Lelaŋ, i cho suɛi sɔvɛ le ma ‘yiyaŋ nyɛkɛndɛi’ tuupa ma bii chaŋyɛi o intanɛtiiyo choo. Te waŋndo yeema pɛ simnɔŋndo chaaŋ num o intanɛtiiyo choo, nɔ isiooŋ le ndu kiɔɔ le mbo wa chaaŋ num te. Le kpundɛlaŋ kpakpalaa, mi apum kɛɛsiaa ma a cho intanɛtiiyo soliŋ kpeku kposoŋ te. Kɛ yɛɛ ŋ nɔ yɛ ma kɛsiŋ o kɔl te a yeema pɛ intanɛtiiyo soliŋndo kpeku?
LA TOFA VIDUEIYO HOO, TOSA SUUKAŊNDO O INTANƐTIIYO CHOO A TAASI, OKOŊ MI LA MULI NYUNALAŊ NDAŊ:
Yɛɛ ŋ nɔ yɛ ma kɛsiŋ o kɔl te a wa pɛ suɛi a numpila okɔɔ, ɔɔ fotueilaŋ heeloo o intanɛtiiyo choo?
Le yɛɛ ŋ nɔ yɛ ma hɛli chaŋyaŋ numndo o intanɛtiiyo choo a taasi?
Le yɛɛ ŋ nɔ yɛ ma kɛsi kpeleŋndaŋ a mɛɛ kpɛ ŋ nɔ ma soliŋ intanɛtiiyo kpeku yɛ?—Ɛfi 5:15, 16.