Vɛɛ Diomndaŋ Veeloo o Baabuiyo Niŋ Mala yɛ Naa Miŋ wa Wanaa Biuwaŋ?

1. Sɔɔŋ kuɛɛ tɛɛmbuu yɛ lepum wanaa Chɛhowaa kɔllo?

BAA suɛi tɛɛmbuu num kɔllo tau ve komal num niŋ pa? Le taamaseliiyo, lepum mi waŋndo pilaŋ num tana o kundaa niŋ. (Chemi. 3:​2) Ɔɔ lepum, mi chaaŋaa num aa nya kua o sukuuwa ɔɔ wanaa nya tosa wallo latulu wa, wa num mamɔɔ le mɛɛ ŋ cho Chɛhowa piɛiyo yɛ. (1 Pitɛ 4:​3, 4) Ɔɔ naapum, mi wanaa nya cho o yuŋgoo niŋnda wa kindiŋndo le num kuunaa kɔlaŋ o bɔŋaŋndaŋ ɔɔ le acheleŋnda dimullo a laalaŋ numndo okɔɔ. (Maa. 10:​35, 36) Te sɔɔŋ waa naa hiu naa pɛ ŋɔwɔɔ, miŋ yiyaŋ maa o bɛnda lɛ miŋ hiou lachi a Chɛhowa piɛiyo le. Kɛ nɔ tiindaŋndo maa mɛɛ mɛɛ sɔɔŋ palaŋ komal num, Chɛhowa cho num taasioo ke le muŋ biyɔɔ o nɛi bɛnda wo choo, nduyɛ mbo luei num yoomuaŋ le ma biuŋ.

2. A mɛɛ Luomaŋnda 15:​4 dimi yɛ, vɛɛ diomndaŋ veeloo o Baabuiyo niŋ mala yɛ naa?

² Mi Chɛhowa tosa a sabu ma poonyiaa taamaseliilaŋ o Baabuiyo niŋ a wanaa biuŋ tɔɔndaŋndaŋ nda okɔɔ, mi che bɛɛ a ve walaŋ te. Le yɛɛ? Le halikpeŋ miŋ pɛɛku o taamaseliila ndalaŋ niŋ. Le sabu koŋ Chɛhowa tosa ni mi Pɔɔl poonyiaa diomnda cho o Luomaŋnda 15:​4 niŋndaŋ. [Nuawɔ.] Te ŋ veelu pɛ diomndaŋ a taamaseliilaŋ ndaŋ okɔɔ, koŋ mala naa miŋ sɔla kɔl dɛɛniaa, nduyɛ miŋ nɔ tiindaŋndo. Kɛ le miŋ sɔla tɔnɔɔ, o cho ko diomndaŋ te naŋ nɔ miŋ veelu o Baabuiyo niŋ te. Ŋ nɔ miŋ chɛl le mi nyɛ naŋ veelu diomndaŋ choo wo piiliaŋ yiyaŋ naa a yeemaŋ naŋ. Le taamaseliiyo, yɛɛ ŋ nɔ yɛ ma tosa te kpɔkɔsioo komal num pɛ? Nɛila hiɔɔlu laŋ ndaŋ la mala num ni. (1) Piɛileŋ, (2) Tuuwɔ mɛɛ bundɛi ŋ veelu diomndaŋ nde yɔŋnuŋ yɛ, (3) Yiyaŋndo, nduyɛ (4) Dɔu nyɛ ŋ pɛɛku wo o wali niŋ. Ŋ yaasiaŋndɔ miŋ che mɛɛ nɛila hiɔɔlu laŋ ndaŋ o kɛ kɛ mala naa yɛ.b Nɛila hiɔɔlu laŋ ndaŋ la cho naa mala miŋ che nyɛ naŋ pɛɛku o taamasi Masaa Deeve wo niŋ a Pɔɔl wana Chiisu vem hɔlte ndɔ.

3. Tuupa ma kandu diomndaŋ veeloo o Baabuiyo niŋ, yɛɛ ŋ nɔ yɛ ma tosa, nduyɛ le yɛɛ?

³ (1) Piɛileŋ. Tuupa ma kandu diomndaŋ veeloo o Baabuiyo niŋ, nyuna Chɛhowa le mbo mala num, ma che mɛɛ ŋ sɔla tɔnɔɔ o nyɛ ŋ cho diomndaŋ veelu wo niŋ yɛ. Le taamaseliiyo, te bahawɛiyo komal num pɛ, a nyuna Chɛhowa le mbo mala num ma saaluŋ sawala mandaalaŋ o Baabuiyo niŋ, la mala num ma tosa kɛɛsiaa kɛndɔɔ wo.—Filipi. 4:​6, 7; Chemi. 1:​5.

4. Yɛɛ mala yɛ naa miŋ bii taamaseliila cho o Baabuiyo niŋndaŋ bila?

⁴ (2) Tuuwɔ mɛɛ bundɛi ŋ veelu diomndaŋ nde yɔŋnuŋ yɛ. Chɛhowa ke naa kpou taasioo, le miŋ tuu mɛɛ sɔɔŋ yɔŋnuŋ yɛ. Hei mala naa miŋ bii taamaseliila cho o Baabuiyo niŋndaŋ bila. Lelaŋ, te ŋ wa pɛ diomndaŋ veeloo a waŋndo okɔɔ o Baabuiyo niŋ, ŋ nɔ miŋ tuu mɛɛ sɔɔŋ yɔŋnuŋ ndu yɛ, nduyɛ miŋ dɔu naapila o foofo ndɔɔ. Ŋ nɔ miŋ kindiŋ le chɔɔ sɔɔŋ o wa chɔɔ a teleŋ koŋ ndo, nduyɛ a mɛɛ o wa sinaŋndo yɛ.

5. Yɛɛ cho yɛ yiyaŋndo, nduyɛ vɛɛ naŋ tosa yɛ hei?

⁵ (3) Yiyaŋndo. Yiyaŋndo cho nyɛ ŋ veelu diomndaŋndo biyɔɔ bila, nduyɛ ma che mɛɛ o piiliaŋ num yɛ ni. Te o yɔŋ pɛ aa a waŋndo okɔɔ ŋ cho diomndaŋ veeloo ni, yiyaŋndo mala num ma dɔu sɔɔŋ yɛ yɛŋ dimiŋ a ndu okɔɔ woŋ diompilɛ, le ma bii bundɛi nduɛi bila nyɛkɛndɛi. Te ŋ veelu pɛ diomndaŋ o Baabuiyo niŋ miŋ yiyaŋ lechoo le, mɛɛ i wa ko mɛɛ wana suandu nyɛlaŋ ndo kili kili nuaa kolaa mbo kɛɛ le ndu dɔwɔɔ diompilɛ yɛ. Kɛ te ŋ yiyaŋ pɛ o nyɛ naŋ veelu diomndaŋndo choo, o wa ko mɛɛ wana kili kili koŋ kolaa wo duau ndu diompilɛ, le mbo sɔndu nyɛ o yeema wo yɛ. Le hei tosaa, a kindiŋ le mulilaŋ sɔlaa le nyunalaŋ ndaŋ: ‘Yɛɛ wana bundɛi hei soo a ndu okɔɔ wo tosa yɛ le bahawɛi komal ndu wo solioo? Vɛɛ Chɛhowa mala yɛ ndu? Vɛɛ nyɛ ya pɛɛku o bundɛi hei niŋndo mala yɛ ya mi biuŋ tɔɔndaŋndaŋ?’

6. Le yɛɛ naŋ nɔ yɛ miŋ dɔu nyɛ naŋ pɛɛku wo o wali niŋ?

⁶ (4) Dɔu nyɛ ŋ pɛɛku wo o wali niŋ. Mi Chiisu dimi maa, te ŋ kɛɛ pɛ nyɛ naŋ pɛɛku wo dɔwɔɔ o wali niŋ, mɛɛ ŋ cho ko maa po taŋgul chiɛi ndɔɔ o siooŋnde choo wo. Mi poo hoo tosa wallo kalaŋ le chiɛi ndɔɔ taŋgullo, kɛ mi saŋga ndɔɔ lo o peelo. Le yɛɛ? Kanifuule, mɛɛ mɛŋndaŋ ma hiŋ tau, nduyɛ mi hueiye hɔŋ hɔŋndo pila, mi chiɛi kalaa komba wɔlɔwɔlɔ. (Maa. 7:​24-27) O nɛi pilɛ koŋ choo, o yɔŋ bɛɛ miŋ piɛi, miŋ tuu mɛɛ bundɛi naŋ veelu diomndaŋ nde yɔŋnuŋ yɛ, nduyɛ miŋ yiyaŋ lechoo, kɛ te ŋ dou nyɛ naŋ pɛɛku wo o wali niŋ te, mɛɛ saŋga naa bɛɛ lo o peelo. Te bahawɛilaŋ ɔɔ sɔɔŋ kindilaŋ komal naa pɛ, mi tiindaŋ naa yɔŋnuŋ pɔmbɔlɔsɔɔ. Kɛ o baa pilɔɔ choo, te ŋ pɛɛku pɛ nduyɛ miŋ dɔu nyɛ naŋ pɛɛku wo o wali niŋ, koŋ cho naa mala miŋ tosa kɛɛsiaala kɛndɛlaŋ, miŋ nɔ kɔl nyuloo, nduyɛ mi tiindaŋ naa kendu poŋ. (Aisaya 48:​17, 18) Ŋ soliŋ ndɔ nɛila hiɔɔlula naŋ yaasiaa laŋ ndaŋ kpeku, miŋ che nyɛ naŋ pɛɛku o taamasi Masaa Deeve wo niŋndo.

YƐƐ NAŊ PƐƐKU YƐ O TAAMASI MASAA DEEVE WO NIŊ?

7. A taamasi nɛɛnɛ okɔɔ naŋ cho yɛ hunɔɔ yaasiaa?

⁷ Baa chaaŋ num ɔɔ wana nya cho o yuŋgoo niŋndo tɛɛmbuu num niŋ pa kɔllo? Te lende i cho ni, mɛɛ a tiuba ma pɛɛku tau o nyɛ Masaa Deeve tosa wo niŋ, mɛɛ po ndɔɔ Abisalɔm tɛɛmbuu ndu kɔl, nduyɛ mbo wa kindiŋndo le mbo simnuŋ masaa.—2 Saam. 15:​5-14, 31; 18:​6-14.

8. Yɛɛ ŋ nɔ yɛ ma tosa le mi Chɛhowa mala num?

⁸ (1) Piɛileŋ. Te o yɔŋ pɛ mi waŋndo tɛɛmbuu num kɔl nduyɛ ma veelu diomndaŋ o Baabuiyo niŋ a suɛi waa lende okɔɔ, dimul Chɛhowa mɛɛ ŋ cho sinaŋndo yɛ. (Sam 6:​6-9) Dimul Chɛhowa nyɛ kpeekpei tɛɛmbuu num kɔllo wo, nduyɛ ma nyuna ndu mbo mala num ma che sawala mandaala Baabuiyo, la mala num ma sina nyɛ ŋ nɔ ma tosa o suɛi keŋ niŋndo.

9. Yɛɛ ndoo yɔŋnuŋ yɛ Deeve nda Abisalɔm tɛɛŋ?

⁹ (2) Tuuwɔ mɛɛ bundɛi ŋ veelu diomndaŋ nde yɔŋnuŋ yɛ. Yiyaŋndɔ a sɔɔŋ yɔŋnuŋ Masaa Deeve woŋ okɔɔ, nduyɛ ma che mɛɛ ŋ piiliaŋ ndu yɛ. Mi Abisalɔm po ndɔ tosa sɔɔŋ tau le halikpeŋ mi waŋnda kaala ndu. (2 Saam. 15:​7) Nduyɛ mɛɛ o tosa hei le wɔsiŋ bɔɔbɔɔ, mbo cha maa teleŋndo fuuluu niko le mbo simnuŋ masaa. Le hei, mbo yɔŋ waŋnda sɔɔsɔɔ le ma kɔ dimul waŋnda o lɛŋnde Isɔluɛileŋ niŋ kpou, le ma siiŋguu ndu masa. Mbo hiau pɛŋ Ahitofɛl kɔɔli le mbo toolu ndu. Nduyɛ Ahitofɛl wa waŋndo opilɛ o chaaŋaa kpɛɛluŋaa Deeve wa tɛɛŋ a wanaa nduaa silaa. Mi Abisalɔm siiŋguu ndupila masaa, nduyɛ mbo wa kindiŋndo le Deeve diyɔɔ. Naapum a teleŋ koŋ Deeve wa a naa tau. (Sam 41:​1-9) Nduyɛ mɛɛ Deeve tuei a ndi okɔɔ, mbo faŋaŋ Chulusalɛm. Okoŋ kɔɔli, mi Abisalɔm chua puaa nduaa chɔuwa, mbo kɔ chiŋalaŋ puaa chɔuwaa Deeve wa. Kɛ o sɔla batiuwaa le. Nduyɛ pɛŋ, mbo sɔla piɔmndo.

10. Yɛɛ Deeve ndoo tiu yɛ ba mbo tosa?

¹⁰ Yiyaŋndɔ vɛlɛ mɛɛ Deeve wa sinaŋndo yɛ, mɛɛ sɔɔŋ muŋ kpou wa ndu yɔŋnɔŋndo. Ndoo kaala Abisalɔm tau, nduyɛ ndoo nɔ tiindaŋndo o Ahitofɛl niŋ. Kɛ mi puaa ŋiɔɔŋnda haa kpou tɛɛmbuu ndu kɔllo, nduyɛ ma kindiŋ pɛŋ le ndu diyɔɔ. Deeve ndoo tiuba mbo yiyaŋ maa, chaaŋaa nduaa kpou hiounuŋ Abisalɔm kɔɔli, nduyɛ mi ndoo kɛɛ tiindaŋndo dɔwɔɔ o nda niŋ. Ndoo tiuba mbo yiyaŋ a ndu pila okɔɔ kinɛi, nduyɛ mi ndoo nyaanuŋ o lɛŋnde cheleŋ niŋ. Ɔɔ ndoo tiuba mbo tambu kɔl tau a sɔɔŋ komal ndu muŋ ndoŋ. Kɛ Deeve tosa sɔɔŋ muŋ i kɛ kɛ le. Mbo tiu tɔɔndaŋndo hoo ba. Yɛɛ mala yɛ ndu le keŋ tosaa?

11. Yɛɛ Deeve ndoo tosa yɛ mɛɛ sɔɔŋ palaŋ komal ndu?

¹¹ (3) Yiyaŋndo. Sawala mandaala kuɛɛ ŋ pɛɛku yɛ o bundɛi Deeve ve niŋ? Kindiŋ ndɔ ma sɔla mulioo le nyunaa hoo. “Yɛɛ Deeve tosa yɛ mɛɛ sɔɔŋ palaŋ komal ndu?” O yɔŋ isiooŋ te, nduyɛ o tosa kɛɛsiaa luku luku le. Nduyɛ o buulaŋ tau a suɛi keŋ okɔɔ le. Kɛ mbo piɛi o Chɛhowa lo le mbo mala ndu. Mbo nyuna vɛlɛ chaaŋaa nduaa le ma mala ndu. Nduyɛ mbo keleŋa vɛlɛ kɛɛsiaa o tosa wo dɔwɔɔ o wali niŋ. M  che bɛɛ mi apum tɛɛmbuu ndu kɔllo, kɛ o kɛɛ tiindaŋ ndɔɔ dɔwɔɔ o acheleŋnda niŋ ɔɔ mbo tul nda leyɛ le. Nduyɛ mbo hiau lachi a tiindaŋ ndɔɔ dɔwɔɔ o Chɛhowa niŋ.

12. Yɛɛ Chɛhowa ndoo tosa yɛ le Deeve malaa?

¹² Yɛɛ Chɛhowa ndoo tosa yɛ le Deeve malaa? Te a tosa pɛ yaasiaa a bundɛi hei okɔɔ, a cho chɔ maa mi Chɛhowa luei Deeve yoomuaŋ, le mbo biuŋ tɔɔndaŋnda komal ndu laŋ. (Sam 3:​1-8) Mi Chɛhowa duau kɛɛsiaala Deeve laŋ sala. Mbo mala chaaŋaa Deeve wa ma sɔla batiuwaa o chɔuwo, nduyɛ ma manda ndu.

13. Vɛɛ ŋ tuallɛ taamasi Deeve wo kɔɔli te waŋndo tɛɛmbuu num pɛ kɔllo? (Maatiu 18:​15-17)

¹³ (4) Dɔu nyɛ ŋ pɛɛku wo o wali niŋ. Nyunaŋndɔ aa, ‘Vɛɛ ya tuallɛ taamasi Deeve wo kɔɔli?’ Te bahawɛiyo luɛi nya pɛ tɛɛŋ nya waŋndo, tosa nyɛ chɔ chɔ le ndu solioo. Te o bɛnda pɛ o foofo koŋ choo, kindiŋ ma dɔu sawa mandaa Chiisu ke naa o Maatiu 18 niŋndo o wali niŋ. (Nuawɔ Maatiu 18:​15-17.) Tosa kɛɛsiaalaŋ luku luku ɔɔ teleŋ ŋ tambu kɔllo le. Piɛi o Chɛhowa lo le mbo tosa ma pɔlul kɔllo, nduyɛ ma sina nyɛ ŋ nɔ ma tosa wo. Hiou lachi a tiindaŋndo dɔwɔɔ o puaapiliaa numnda niŋ, nduyɛ chɛl mala nda ke numndo. (Pulɔ. 17:​17) I hiou kpou ve, tol sila Chɛhowa ke naa o Diom ndɔɔ niŋndo kɔɔli.—Pulɔ. 3:​5, 6.

YƐƐ NAŊ PƐƐKU YƐ O TAAMASI PƆƆLLO NIŊ?

14. Vɛɛ Timoti Diiŋ Ndɔɔ 1:​12-16; 4:​6-11, 17-22 dɛɛniaa yɛ num kɔllo?

¹⁴ Baa wanaa cho o yuŋgu numndo niŋnda cho num pa simullo le mɛɛ ŋ cho Chɛhowa piɛiyo yɛ? Baa o lɛŋnde nda kuuna wali naa o tiŋ ɔɔ kpou leŋ niŋ ŋ cho ni? Te lende i cho ni, mɛɛ a cho kɔl dɛɛniaa sɔla te a veelu pɛ diomndaŋ o Timoti Diiŋ Ndɔɔ 1:​12-16; 4:​6-11, 17-22.c Teleŋ Pɔɔl wa o chiɛi manyumndo niŋndo o poonyiaa nyɛ dimiŋ o bolii Baabuiye hei niŋndo ni.

15. A yɛɛ okɔɔ ŋ nɔ yɛ ma piɛi o Chɛhowa lo?

¹⁵ (1) Piɛileŋ. Tuupa ma veelu diomndaŋ a nyɛ yɔŋnuŋ Pɔɔllo okɔɔ, dimul Chɛhowa bahawɛi numndo, nduyɛ ma chɔm ndu mɛɛ ŋ cho sinaŋndo yɛ. Dimul Chɛhowa nyɛ kpeekpei cho num paaliaŋndo wo, nduyɛ ma nyuna ndu mbo mala num ma che sawala mandaalaŋ o nyɛ yɔŋnuŋ Pɔɔllo niŋ, le halikpeŋ ma sina nyɛ ŋ nɔ ma tosa o bahawɛi numndo niŋndo.

16. Yɛɛ ndoo yɔŋnuŋ yɛ Pɔɔl?

¹⁶ (2) Tuuwɔ mɛɛ bundɛi ŋ veelu diomndaŋ nde yɔŋnuŋ yɛ. Yiyaŋndɔ maa num cho Pɔɔl ni. Mɛɛ waŋnda bii ndu, ma duau ndu o yɔlɔŋ, nduyɛ ma kɔ dɔu ndu o chiɛi manyumndo niŋ Luom. Mi che bɛɛ o wa paandu o chiɛi manyumndo niŋ, kɛ a teleŋndo hoo niŋ, Pɔɔl ndoo sina maa o wa piɔmndo sɔla. Mi chaaŋaa nduaa atiŋ mal ndu, nduyɛ o wa niŋ o saŋgɛi yɔkɔɔ.—2 Timo. 1:​15.

17. Yɛɛ Pɔɔl ndoo tiu yɛ ba mbo tosa?

¹⁷ Pɔɔl ndoo tiuba mbo handu kɔllo o nyɛ yɔŋnuŋ ndu paandu wo choo, nduyɛ mi ndoo yiyaŋ maa ndoo bɛnda kposoŋ mi ndoo simnuŋ Kilisiɔŋnɔɔ le. Kanifuule, keŋ wa tosa a ve ndu dɔwɔɔ o chiɛi manyum niŋ te. Ndoo tiu vɛlɛ ba mbo tambu kɔl, le mɛɛ chaaŋaa nduaa o buŋgɛi Eesiaa ve niŋ mal ndu yɛ. Nduyɛ ndoo tiu vɛlɛ ba mbo kɛɛ tiindaŋndo dɔwɔɔ o chaaŋaa nduaa a piliaa niŋ. Kɛ Pɔɔl tosa sɔɔŋ muŋ i kɛ kɛ le. Le yɛɛ Pɔɔl ndoo nɔ yɛ tiindaŋndo maa chaaŋaa nduaa a piliaa mel ndu niŋ te, nduyɛ maa Chɛhowa cho ndu fanda?

18. Yɛɛ Pɔɔl tosa yɛ mɛɛ sɔɔŋ palaŋ komal ndu?

¹⁸ (3) Yiyaŋndo. Nyunaŋndɔ aa, “Yɛɛ Pɔɔl tosa yɛ mɛɛ sɔɔŋ palaŋ komal ndu?” Mi che bɛɛ Pɔɔl ndoo sina maa o wa piɔmndo sɔla, kɛ mbo hiau lachi a kɔllo handɔɔ o suɛi sɔvɛi choo. Ndi cho ni, le mi Chɛhowa sɔla bɛɛleŋ. Nduyɛ mbo hiau lachi a yiyaŋndo mɛɛ o tiuba mbo dɛɛniaa acheleŋnda kɔltaŋ yɛ. Mi ndoo piɛi teleŋ o teleŋ o Chɛhowa lo. (2 Timo. 1:​3) Pɔɔl hiu lachi a yiyaŋndo a chaaŋaa nduaa mal ndu wa okɔɔ le. Kɛ o chaaŋaa nduaa chɔm ndu lo lechoo wo, nduyɛ ma mala ndu wa choo ndoo handu kɔl ndɔɔ ni. O faŋaŋndɔ o hei kɔɔli, mi Pɔɔl hiau lachi a Diom Mɛlɛkaa pɛɛkoo. (2 Timo. 3:​16, 17; 4:​13) I hiou kpou ve, ndoo nɔ tiindaŋndo maa Chɛhowa nda Chiisu kaala ndu tau, nduyɛ maa fɛɛŋ bɛɛ a mel ndu le. Ndoo sina vɛlɛ maa a cho ndu fanda le wali o wa tosaa wo.

19. Vɛɛ Chɛhowa mala yɛ Pɔɔl?

¹⁹ Mi Chɛhowa dimul Pɔɔl kpendekele maa, waŋnda cho ndu nyɛpalaa tusi choo te o simnuŋ pɛ Kilisiɔŋnɔɔ. (Walta. 21:​11-13) Vɛɛnɛ Chɛhowa mala yɛ Pɔɔl? Mbo muli piɛile ndɔleŋ, nduyɛ mbo luei ndu yoomuaŋ. (2 Timo. 4:​17) Mi Chɛhowa ke Pɔɔl tiindaŋndo maa o cho fandaa sɔla le wali kala kala o wa tosaa wo. Nduyɛ mi Chɛhowa soliŋ chaaŋaa nduaa kpeku le ma ke ndu mala ndoo yeema wo.

20. Nyɛ Pɔɔl dimi o Luomaŋnda 8:​38, 39 niŋndo chɔm kɛsɛ maa ndoo nɔ tiindaŋndo. Vɛɛ naŋ tuallɛ taamasi ndɔɔ kɔɔli?

²⁰ (4) Dɔu nyɛ ŋ pɛɛku wo o wali niŋ. Nyunaŋndɔ aa, ‘Vɛɛ ya tuallɛ taamasi Pɔɔllo kɔɔli?’ Maa Pɔɔl, ŋ nɔ miŋ wa kɔl maa waŋnda cho naa nyɛpalaa tusi choo le tiindaŋ naa. (Maki 10:​29, 30) Le miŋ lo o tiindaŋ naa choo te tɔɔndaŋndo komal naa pɛ, ŋ nɔ miŋ wa piɛileŋ o Chɛhowa lo, nduyɛ miŋ wa pɛɛkɔŋ ipilayaa tosaa teleŋ o teleŋ. Ŋ nɔ vɛlɛ miŋ loonuŋ maa, nyɛ sɔvɛ naŋ nɔ miŋ kɛsiŋ o kɔllo cho ni, ŋ nɔ miŋ tosa a sabu le mi Chɛhowa sɔla saŋgalaa. Ŋ nɔ miŋ nɔ tiindaŋndo maa fɛɛŋ bɛɛ o mel naa le. Nduyɛ maa nyɛ o nyɛ feŋa naa o kaala ndɔɔ bɛŋgu le.—Nuawɔ Luomaŋnda 8:​38, 39; Hibu. 13:​5, 6.

TAAMASELIILA WANAA CHELEŊ BAABUIYO SOO A NDA OKƆƆ WA PƐƐKU NAA TAU

21. Yɛɛ mala yɛ Eya nda Hɛtɔ le ma tiu simulta komal nda laŋ ba?

²¹ Te suɛi kɛ kɛ komal naa pɛ, taamaseliilaŋ o Baabuiyo niŋ la nɔla mi la luei naa yoomuaŋ. Le taamaseliiyo, mi Eya, kɔɔfanɔɔ o lɛŋnde Chepaŋndeŋ niŋ dimi maa, bundɛi Chona ve mala ndu ni, mbo soliŋ siooŋnde o kɔl le yooŋgu kɛndɔɔ dimioo o luŋ kpendekele. Feleŋgɔnɔɔ Hɛtɔ cho ni, nduyɛ o lɛŋnde Iŋndoniisiaaleŋ niŋ o cho ni. Kɛ wanaa velu ndu wa cho Chɛhowa piɛi le. Mbo dimi maa, taamasi Lufu wo mala ndu ni mbo pɛɛku a Chɛhowa okɔɔ, nduyɛ mbo wa ndu piɛiyo.

22. Tɔnɔ yɛɛ ŋ sɔla yɛ te o yɔŋ pɛ ma nua vidueilaŋ a bundɔŋ Baabuiyoŋ okɔɔ ɔɔ ma veelu diomndaŋ o buŋgɛi hei bɛŋgu, “Tol Tiindaŋ Ndaa Kɔɔli”?

²² Kuɛɛ ŋ saaluŋ yɛ taamaseliilaŋ o Baabuiyo niŋ la luei num yoomuaŋ ndaŋ? Vidueila naalaŋ, tuula veelaa ladiomndo, a buŋgɛi hei, “Tol Tiindaŋ Ndaa Kɔɔli,” mala naa miŋ bii bundɔŋ Baabuiyoŋ bila.d Tuupa ma nua vidueilaŋ ndaŋ, ɔɔ ma yaŋ nilaŋ o tuula veelaa ladiomndo, ɔɔ ma veelu diomndaŋ o buŋgɛi keŋ niŋ, nyuna Chɛhowa le mbo mala num ma saaluŋ nyɛ kpeekpei mala numndo. Dɔu numpila o foofo wana bundɛi keŋ soo a ndu okɔɔ wo. Yiyaŋ a nyɛ wana koŋ tosa wo okɔɔ, nduyɛ a mɛɛ Chɛhowa mala ndu mbo tiu sɔɔŋ palaŋ komal ndu woŋ ba yɛ. Okoŋ ma dɔu nyɛ ŋ pɛɛku o bundɛi keŋ niŋndo o wali niŋ. Mel Chɛhowa balika le mɛɛ o cho num malaa yɛ. A chɔm balika melaa le mala o cho num kioo wo, te a nuuviaa pɛ nɛilaŋ le acheleŋnda malaa, nduyɛ ma dɛɛniaa nda kɔltaŋ.

23. Diomnde yɛɛ Chɛhowa mel lɛ naa o Aisaya 41:​10, 13 niŋ?

²³ O chieeŋ Setanaa hoo niŋ, yoomoo ve bɛɛŋ a teleŋndaŋ lapum te. Nduyɛ lepum, ŋ sina pɛŋ nyɛ naŋ tosa wo le. (2 Timo. 3:​1) Kɛ siooŋii nɔ mii bii naa ɔɔ miŋ hiu buulaŋ te. Chɛhowa sina sɔɔŋ palaŋ cho naa choo woŋ. Te ŋ yeema pɛ malaa, o mɛi lediom maa o cho naa saa a ba ndɔ kɛndɔɔ. (Nuawɔ Aisaya 41:​10, 13.) Ŋ nɔ miŋ nɔ tiindaŋndo o ndu niŋ le naa malaa. Nduyɛ mbo soliŋ Baabuiyo kpeku le naa yoomuaŋ lueiyo le miŋ biunuŋ sɔɔŋ palaŋ cho naa choo woŋ.