A Sina Pa?

Baa Mɔdikai Baabuiyo soo okɔɔ wo wa pa achal kpeekpei?

Mi yau Ɛsita wo suaa tau a sɔɔŋ bɔɔbɔɔ po Chuunɔ pilɛ diolaŋ Mɔdikai tosa woŋ okɔɔ. Mɔdikai wa o wanaa nda kuɛ o chɛleŋ niŋ Paasiaa wa tɛɛŋ. Nduyɛ a wɔsi 500 tuupa mi Chiisu vialuŋ, mbo kandu wallo o chiɛi lemasaa niŋ. A teleŋ koŋ, Masaa Sɛsɛɛ wa “masaa le lɛŋnde paasiaaleŋ kpou ni.” Mɛɛ puaa a ŋiɔɔŋ wa kɛɛsiaa le masaa diyɔɔ, mi Mɔdikai chɔɔmuu nda. Le hei, a dii lɛ masaa le. Le ndu balikaa mello, mi masaa tosa kɛɛsiaa le ndu bɛɛleŋ kioo o luŋ kpendekele. Okoŋ kɔɔli, mɛɛ Hamaŋ, wana wa yaamɔɔnɔɔ le Mɔdikai a Chuuwa kpou wo sɔla piɔmndo, mi masaa siiŋguu Mɔdikai masa diiŋ ndɔɔ. Mi foofo Mɔdikai ndoo sɔla koŋ ndo mala ndu mbo piŋi Chuuwa, Paasiaaŋ nda diu lɛ nda le.—Ɛsita 1:​1-2; 2:​5, 21-23; 8:​1, 2; 9:​16-17.

O wɔsiŋ 2000 kandɔŋndo, mi wanaa sinaa dɛniaa dimi maa sɔɔŋ yau Ɛsita wo dimi woŋ cho sɔɔŋ kpeekpei le, nduyɛ maa Mɔdikai ve achal kpeekpei le. Kɛ a wɔsi 1941, mi wanaa tuau nyɔɔŋ lɛŋ nda saaluŋ nyɛ chɔm maa, sɔɔŋ Baabuiyo dimi a Mɔdikai okɔɔ woŋ cho tonya wo. Yɛɛ wa yɛ nyɛ koŋ?

Ma saaluŋ yaula masindɛla wa o Paasiaa niŋndaŋ a diola po pilɛ lechoo aa Maduka. (O Iŋgkilisiiye niŋ, la sim le Mɔdikai). O chiɛi lemasaa niŋ ndoo tosa wallo ni. Nduyɛ naapum a kanioŋ okɔɔ ndoo tosa wallo o Susa niŋ ni. Mi Atɔ Unadi, wana ndoo sina a sɔɔŋ masindɔŋ okɔɔ nyɛkɛndɛiyo dimi maa, nyɛ nda saaluŋ koŋ ndo kinɛi nɔ diola Mɔdikai laŋ lechoo ni mi la “chɛlaŋ a nyɛ Baabuiyo dimi a ndu okɔɔ wo.”

Chɔŋ a teleŋ Unadi dimi heiyo, wanaa sinaa dɛniaa bɔɔbɔɔ hivi niŋ yaula masindɛla cheleŋnda wa o Paasiaa niŋndaŋ o waalaŋ niŋ. Sɔɔŋ nda hivi woŋ, ŋpum wa o pouta yɛndɛla nda saaluŋ o fondaŋ kɛsiaa nyɛsɔlaa wa o kpaki chioo ikɛiyo. Pouta yɛndɛlaŋ ndaŋ la cho o chiee bɛndoo Pɛsipolisi niŋ. Nduyɛ la soo a teleŋ masaa Sɛsɛɛ Tasoo wa o masaleŋ choo wo okɔɔ. O suɛi maŋgalɛi Ilamitiiye niŋ ndaa poonyiaa o poutaŋ ndaŋ choo ni. Poutaŋ ndaŋ la nɔ diola wanaa bɔɔbɔɔ yau Ɛsita wo soo a nda okɔɔ wa.a

Pouta yɛndɛla bɔɔbɔɔ wa o chiee bɛndoo Pɛsipolisi niŋndaŋ laa nɔ diolaŋ ndaŋ Maduka. Poo hoo wa wallo o chiɛi lemasaa niŋ Susa a teleŋ Sɛsɛɛ Tasoo wa o masaleŋ choo wo. Mi pouta yɛndɛla laŋ opilɛ chɔm maa wana hiviaa Maduka wa ni. Nyɛ o dimi koŋ ndo chɛlaŋ a nyɛ Baabuiyo dimi a Mɔdikai okɔɔ wo. O chiɛi lemasa Sɛsɛɛ Tasoo niŋ Mɔdikai ndoo tosa wallo ni, nduyɛ mi ndoo dimi sɔɔŋ maŋgalaŋ ŋmuuŋ. Teleŋ o teleŋ, o dio chiɛi lemasaa sondoo ndoo chal ni. (Ɛsita 2:​19, 21; 3:​3), Fondaŋndo wa o dio koŋ sondoo naa wanaa bɛnduaa o chiɛi lemasaa niŋ ndaa tosa wallo wa.

Sɔɔŋ bɔɔbɔɔ pouta yɛndɛlaŋ la dimi a Maduka okɔɔ wo, velaŋ a sɔɔŋ Baabuiyo dimi a Mɔdikai okɔɔ woŋ. A teleŋ pilɔɔ kpe nda wa achal ni, nduyɛ o fondaŋ pilɔɔ nda wa ni. O faŋaŋ okoŋ kɔɔli, foofola pilɛlaŋ ndaa nɔ o chiɛi lemasaa niŋ ni. Sɔɔŋ muŋ kpou chɔm maa, naapum nyɛ wanaa tuau nyɔɔŋ lɛŋ nda saaluŋ ndo chɛlaŋ a nyɛ yau Ɛsita wo dimi a Mɔdikai okɔɔ wo.