A Chɔm Maa A Cho Wana Dialuŋ Kala, Te A Wa pɛ Mɔɔsɔlɔɔ

1. A yɛɛ okɔɔ wanaa naŋ tosa wallo wa ɔɔ wanaa naŋ kua o sukuu wa nyuna yɛ lepum?

VƐƐ ŋ yiyaŋ yɛ te wanaa nya cho wallo wa ɔɔ wanaa nya cho o sukuu wa nyuna num pɛ a laalaŋnda numndaŋ okɔɔ? Baa mi siooŋnde bii num pa? Naa a bɔɔbɔɔ, mi siooŋnde bii naa. Te waŋndo nyuna naa pɛ a laalaŋnda naalaŋ okɔɔ, naapum mi nyuna koŋ tosa miŋ sina yiyaŋnda ndɔlaŋ ɔɔ laalaŋnda ndɔlaŋ, nduyɛ mi keŋ ke naa fondaa le ndu yooŋgu kɛndɔɔ dimullo. Lepum yɛ, mi waŋndo nyuna naa, nyuna tosa miŋ hiŋaŋ ladiomndo. Hei nɔ mi i bii naa kɔndɔfili le kanifuule, waŋnda apum, a dimul nda niŋ choolaŋ a laalaŋnda naalaŋ okɔɔ. (Walta. 28:​22) Le handɔɔ lechoo, “o palɛi mɛɛlɛi niŋ,” naŋ cho ni. Nduyɛ Baabuiyo dimi maa, waŋnda “chɛl niŋ acheleŋnda diom te” vɛlɛ maa, “a wa niŋ wanaa kɔl vesɛi.”—2 Timo. 3:​1, 3.

2. Le yɛɛ naŋ nɔ yɛ miŋ chɔm kaa mɔɔsɔlɔɔ wo?

² Naapum ma nyunaŋ dɔɔ lepum aa, ‘Vɛɛ ya chɔm yɛ kaa kɛndɔɔ te waŋndo simul pɛ laalaŋnda nilaŋ?’ Yɛɛ mala yɛ num o hei niŋ? Kaa mɔɔsɔlɔɔ wo tiuba ni mbo mala num. Wana cho mɔɔsɔlɔɔ wo doonuŋ tumbe chɔ chɔ le, nduyɛ mbo dɔu ndupila o mandaa bɛŋgu te waŋndo tɛɛmbuu ndu pɛ kɔllo vɛlɛ mbo simul ndu. (Pulɔ. 16:​32) I cho tonya maa, lepum i ve bɛɛŋ bɛɛŋ le kaa mɔɔsɔlɔɔ wo chɔmndo le. Yɛɛ mala yɛ num ma nɔ kaa mɔɔsɔlɔɔ wo? Te waŋndo simul pɛ laalaŋnda numndaŋ, vɛɛ ŋ cho yɛ muli o nɛi lebɛɛ niŋ, nduyɛ ma chɔm kaa mɔɔsɔlɔɔ wo? Te kala chuaa ŋ cho ni, vɛɛ ŋ mala yɛ chuauwaa numnda le ma tɛɛsiaa laalaŋnda ndalaŋ a lebɛɛ, nduyɛ ma chɔm kaa mɔɔsɔlɔɔ wo? Ŋ yaasiaŋndɔ.

YƐƐ MALA YƐ NUM MA NƆ KAA MƆƆSƆLƆƆ WO?

3. Le yɛɛ naŋ dimi yɛ maa, wanaa nɔ kaa mɔɔsɔlɔɔ wo wa, nɔ dialuŋ kalaŋ ni? (2 Timoti 2:​24, 25)

³ Wanaa mɔɔsɔlɔɔ wa, wanaa dialuŋ kalaa nda cho ni. Te simul kala kalaa komal naa pɛ, mɛɛ miŋ nɔ yoomuaŋ nduyɛ miŋ kɛsi kɔllo. Kaa mɔɔsɔlɔɔ wo cho suliŋndo opilɛ, o “suliŋnda nyina Mɛlɛkaa” tɛɛŋ. (Kalee. 5:​22, 23) Teleŋnda bɔɔbɔɔ, ma soliŋ diom maKilikii nda hivi le ‘kaa mɔɔsɔlɔɔ’ wo kpeku, le tɛɛsiaa so nda pɛɛku le mbo dɔu ndupila o mandaa bɛŋgu wo. Yiyaŋndɔ a so waa lende okɔɔ. Mi che bɛɛ o cho mɔɔsɔlɔɔ, kɛ o nɔ wɔ yoomuaŋ. Naa bɛɛ, vɛɛ naŋ pɛɛku yɛ le kaa mɔɔsɔlɔɔ wo nɔɔ, nduyɛ miŋ nɔ dialuŋ kalaŋ? Ŋ nɔla miŋ tosa hei a ba naa le. Nyɛ mala naa wo cho ni, ŋ nɔ miŋ nyuna Mɛlɛka le mbo ke naa nyina ndɔ diandaa, nduyɛ mbo mala naa miŋ nɔ suliŋ kɛndɛ kɛndɔɔ hoo. Sɔɔŋ yɔŋnaŋ bɔɔbɔɔ chɔm niŋ maa, ŋ tiuba miŋ pɛɛku le kaa mɔɔsɔlɔɔ wo nɔɔ. Le tamaseliiyo, Seiyaa Chɛhowaa a bɔɔbɔɔ chɔm niŋ kaa mɔɔsɔlɔɔ wo mɛɛ waŋnda simul nda. Nduyɛ mi hei tosa mi wanaa bɔɔbɔɔ nɔ niŋ hau yiyaŋ kɛndɔɔ a naa okɔɔ. (Nuawɔ 2 Timoti 2:​24, 25.) Yɛɛ mala yɛ num ma nɔ kaa mɔɔsɔlɔɔ wo, nduyɛ ma nɔ dialuŋ kalaŋ?

4. Yɛɛ naŋ pɛɛku yɛ le kaa mɔɔsɔlɔɔ wo chɔmndo o tamasi Aase wo niŋ?

⁴ Tamaseliilaŋ la cho tau o Baabuiyo niŋ la chɔm maa, i cho suɛi sɔvɛ le kaa mɔɔsɔlɔɔ wo nɔɔ laŋ. Yiyaŋndɔ a Aase okɔɔ. A teleŋ o wa ichali Kɛlua o tanda Filitiaŋnda niŋndo, mi Filitiaŋnda paŋala ndu, nduyɛ ma beŋul sooŋnda buɛiyaa finya ndɔ wa ndaa tou laŋ. Aase sɔŋga le di ndɔɔ le. Kɛ mbo kuaŋnuŋ landaŋ a yuŋgu ndɔɔ, nduyɛ ma kɔ tou sooŋnda cheleŋ. (Chɛ. 26:​12-18) Loŋ bɛɛ, mi Filitiaŋnda dimi maa nda nɔ sooŋnda laŋ ni. A koŋ kpou, mi Aase chɔm vɛlɛ maa wana kɔl nyuloo o wa ni. (Chɛ. 26:​19-25) Yɛɛ mala yɛ ndu mbo hiau lachi a kaa mɔɔsɔlɔɔ wo chɔmndo, mi che bɛɛ waŋnda haa wa ndu kɔllo tɛɛmbuu wo? Tamasi wanaa velu ndu wa o wa tolɔɔ kɔɔli ni. Mbo pɛɛku mɛɛ Ebilaham wa wana kɔl nyulu yɛ, vɛlɛ a mɛɛ Sela kala ndɔ ndoo “chuɛɛnuŋ kaa mɔɔsɔlɔɔ wo a kaa tusiaŋndo” yɛ okɔɔ.—1 Pitɛ 3:​4-6; Chɛ. 21:​22-34.

5. Tamasi kuɛɛ chɔm yɛ maa kalaŋ chuauwaa Kilisiɔŋnda tiuba ma pɛɛku chuauwaa ndaa le kaa mɔɔsɔlɔɔ wo nɔɔ?

⁵ Kalaŋ chuauwaa Kilisiɔŋnda, la nɔ tiindaŋndo maa la tiuba mi la pɛɛku chuauwaa nyaa le kaa mɔɔsɔlɔɔ wo nɔɔ. Ŋ tofaŋndɔ tamasi po feleŋgɔnɔ pilɛ cho wɔsilaŋ 17 wo diolaŋ Masiŋ. O wa latulu a wanaa kɔl tuuwa o sukuu, nduyɛ mi ndoo komal vɛlɛ wanaa waa lende o wali pollo niŋ. Mi wanaa velu ndu wa biunuŋ ndu malaa le mbo nɔ kaa mɔɔsɔlɔɔ wo. Ma dimi aa, “Masiŋ bii niŋ bila maa, te waŋndo pilaŋ naa pɛ tana, kaa mɔɔsɔlɔɔ wo mala naa ŋ muli a tumbe le.” I cho suɛi kɔl kɛndɛ le sinaa maa, Masiŋ pɛɛku niŋ le kaa mɔɔsɔlɔɔ wo nɔɔ.

6. Vɛɛ piɛileŋ le mala yɛ naa le miŋ tosa hiouwɔɔ lachioo le kaa mɔɔsɔlɔɔ wo nɔɔ?

⁶ Yɛɛ naŋ nɔ yɛ miŋ tosa te waŋndo wa pɛ diola Chɛhowalaŋ tɔɔ tɛɛmbuuwo, ɔɔ mbo pɛɛsa sɔɔŋ cho o Baabuiyo niŋndoŋ? Ŋ nɔ mi nyuna Chɛhowa le nyina ndɔ diandaa a taasioo le miŋ muli o nɛi lebɛɛ niŋ, vɛlɛ miŋ chɔm kaa mɔɔsɔlɔɔ wo. Kɛ te o yɔŋ yɛ miŋ sina maa ŋ muli o nɛi lebɛɛ niŋ te? Ŋ nɔ miŋ piɛi a ndi okɔɔ, nduyɛ miŋ yiyaŋ mɛɛ naŋ tosa hiouwɔɔ lachioo yɛ. Te ŋ tosa lende pɛ, Chɛhowa cho naa mala a nyina ndɔ diandaa le miŋ dɔu naapila o mandaa bɛŋgu, vɛlɛ miŋ chɔm kaa mɔɔsɔlɔɔ wo.

7. Vɛɛ bolii Baabuiye ipum kɛsiŋndo o kɔl mala yɛ naa miŋ dɔu naapila o mandaa bɛŋgu, te simulta kala kalalaŋ la komal naa pɛ? (Pulɔwaa 15:​1, 18)

⁷ Bolii Baabuiye ipum tiuba mi i mala naa le naapila dɔwɔɔ o mandaa bɛŋgu, te simul kala kalaa komal naa pɛ. Nyina Mɛlɛkaa tiuba mbo mala naa miŋ loonuŋ a bolii Baabuiye hei okɔɔ. (Chɔŋ 14:​26) Le tamaseliiyo, sawala mandaala cho o yau Pulɔwaa wo niŋndaŋ la tiuba mi la mala naa le miŋ chɔm kaa mɔɔsɔlɔɔ wo. (Nuawɔ Pulɔwaa 15:​1, 18.) Yauwo hoo chɔm naa vɛlɛ tɔnɔla naŋ sɔla laŋ te simulta kala kalalaŋ la komal naa pɛ, miŋ dɔu naapila o mandaa bɛŋgu.—Pulɔ. 10:​19; 17:​27; 21:​23; 25:​15.

VƐƐ KƆL KALOO MALA YƐ NAA MIŊ CHƆM KAA MƆƆSƆLƆƆ WO?

8. Le yɛɛ i cho yɛ suɛi sɔvɛ le sinaa nyɛ nyindu waŋndo le naa nyunaa a laalaŋnda naalaŋ okɔɔ wo?

⁸ Kɔl kaloo tiu vɛlɛ ba mbo mala naa. (Pulɔ. 19:​11) Mi wana nɔ kɔl kaloo wo dɔu ndupila o mandaa bɛŋgu, te simullo komal ndu pɛ le mbo tɛɛsiaa a laalaŋnda ndɔlaŋ okɔɔ. Teleŋnda bɔɔbɔɔ, te waŋnda nyuna naa pɛ, a chɔm le sabu kpeekpei nda nyuna naa wo le. Le tamaseliiyo, naapum nyɛ cho waŋndo o kɔllo tosa ni mbo nyuna naa. Lelaŋ tuupa miŋ muli, i wa suɛi sɔvɛ le sinaa nyɛ nyindu ndu le naa nyunaa wo.—Pulɔ. 16:​23.

9. Vɛɛ Kidiɔŋ soliŋ yɛ kɔl kaloo a kaa mɔɔsɔlɔɔ wo kpeku le puaa Efiluem mulullo?

⁹ Yiyaŋndɔ mɛɛ Kidiɔŋ mulul puaa Efiluem yɛ. Mi puaa kaŋ tuulu kɔl a ndu, nduyɛ ma nyuna ndu le sabu o keleŋa nda veelu le yaamɔɔwaa Isɔluɛiya chɔulabaa le wo. Baa puaa kaŋ ndaa nɔ pa saboo le ma dɔɔnuŋ tumbe? O kpeekpei niŋ, wana che pɛ maa, yoŋgaa ndoo tosa ni ma duaunuŋ tumbe. Mɛɛ mɛɛ i wa, mi Kidiɔŋ soliŋ kɔl kalu ndɔɔ kpeku le yiyaŋnda ndalaŋ bɛɛleŋ kioo, nduyɛ mbo chɔm kaa mɔɔsɔlɔɔ wo le nda mulullo. Yɛɛ wa yɛ fulamakɔɔlioo? Baabuiyo dimi maa, “mɛɛ puaa Efiluem a tuei nyɛ Kidiɔŋ o dimi wo, . . . mi kɔltaŋ la pɔlul nda.”—Chɔɔchi. 8:​1-3.

10. Yɛɛ mala yɛ naa le sinaa mɛɛ naŋ mulul wanaa nyuna naa a laalaŋnda naalaŋ okɔɔ wa? (1 Pitɛ 3:​15)

¹⁰ Naapum, mi wana naŋ tosa wallo wo ɔɔ wana naŋ kua o sukuu pilɔɔ wo nyuna naa le sabu naŋ diikuŋ sawala cho o Baabuiyo niŋndaŋ ndo. I wa suɛi kɛndɛ le miŋ tɛɛsial ndu a lebɛɛ le sabu naŋ laalaŋ nyɛ Baabuiyo dimi wo. (Nuawɔ 1 Pitɛ 3:​15.) Lelaŋ, yiyaŋ nuaa maa le mi la hiŋaŋ diomndaŋ koni le o nyuna num te, kɛ chɔ nyuna ndɔɔ maa, nɛi ŋ tiuba ma sina nyɛ cho o sɔvɛ le ndu wo cho koŋ ni. O yɔŋ bɛɛ mi waŋndo nɔ yiyaŋ kɛndɔɔ le naa nyunaa ɔɔ mbo nɔ yiyaŋ kɛndɛ le, ŋ nɔ miŋ kindiŋ le ndu mulullo o nɛi lebɛɛ niŋ, nduyɛ miŋ chɔm kaa mɔɔsɔlɔɔ wo. Naapum, mɛɛ naŋ cho ndu mulullɛ cho tosa mbo siŋga yiyaŋ ndɔɔ. O yɔŋ bɛɛ mbo chɔm lebɛɛ le ɔɔ mbo soliŋ diomnda wɔɔŋndaŋ kpeku, kpeleŋ naa nɔ ni mbo wa le ndu mulullo o nɛi lebɛɛ niŋ.—Luomaŋ. 12:​17.

11-12. (a) A yɛɛ okɔɔ naŋ nɔ yɛ miŋ yiyaŋ tuupa miŋ muli nyuna kala kalaa? (Tofa vɛlɛ fotueiyo.) (b) Chɔmndɔ tamaseliiyo a mɛɛ nyuna waŋndo kumbi nɛiyo le balta ichaŋya laŋ dɔwɔɔ yɛ.

¹¹ Te o wa yɛ mi wana naŋ cho wallo wo nyuna naa le sabu, naŋ biilu paale vialaŋndeŋ te wo? Yiyaŋndɔ a hei okɔɔ: Baa yiyaŋndo wana koŋ cho ni maa naŋ tosa yelelaŋ kposoŋ te? Ɔɔ baa yiyaŋndo o cho ni maa, ŋ yeema miŋ tɛɛmbuu chaŋyɛi cho wanaa walla tɛɛŋ o fondaŋ wali koŋ nde? Le ndu malaa mbo nɔ yiyaŋ kɛndɔɔ a naa okɔɔ, ŋ tiuba miŋ chandu ndu le mɛɛ o chɔm yeemɛi o naa niŋ, vɛlɛ a wanaa cheleŋ cho wallo o fondaŋ koŋ nda yɛ. Nduyɛ miŋ chɔm ndu maa naa bɛɛ, miŋ naŋ kɔl tau te wana o wana o fondaŋ wallo wa pɛ a kɔl kɛndɛ. Hei tiuba mi i mala naa miŋ sɔla vɛlɛ fondaa le baltaŋ dɔwɔɔ, a nyɛ Baabuiyo dimi a paale vialaŋndeŋ ndo okɔɔ.

¹² Ŋ tiu vɛlɛ ba miŋ soliŋ nɛi pilɔɔ hoo kpeku, te waŋndo nyuna naa pɛ a sɔɔŋ kalaŋ cheleŋ okɔɔ. Naapum, mi wana naŋ cho o sukuu pilɔɔ niŋndo dimi maa, Seiyaa Chɛhowaa nɔ ma siŋga yiyaŋ ndaa te o hiŋ pɛ a poo a poo vɛlɛ a chuaa a chuaa hiniei tosaa. Baa le mɛɛ o bii bila nyɛ Seiyaa Chɛhowaa laalaŋ a hei okɔɔ le yɛ o nɔ laalaŋ koŋ ni? Ɔɔ baa le mɛɛ chaaŋ ndɔ ɔɔ wanayɛi nduɛi cho o kaa koŋ niŋ yɛ? Baa yiyaŋndo o cho ni maa, ŋ kaala wanaa cho balaŋ o kaa koŋ niŋ nda le? Ŋ nɔ miŋ chɔm ndu maa ŋ buulaŋ le wana o wana, nduyɛ ŋ sina maa, wana o wana nɔ dioo le chuaŋ chuaa tosaa a ba ndɔ.b (1 Pitɛ 2:​17) Okoŋ, miŋ dimul ndu nyɛ Baabuiyo dimi a suɛi keŋ okɔɔ wo, vɛlɛ a tɔnɔla naŋ sɔla laŋ te ŋ diikuŋ pɛ sawala ndɔlaŋ.

13. Vɛɛ ŋ mala yɛ wana yiyaŋ maa i cho suɛi taasi le laalaŋndo o Mɛlɛka niŋ te wo?

¹³ Te waŋndo sɛɛŋgiaa pɛ nyɛ naŋ laalaŋndo, ŋ nɔ miŋ keleŋa dimi maa wana koŋ sina nyɛ o laalaŋndo le. (Tai. 3:​2) Le tamaseliiyo, te o wa yɛ mi wana nya cho o sukuu pilɔɔ niŋndo dimi maa, i cho suɛi taasi le laalaŋndo o Mɛlɛka niŋ te? Baa a nɔ pa ma yiyaŋ ma wana koŋ laalaŋ maa nyɛ o nyɛ a ba ndɔ o hiŋ ni, vɛlɛ maa o sina tau a ndi okɔɔ? O kpeekpei niŋ, naapum nyɛ o tueiyo o cho dimioo ni. Kindiŋ mi la hiŋaŋ diomndaŋ o ndi choo le, kɛ chɔm ndu nyɛ o tiuba mbo yiyaŋ lechoo wo. Naapum, a chɔm ndu buŋgɛi o jw.org choo, i soo a nyɛm Mɛlɛka toosiaa woŋ okɔɔ wo. Kɛlɛŋgaa o cho yeemɛi nɔ a teleŋ cheleŋ le mi la suukaŋ o buŋgɛi pilɛ ɔɔ o viduei o saaluŋ o tɛɛŋgii keŋ choo wo choo. A tonya, te ŋ chɔm pɛ bɛɛleŋ o nɛiyo hoo choo, naapum keŋ cho ndu nyindɔɔ le mbo siŋga yiyaŋ ndɔɔ.

14. Vɛɛ Nɛli soliŋ yɛ tɛɛŋgii nɛi kpeku le wanaa nda cho o toŋgo pilɔɔ niŋnda chɔmndo maa, nyɛ waŋnda apum dimi a Seiyaa Chɛhowaa okɔɔ wo cho tonya le?

¹⁴ Mi feleŋgɔnɔ pilɛ diolaŋ Nɛli soliŋ tɛɛŋgii nɛi kpeku, le waŋnda chɔmndo maa nyɛ waŋnda apum dimi a Seiyaa Chɛhowaa okɔɔ wo cho tonya le. Mbo dimi aa, “Mi wana naŋ wa o toŋgo pilɔɔ niŋndo ndoo dimulla teleŋ o teleŋ maa, I laalaŋ maa nyɛ o nyɛ a ba ndɔ le o hiŋ te kanifuule, nyɛ Baabuiyo dimi wo ya tiindaŋ ni.” Mɛɛ Nɛli wana nda cho o toŋgo pilɔɔ niŋndo kuuna ndu tɛɛsiaa a laalaŋnda ndɔlaŋ okɔɔ, mbo chɔm ndu buŋgɛi hei, “Science and the Bible,” (Nyɛm Mɛlɛka Toosiaa Woŋ a Baabuiyo) o jw.org choo. Mi Nɛli sina maa, mi wana nda wa o toŋgo pilɔɔ niŋndo veelu diomndaŋ o buŋgɛi keŋ niŋ. Le hei, ndoo nɔ niŋ yeemɛi le ma suukaŋ a kandɔŋ yoomoo okɔɔ. Naapum, num bɛɛ tiuba ma sɔla fulamakɔɔlila waa nuaa.

LA BƐƐNDIAŊ O YUŊGU NYAA NIŊ

15. Vɛɛ kalaŋ chuauwa mala yɛ chuauwaa ndaa le ma chɔm kaa mɔɔsɔlɔɔ wo, te wanaa nda cho o sukuu wa nyuna nda pɛ a laalaŋnda ndalaŋ okɔɔ ma wa nda mulullo?

¹⁵ Kalaŋ chuauwa tiuba ma mala chuauwaa ndaa mɛɛ nda looku ma muli a lebɛɛ yɛ, te waŋndo nyuna nda pɛ le tɛɛsiaa a laalaŋnda ndalaŋ okɔɔ. (Chemi. 3:​13) Mi kalaŋ chuauwaa bɔɔbɔɔ tosa tuuliaalaŋ te a wa pɛ pɛɛku leyuŋgoo tosaa. Naapum, ma yaasiaa buŋgaŋ ŋpum ŋ chuauwaa ndaa sɔla simullo o sukuu woŋ. Nduyɛ ma pɛɛku nda mɛɛ nda nɔ ma muli yɛ, vɛlɛ a mɛɛ nda chɔm kaa mɔɔsɔlɔɔ wo yɛ, te a wa pɛ suɛi, le halikpeŋ ma pilaŋ waŋnda kɔltaŋ.—Tofa kɔfoo hoo, “Tuuliaalaŋ Tosaa a Teleŋ Pɛɛku leYuŋgoo Mala Yuŋgu Numndo Tau.”

16-17. Vɛɛ tuuliaalaŋ tosaa a teleŋ pɛɛku leyuŋgoo mala yɛ feleŋguaa?

¹⁶ Tuuliaalaŋ tosaa a teleŋ pɛɛku leyuŋgoo mala Kilisiɔŋnda ma nɔ sɔɔŋ sɔvɛ sɔviɔŋ le acheleŋnda dimullo, nduyɛ mi ndapila nɔ tiindaŋndo kɛsɛ maa, a nɔ sabula sɔvɛlaŋ le laalaŋnda ndalaŋ. Buŋgɛi hei, “Nyunala Feleŋguaa Nyunalaŋ” o jw.org choo, nɔ fondaŋndo le mi feleŋguaa poonyiaa nyɛ nda yiyaŋndo. A toosiaa fondaa hoo le feleŋguaa malaa ma kindi laalaŋnda ndalaŋ poŋ, vɛlɛ ma bɛɛndiaa mulilaŋ le sɔɔŋ ŋpum tɛɛsiaa a ba nda. Te ŋ wa pɛ sɔɔŋ cho o buŋgɛi keŋ bɛŋgu woŋ pɛɛkoo a teleŋ pɛɛku leyuŋgoo, keŋ cho naa kpou mala le miŋ tɛɛsial acheleŋnda a laalaŋnda naalaŋ okɔɔ o nɛi pilaŋ nda kɔllo wo niŋ, vɛlɛ miŋ chɔm kaa mɔɔsɔlɔɔ wo.

¹⁷ Mi feleŋgɔnɔ pilɛ diolaŋ Maatiu tɛɛsiaa mɛɛ tuuliaala ndaa tosa a teleŋ pɛɛku leyuŋgoo laŋ la mala ndu yɛ. O pɛɛku nda leyuŋgoo niŋ, teleŋnda bɔɔbɔɔ mi Maatiu a wanaa velu ndu wa ndaa tosa yaasiaa a sɔɔŋ ŋpum okɔɔ, ŋ ndaa suukaŋ a muŋ okɔɔ o toŋgo ndaa niŋndoŋ. Mbo dimi aa: “Mi naŋ yiyaŋ a nyunaa opilɛ okɔɔ, o wanaa naŋ cho o toŋgo pilɔɔ niŋnda ndaa nyuna lepum ndo. Nduyɛ mi naŋ tɔlnuŋ o nyɛ naŋ yaasiaa wo choo, le pɛɛkoo mɛɛ ya mulul nda yɛ. Te I sina pɛ le sabu ya laalaŋ suɛi ipum ndo, mi keŋ tosa mi nɔ tiindaŋndo o ndi niŋ, nduyɛ mi che ndi tɛtɛlɛ le acheleŋnda tɛɛsiallo a ndi okɔɔ, vɛlɛ mi chɔm kaa mɔɔsɔlɔɔ wo.”

18. Suɛi sɔvɛ kuɛɛ Koloosiaŋnda 4:​6 chɔm yɛ naa?

¹⁸ I cho tonya maa, o yɔŋ bɛɛ miŋ tɛɛsiaa laalaŋnda naalaŋ nyɛkɛndɛi, o cho waŋnda kpou le chɛl nyɛ naŋ cho dimioo wo le. Kɛ te ŋ tɛɛsiaa pɛ laalaŋnda naalaŋ o nɛi lebɛɛ niŋ, nduyɛ miŋ chɔm kaa mɔɔsɔlɔɔ wo, keŋ tiuba mi i mala naa tau. (Nuawɔ Koloosiaŋnda 4:​6.) Suɛi o waŋndo lo a laalaŋnda naalaŋ okɔɔ, cho ko mɛɛ naŋ wuulul nuaa waŋndo bɔllo yɛ. Ŋ nɔla miŋ wuu ndu dɛɛ, ɔɔ miŋ wuu ndu a mayoomu. Te ŋ wuu ndu pɛ dɛɛ, naapum keŋ tosa mi waŋndo opilɔɔ saala ndu, nduyɛ miŋ hiou lachi a pisultaŋ. O nɛi pilɛ koŋ choo, te ŋ chɔm pɛ acheleŋnda a laalaŋnda naalaŋ okɔɔ o nɛi lebɛɛ niŋ, vɛlɛ miŋ chɔm kaa mɔɔsɔlɔɔ wo, naapum ma nɔ yeemɛi tau le naa nilaŋ yaŋɔɔ vɛlɛ miŋ hiou lachi a baltaŋ dɔwɔɔ a nda. Kɛ te waŋndo yeema naa pɛ miŋ hiŋaŋ diomndaŋ a ndu, ɔɔ mbo pɛɛsa laalaŋnda naalaŋ, ŋ nɔ miŋ hiou lachi a suukaŋndo a ndu le. (Pulɔ. 26:​4) O kpeekpei niŋ, o cho waŋnda kpou le tosa hei le. Lepum, mi wanaa bɔɔbɔɔ nɔ yeemɛi le naa nilaŋ yaŋɔɔ.

19. Yɛɛ nɔ yɛ mbo nyindu num le ma chɔm kaa mɔɔsɔlɔɔ wo, te a wa pɛ waŋnda tɛɛsiallo a laalaŋnda numndaŋ okɔɔ?

¹⁹ Miŋ sɔla tɔnɔɔ tau te ŋ chɔm pɛ kaa mɔɔsɔlɔɔ wo. Piɛi o Chɛhowa lo le mbo luei num yoomuaŋ, le halikpeŋ ma chɔm kaa mɔɔsɔlɔɔ wo te a wa pɛ nyunala waŋnda mulioo ɔɔ te waŋnda pɛɛsa num pɛ. Loonuŋ maa, kaa mɔɔsɔlɔɔ ŋ cho chɔmndo cho tosa la hiŋaŋ ladiom o laalaŋnda numndaŋ choo le. Hei tosa vɛlɛ, mi waŋnda apum siŋga yiyaŋ nda nɔ a naa vɛlɛ a tonyala Baabuiyo okɔɔ laŋ. Baabuiyo dimi maa, naŋ “wa a bɛɛndiaŋnda lɔɔlɔɔ le [miŋ] tɛɛsial” waŋnda a laalaŋnda naalaŋ okɔɔ, vɛlɛ maa ŋ nɔ miŋ “tosa ndi dɛɛ, nduyɛ a bɛɛle yiŋgoloŋndeŋ.” (1 Pitɛ 3:​15) A tonya, maa kaa mɔɔsɔlɔɔ ŋ nɔ wo tosa ma nɔ dialuŋ kalaŋ fɔ!