Suɛi Yɔŋnaŋnde

Nyiɛɛye Chɔmndo le Wana o Wana

Paale pilɛ, mi ndepilɛnɔ pilɛ o Niu Silaŋ niŋ tofa vidueiyo o jw.org choo. Nduyɛ mi viduei koŋ chɔm maa, Chɛhowa bii ko mɔnɛi le wana wa o saŋgaa niŋndo le, kɛ mbo chɔm ndu nyiɛɛye. (Aisaya 63:​7-9) Mbo kɛɛsiaa le nyɛ o pɛɛku wo dɔwɔɔ o wali niŋ sanaa a nɛilaŋ nuuviaa le waŋndo malaa. O paale pilɛle leŋ choo, mɛɛ o kuɛ piinduulaŋ, mbo cha chua pilɛ ndoo nɔ naa lɔlaa kposoŋ te wo. Okoŋ mbo pindul ndu nyɛdiaa. Mi chua koŋ bii nyɛdiaa koŋ. Mɛɛ ndepilɛnɔɔ wa chua koŋ nyɛdiaa kioo, mbo dimul ndu yooŋgu kɛndɔɔ, nduyɛ mbo ke ndu yau pɔmbɔɔ hoo, Baa Nyɛpalaa Chuu niŋ Pa?

Mi chua koŋ kandu chaŋndo. Okoŋ mbo tɛɛsial ndepilɛnɔɔ maa, ndu bɛɛ o tonyaa niŋ o veluŋ ni, kɛ mbo mal tonyaa. Nduyɛ maa, o palɛi biŋgii ndii hiou ve niŋ, mbo piɛi o Chɛhowa lo le mbo mala ndu mbo miiŋgu ndu o ibuŋ. Mi ndepilɛnɔ koŋ ke ndu Baabuiyo, nduyɛ mbo tosa kɛɛsiaa le mbo kandu Baabuiyo pɛɛkoo.a

Ŋ tual tamasi Chɛhowaa kɔɔli le acheleŋnda nyiɛɛye tuiinɔŋndo, mɛɛ wanayaŋ naŋ, a puaapiliaa a ndepiliaa naa o kundaa niŋ cho nuaa yɛ. Nduyɛ ŋ chɔm acheleŋnda nyiɛɛye, te ŋ wa pɛ nɛilaŋ nuuviaa le nda yooŋgu kɛndɔɔ dimullo.