“Ŋ Hiounuŋ Lachi a Sɔɔŋ Ŋkaasoŋndoŋ Pɛɛkoo”

1. Yɛɛ Chɛhowa yeema yɛ naa miŋ tosa?

TE PƆNƆƆ a lanɔɔ velu pɛ hɔɔ, ma naŋ kɔl tau. Mi che bɛɛ ma wa a kɔl kɛndɛ le chɛlɛkpɛ sɛnɛi nda velu koŋ ndo, kɛ pesiŋ bɛɛ a yeema ndu mbo hiou lachi a waa chɛlɛkpɛ le. Nduyɛ pɛŋ, ma tambu kɔl tau te o kɛɛ pɛ le hindɔɔ. O nɛi pilɛ koŋ choo, mi Chɛhowa naŋ kɔl tau, te ŋ komal pɛ kpeleŋnda taselaŋ le simnɔŋndo buɛiyaa Chiisu wa. Kɛ pesiŋ bɛɛ o yeema naa miŋ mɛɛlu loŋ te. (1 Kɔliŋ. 3:1) Lelaŋ pɛŋ o dimul naa ni le miŋ “simnuŋ kaasoŋnda” o ndu piɛiyo niŋ.—1 Kɔliŋ. 14:20.

2. Yɛɛ naŋ cho yɛ pɛɛku o buŋgɛi hei niŋ?

² Yɛɛ o sim le waa Kilisiɔŋnɔ kendu o Mɛlɛka piɛiyo niŋndo? Yɛɛ naŋ nɔ yɛ miŋ tosa le miŋ simnuŋ Kilisiɔŋaa kendu o Mɛlɛka piɛiyo niŋnda? Vɛɛ nyɛdiaa sikpaa dioo mala yɛ naa, miŋ simnuŋ Kilisiɔŋaa kendu o Mɛlɛka piɛiyo niŋnda? Nduyɛ, le yɛɛ naŋ nɔ yɛ miŋ hiu tiindaŋndo dɔwɔɔ o naapila niŋ te? Ŋ cho pɛɛku a nyunalaŋ ndaŋ okɔɔ o buŋgɛi hei niŋ.

YƐƐ O SIM YƐ LE WAA KILISIƆŊNƆ KENDU O MƐLƐKA PIƐIYO NIŊNDO?

3. Yɛɛ naŋ nɔ yɛ miŋ tosa le miŋ simnuŋ Kilisiɔŋaa kendu o Mɛlɛka piɛiyo niŋnda?

³ O Baabuiyo niŋ, diom maKilikii nda hivi le “kaasoŋnda” wo sim le wana “kendu o Mɛlɛka piɛiyo niŋndo,” a “wana cho walaŋndo.”a (1 Kɔliŋ. 2:6) Ŋ tiuba miŋ simnuŋ kaasoŋnda o Mɛlɛka piɛiyo niŋ, te ŋ soli pɛ balaŋ o sɔɔŋ ŋchuaambɔyaŋ niŋ, okoŋ miŋ simnuŋ wanaa kendu o Mɛlɛka piɛiyo niŋnda. Nduyɛ, o yɔŋ bɛɛ miŋ simnuŋ wanaa kendu o Mɛlɛka piɛiyo niŋnda, ŋ nɔ miŋ mɛɛlu loŋ te. (1 Timo. 4:15) Naa kpou tiuba miŋ simnuŋ Kilisiɔŋaa kendu o Mɛlɛka piɛiyo niŋnda, o yɔŋ bɛɛ miŋ wa feleŋguaa. Kɛ, vɛɛ naŋ looku yɛ sina maa, Kilisiɔŋaa kendu o Mɛlɛka piɛiyo niŋnda naŋ cho ni?

4. Yɛɛ chɔm yɛ maa waŋndo kendu o Mɛlɛka piɛiyo niŋ?

⁴ Kilisiɔŋnɔ kendu o Mɛlɛka piɛiyo niŋndo, cho wana diikuŋ sawala Mɛlɛkalaŋ kpou wo ni. O hɛli la o hɛnaŋ ndaŋ, okoŋ mbo kɛɛ la o hɛnaŋ te laŋ tolɔɔ kɔɔli le. I cho tonya maa, le mɛɛ o cho wana hakioo yɛ, mbo tosa biondɔŋndaŋ. A koŋ kpou, mbo chɔm o yoomu ndɔɔ niŋ lepaa o lepaa maa, mɛɛ o yiyaŋ yɛ vɛlɛ a mɛɛ o tosa sɔɔŋ yɛ chɛlaŋ a hɛnaŋ Mɛlɛkaa. Mbo wounuŋ wanachieeyɛi sɛnɛiye, nduyɛ mbo kindiŋ kpoke, le mi yiyaŋnda ndɔlaŋ la chɛlaŋ a yiyaŋnda Mɛlɛkalaŋ. (Ɛfi. 4:22-24) Mbo pɛɛku le kɛɛsiaalaŋ tosaa a taasi, nduyɛ mi kɛɛsiaala ndɔlaŋ la tɔlnuŋ o sawala Chɛhowalaŋ vɛlɛ a o sawala ndɔla mandaalaŋ choo. Lelaŋ, o nɔ lasawa o yau choo, le ndu chɔmndo nyɛ o nɔ mbo tosa wo le. Nduyɛ kɛɛsiaa kɛ kɛ o tosa pɛ, mbo kindiŋ kpoke le ndu dɔwɔɔ o wali niŋ.—1 Kɔliŋ. 9:26, 27.

5. Yɛɛ yɔŋnuŋ yɛ wanaa kindu o Mɛlɛka piɛiyo niŋ te wa? (Ɛfisiaŋnda 4:14, 15)

⁵ O baa pilɔɔ choo, mi i wa tɛtɛlɛ le mi Kilisiɔŋaa kindu o Mɛlɛka piɛiyo niŋ te wa laalaŋ wanaa pɛɛkaa lachoowaa, aayoo wo, bundɔŋ vɛlɛ a yooŋgula lachoowalaŋ o intanɛtiiyo choo. Nduyɛ, haupa mi wanaa simul piɛile tonyaleŋ nda hui nda.b (Nuawɔ Ɛfisiaŋnda 4:14, 15.) Naapum mi Kilisiɔŋnɔ waa nuaa nɔ ŋgɛbɛ ŋgɛbɛlaŋ, kaa paŋalɛiyo, nduyɛ mbo kaala vɛlɛ sɛɛŋgiaŋndaŋ tau. O faŋaŋ okoŋ kɔɔli, haupa mi Kilisiɔŋnɔ waa nuaa luei balaŋ o sɔɔŋ wɔɔŋndoŋ niŋ.—1 Kɔliŋ. 3:3.

6. A yɛɛ naŋ tuu yɛ simnɔŋndo kaasoŋnɔɔ o Mɛlɛka piɛiyo niŋ? (Tofa vɛlɛ fotueiyo.)

⁶ A mɛɛ naŋ che o kandɔŋndo yɛ, Baabuiyo tuu simnɔŋndo kaasoŋnɔɔ o Mɛlɛka piɛiyo niŋ, a mɛɛ chuaambɔɔ hindu mbo simnuŋ kaasoŋnɔɔ yɛ. Teleŋ waŋndo wa chɛlɛkpɛ wo, o nɔ taasi bɔɔ le. Lelaŋ, mɛɛ mi kaasoŋnɔɔ manda ndu, vɛlɛ mbo kɛsi ndu hɔlteŋ choo. Le tamaseliiyo, mi kala chuaa bii chua ndɔɔ baa, te a wa pɛ nɛi bɛndoo taŋɔɔ. Kɛ mɛɛ chua ndɔ koŋ hindu fau, lende koni o chɛl ndu ni, le mbo wa nɛi bɛndoo taŋɔɔ a ba ndɔ. A koŋ kpou, mbo wa ndu loonɔŋndo teleŋ o teleŋ maa, o nɔ mbo mɛɛndiaŋ fɛŋ tuupa mbo taŋ. Nduyɛ te chua ndɔ koŋ simnuŋ pɛ kaasoŋnɔɔ, mbo wa niŋ yekeŋ te o wa pɛ nɛi bɛndoo taŋɔɔ. Mi chuaambɔɔ yeema malaa kaasoŋnɔɔ o ba, le kpundɔɔ fafaŋndo. O nɛi pilɛ koŋ choo, teleŋnda bɔɔbɔɔ, mi Kilisiɔŋnɔ kindu wɔ o Mɛlɛka piɛiyo niŋ te wo yeema malaa, Kilisiɔŋaa kendu o Mɛlɛka piɛiyo niŋnda o ba, le kpundɔɔ fafaŋndo, vɛlɛ a le kɛɛsiaalaŋ tosaa a taasi. Nduyɛ, te o simnuŋ pɛ Kilisiɔŋnɔ kendu o Mɛlɛka piɛiyo niŋndo, tuupa mbo tosa kɛɛsiaalaŋ, mbo yiyaŋ fɛŋ a sawala mandaala Baabuiyo okɔɔ, le halikpeŋ mbo nɔ yiyaŋ Mɛlɛkaa o suɛi keŋ choo, okoŋ mbo tol laŋ kɔɔli.

7. Baa Kilisiɔŋnɔ kendu o Mɛlɛka piɛiyo niŋndo bɛɛ yeema pa malaa acheleŋnda o ba?

⁷ Baa hei sim ni maa Kilisiɔŋnɔ kendu o Mɛlɛka piɛiyo niŋndo yeema mala wana cheleŋ o ba le? Sako. Teleŋndaŋ lapum, Kilisiɔŋaa kendu o Mɛlɛka piɛiyo niŋnda bɛɛ nɔ ma nyuna le malaa. Kɛ, mi wana kindu o Mɛlɛka piɛiyo niŋ te wo wa acheleŋnda kɔl, le ma dimul ndu nyɛ o nɔ mbo tosa wo, ɔɔ kɛɛsiaa o nɔ mbo tosa wo, mi che bɛɛ ndupila nɔ ni mbo tosa kɛɛsiaa a ba ndɔ. O baa pilɔɔ choo, mi Kilisiɔŋnɔ kendu o Mɛlɛka piɛiyo niŋndo yiyaŋ a sila taasi wanaa cheleŋnda ke ndu wo, vɛlɛ a sɔɔŋ ndaŋ yɔŋnaŋndoŋ. Nduyɛ o sina maa, kalaŋ ndɔɔ i cho ni le kɛɛsiaalaŋ tosaa a ba ndɔ. Kanifuule, Baabuiyo dimi maa, “wana o wana cho kalaŋndo o ndɔɔ siilɔŋ.”—Kalee. 6:5.

8. Teŋgeŋnda kuɛɛ cho yɛ Kilisiɔŋaa kendu o Mɛlɛka piɛiyo niŋnda tɛɛŋ?

⁸ Teŋgeŋndo cho wanaa simnuŋ kaasoŋnda o dialuŋ niŋnda tɛɛŋ. O nɛi pilɛ koŋ choo, teŋgeŋndo cho Kilisiɔŋaa kendu o Mɛlɛka piɛiyo niŋnda tɛɛŋ, te o hiŋ pɛ a suliŋnda leKilisiɔŋndaŋ okɔɔ. Mɛɛ taasioo, kɔl simulaa, kɛndɛi, a nyiɛɛye cho nuaa yɛ. Le handɔɔ lechoo, te Kilisiɔŋaa kendu o Mɛlɛka piɛiyo niŋnda a ŋiɔɔŋ nɔ pɛ bahawɛi pilɔɔ kpe, ma tosa kɛɛsiaala tɔlnuŋ o Baabuiyo choo laŋ, kɛ la ve kɛɛsiaala pilɛ le. Mi hei yɔŋnuŋ, te o kɛ kɛ tol pɛ kɔl ndɔ iyamaa kɔɔli, le kɛɛsiaala laŋ tosaa. Te Kilisiɔŋnɔ kendu o Mɛlɛka piɛiyo niŋndo sina pɛ hei, keŋ mala ndu o kilul chaaŋ ndɔ yamɛi, le kɛɛsiaa o tosa wo le. Kɛ, mbo hiou lachi a waa o diompilɔɔ niŋ a chaaŋ ndɔ.—Luomaŋ. 14:10; 1 Kɔliŋ. 1:10.

YƐƐ NAŊ NƆ YƐ MIŊ TOSA LE MIŊ SIMNUŊ KILISIƆŊAA KENDU O MƐLƐKA PIƐIYO NIŊNDA?

9. Baa o lepilɛ niŋ kpe naŋ simnuŋ Kilisiɔŋaa kendu o Mɛlɛka piɛiyo niŋnda ni? Tɛɛsiaawɔ.

⁹ Mɛɛ teleŋndo hiau fau, lende koni chuaambɔɔ hindu ni, hali mbo tosa bɛɛ nyɛ o nyɛ le. Kɛ, le mi waŋndo simnuŋ kaasoŋnɔɔ o Mɛlɛka piɛiyo niŋ, mɛɛ mbo dɔu sɛmbɔɔ tau. Le tamaseliiyo, mɛɛ puaapiliaa a ndepiliaa o Kɔliŋ niŋ chɛl yooŋgu kɛndɔɔ, ma sɔla yiŋɔɔ, nduyɛ mi Mɛlɛka ke nda nyina ndɔ diandaa. Okoŋ kɔɔli, ma sɔla tɔnɔɔ tau o silala kiilanɔɔ Pɔɔl ke ndalaŋ niŋ. (Walta. 18:8-11) A koŋ kpou, a bɔɔbɔɔ wa wɔ Kilisiɔŋaa kindu o Mɛlɛka piɛiyo niŋ te wa. (1 Kɔliŋ. 3:2) Vɛɛ naŋ fafaŋ yɛ i waa nuaa?

10. Yɛɛ naŋ nɔ yɛ miŋ tosa le miŋ simnuŋ Kilisiɔŋaa kendu o Mɛlɛka piɛiyo niŋnda? (Chudi 20)

¹⁰ Le miŋ simnuŋ Kilisiɔŋaa kendu o Mɛlɛka piɛiyo niŋnda, ŋ nɔ fɛŋ mi nɔ yeemɛi le keŋ tosaa. Mi wanaa kaala waa ‘wanaa nɔ taasi bɔɔ le wa’ naŋ kɔl, le ma hiou lachi a waa wanaa kindu o Mɛlɛka piɛiyo niŋ te wa. Nduyɛ, a tosa hiouwɔɔ lachi kposoŋ te. (Pulɔ. 1:22) Pesiŋ bɛɛ ŋ yeema miŋ wa maa wanaa simnuŋ kaasoŋnda o dialloŋ niŋ, ma wa wɔ wanaa velu nda wa kɔl, le nda kɛɛsiaalaŋ tosallo wa le. Kɛ, naapila nɔ ni miŋ kindi chaŋyɛi nɛi a Chɛhowa, vɛlɛ miŋ simnuŋ kaasoŋnda o ndu piɛiyo niŋ. (Nuawɔ Chudi 20.) Te o yɔŋ pɛ maa a cho wɔ wallo tosaa kalaŋ le simnɔŋndo kaasoŋnɔɔ o Mɛlɛka piɛiyo niŋ, mɛɛ piɛi o Chɛhowa lo le ma nɔ “yeemɛi a kpaayaa le hɛnaŋ ndɔɔ tosaa.”—Filipi. 2:13.

11. Yɛɛ Chɛhowa ke yɛ naa le naa malaa miŋ simnuŋ kaasoŋnda o ndu piɛiyo niŋ? (Ɛfisiaŋnda 4:11-13)

¹¹ Chɛhowa cho naa kɔl le miŋ simnuŋ kaasoŋnda o ndu piɛiyo niŋ a ba naa le. O ke naa wanaa mandaa lasaa, a wanaa pɛɛkaa o kundaa niŋ, le naa malaa miŋ simnuŋ “kaasoŋnda” o ndu piɛiyo niŋ, nduyɛ “okoŋ kɔɔli, miŋ simnuŋ kɛsɛ maa Kiliti.” (Nuawɔ Ɛfisiaŋnda 4:11-13.) O ke naa vɛlɛ nyina ndɔ diandaa, le naa malaa miŋ nɔ “yiyaŋ Kiliti wo.” (1 Kɔliŋ. 2:14-16) Le handɔɔ lechoo, mbo ke puaa nyina ndɔ diandaa, le ma poonyiaa yaula hiɔɔlula soo a yoomu Chiisu wo okɔɔ laŋ, le naa chɔmndo mɛɛ Chiisu ndoo yiyaŋ yɛ, mɛɛ ndoo suaa yɛ, vɛlɛ a mɛɛ ndoo tosa sɔɔŋ yɛ teleŋ o wa wali pollo tosaa o lɛŋndeŋ choo wo. Te ŋ tol pɛ tamasi Chiisu wo kɔɔli o yiyaŋnda naalaŋ niŋ vɛlɛ a mɛɛ naŋ tosa sɔɔŋ yɛ, keŋ mala naa miŋ simnuŋ Kilisiɔŋaa kendu o Mɛlɛka piɛiyo niŋnda.

VƐƐ NYƐDIAA SIKPAA DIOO MALA YƐ NAA MIŊ SIMNUŊ KILISIƆŊAA KENDU O MƐLƐKA PIƐIYO NIŊNDA?

12. Yɛɛ sɔɔŋ taseŋ cho a Kiliti okɔɔ woŋ sim yɛ?

¹² Le miŋ simnuŋ Kilisiɔŋaa kendu o Mɛlɛka piɛiyo niŋnda, ŋ nɔ miŋ ‘chii sɔɔŋ taseŋ cho a Kiliti okɔɔ woŋ’ pɛɛku. Sɔɔŋ muŋ cho pɛɛkula kpeekpeila cho o Baabuiyo niŋndaŋ ni. Pɛɛkulaŋ ndaŋ latiŋ la cho ni, hakioo malɔɔ, laalaŋndo nɔɔ, yiŋɔɔ sɔlaa, a tiindaŋndo nɔɔ maa waŋnda cho miiŋgu yoomu. (Hibu. 6:1, 2) Kilisiɔŋnɔ kɛ kɛ nɔ mbo laalaŋ pɛɛkulaŋ ndaŋ. Lelaŋ, mɛɛ kiilanɔɔ Pitɛ wa suɛi o waŋnda lo o paale Pɛŋtikɔɔsileŋ choo, mbo suaa a laŋ okɔɔ. (Walta. 2:32-35, 38) Nduyɛ, le miŋ simnuŋ buɛiyaa Kiliti wa, mɛɛ miŋ chɛl pɛɛkula taselaŋ ndaŋ. Le tamaseliiyo, mi Pɔɔl dimi maa, wana o wana laalaŋ maa waŋnda cho miiŋgu yoomu le, mɛɛ o ve buɛi Kiliti wo le. (1 Kɔliŋ. 15:12-14) A koŋ kpou, o cho ko sɔɔŋ tasoŋ muŋ te naŋ nɔ miŋ pɛɛku le. Ŋ nɔ miŋ hiou lachi a pɛɛkoo, le halikpeŋ miŋ simnuŋ Kilisiɔŋaa kendu o Mɛlɛka piɛiyo niŋnda.

13. Yɛɛ naŋ nɔ yɛ miŋ tosa, le miŋ sɔla tɔnɔɔ o nyɛdiaa sikpa Hibuluiya 5:14 soo a ndu okɔɔ wo niŋ? (Tofa vɛlɛ fotueiyo.)

¹³ Nyɛdiaa sikpaa cho teŋgeŋ a sɔɔŋ taseŋ naŋ pɛɛku woŋ kanifuule, nyɛdiaa sikpaa tolnuŋ ko o sawala Chɛhowalaŋ choo le, kɛ o tɔlnuŋ vɛlɛ o sawala mandaalaŋ choo, la mala naa miŋ bii yiyaŋnda ndɔlaŋ bila laŋ. Nduyɛ le miŋ sɔla tɔnɔɔ leniŋ, ŋ nɔ miŋ pɛɛku Diom Mɛlɛkaa, miŋ yiyaŋ lechoo yiŋgoloŋ, vɛlɛ miŋ dɔu nyɛ naŋ pɛɛku wo o wali niŋ. Hei tosaa mala naa miŋ pɛɛku le kɛɛsiaala nɛŋi Chɛhowa kɔllo laŋ tosaa.c—Nuawɔ Hibuluiya 5:14.

14. Vɛɛ Pɔɔl ndoo mala yɛ Kɔliŋtiaŋnda le ma simnuŋ Kilisiɔŋaa kendu o Mɛlɛka piɛiyo niŋnda?

¹⁴ Teleŋndaŋ lapum, mi Kilisiɔŋnɔ kindu o Mɛlɛka piɛiyo niŋ te wo saŋga tau, te o sɔla pɛ bahawɛi o nɔ mbo yiyaŋ a sawala mandaala Baabuiyo okɔɔ, okoŋ mbo dɔu laŋ o wali niŋndo. Te sawa ve o Baabuiyo niŋ a bahawɛi komal ndu wo okɔɔ le, mbo yiyaŋ maa o nɔla mbo tosa nyɛ o nyɛ o yeema pɛ. Lepum, mi apum nyuna te sawa cho pɛ a suɛi waa lende okɔɔ. Kɛ o kpeekpei niŋ, sawa ve a ndi okɔɔ le. Le tamaseliiyo, naapum mi Kilisiɔŋnda o Kɔliŋ niŋ nyuna Pɔɔl, te sawa cho pɛ a nyɛdiaa lasooluuwo dioo okɔɔ. Pɔɔl dimul nda nyɛ nda nɔ ma tosa wo le. Kɛ mbo dimul nda maa, a nɔ ma tol kɔlta ndala iyamalaŋ kɔɔli kanifuule, wana o wana nɔ dioo “le sɔɔŋ hɛlioo” a ba ndɔ. Mbo chɔm nda sawala mandaala mala nda, ma tosa kɛɛsiaala paaliaŋ kɔlta ndala iyamalaŋ, vɛlɛ a kɔlta iyamala acheleŋnda le. (1 Kɔliŋ. 8:4, 7-9) O hei niŋ, Pɔɔl wa Kɔliŋtiaŋnda malaa le ma simnuŋ kaasoŋnda o Mɛlɛka piɛiyo niŋ, okoŋ ma soliŋ kɔl kalu ndaa kpeku le kɛɛsiaalaŋ tosaa a ba nda, a ve acheleŋnda kɔl, le ma tosal nda kɛɛsiaalaŋ ɔɔ ma chɔm nda sawalaŋ a sɔɔŋ komal nda woŋ okɔɔ le.

15. Vɛɛ Pɔɔl ndoo mala yɛ Kilisiɔŋaa Hibuluiya, le ma simnuŋ Kilisiɔŋaa kendu o Mɛlɛka piɛiyo niŋnda?

¹⁵ Ŋ tiuba miŋ pɛɛku suɛi sɔvɛ sɔvɛi o nyɛ Pɔɔl poonyial Kilisiɔŋaa Hibuluiya wo niŋ. Kilisiɔŋaa kaŋ apum ndaa kindu wɔ o Mɛlɛka piɛiyo niŋ te. Nduyɛ pɛŋ, apum ndaa “tiu wɔ ba nyɛdiaa sikpaa dioo le, mɛɛ mɛɛyaŋ.” (Hibu. 5:12) Kilisiɔŋnda haa ndaa pɛɛku wɔ sɔɔŋ sɛnɛi Chɛhowa wa nda pɛɛkoo woŋ, okoŋ ma chɛl muŋ te. (Pulɔ. 4:18) Le tamaseliiyo, Chuuwaa ndaa simnuŋ wanaa laalaŋnda wa, wa wɔ hiouwɔɔ lachi a sawala Muuselaŋ diikɔŋndo, mi che bɛɛ wɔsilaŋ 30 laa hiou niŋ ni, chɔŋ a teleŋ sala soliaŋ Kiliti wo faŋa sawala laŋ ndo. (Luomaŋ. 10:4; Tai. 1:10) A tonya, Chuuwaa ndaa simnuŋ Kilisiɔŋnda wa ndaa tiuba ma siɛɛnduu yiyaŋnda ndalaŋ, o wɔsila 30 la laŋ bɛŋgu. Kanifuule, wana o wana ndoo veelu pɛ diomndaŋ o yau Pɔɔl poonyial Hibuluiya wo niŋ, o wa chɔ kɛsɛ maa a nyɛdiaa sikpaa okɔɔ Pɔɔl ndoo poonyial nda ni. Nduyɛ mi yau koŋ mala nda le ma che maa, sanaa a Chiisu, Chɛhowa kila nɛi sɛnɛiyo le ndu piɛiyo. Mi yau koŋ mala vɛlɛ nda le ma nɔ kɔl simulaa le yooŋgu kɛndɔɔ dimioo, mi che bɛɛ Chuuwa wa nda simullo.—Hibu. 10:19-23.

LE YƐƐ Ŋ NƆ MIŊ HIU TIINDAŊNDO DƆWƆƆ O NAAPILA NIŊ TE?

16. Yɛɛ naŋ nɔ yɛ miŋ tosa le miŋ hiou lachi a simnɔŋndo kaasoŋnda o Mɛlɛka piɛiyo niŋ?

¹⁶ Ŋ nɔ ko miŋ tosa wallo kalaŋ le simnɔŋndo Kilisiɔŋaa kendu o Mɛlɛka piɛiyo niŋnda le. Kɛ ŋ nɔ miŋ hiou lachi a waa lende. Hei sim ni maa, ŋ nɔ miŋ hiu tiindaŋndo dɔwɔɔ o naapila niŋ te. (1 Kɔliŋ. 10:12) Ŋ nɔ miŋ hiou lachi a ‘yaasiaŋndo nyɛkɛndɛi,’ le sinaa te ŋ cho pɛ hiouwɔɔ lachioo tosaa.—2 Kɔliŋ. 13:5.

17. Vɛɛ yau Pɔɔl poonyial Koloosiaŋnda wo chɔm yɛ, mɛɛ i cho suɛi sɔvɛ le miŋ hiou lachi a waa Kilisiɔŋaa kendu o Mɛlɛka piɛiyo niŋnda yɛ?

¹⁷ Mɛɛ Pɔɔl wa Koloosiaŋnda yauwo poonyiallo, mbo kindila mɛɛ i cho suɛi sɔvɛ, le miŋ hiou lachi a waa Kilisiɔŋaa kendu o Mɛlɛka piɛiyo niŋnda yɛ. Mi che bɛɛ Kilisiɔŋaa kaŋ ndaa simnuŋ niŋ kaasoŋnda o Mɛlɛka piɛiyo niŋ, kɛ mi Pɔɔl sila nda maa, a nɔ ma wa yekeŋ yɔŋii nda chɛl le mi yiyaŋnda chieeŋndo la piiliaŋ nda. (Kolo. 2:6-10) Naapum, Ɛpafulɔɔ ndoo sina Kilisiɔŋaa kaŋ nyɛkɛndɛi. Lelaŋ, teleŋ o teleŋ mi ndoo piɛi le nda, le ma “sim yi, nduyɛ kiisaŋ o kiisaŋ ve” nda le. (Kolo. 4:12) Yɛɛ naŋ pɛɛku yɛ o hei niŋ? Ŋ pɛɛku maa, Pɔɔl nda Ɛpafulɔɔ ndaa bii bila maa, mi che bɛɛ ŋ nɔ miŋ nyuna Mɛlɛka le mbo mala naa miŋ hiou lachi a waa Kilisiɔŋaa kendu o ndu piɛiyo niŋnda, kɛ naapila bɛɛ nɔ miŋ dɔu sɛmbɔɔ. Ndaa yeema mi Koloosiaŋnda ndaa hiou lachi a waa Kilisiɔŋaa kendu o Mɛlɛka piɛiyo niŋnda, mi che bɛɛ simulta yɛ yɛlaŋ la wa nda komallo.

18. Yɛɛ tiu yɛ ba mbo yɔŋnuŋ a Kilisiɔŋnɔ kendu o Mɛlɛka piɛiyo niŋndo? (Tofa vɛlɛ fotueiyo.)

¹⁸ Mi Pɔɔl sila Hibuluiya maa, Kilisiɔŋnɔ kendu o Mɛlɛka piɛiyo niŋndo bɛɛ, chaŋyɛi nduɛi a Chɛhowa tiuba mi i hɛluŋ ndu. Te Kilisiɔŋnɔɔ kɛɛ pɛ le sawala Chɛhowalaŋ diikɔŋndo, mi keŋ tosa mbo wa landaŋ a ndu, o yeema lɛ mbo siŋgaŋ, okoŋ mbo sɔla malɔɔ hakioo le. Kɛ i cho suɛi kɔl kɛndɛ le sinaa maa, kposoŋ bɛɛ i waa nuaa ndii yɔŋnuŋndɔ a Kilisiɔŋaa Hibuluiya le. (Hibu. 6:4-9) Ɔɔ niŋ wanaa kialu hau kɔlaŋ o bɔŋaŋndaŋ a o wali pollo niŋ, vɛlɛ a wanaa sɔla solioo o kundaa niŋ kɛ ma miiŋgu wa? Nyɛ waŋnda haa tosa wo chɔm maa, a cho teŋgeŋ a wanaa Pɔɔl poonyiaa a nda okɔɔ wa. A koŋ kpou, te a miiŋgu pɛ Chɛhowa o ibuŋ, a nɔ ma sɔla malaa ndu o ba. (Isi. 34:15, 16) Lepum, mi bɛnduaa kundaa kɛɛsiaa le mi Kilisiɔŋnɔ kendu o Mɛlɛka piɛiyo niŋndo mala wanaa waa nuaa, le ma miiŋgu yoomuaŋ sɔla o Chɛhowa piɛiyo niŋ.

19. Kpeleŋ kuɛɛ naŋ nɔ yɛ miŋ nɔ?

¹⁹ Te o yɔŋ pɛ maa a cho wallo tosaa kalaŋ le simnɔŋndo Kilisiɔŋnɔ kendu o Mɛlɛka piɛiyo niŋndo, mɛɛ nɔ tiindaŋndo maa a cho kpeleŋ numndo komal. Hiou lachi a nyɛdiaa sikpaa dioo, vɛlɛ ma kindiŋ kpoke le mi yiyaŋnda numndaŋ la chɛlaŋ a yiyaŋnda Chɛhowalaŋ. Nduyɛ te o yɔŋ pɛ maa a simnuŋ niŋ Kilisiɔŋnɔ kendu o Mɛlɛka piɛiyo niŋndo, kindiŋ kpoke le ma hiou lachi a waa lende.