Sɔɔŋ Sɔvɛ Naŋ Pɛɛku Masaa o Isɔluɛi Niŋnda o Ba Woŋ

1-2. Yɛɛ Baabuiyo dimi yɛ a masaa Isɔluɛi atiŋ okɔɔ?

BAABUIYO soo a puaa hiouwɔɔ 40 okɔɔ, a keeku o masaleŋ choo o Isɔluɛi niŋnda.a Nduyɛ mbo chɔm naa kpendekele sɔɔŋ puaa haa apum tosa woŋ. Le tamaseliiyo, hali masaa kɛndiaa bɛɛ ma tosa sɔɔŋ wɔɔŋndoŋ ŋpum. Ŋ tofaŋndɔ tamasi Masaa Deeve wo. Mi Chɛhowa dimi aa: “[Mi] buɛi nuu Deeve . . . tual la kɔɔli a kɔl ndɔɔ kpou. Nyɛ wa sakpo ya o hɔl lo suee ndoo tosa ni.” (1 Masaa. 14:8) A koŋ kpou, mbo suunda a lanɔ pilaa, nduyɛ mbo nuuviaa nɛilaŋ le ma dii pɔnɔɔ chua koŋ o chɔuwo.—2 Saam. 11:​4, 14, 15.

² Baabuiyo soo vɛlɛ a sɔɔŋ kɛndɔŋ ŋtiŋ ŋ masaa kɛɛ lo lechoo wo chɔmndo wa tosa woŋ. Ŋ tofaŋndɔ tamasi Luihobowam ndo. Mi Chɛhowa dimi a ndu okɔɔ maa, mbo “tosa yɔŋ wɔɔŋndo.” (2 Kolo. 12:14) Kɛ mi Luihobowam tosa sɔɔŋ kɛndɔŋ ŋtiŋ. Le tamaseliiyo, mbo diikuŋ Chɛhowa mɛɛ o dimul ndu maa, o sɔŋga a kayii tɔ ve pilɛi Isɔluɛi le, nduyɛ maa o mal nda ma chua masaa a ba nda. Mbo taŋgul vɛlɛ chiooŋ tau, ŋ balaa a saasala kala kalalaŋ, le wanaa Mɛlɛkaa mandaa yaamɔɔwaa ndaa tiu nda ba le.—1 Masaa. 12:​21-24; 2 Kolo. 11:​5-12.

3. A nyuna sɔvɛ kuɛɛ okɔɔ naŋ cho yɛ isɔɔ, nduyɛ yɛɛ naŋ cho yɛ pɛɛku o buŋgɛi hei niŋ?

³ Te o yɔŋ pɛ maa mi masaa o Isɔluɛi niŋ sindɛ tosa sɔɔŋ kɛndɔŋ a ŋ wɔɔŋndoŋ, mɛɛ vɛɛ naŋ looku yɛ sina masaa chɔm lo lechoo wo o Chɛhowa lo wa? Muli nyunaa hoo cho naa mala miŋ bii bila nyɛ naŋ nɔ miŋ tosa le Chɛhowa kɔllo nɛŋioo wo. Ŋ cho yaasiaa sɔɔŋ ŋgaa, ŋ Chɛhowa ndoo handu kɔllo choo woŋ le chɔmndo te waŋndo ndoo wa pɛ masa kɛndɛ ɔɔ masa wɔɔŋ. O tasoo, baa masaa hoo ndoo kaala pa Chɛhowa a kɔl ndɔɔ kpou? O diiŋ ndɔɔ, baa mbo wookuŋ pa mɛɛ o tosa yɔŋ wɔɔŋndo? O yaa ndɔɔ, baa mi masaa hoo hiau pa lachi a Chɛhowa piɛiyo o laalaŋndo choo?

MA PIƐI CHƐHOWA A KƆL NDAA KPOU

4. Ɔɔ teŋgeŋ wa masaa ndaa nɔ laalaŋndo wa tɛɛŋ, a masaa ndaa nɔ laalaŋ te wa?

⁴ Masaa nɛŋi Chɛhowa kɔllo wa cho masaa kindiŋ le ndu piɛiyo a kɔllo kpou wa ni.b Chɛhosiafati wa masa kɛndɛ, nduyɛ ‘mbo tosa nyɛ bɛnda Chɛhowa o hɔl lo a kɔl ndɔɔ kpou.’ (2 Kolo. 22:9) Mi Baabuiyo dimi a Choosaya okɔɔ aa: “Masaa keeku ndu lachi wa ni, a hiŋ o ndu kɔɔli wa ni, wana o wana miiŋgu Chɛhowa o ibuŋ . . . maa ndu le.” (2 Masaa. 23:25) Kɛ, ɔɔ niŋ Sɔlɔmɔŋ o tosa sɔɔŋ wɔɔŋndoŋ tau o yuwɛi nduɛi niŋndo? O ‘ve lɛ Chɛhowa Mɛlɛka ndɔɔ piɛiyo a kɔllo kpou le.’ (1 Masaa. 11:4) Mi Baabuiyo suaa a Abaicham okɔɔ, o ndoo nɔ laalaŋ o Chɛhowa niŋ te wo aa: “O piɛi Chɛhowa a kɔllo kpou le.”—1 Masaa. 15:3.

5. Tɛɛsiaawɔ nyɛ o sim le Chɛhowa piɛiyo a kɔllo kpou wo.

⁵ Yɛɛ kpeekpei o sim yɛ le Chɛhowa piɛiyo a kɔllo kpou? Wana piɛi hoo Mɛlɛka a kɔl ndɔɔ kpou wo, o piɛi ndu le mɛɛ i cho ndu kuee yɛ le. Kɛ mbo piɛi ndu kanifuule o nɔ kaala a bɛɛle yiŋgoloŋndeŋ le ndu. Nduyɛ mbo hiou lachi a kaalaa nɔɔ le Chɛhowa a ndu bɛɛleŋ kioo haaa o yoomu ndɔɔ mɛɛlulaŋ.

6. Yɛɛ naŋ nɔ yɛ miŋ tosa le miŋ hiou lachi a Chɛhowa piɛiyo a kɔllo kpou? (Polowaa 4:23; Maatiu 5:​29, 30)

⁶ Vɛɛ naŋ tual lɛ tamasi masaa ndaa kaala Chɛhowa a kɔl ndaa kpou wa kɔɔli? Ŋ nɔ miŋ fafaŋ nyɛ o nyɛ tosa mi kaala naa le Chɛhowa tol toolo wo. Le tamaseliiyo, ŋ nɔ miŋ wa yekeŋ a wunduma naŋ tofa waŋ ɔɔ yelelaŋ cheleŋ. Ŋ nɔ vɛlɛ miŋ wa yekeŋ a chaŋyaŋ naŋ hɛli woŋ, yɔŋii naŋ kandu yiyaŋndo maa nyɛsɔlaa nɔɔ tau hiou wa o sɔvɛ o yoomoo niŋ. Te ŋ saaluŋ pɛ maa suɛi pum cho tosaa mi kaala naŋ nɔ le Chɛhowa wo kandu tolɔɔ toolo, ŋ nɔ miŋ dɔu sɛmbɔɔ le kaa naa a yiyaŋnda naalaŋ siŋgaa chɔ chɔ yɔŋii la tosa mi chaŋyɛi naŋ nɔ a Chɛhowa ve hɛluŋ naa.—Nuawɔ Polowaa 4:23; Maatiu 5:​29, 30.

7. Le yɛɛ o cho yɛ suɛi sɔvɛ le miŋ kɛɛ nyɛ o nyɛ tosa mi chaŋyɛi naŋ nɔ a Chɛhowa ve yɔŋyɔla ve?

⁷ Ŋ nɔ miŋ chɛl kposoŋ mi kɔl naa hui naa le. Te ŋ ve yekeŋ te, miŋ yiyaŋ maa le mɛɛ naŋ cho kpɔndi kpɔndi o Chɛhowa piɛiyo niŋ yɛ, chaŋyaŋ wɔɔŋndoŋ nɔla miŋ tiu naa ba le. Le tamaseliiyo, yiyaŋndɔ maa chiɛi numndo cho o nɛiyo daŋgala naa mɔmbiltaŋ la hiau tau wa, nduyɛ chundoo pila la heelu ni. Baa a cho pa diolaŋ a wundɛilaŋ mɛi la kumbiaa te a chii pɛ chiɛi numndo dindi leniŋ? Te ŋ mɛi laŋ la kumbiaa pɛ chundoo cho vɛlɛ miiŋgu mbo pɛ chiɛiniŋ cha. Ŋ tuu tamaseliiyo hoo a chaŋyɛi naŋ nɔ a Chɛhowa ve. O cho ko sɔɔŋ mala naa miŋ sɔɔŋguu Chɛhowa ikɛi kpɛɛluŋ ndoŋ te naŋ nɔ miŋ wa tosaa le. Ŋ nɔ miŋ kɛɛ nyɛ o nyɛ cho o chieeŋndo hoo niŋ, o tosa mi chaŋyɛi naŋ nɔ a Chɛhowa ve yɔŋyɔla ve.—Ɛfi. 2:2.

MA MULUL HAKILA NDALAŊ KƆƆ

8-9. Yɛɛ Masaa Deeve a Masaa Hɛsikaya tosa yɛ mɛɛ nda miŋgi nda o nɛi? (Tofa o kɔɔ.)

⁸ A mɛɛ naŋ pɛɛku o pɛl tasoo niŋ yɛ, mi Masaa Deeve tosa haki wɔɔŋ wɔɔŋndo. Kɛ mɛɛ Netaŋ wana ndoo suaa le Mɛlɛka wo dimul Deeve mɛɛ Chɛhowa ndoo tambu kɔl lɛ, mbo tusiŋ okoŋ mbo mulul yɔŋ ndɔ wɔɔŋndo kɔɔ. (2 Saam. 12:13) O cho le Netaŋ huiyo le Deeve chɔm maa o tambu kɔl le nyɛ o tosa wo le, kɛ wookɔŋndo kɛsɛ ndoo wookuŋ ni. Diomnda o poonyiaa o Sam bolle 51 niŋndo chɔm mɛɛ ndoo tambu kɔl a haki wɔɔŋ o tosa koŋ ndo yɛ.—Sam 51:​3, 4, 17.

⁹ Mi Masaa Hɛsikaya bɛɛ tosa hakioo a Chɛhowa. Mi Baabuiyo duaunuŋ kona a ndu okɔɔ aa: “Mi Hɛsikaya o tosa yoŋgaa, o sina kɛndɛi Mɛlɛka Yaawɛɛ o tosal ndu ve le. Le hei, mi Mɛlɛka tusi ndu, a waŋnda Chuda, a Chulusalɛm dɛnɛ palaa choo.” (2 Kolo. 32:25) Le yɛɛ Hɛsikaya ndoo heeluŋ yɛ? Naapum le mɛɛ Chɛhowa tosa mbo sɔla nyɛm kiɔɔŋ tau, mbo sɔla batiuwaa Asiiliaŋnda choo ɔɔ le mɛɛ Chɛhowa siŋgi ndu a naa wɔɔŋ wɔɔŋndo yɛ. Kɛlɛŋgaa nyɛ nyindu ndu le Babiloniaŋnda sulta ndɔlaŋ kpou chɔmndo wo wa kaa heelaŋndo ni. Lelaŋ, mi Aisaya wana ndoo suaa le Mɛlɛka wo dimul ndu maa Chɛhowa dɔunuŋ tumbe a ndu. (2 Masaa. 20:​12-18) Kɛ maa Deeve, mi Hɛsikaya bɛɛ tusiŋ, nduyɛ mbo wookuŋ. (2 Kolo. 32:26) Le hei, vɛɛ Chɛhowa ndoo che yɛ Hɛsikaya? Mbo cha ndu maa masa kɛndɛ ‘hiou lachi a nyɛ bɛnda wo tosaa wo,’ o wa ni.—2 Masaa. 18:3.

10. Yɛɛ Masaa Amasaya tosa yɛ mɛɛ nda ke ndu silaa?

¹⁰ Mi che bɛɛ mi Masaa Amasaya tosa nyɛ bɛnda Mɛlɛka hɔl lo, “kɛ o chɛl mbo yɔŋguŋ a kɔl ndɔɔ kpou” o ndu lo le. (2 Kolo. 25:2) Suɛi wɔɔŋ kuɛɛ ndoo tosa yɛ? Mɛɛ Chɛhowa mala ndu mbo sɔla batiuwaa Idɔmaitiiya choo, mbo kandu mɛlɛkaa ndaa sooluuwo.c Mɛɛ Chɛhowa soliŋ wana ndoo suaa le ndu wo kpeku le ndu silaa, o yeŋ ndu lani kposoŋ te, nduyɛ pɛŋ mbo tuau ndu.—2 Kolo. 25:​14-16.

11. A mɛɛ 2 Kɔliŋtiaŋ 7:​9, 11 dimi yɛ, yɛɛ naŋ nɔ yɛ miŋ tosa le mi Chɛhowa mal naa haki? (Tofa vɛlɛ fotueilaŋ.)

¹¹ Yɛɛ naŋ pɛɛku yɛ o tamasilaŋ ndaŋ niŋ? Ŋ nɔ miŋ chɛl silaa te ŋ tosa pɛ haki wɔɔŋ wɔɔŋndo, nduyɛ miŋ kindiŋ o nɛi o nɛi niŋ, ŋ miŋgi lɛ ndu tosa le. Te o yɔŋ yɛ mi bɛnduaa kundaa ke naa silaa, o sɔɔŋ naŋ yiyaŋ maa ŋ cho ŋ sɔvɛ le woŋ choo? Ŋ nɔ miŋ yiyaŋ maa a tul naa leyɛ ɔɔ Chɛhowa kaala naa le le. Lepum masaa kɛndiaa o Isɔluɛi niŋ bɛɛ mi ndaa sɔla silaa, nduyɛ mi ndaa miŋgi nda o nɛi. (Hibu. 12:6) Te a sila naa pɛ, ŋ nɔ (1) miŋ chɔm kaa tusiaŋndo nduyɛ miŋ chɛl silaa, (2) miŋ tosa siŋgaŋnda yeemaŋ ndaŋ, nduyɛ (3) miŋ hiou lachi a Chɛhowa piɛiyo a kɔllo kpou. Te ŋ wookuŋ pɛ miŋ mulul haki naa kɔɔ, mi Chɛhowa mal naa haki fasɛi.—Nuawɔ 2 Kɔliŋtiaŋ 7:​9, 11.

MA PIƐI CHƐHOWA O NƐI SAKPOO CHOO

12. Yɛɛ kpeekpei wa yɛ teŋgeŋndo masaa ndaa chɔm laalaŋndo wa tɛɛŋ, a masaa kɛɛ laalaŋndo chɔmndo o Chɛhowa niŋnda?

¹² Chɛhowa o hɔl, masaa ndaa laalaŋ o ndu niŋnda, wa masaa piɛi ndu mɛɛ ndoo yeema yɛ ni. Nduyɛ mi ndaa dɛɛniaa vɛlɛ wanaa Chɛhowaa le ma tosa nyɛ pilɛ koŋ kpe. Kɛ a mɛɛ naŋ pɛɛku niŋ yɛ, lepum mi ndaa tosa biondɔŋndaŋ. A koŋ kpou, Chɛhowa kinɛi ndaa piɛi ni, nduyɛ ma kindiŋ le piɔmnda faŋaa o lɛŋnde ndaleŋ niŋ.d

13. Le yɛɛ Masaa Ehaabi wa yɛ masa dɛnɛ wɔɔŋ Chɛhowa o hɔl?

¹³ Le yɛɛ masaa apum wa yɛ, masaa wɔɔŋnda Chɛhowa o hɔl? O kpeekpei niŋ, o cho sɔɔŋ ndaa tosa woŋ kpou le muŋ wɔu le. Le tamaseliiyo, mɛɛ Masa dɛnɛ wɔɔŋndo Ehaabi tuei maa a dii Nabɔti le ndu, mbo tambu tiŋ kɔl, okoŋ mbo tusiŋ. (1 Masaa. 21:​27-29) Mbo taŋgul chiooŋ bɛndoŋ nduyɛ mbo sɔla batiuwaa tau yaamɔɔwaa Isɔluɛiya choo. (1 Masaa. 20:​21, 29; 22:39) Kɛ mi Ehaabi tosa suɛi wɔɔŋ wɔɔŋnde ipum. Ndi cho ni, mbo chɛl mi laa ndɔ nyindu ndu le piɛile lachoowaleŋ pɛŋgɛlaa o Isɔluɛi niŋ. Nduyɛ pesiŋ bɛɛ, o mulul yɔŋ ndɔ wɔɔŋndo kɔɔ le.—1 Masaa. 21:​25, 26.

14. (a) Le yɛɛ Masaa Luihobowam wa yɛ masa wɔɔŋ Chɛhowa o hɔl? (b) Suɛi wɔɔŋ kuɛɛ masaa bɔɔbɔɔ kɛɛ lo lechoo wo chɔmndo o Chɛhowa lo wa tosa yɛ?

¹⁴ Ŋ tofaŋndɔ tamasi Luihobowam ndo. Ndu bɛɛ masaa dɛnɛ wɔɔŋndo o wa ni. A mɛɛ naŋ soo a ndu okɔɔ o pɛl diiŋ ndɔɔ niŋ yɛ, mbo tosa sɔɔŋ kɛndɔŋ tau o masale ndɔleŋ bɛŋgu. Kɛ mɛɛ o simnuŋ masa kpaayaa bɛndu, mbo mal Sawala Chɛhowa laŋ diikɔŋndo, nduyɛ mbo kandu mɛlɛkaa lachoowaa piɛiyo. (2 Kolo. 12:1) Okoŋ, teleŋndaŋ lapum mi ndoo piɛi Chɛhowa, kɛ teleŋndaŋ lapum yɛ mi ndoo piɛi vɛlɛ mɛlɛkaa lachoowaa. (1 Masaa. 14:​21-24) O cho ko Luihobowam nda Ehaabi le wa masaa kɛɛ Chɛhowa piɛiyo o nɛi sakpoo choo wa le. O kpeekpei niŋ, mi masaa bɔɔbɔɔ kɛɛ lo lechoo wo chɔmndo o Chɛhowa lo wa, piɛi vɛlɛ mɛlɛkaa lachoowaa. Nduyɛ ma kindiŋ le wanaa wa o masale ndaleŋ bɛŋgu wa balaŋ lueiyo o piɛile lachoowaleŋ niŋ. I cho kpendekele maa Chɛhowa o hɔl, nyɛ kpeekpei ndoo chɔm teŋgeŋndo masa kɛndɔɔ tɛɛŋ a masa wɔɔŋndo wo, wa ndu piɛiyo o nɛi bɛnda wo choo ni.

15. Le yɛɛ lo lechoo wo chɔmndo o Chɛhowa lo, cho yɛ suɛi sɔvɛ o Mɛlɛka piɛiyo niŋ?

¹⁵ Le yɛɛ Chɛhowa piɛiyo o nɛi bɛnda wo choo wa yɛ suɛi sɔvɛ ndu o hɔl? Saboo opilɛ cho ni, masaa ndaa chua chilaŋ ni, le wanaa Mɛlɛkaa malaa ma piɛi Chɛhowa o nɛi sakpoo choo. O faŋaŋ okoŋ kɔɔli, te wanaa Mɛlɛkaa ndaa wa pɛ mɛlɛkaa lachoowaa piɛiyo, mi keŋ ndii nyindu nda le hakila wɔɔŋ wɔɔŋnda cheleŋ tosaa a acheleŋnda biyɔɔ wɔɔŋndo. (Hoosi. 4:​1, 2) Le handɔɔ lechoo, masaa Isɔluɛi a Isɔluɛiyaa tuaa kpou, wanaa wa a yɔŋgaŋ o Chɛhowa lo wa nda wa ni. Lelaŋ, te ndaa kɛɛ pɛ lo lechoo wo chɔmndo o Chɛhowa lo, nduyɛ mi ndaa kandu mɛlɛkaa lachoowaa piɛiyo, mi Baabuiyo ndoo tuu nda a wana lanɔ suundɛiyo. (Chɛlui. 3:​8, 9) Te waŋndo suunda pɛ, mi haki o tosa koŋ ndo tɛɛmbuu wana nda cho o nɔɔ niŋndo kɔllo tau. O nɛi pilɛ koŋ choo, te wana yɔŋguŋ o Chɛhowa lo wo luei pɛ balaŋ o piɛile lachoowaleŋ niŋ, mbo tɛɛmbuu Ndu kɔllo tau.e—Ditɔnɔ. 4:​23, 24.

16. Chɛhowa o hɔl, teŋgeŋ yɛɛ cho yɛ wana sakpoo tɛɛŋ a wana dɛnɛ wɔɔŋndo?

¹⁶ Sɔɔŋ yɛɛ naŋ pɛɛku yɛ? O kpeekpei niŋ, ŋ nɔ miŋ kɛɛsiaŋ o kɔl le nyɛ o nyɛ chiɛɛliaŋ a piɛile lachoowaleŋ fafaŋndo. O baa pilɔɔ choo, ŋ nɔ miŋ wa lɔɔlɔɔ Chɛhowa piɛiyo o nɛi o yeema wo choo, nduyɛ miŋ wa a tuandaŋ o wali ndɔɔ tosaa niŋ. Mi Malakai wana ndoo suaa le Mɛlɛka wo chɔm nyɛ tosa mi waŋndo wa sakpo Chɛhowa o hɔl lo, ɔɔ mbo wa wana dɛnɛ wɔɔŋndo wo. Mbo poonyiaa aa: “Wanaa niaa cho vɛlɛ yɛ yiɔɔ chɔ wanaa cho sakpo wa tɛɛŋ, a wanaa dɛnɛ wɔɔŋnda, nduyɛ ma che vɛlɛ yɛ yiɔɔ wanaa saaŋgial la wa tɛɛŋ, a wanaa saaŋgial la le wa.” (Mal. 3:18) Lelaŋ, te ŋ yeema pɛ miŋ wa wanaa sakpuaa Chɛhowa o hɔl, ŋ nɔ miŋ wa yekeŋ yɔŋii dialuŋ naŋ vilɛiyoŋ, biondɔŋnda naalaŋ ɔɔ nyɛ o nyɛ cheleŋ tosa miŋ mal Chɛhowa piɛiyo. Haki wɔɔŋ wɔɔŋndo o cho ni le Chɛhowa kiɔɔ piɛiyo.

17. Le yɛɛ naŋ nɔ yɛ miŋ wa yekeŋ, te ŋ wa pɛ wana naŋ cho ichali o nɔɔ niŋndo hɛlioo?

¹⁷ Te Yemboo ŋ cho ni nduyɛ ma wa kɛɛsiaa le nɔɔ chuaa, diomnda Malakai dimi laŋ la mala num le ma hɛli wana bɛnda le num, le mi la chal o nɔɔ niŋndo. O yɔŋ bɛɛ mi waŋndo nɔ suliŋnda kɛndɛlaŋ, kɛ te o ve Mɛlɛka tonyaa piɛi le, baa Chɛhowa che ndu pa maa wana sakpoo o cho ni? (2 Kɔliŋ. 6:14) Te la chal pɛ nya wana waa lende o nɔɔ niŋ, baa o mala num niŋ pa ma lo Chɛhowa piɛiyo o laalaŋndo choo? Yiyaŋndɔ a laanduaa Masaa Sɔlɔmɔŋ ndoo nɔ wa. Naapum ndaa nɔ suliŋnda kɛndɛlaŋ lapum. Kɛ le mɛɛ nda ve Chɛhowa piɛi le yɛ, o pɔmbɔ pɔmbɔ ma tosa mi Sɔlɔmɔŋ muliŋ mɛlɛkaa lachoowaa piɛiyo.—1 Masaa. 11:​1, 4.

18. Yɛɛ kalaŋ chuauwa nɔ yɛ ma pɛɛku chuauwaa ndaa?

¹⁸ Kalaŋ chuauwa, la tiuba mi la soliŋ tamaseliila masaa Baabuiyo soo a nda okɔɔ wa, le chuauwaa nyaa malaa ma nɔ yeemɛi le Chɛhowa piɛiyo. La nɔ mi la mala nda le ma bii bila maa masaa nɛŋi Chɛhowa kɔllo wa, wa masaa piɛi ndu o laalaŋndo choo, nduyɛ ma dɛɛniaa wanaa Chɛhowaa le ndu piɛiyo wa ni. La nɔ mi la pɛɛku nda, o nyɛ nya dimi wo vɛlɛ a o sɔɔŋ nya tosa woŋ niŋ, maa sɔɔŋ mala naa le sɔɔŋguuwo Chɛhowa ikɛiyoŋ, mɛɛ Baabuiyo pɛɛkoo, kɔlaŋ o bɔŋaŋndaŋ a yooŋgu kɛndɔɔ dimioo cho nuaa yɛ, cho sɔɔŋ hiou wa ŋ sɔvɛ o yoomula naalaŋ niŋndo ni. (Maa. 6:33) Te la tosa lende le, naapum mi chuauwaa nyaa yiyaŋ maa a nɔ ma piɛi Chɛhowa le mɛɛ wanaa velu nda wa cho Seiyaa Chɛhowaa yɛ. Nduyɛ mi keŋ tosa ndapila nɔ niŋ chaŋyɛi kpɛɛluŋnde a Chɛhowa le. Fulamakɔɔlioo wa ni, Chɛhowa piɛiyo ve niŋ suɛi sɔvɛ nda hɔl te, nduyɛ pɛŋ ma mal tonyaa.

19. Tiindaŋ yɛɛ cho yɛ le wanaa mal Chɛhowa piɛiyo wa? (Tofa vɛlɛ kɔfoo hoo, “A Nɔla Ma Miiŋgu Chɛhowa o Ibuŋ!”)

¹⁹ Te waŋndo mal pɛ Chɛhowa piɛiyo, baa o tiu lɛ ba mbo miŋgi chaŋyɛi ndoo nɔ a Chɛhowa ve? O Kpeekpei niŋ, o tiuba te o yɔŋ pɛ mbo mulul yɔŋndɔ wɔɔŋndo kɔɔ nduyɛ mbo miiŋgu Chɛhowa o ibuŋ. Le keŋ tosaa, naapum o nɔ mbo tusiŋ, nduyɛ mbo chɛl sila bɛnduaa cho ndu wa kioo wo. (Chemi. 5:14) Wana dimi isɔɔ a tonya, sala soliaŋ kɛ kɛ hiu o waŋndo tosa le mbo miiŋgu o chaŋyɛi kpɛɛluŋnde niŋ a Chɛhowa wo le.

20. Te ŋ tol pɛ tamasi masaa chɔm laalaŋndo wa kɔɔli, vɛɛ Chɛhowa cho yɛ naa chɔ?

²⁰ Sɔɔŋ yɛɛ naŋ pɛɛku yɛ wanaa keeku o masaleŋ choo o Isɔluɛi niŋnda o ba? Ŋ nɔla miŋ wa maa masaa chɔm lo lechoo wo wa, te ŋ hiou pɛ lachi a Chɛhowa piɛiyo a kɔl naa kpou. Ŋ nɔ miŋ pɛɛku o biondɔŋnda naŋ tosa laŋ niŋ, miŋ wookuŋ, nduyɛ miŋ tosa siŋgaŋnda yeemaŋ ndaŋ. Maa naa kpou loonuŋ le sabu i cho suɛi sɔvɛ le miŋ piɛi Mɛlɛka tonyaa ndu pilɛ kpe wo. Te a kindiŋ pɛ le loo Chɛhowa ikɛi kpɛɛluŋ, o cho num chɔ maa wana cho sakpo ndu o hɔl lo.