“La Nɔ Mi la Tosa Nyɛ Diom Mɛlɛkaa Dimi Wo”

1-2. Yɛɛ tosa yɛ mi buɛiyaa Mɛlɛkaa wa a kɔl kɛndɛ? (Chemisi 1:​22-25)

CHƐHOWA nda Po ndɔ kaalaa yeema naa miŋ wa a kɔl kɛndɛ. Mi wana poonyiaa Sam 119:2 ndo dimi aa: “Kɔl kɛndɔɔ cho le wanaa tual loonɔŋnda ndɔlaŋ kɔɔli, nduyɛ ma nuuviaa ndu a kɔlta ndalaŋ kpou wa.” Mi Chiisu dimi aa: “Kɔl kɛndɔɔ cho le wanaa tuɛi diom Mɛlɛkaa, nduyɛ ma tosa nyɛ o dimi wo wa!”—Luku 11:28.

² Buɛiyaa Chɛhowa cho a kɔl kɛndɛ. Le yɛɛ? Wanaa Chɛhowa nɔ sabulaŋ tau le waa a kɔl kɛndɛ. Nduyɛ sabu sɔvɛ sɔviɔɔ opilɛ cho sɛmbɛ naŋ duau le diomndaŋ veeloo o Diom Mɛlɛkaa niŋ lepaa o lepaa, nduyɛ miŋ kindiŋ le ndu dɔwɔɔ o wali niŋndo ni.—Nuawɔ Chemisi 1:​22-25.

3. Tɔnɔ yɛɛ naŋ sɔla yɛ te ŋ dɔu pɛ nyɛ naŋ veelu diomndaŋ o Diom Mɛlɛkaa niŋndo o wali niŋ?

³ Miŋ sɔla tɔnɔɔ o nɛila bɔɔbɔɔ niŋ te ŋ kindiŋ pɛ le tosaa nyɛ Diom Mɛlɛkaa dimi wo. Le tamaseliiyo, te ŋ dɔu pɛ nyɛ naŋ pɛɛku o Diom Mɛlɛkaa niŋndo o wali niŋ, mi keŋ nɛŋi Chɛhowa kɔl, nduyɛ mi naapila wa a nyaale. (Ikili. 12:13) Te ŋ tol pɛ sila naŋ sɔla o Diom Mɛlɛkaa niŋndo kɔɔli, mi keŋ mala naa le chaŋyɛi kɛndɛi nɔɔ a wanaa naŋ cho o yuŋgoo niŋnda, vɛlɛ a puaapiliaa a ndepiliaa o kundaa niŋ. Hei cho hau peelɔŋndo o yoomula naa laŋ niŋ. Le handɔɔ lechoo, bahawɛila bɔɔbɔɔ wanaa kɛɛ le sawala Mɛlɛkaa laŋ diikɔŋndo wa sɔla laŋ la komal naa le. Ndi kpeekpei Masaa Deeve ndoo dimi ni. Mɛɛ o soo a sawala, nɛila chɔmaalaŋ, vɛlɛ a yamaŋ Chɛhowa kialu woŋ okɔɔ o chondei niŋ, mbo dimi aa: “Te [ŋ] bii laŋ pɛ, [miŋ] sɔla tɔnɔɔ tau.”—Sam 19:​7-11.

4. Yɛɛ tosa yɛ ndi ikala le nyɛ naŋ pɛɛku o Diom Mɛlɛkaa niŋndo dɔwɔɔ o wali niŋ?

⁴ Wana dimi isɔɔ a tonya, i ve lɔɔlɔɔ bɛɛŋ le miŋ veelu diomndaŋ o Diom Mɛlɛkaa niŋ, nduyɛ miŋ dɔu nyɛ naŋ pɛɛku wo o wali niŋ te. O yɔŋ bɛɛ mi yoomu naa wa kpɔndi kpɔndi, ŋ nɔ miŋ nuuviaa teleŋndo le Baabuiyo pɛɛkoo le miŋ bii bila nyɛ Chɛhowa yeema naa miŋ tosa wo. Lelaŋ, ŋ tofaŋndɔ sɔɔŋ ŋpum ŋ mala naa le miŋ wa lɔɔlɔɔ diomndaŋ veeloo o Baabuiyo niŋndo. Ŋ cho vɛlɛ yaasiaa nyɛ mala naa le miŋ yiyaŋ o nyɛ naŋ veelu diomndaŋ ndo choo, nduyɛ miŋ che mɛɛ naŋ duau nyɛ naŋ pɛɛku wo o wali niŋ o yoomula naalaŋ niŋ yɛ.

KƐSI TELEŊNDO LE DIOMNDAŊ VEELOO O DIOM MƐLƐKAA NIŊ

5. Kalaŋnda kuɛɛ naŋ nɔ yɛ, la chua naa teleŋndo o ba tau laŋ?

⁵ Mi wanaa bɔɔbɔɔ cho Chɛhowa piɛiyo wa wa kpɔndi kpɔndi o yoomula ndalaŋ niŋ. Miŋ chua teleŋndo tau le sɔɔŋ Baabuiyo dimi maa ŋ cho ŋ sɔvɛ woŋ tosaa. Le tamaseliiyo, mi naa a bɔɔbɔɔ tosa wallo le nyɛm naŋ hauba woŋ sɔlaa, vɛlɛ a le yuŋgu naa nyɛm nda hauba woŋ kioo. (1 Timo. 5:8) Kilisiɔŋaa bɔɔbɔɔ cho wanayaŋ ndaŋ cho a dialii nɛyɛi ɔɔ o yuwɛi niŋnda mandaa. Nduyɛ, naa kpou nɔ miŋ chua teleŋndo le sɔɔŋ tosaa le kɛndiaa naa mandaa. O faŋaŋ okoŋ kɔɔli, ŋ nɔ vɛlɛ kalaŋnda cheleŋ o kundaa niŋ. Kalaŋ sɔviɔɔ opilɛ cho sɛmbɔɔ nɔɔ le wali dimiaa yooŋgu kɛndɔɔ ni. A sɔɔŋ naŋ nɔ muŋ kpou le tosaa woŋ, vɛɛ naŋ sɔla yɛ teleŋndo le diomndaŋ veeloo lepaa o lepaa o Baabuiyo niŋ, le yiyaŋndo o nyɛ naŋ veelu diomndaŋ ndo choo a le ndu dɔwɔɔ o wali niŋ?

6. Yɛɛ mala yɛ num le diomndaŋ veeloo o Baabuiyo niŋ lepaa o lepaa? (Tofa vɛlɛ fotueiyo.)

⁶ Le naa Kilisiɔŋnda, diomndaŋ veeloo o Baabuiyo niŋ cho nyɔɔ opilɛ o “sɔɔŋ hiou wa ŋ sɔvɛ woŋ” tɛɛŋ. Lelaŋ, ŋ nɔ miŋ kɛsi kpeleŋndo le diomndaŋ veeloo o Baabuiyo niŋ lepaa o lepaa. (Filipi. 1:10) Mi diomnda taselaŋ o yau Sam ndo niŋ la dimi a wana cho a kɔl kɛndɔɔ wo okɔɔ aa: “O nɔ yeemɛi tau o sawala Chɛhowa laŋ niŋ, nduyɛ idii a ichɔl, mbo veelu diomndaŋ o sawala ndɔlaŋ niŋ toolo toolo.” (Sam 1:​1, 2) Mɛɛ hei sim ni maa, ŋ nɔ miŋ wa teleŋndo chuaa le diomndaŋ veeloo o Baabuiyo niŋ. Teleŋ kuɛɛ bɛnda yɛ le diomnda veeloo o Baabuiyo niŋ? O kpeekpei niŋ, wana o wana nɔ teleŋ bɛnda le ndu wo. Kɛ i hiou wa i sɔvɛ ve, wana o wana nɔ mbo hɛli teleŋ mala ndu le diomndaŋ veeloo o Baabuiyo niŋ lepaa o lepaa wo. Le tamaseliiyo, mi puaapilɛnɔɔ diolaŋ Vitɔɔ dimi aa: “I kaala bɔɔ diomndaŋ veeloo o Baabuiyo niŋ idii kanifuule, I wa tɛtɛlɛ le mi bii bila nyɛ ya cho diomndaŋ veeloo wo. Mi che bɛɛ I yala chɔnɔŋ idii le, kɛ sɔɔŋ paaliaŋ ya woŋ ve tau a teleŋ koŋ te. Baa lende num bɛɛ yiyaŋ ni? Nyunaŋndɔ aa: ‘Teleŋ kuɛɛ bɛnda yɛ a ya, le diomndaŋ veeloo o Baabuiyo niŋ?’

YIYAŊ O NYƐ Ŋ VEELU DIOMNDAŊ NDO CHOO

7-8. Yɛɛ kuuna yɛ naa lepum tɔnɔɔ sɔla o nyɛ naŋ veelu diomndaŋ ndo niŋ? Chɔmndɔ tamaseliiyo.

⁷ Lepum, miŋ chua teleŋndo tau le diomndaŋ veeloo kɛ ŋ sɔla tɔnɔ bɔɔ leniŋ te. Baa a veelu niŋ pa diomndaŋ o yauwo niŋ, kɛ okoŋ kɔɔli a tiuba ma loonuŋ nyɛ ŋ veelu diomndaŋ ndo le? Mi i waa nuaa yɔŋnuŋ naa kpou. Nduyɛ mi hei wa bahawɛiyo te o hiŋ pɛ a diomndaŋ veeloo o Baabuiyo niŋ. Naapum, a kɛsi ndɔɔ kpeleŋndo le bolii Baabuiye ipum diomndaŋ veeloo lepaa o lepaa. Keŋ cho bɔɔ suɛi sɔvɛ. Ŋ nɔ miŋ kɛsi kpeleŋndaŋ, nduyɛ miŋ dɔu sɛmbɔɔ le laŋ komallo. (1 Kɔliŋ. 9:26) Kɛ, ŋ nɔ miŋ tosa nyɛ cheleŋ mbo hiou diomndaŋ veeloo o Baabuiyo niŋ kinɛi, te ŋ yeema pɛ miŋ sɔla tɔnɔɔ o nyɛ naŋ veelu diomndaŋ ndo niŋ.

⁸ Yiyaŋndɔ a tamaseliiyo hoo okɔɔ: Mi piɔɔ tosa mi tɔlɔɔlaŋ la naŋ. Kɛ te o hiu pɛ siaa o teleŋ biŋgi bɛŋgu, mi lɛŋndeŋ le hiu pɔɔlaa, nduyɛ tɔlɔɔlaŋ bɛɛ la sɔla tɔnɔ leniŋ te. Kɛ te piɔɔ lo pɛ siaa nyɛɛmbɔ nyɛɛmbɔ le teleŋ vilɛi, mi lɛŋndeŋ le pɔɔla nyɛkɛndɛi, okoŋ mi tɔlɔɔlaŋ bɛɛ la sɔla tɔnɔɔ leniŋ. Nyɛ pilɛ koŋ kpe cho a diomndaŋ veeloo o Baabuiyo niŋ ni. Ŋ nɔ miŋ wa lauwo le diomndaŋ veeloo o Baabuiyo niŋ te. Keŋ sim ni, keleŋaa diomndaŋ veeloo o Baabuiyo niŋ kinɛi, kɛ ŋ nɔ teleŋ le yiyaŋndo o nyɛ naŋ veelu diomndaŋ ndo choo le.—Chemi. 1:24.

9. Yɛɛ naŋ nɔ yɛ miŋ tosa te ŋ saaluŋ pɛ maa kaa naa i cho le diomndaŋ keleŋaa veeloo o Baabuiyo niŋ ni?

⁹ Baa a saaluŋ niŋ pa maa teleŋndaŋ lapum diomndaŋ koni ŋ keleŋa veelu o Baabuiyo niŋ ni? Yɛɛ ŋ nɔ yɛ ma tosa? A nɔ ma chua teleŋndo le diomndaŋ veeloo dɛɛ, nduyɛ ma yiyaŋ yiŋgoloŋ o nyɛ ŋ wa diomndaŋ veeloo wo choo. Hei nɔ mi i wa suɛi kala le tosaa le. Le ma sɔla batiuwaa o hei niŋ, a nɔ ma chɔɔlu teleŋndo chua le yiyaŋndo o nyɛ ŋ wa pɛɛkoo wo choo, ɔɔ ma dɔɔniaa bolii Baabui ŋ veelu diomndaŋ nde, okoŋ ma soliŋ teleŋ tɔɔ kpeku le yiyaŋndo lechoo. Mi Vitɔɔ naŋ soo suŋ a ndu okɔɔ wo dimi aa: “Mi kindiŋ le diomndaŋ veeloo o Baabuiyo niŋ nyɛɛmbɔ, naapum buŋgɛi ipilɛ kpe. Le mɛɛ ya veelu diomndaŋ idii pum yɛ, I tiuba mi niilu yiyaŋndo kpɛŋ o nyɛ ya veelu diomndaŋ ndo choo.” A nɔla ma tosa kɛɛsiaa le sina mɛɛ kpɛ ŋ nɔ ma veelu diomndaŋ yɛ. Kɛ nyɛ cho suɛi sɔvɛi yo cho ni, ŋ nɔ miŋ veelu laŋ dɛɛ le halikpeŋ miŋ tiuba yiyaŋndo o nyɛ naŋ veelu diomndaŋ ndo choo.—Sam 119:97; tofa kɔfoo hoo “Nyunala Ŋ Nɔ Ma Nyunaŋ Ndaŋ.”

10. Chɔmndɔ tamaseliiyo le sinaa mɛɛ ŋ duau nyɛ ŋ cho pɛɛkoo wo o wali niŋ yɛ? (1 Tɛsaloniaŋ 5:​17, 18)

¹⁰ Te a veelu pɛ diomndaŋ o buŋgɛi Baabuiye niŋ, yiyaŋ a mɛɛ ŋ duau ndi o wali niŋ yɛ. Le keŋ tosaa, a tiuba ma nyunaŋ aa: “Vɛɛ ya soliŋ yɛ nyɛ ya pɛɛku wo kpeku suŋ suŋ, ɔɔ o chilaŋ niŋ? Le tamaseliiyo, ŋ dimi wɔ maa a cho diomndaŋ veeloo o Baabuiyo niŋ, okoŋ ma veelu nyɛ cho o 1 Tɛsaloniaŋ 5:​17, 18 niŋndo. (Nuawɔ.) Te a chii pɛ diomndaŋ veeloo o bolle Baabuile leŋ niŋ, chua teleŋndo le sinaa mɛɛ kpɛ ŋ piɛi o paaleŋ niŋ yɛ, vɛlɛ a mɛɛ ŋ yiyaŋ o nyɛ ŋ cho dimi wo choo yɛ. A yiyaŋ vɛlɛ o sɔɔŋ ŋ tiuba ma chɔm balika melaa woŋ choo. Naapum, a kɛɛsiaa le Chɛhowa balika mello le sɔɔŋ yɔŋnuŋ numndoŋ ŋgaa. O yɔŋ bɛɛ aa chemchemndaŋ nyɛɛmbɔ koni ŋ chua le yiyaŋndo o sɔɔŋ ŋ pɛɛku o Baabuiyo niŋndoŋ ni, mi keŋ mala num le ma bii bila Diom Mɛlɛka nyɛkɛndɛi, nduyɛ ma dɔu ndu o wali niŋ. Yiyaŋndɔ a tɔnɔla ŋ cho sɔla laŋ te o yɔŋ pɛ ma tosa nyɛ pilɔɔ hoo lepaa o lepaa a buŋgɛi kɛ kɛ ŋ veelu pɛ diomndaŋ o Baabuiyo niŋ. A tonya, mi keŋ mala num ma simnuŋ wana duau Diom Mɛlɛkaa o wali niŋndo. Kɛ, yɛɛ ŋ nɔ yɛ ma tosa te a che pɛ maa a nɔ ma tosa wallo tau o sɔɔŋ ŋpum choo?

KƐSI KPELEŊNDA Ŋ TIUBA MA KOMAL TAŊ

11. Yɛɛ tosa yɛ lepum ma tambu kɔl? Chɔmndɔ tamaseliiyo.

¹¹ Te ŋ wa pɛ diomndaŋ veeloo o Baabuiyo niŋ, miŋ tambu kɔl te ŋ saaluŋ pɛ maa sɔɔŋ cho tau ŋ naŋ nɔ miŋ tosa hiouwɔɔ lachioo woŋ. Ŋ tuuwɔ ndi maa: O Koondoo choo, a veelu diomndaŋ o Baabuiyo niŋ, mi la wa silaa yɔŋgoo a kaa hɛliaa okɔɔ. (Chemi. 2:​1-8) Ma cha maa, a nɔ ma tosa hiouwɔ lachioo a mɛɛ ŋ bii acheleŋnda yɛ, nduyɛ ma kɛɛsiaa le siŋgaŋndaŋ tosaa. Keŋ bɛnda bɔɔ. O Nɔŋgɔwaa choo, ma veelu diomndaŋ o bolle Baabuile cheleŋ niŋ, le chɔm maa i cho suɛi sɔvɛ le miŋ wa yekeŋ a mɛɛ naŋ suaa yɛ okɔɔ. (Chemi. 3:​1-12) Okoŋ ma bii bila maa teleŋndaŋ lapum, diomnda ŋ dimi laŋ la ve diomnda kɛndɛ kposoŋ te. Nduyɛ ma kɛɛsiaŋ o kɔl maa, a cho kindiŋ kpoke le diomnda dɛɛniaa acheleŋnda kɔllo laŋ soliŋ kpeku. O Kpekedoo choo, ma veelu diomndaŋ o Baabuiyo niŋ, mi la sila num le fafaŋndo chaŋyɛi tosaa a chieeŋndo okɔɔ. (Chemi. 4:​4-12) Ma saaluŋ maa, a nɔ ma chɔɔlu wa yekeŋ le yelelaŋ suu ŋ nɔ ma hɛli wo. Naapum o Kɔɔlumaa choo, ma che maa i cho bɔɔ suɛi kala le siŋgaŋndaŋ ndaŋ kpou tosaa.

12. Te a wa pɛ diomndaŋ veeloo o Baabuiyo niŋ, nduyɛ ma che maa a nɔ ma tosa siŋgaŋndaŋ, le yɛɛ ŋ nɔ yɛ ma tambu kɔl te? (Tofa vɛlɛ tɛɛsiaa amatou.)

¹² Te o yɔŋ pɛ maa a nɔ le siŋgaŋndaŋ tosaa tau, mɛɛ tambu kɔl te. Le mɛɛ ŋ bii bila maa a nɔ le hiouwɔɔ lachioo tosaa yɛ, chɔm ni maa a cho wana tusiaŋ, nduyɛ ma nɔ yiyaŋ kɛndɔɔ. Mi wana cho hoo wana tusiaŋ ndo wo, nduyɛ mbo sandu a ndupila wo veelu diomndaŋ o Baabuiyo niŋ, le chɔɔ naa o nɔ mbo tosa hiouwɔɔ lachioo wa.a Loonuŋ vɛlɛ maa, ŋ nɔ mi hiou lachi a wanachieeyɛi sɛnɛiye chuɛɛnɔŋndo. (Kolo. 3:10) Yɛɛ mala yɛ num ma hiou lachi a Diom Mɛlɛka dɔwɔɔ o wali niŋ?

13. Yɛɛ mala yɛ num ma kɛsi kpeleŋnda ŋ tiuba ma komal taŋ? (Tofa vɛlɛ fotueiyo.)

¹³ Yɔŋii naŋ kindiŋ le nyɛ naŋ pɛɛku wo dɔwɔɔ o wali niŋ o lepilɛ niŋ kpe yɛ, ŋ nɔ miŋ kɛsi kpeleŋnda naŋ tiuba miŋ komal taŋ. (Polo. 11:2) Nyɛ ŋ tiuba ma tosa wo cho hoo ni: Kindiŋ ma poonyiaa o yau choo sɔɔŋ ŋ nɔ ma tosa wallo choo woŋ, ma hɛli suɛi ipilɛ ɔɔ ŋmuuŋ le kandɔɔ. Okoŋ, ma kɛsi ŋ tɔɔŋ le wallo lechoo a teleŋ cheleŋ. A yɛɛ ŋ nɔ yɛ ma kandu?

14. O kpeleŋnda kuɛɛ choo ŋ nɔ yɛ ma kandu wallo tosaa?

¹⁴ Naapum, a kɛɛsiaa le kandɔɔ a kpeleŋ cho tɛtɛlɛ le ma komallo. Ɔɔ a nɔla ma hɛli naa ŋ yiyaŋ maa a nɔ ma tosa hiouwɔɔ lachioo tau wa. Te a chii pɛ suɛi ŋ nɔ ma tosa wallo choo ve hɛli, tosa yaasiaa o yaula naalaŋ niŋ. Naapum a soliŋ Watch Tower Publications Index ɔɔ Yau Yaasiaa Ŋsɔɔ le Seiyaa Chɛhowaa kpeku. Nyuna Chɛhowa o piɛileŋ niŋ le mbo mala num ma “nɔ yeemɛi a kpaayaa le hɛnaŋ ndɔɔ tosaa.” (Filipi. 2:13) Okoŋ, ma kindiŋ le nyɛ ŋ pɛɛku wo dɔwɔɔ o wali niŋ. Te a tosa pɛ hiouwɔɔ lachioo le kpeleŋ tase ŋ kɛsi wo komallo, keŋ cho tosa ma chɔɔlu yeemɛi nɔ le kpeleŋ cheleŋ komallo. Te a saaluŋ pɛ maa, a sɔla batiuwaa le siŋgaŋndaŋ tosaa, ɔɔ le suliŋ leKilisiɔŋndo nɔɔ, mi keŋ tosa ma nɔ yeemɛi le hiouwɔɔ lachi a siŋgaŋndaŋ tosaa. Naapum i ve lɛ suɛi kala num o ba le siŋgaŋnda cheleŋ tosaa le.

CHƐL MI DIOM MƐLƐKAA TOSA NUM WALLO O ŊDIAL

15. Vɛɛ wanaa Chɛhowaa cho yɛ teŋgeŋ a wanaa cheleŋ veelu diomndaŋ o Baabuiyo niŋnda? (1 Tɛsaloniaŋ 2:13)

¹⁵ Mi waŋnda apum dimi maa, a sɔla niŋ batiuwaa le diomndaŋ veeloo o Baabuiyo niŋ kpou. Kɛ baa a laalaŋ pa kpeekpei nyɛ Baabuiyo pɛɛku wo? A kindiŋ niŋ pa le nyɛ Baabuiyo dimi wo dɔwɔɔ o wali niŋ, a le siŋgaŋndaŋ tosaa o yoomula ndalaŋ niŋ? Sako bɛɛ. Kanifuule wanaa bɔɔbɔɔ tul sila Baabuiyo kɔɔli le. Kɛ, mɛɛ wanaa Chɛhowaa che Baabuiyo yɛ cho teŋgeŋ a wanaa tuaa. Maa Kilisiɔŋnda o wɔsiŋ kɛmɛ tasoŋ niŋ, miŋ che Baabuiyo maa “diom Mɛlɛkaa kpeekpei o cho ni.” Le handɔɔ lechoo, miŋ kindiŋ le silala ndɔlaŋ dɔwɔɔ o wali niŋ o yoomula naalaŋ niŋ.—Nuawɔ 1 Tɛsaloniaŋ 2:13.

16. Yɛɛ mala yɛ naa le mi simnuŋ wanaa duau nyɛ Diom Mɛlɛkaa dimi wo wa o wali niŋ?

¹⁶ I cho suɛi kpɛdɛ le diomndaŋ veeloo teleŋ o teleŋ o Diom Mɛlɛkaa niŋ, vɛlɛ a nyɛ o dimi wo tosaa le. Lepum, mɛɛ miŋ kindiŋ kpoke le teleŋndo sɔlaa le diomndaŋ veeloo leniŋ. Ɔɔ naapum, miŋ veelu diomndaŋ o Baabuiyo niŋ chɔchɔ, ŋ chue teleŋndo le yiyaŋndo lechoo le. Ɔɔ lepum miŋ tambu kɔl te ŋ sina pɛ, maa ŋ nɔ siŋgaŋndaŋ tau le tosaa. Mɛɛ mɛɛ bahawɛi naa wa, a mala Chɛhowaa ŋ nɔla miŋ sɔla batiuwaa. Maa ŋ kɛɛsiaŋ o kɔl le mala ndɔɔ chɛlɔɔ le simnɔŋndo wanaa duau Diom Mɛlɛkaa o wali niŋnda, kɛ o cho wanaa mɛɛlu o tueiyɔɔ wa kinɛi le. I cho kpendekele maa, mɛɛ naŋ hiau lachi fau a diomndaŋ veeloo o Diom Mɛlɛkaa niŋ, nduyɛ a ndu dɔwɔɔ o wali niŋ o yoomula naalaŋ niŋ yɛ, lende koni naŋ wa a nyaale ni.—Chemi. 1:25.