Yɛɛ Naŋ Nɔ yɛ Miŋ Tosa le Miŋ Wa Yoomu Lefafɛɛŋ?

1. Vɛɛ waŋnda apum yiyaŋ yɛ le waa yoomu lefafɛɛŋ?

MI WANAA bɔɔbɔɔ de nyɛdiaa kɛndɔɔ, nduyɛ ma hiiluu dialloŋ le halikpeŋ ma wa kɛndiaa. Kɛ a nɔ o kɔl maa, a tiuba ma wa yoomu lefafɛɛŋ te. Naapum nyɛ tosa ma yiyaŋ lende wo cho sinaa mɛɛ kpɛ wana saŋga a yoomoo o yuuwɛi niŋ yɛ ni. A koŋ kpou mi Chiisu dimi maa, ŋ tiuba miŋ wa ‘yoomu lefafɛɛŋ,’ a mɛɛ o dimi o Chɔŋ 3:16 vɛlɛ a 5:24 niŋ yɛ.

2. Yɛɛ Chɔŋ bolle 6 dimi yɛ a yoomu fafɛɛŋndo okɔɔ? (Chɔŋ 6:​39, 40)

² Paale pilɛ, mi Chiisu tosa kaamaa mbo ke waŋnda o waalaŋ niŋ beediiyo a suuwa le ma de.a Hei wa bɔɔ suɛi kɔndɔfili. Kɛ mi kaamaa chɔɔlu waŋnda biyɔɔ a nyɛ o dimi diimandɔɔ wo. Mi faŋga bɛndoo hoo tual ndu kɔɔli ma kua Kepaaniɔm, Kalili leeloo. Loŋ o dimul nda ni maa, waŋnda cho miiŋgu yoomu, okoŋ ma tuei yoomoo yeela lefafɛɛŋ. (Nuawɔ Chɔŋ 6:​39, 40.) A hei o kɔl, yiyaŋndɔ a chaaŋaa numnda, vɛlɛ a wanaa num aa kaalaa sɔla niŋ piɔmndo wa. Mi diomnda Chiisu dimi laŋ ndaŋ la chɔm maa, wanaa bɔɔbɔɔ vi niŋnda cho miiŋgu yoomu, nduyɛ mi num a nda latulu tuei yoomoo yeela lefafɛɛŋ. Kɛ mi wanaa bɔɔbɔɔ che ndi ikala, le biyɔɔ bila diomnda cheleŋ Chiisu dimi o Chɔŋ bolle 6 niŋndaŋ. Ŋ yaasiaŋndɔ diomnda o dimi laŋ ndaŋ nyɛkɛndɛi.

3. A mɛɛ Chɔŋ 6:51 dimi yɛ, yɛɛ Chiisu ndoo dimi yɛ a ndupila okɔɔ?

³ Mɛɛ faŋga bɛndu wa o Kepaaniɔm niŋndo che mɛɛ Chiisu tosa kaamaa le nda beediiyo a suuwa kioo le ma de yɛ, mi keŋ loonuŋ nda a manɛi Chɛhowa ndoo ke finyaa ndaa mamaa o pollo niŋndo. Mi Baabuiyo veelu pɛŋ manɛi koŋ aa, “nyɛdiaa fula o choo choo” niŋndo. (Sam 105:40; Chɔŋ 6:31) Mi Chiisu soliŋ manɛiyo kpeku le faŋga bɛndoo hoo pɛɛkoo. Mi che bɛɛ kaamaa Mɛlɛka ndoo tosa ni le waŋnda manɛiyo kioo, kɛ wanaa ndaa de ndu wa, ma sɔla piɔmndo okoŋ kɔɔli. (Chɔŋ 6:49) O dimi niŋ, mi Chiisu veeluŋ ndupila aa, “nyɛdiaa kpeekpei fula o choo choo niŋndo,” “nyɛdiaa Mɛlɛkaa,” nduyɛ a “nyɛdiaa yɔŋgu yoomoo” wo. (Chɔŋ 6:​32, 33, 35) Mi Chiisu chɔm teŋgeŋ wa ndu tɛɛŋ a manɛiyo wo. Mbo dimi aa: “Ya cho nyɛdiaa yɔŋgu yoomoo wo ni, o fula o choo choo niŋndo. Wana o wana de nyɛdiaa hoo pɛ, o cho wa yoomu lefafɛɛŋ.” (Nuawɔ Chɔŋ 6:51.) Mi kaamaa bii Chuuwa haa. Okoŋ ma nyunaŋ aa, vɛɛ Chiisu nɔla yɛ mbo dimi maa ndu cho “nyɛdiaa” fula o choo choo niŋndo ni, nduyɛ maa o cho o sɔvɛ mbo hiau manɛi Mɛlɛka tosa kaamaa le finyaa naa mamaa kioo o sindɔɔ niŋndo? Mi Chiisu mulul nda aa: “Nyɛdiaa ya cho koŋ yɔŋgu wo cho dialuŋ nuŋ ni.” Yɛɛ Chiisu ndoo yiyaŋ yɛ? I cho suɛi sɔvɛ le miŋ bii bila nyɛ hei simndo kanifuule, mulioo le nyunaa hoo chɔm mɛɛ yoomu fafɛɛŋndo cho nyɛ sɔvɛ le naa, vɛlɛ a wanaa naa kalaa vi wa yɛ. Ŋ tofaŋndɔ miŋ che nyɛ Chiisu ndoo yiyaŋ ndo.

NYƐDIAA YƆŊGU YOOMOO WO A DIALUŊ NDƆŊ

4. Le yɛɛ kɔndɔfillo bii yɛ waŋnda apum a nyɛ Chiisu ndoo dimi wo okɔɔ?

⁴ Mi kɔndɔfillo bii waŋnda apum mɛɛ nda tuei Chiisu dimioo maa, “nyɛdiaa ya cho koŋ yɔŋgu wo cho dialuŋ nuŋ ni, le mi waŋchieeya wa yoomu.” Baa yiyaŋndo nda wa ni maa dialuŋ ndɔŋ kpeekpeiyoŋ o cho nda ke ni ma de, naŋ chaa wanaa dia waŋnda chieeya wa nda cho ni? (Chɔŋ 6:52) Mi Chiisu dimi vɛlɛ nyɛ cheleŋ o chɔɔlu nda siooŋnde lueiyo. Mbo dimi aa: “Te o cho mi la de dialuŋ Po wana pɔnɔɔ nduyɛ mi la kol kooma nduaŋ te, la sɔla yoomoo o nyapila niŋ te.”—Chɔŋ 6:53.

5. Le yɛɛ naŋ laalaŋ yɛ maa o cho dimi le Chiisu wa maa, waŋnda nɔ ma kol kooma ndɔ ma kpeekpei yaŋ te?

⁵ O palɛi Nuuwa ve niŋ, mi Mɛlɛka dimul waŋnda maa a dia koowaŋ te. (Chɛn. 9:​3, 4) Mi Chɛhowa miŋgi vɛlɛ nyɛ pilɔɔ hoo kpe dimi, mɛɛ o wa Isɔluɛiya sawalaŋ kioo. Wana o wana de pɛ koowaŋ, “o nɔ mbo sɔla piɔmndo.” (Lɛv. 7:27) Mi Chiisu pɛɛku waŋnda le ma diikuŋ Sawala Mɛlɛkalaŋ kpou. (Mat. 5:​17-19) Lelaŋ, te ndoo yɔŋ pɛ maa, mi Chiisu dimul Chuuwaa wa ndu nilaŋ yaŋɔɔ wa, le ma de dialuŋ ndɔŋ kpeekpeiyoŋ ɔɔ ma kol kooma nduaŋ, i ve wa suɛi taasi kposoŋ te. Kɛ diomnda Chiisu dimi laŋ ndaŋ, la wa le waŋnda haa pɛɛkoo, ma sina mɛɛ wana sɔla “yoomu fafɛɛŋndo” yɛ.—Chɔŋ 6:54.

6. Vɛɛ naŋ looku yɛ sina maa tamaseliiyo Chiisu soliŋ kpeku ni, mɛɛ o soo a dialuŋ ndɔŋ dioo vɛlɛ a kooma nduaŋ kolɔɔ okɔɔ?

⁶ Yɛɛ Chiisu ndoo yiyaŋ yɛ? I cho kpendekele maa, tamaseliiyo koni Chiisu soliŋ kpeku ni le suɛi o nda lo, mɛɛ o tosa teleŋ o soo o chua Sameeliaŋnɔɔ lo yɛ. Mbo dimul chuaa hoo aa: “Kɛ wana o wana kol pɛ mɛŋma ya cho ndu ke waŋ, fɛɛŋ bɛɛ kolɔɔ bii lɛ ndu le. Mɛŋma ya cho ndu ke waŋ, ma cho simnɔŋ ndu niŋ maa pee buulu ke ndu yoomu fafɛɛŋndo wo.” (Chɔŋ 4:​7, 14)b Nyɛ Chiisu dimul chua Sameeliaŋnɔɔ hoo wo chɔm nuaa maa, te o kol dɔɔ pɛ mɛŋma yɔŋaŋ maŋ kinɛi, o sɔla yoomu fafɛɛŋndo le. O nɛi pilɛ koŋ choo, o cho dimul te o wa faŋga bɛndu wa ndu nilaŋ yaŋɔɔ Kepaaniɔm ndo maa, te a de pɛ dialuŋ ndɔŋ ɔɔ ma kol kooma nduaŋ a cho wa yoomu lefafɛɛŋ te.

TEŊGEŊ KUƐƐ CHO YƐ TELEŊNDA TIƆƆŊNDA CHIISU SOO A LAŊ OKƆƆ LAŊ TƐƐŊ?

7. Yɛɛ waŋnda apum yiyaŋ yɛ a diomnda Chiisu dimi mi la wa o Chɔŋ 6:53 niŋndaŋ?

⁷ Piɛiyii bɔɔbɔɔ yiyaŋ maa diomnda Chiisu dimi le dialuŋ ndɔŋ dioo, a kooma nduaŋ kolɔɔ mi la wa o Chɔŋ 6:53 niŋndaŋ, la sim lewundu le Nyɛdiaa Ichɔl Masanɔɔ kanifuule, a teleŋ koŋ o soliŋ diomndaŋ ndaŋ kpeku ni. (Mat. 26:​26-28) A yiyaŋ maa, wana o wana wa pɛ o chuuŋgiaŋ Nyɛdiaa Ichɔl Masanɔɔ, o nɔ mbo de beediiyo, vɛlɛ mbo kol muɛima maŋ. Baa keŋ cho pa tonya? I cho bɔɔ suɛi sɔvɛ le miŋ tosa yaasiaa yiŋgoloŋndo le sinaa a ndi okɔɔ. Kanifuule, iwɔsi o iwɔsi, mi waŋnda o miiliɔŋndaŋ niŋ chieeŋndo balɔɔ silɔ chuuŋgiaŋ a naa diompilɛ le bɔŋaŋndo hoo biyɔɔ. Ŋ cho chɔ teŋgeŋ cho o diomnda cho o Chɔŋ 6:53 niŋndaŋ tɛɛŋ, a nyɛ Chiisu dimi a Nyɛdiaa Ichɔl Masanɔɔ okɔɔ wo.

8. ƆƆ sabulaŋ lapum, la chɔm teŋgeŋ cho teleŋnda tiɔɔŋndaŋ tɛɛŋndo? (Tofa vɛlɛ fotueilaŋ.)

⁸ Ŋ yaasiaŋndɔ miŋ che teŋgeŋ cho teleŋnda tiɔɔŋndaŋ ndaŋ tɛɛŋ ndo. O tasoo, kuɛɛnɛ nduyɛ a teleŋ kuɛɛ Chiisu dimi yɛ diomnda cho o Chɔŋ 6:​53-56 niŋndaŋ? O tosa hei Chuuwaa faŋga bɛnduaa o hɔl o Kalili niŋ a wɔsii 32. Mi wɔsioo opilɛ hiau tuupa mi Chiisu chɔm buɛiyaa nduaa o Chulusalɛm niŋ, mɛɛ nda nɔ ma wa Nyɛdiaa Ichɔl Masanɔɔ tosaa yɛ. O diiŋ ndɔɔ, o nɛɛ yaa lo o dimi yɛ diomndaŋ ndaŋ? Wanaa bɔɔbɔɔ wa Chiisu nilaŋ yaŋɔɔ o Kalili niŋnda, ndaa nɔ yeemɛi o nyɛdiaa ŋdiallo niŋ, mbo hiau pɛɛkoo a Chiisu, Chɛhowa, vɛlɛ a Masale ndɔleŋ okɔɔ. (Chɔŋ 6:26) Mɛɛ Chiisu dimul nda nyɛ wa nda o kala o ba le ma bii bila wo, o lepilɛ niŋ kpe, ma mal laalaŋ ndaa nɔ o ndu niŋndo. Nduyɛ hali buɛiyaa nduaa bɛɛ, ma mal ndu. (Chɔŋ 6:​14, 36, 42, 60, 64, 66) Tuuwɔ nyɛ yɔŋnuŋ wɔsioo opilɛ tuupa mi Chiisu chɔm buɛiyaa nduaa mɛɛ nda nɔ ma wa Bɔŋaŋ Nyɛdiaa Ichɔl Masanɔɔ biyɔɔ yɛ a wɔsii 33 wo. A teleŋ koŋ, mi buɛiyaa nduaa 11 hiau lachi a waa a ndu latulu, mi che bɛɛ ndaa bii diomnda laŋ bila nyɛkɛndɛi le. A koŋ kpou waŋnda o Kalili niŋ ndaa dou tiindaŋndo o Chiisu niŋ te, kɛ mi buɛiyaa nduaa sina kɛsɛ maa ndu cho Po Mɛlɛka fula o choo choo niŋndo ni. (Maatiu 16:16) Mbo dimul nda aa: “Nya wa a ya latulu o nyɛpalaa nuu niŋ ni.” (Luku 22:28) Sɔɔŋ sala tiɔɔŋndoŋ muŋ cho letuu le chɔmndo teŋgeŋ cho nyɛ Chiisu dimi o Chɔŋ 6:53 niŋndo a Nyɛdiaa Ichɔl Masanɔɔ tɛɛŋndo. Sabula cheleŋndaŋ la cho tau le chɔmndo teŋgeŋ cho teleŋ nda tiɔɔŋndaŋ ndaŋ tɛɛŋndo.

YƐƐ DIOMNDA CHIISU DIMI LAŊ NDAŊ LA SIM YƐ LE NUM?

9. O kunda kuɛɛ lo Chiisu wa yɛ suɛi a Nyɛdiaa Ichɔl Masanɔɔ okɔɔ?

⁹ A teleŋ nda wa Bɔŋaŋ Nyɛdiaa Ichɔl Masanɔɔ biyɔɔ wo, mi Chiisu ke buɛiyaa nduaa beedii nɔ yiisii leniŋ te wo, nduyɛ mbo dimul nda maa ndu sim le dialuŋ ndɔ ni. Mbo ke nda vɛlɛ muɛiyaŋ, mbo dimi maa maŋ ma sim le kpema o yii a kooma nduaŋ ndo ni. (Maki 14:​22-25; Luku 22:20; 1 Kɔl. 11:24) Nyɛ o dimi a kpemaa hoo okɔɔ wo cho bɔɔ suɛi sɔvɛ. Kpema sɛnɛiyo hoo, a ‘IsɔluɛiMɛlɛkaa’ o yii ndu ni. Nduyɛ, nda cho wa “o Masale Mɛlɛkaleŋ niŋ” ni, kɛ o cho waŋnda chieeya kpou le. (Hibu. 8:​6, 10; 9:15) Buɛiyaa nduaa ndaa bii diomndaŋ ndaŋ bila a teleŋ koŋ te. Kɛ a wa suŋ hunɔɔ pɔyaa sɔla a nyina diandaa, okoŋ mi ndaa sɔla fondaa le ma wa o kpema sɛnɛiyo niŋ, vɛlɛ a dikeŋnaŋndo le waa a Chiisu latulu o choo choo niŋ.—Chɔŋ 14:​2, 3.

10. Teŋgeŋ yɛɛ cho yɛ nyɛ Chiisu dimi o Kalili niŋndo tɛɛŋ, a teleŋ nda wa Bɔŋaŋ Nyɛdiaa Ichɔl Masanɔɔ biyɔɔ wo? (Tofa vɛlɛ fotueiyo.)

¹⁰ Kɛsiŋ o kɔl maa a teleŋ Bɔŋaŋ Nyɛdiaa Ichɔl Masanɔɔ, o “saa kunda pɔmbɔɔ” lo Chiisu wa suɛi ni. Buɛiyaa nduaa wa a ndu latulu o lumui koŋ niŋnda wa wanaa tasiaa o kundaa hoo choo ni. (Luku 12:32) Buɛiya haa vɛlɛ a wanaa cheleŋ wa hunɔɔ wa o kundaa hoo choo wa, nɔ ni ma de beediiyo nduyɛ ma kol muɛiyaŋ. Waŋnda haa sɔla hɛliŋndo ni, le waa choo choo a Chiisu latulu. Nyɛ o dimul kiilaa nduaa a teleŋndo hoo wo wa teŋgeŋ a nyɛ o dimul faŋga bɛndu wa Kalili, a kɔndɔfillo ndoo bii a nyɛ o wa dimioo wo wa. Lelaŋ o faŋga bɛndoo hoo lo Chiisu wa suɛi ni.

11. Vɛɛ nyɛ Chiisu dimi o Kalili niŋndo chɔm yɛ maa o cho o waŋnda nyɛɛmbɔ koni lo le o wa suɛi le?

¹¹ Teleŋ Chiisu wa Kalili a wɔsii 32 wo, o Chuuwa ndaa yeema nyɛdiaa ŋdiallo wa lo kinɛi o wa suɛi ni. Lelaŋ, mbo suaa a nyɛdiaa ndoo chuu nda niŋ tɔnɔɔ tau mbo hiou nyɛdiaa ŋdiallo wo okɔɔ. Ndu cho yɛ nyɛ ndaa nɔ ma tosa le yoomu fafɛɛŋndo sɔlaa wo ni. Mi Chiisu dimul nda maa wanaa vi wa cho miiŋgu yoomu o paale mɛɛlaaleŋ choo nduyɛ ma wa yoomu lefafɛɛŋ. O cho nuaa maa o waŋnda nyɛɛmbɔ lo le o wa suɛi a nyɛ o tosa a teleŋ nda wa Bɔŋaŋ Nyɛdiaa Ichɔl Masanɔɔ biyɔɔ wo le, kɛ a salala wana o wana sɔla niŋ tɔnɔɔ leniŋ ndaŋ okɔɔ o soo o Kalili niŋ ni. Lelaŋ pɛŋ o dimi ni aa: “Ya cho nyɛdiaa yɔŋgu yoomoo wo ni, o fula o choo choo niŋndo. Wana o wana de nyɛdiaa hoo pɛ, o cho wa yoomu lefafɛɛŋ . . . Nyɛdiaa ya cho koŋ yɔŋgu wo cho dialuŋ nuŋ ni, le mi waŋchieeya wa yoomu.”—Chɔŋ 6:51.c

12. Yɛɛ naŋ nɔ yɛ miŋ tosa le miŋ sɔla tɔnɔɔ o nyɛ Chiisu dimi wo niŋ?

¹² Chiisu dimul Chuuwaa wa o Kalili niŋnda nuaa maa salalaŋ ndaŋ la cho wa le wana o wana cho yoomu, ɔɔ le wanaa cho bɛɛ hunɔɔ violɔŋ o chilaŋ niŋ nda le. Kɛ wanaa cho ‘nyɛdiaa hoo dio,’ nduyɛ ma dɔu laalaŋndo o ndu niŋnda kinɛi cho tɔnɔlaŋ ndaŋ sɔla ni. Wanaa bɔɔbɔɔ laalaŋ maa a laalaŋ o Chiisu niŋ, nduyɛ a che maa wana nda piŋiaa o cho ni. (Chɔŋ 6:29) Kɛ mi waŋnda apum o faŋgaa hoo tɛɛŋ, a ndaa nɔ laalaŋndo o Chiisu niŋ o tasela ndɔ wa faŋaŋ ndu kɔɔli. Le yɛɛ?

13. Yɛɛ naŋ nɔ yɛ miŋ tosa le miŋ simnuŋ buɛiyaa Chiisu wa?

¹³ Waŋnda apum o faŋga bɛndoo hoo tɛɛŋ, a Chiisu ke nyɛdiaa wa wa a kɔl kɛndɛ tau le ndu tolɔɔ kɔɔli, te ndoo hiou pɛ lachi a nda kioo nyɛ ndaa yeema wo. Ndaa nɔ yeemɛi le ndu chɔɔ kaamaalaŋ tosaa le waŋnda siŋgioo, nyɛdiaa fondoo nda kioo, a pɛɛkula ndaa nɔ yeemɛi leniŋ ndaŋ tueiyɔɔ. O baa pilɔɔ choo, buɛiyaa Chiisu wa ndaa nɔ ma nɔ kaa waa nuaa le, kanifuule o cho le yeemaŋ ŋdialloŋ peeloo le Chiisu hiŋ o lɛŋndeŋ choo le, kɛ ndaa nɔ ma chɛl ‘veelu ndɔɔ’ ma hiŋ naa ndu chua, ma diikuŋ ndu, nduyɛ ma dɔu nyɛ o nyɛ o pɛɛku nda o wali niŋ.—Chɔŋ 5:40; 6:44.

14. Mi Chiisu soliŋ dialuŋ ndɔŋ a kooma nduaŋ sala, yɛɛ naŋ nɔ yɛ miŋ tosa le miŋ sɔla tɔnɔɔ o hei niŋ?

¹⁴ Mi Chiisu chɔm faŋga bɛndoo nyɛ nda nɔ ma tosa, le ma nɔ laalaŋndo wo. O nɛi kuɛɛ choo? Mbo soliŋ dialuŋ ndɔŋ a kooma nduaŋ sala le waŋnda baŋaa. Nduyɛ tiindaŋndo dɔwɔɔ o hei niŋ wa tosa mi ndaa sɔla yoomu fafɛɛŋndo. Tiindaŋ waa nuaa wa bɔɔ nyɛ sɔvɛ le Chuuwa. Nduyɛ o cho vɛlɛ o sɔvɛ le naa hau. (Chɔŋ 6:40) A mɛɛ Chɔŋ 6:53 dimi yɛ, le miŋ sɔla tɔnɔɔ o dialuŋ Chiisu woŋ niŋ vɛlɛ a kooma nduaŋ, ŋ nɔ miŋ dɔu laalaŋndo o sala baŋaa hoo niŋ. Salaa hoo cho le wana o wana.—Ɛfi. 1:7.

15-16. Sɔɔŋ sɔvɛ kuɛɛ naŋ pɛɛku yɛ o Chɔŋ bolle 6 niŋ?

¹⁵ Chɔŋ bolle 6 pɛɛku naa sɔɔŋ sɔvɛ sɔviɔŋ tau, ŋ dɛɛniaa naa kpou kɔllo woŋ. O chɔm naa kpendekele mɛɛ Chiisu buulaŋ le waŋnda yɛ. A teleŋ o wa Kalili wo, mbo siŋgi wanaa wa a naalaŋ nda, mbo pɛɛku waŋnda a Masale Mɛlɛkaleŋ okɔɔ, nduyɛ mbo tosa a sabu mi waŋnda sɔla nyɛdiaa. (Luku 9:11; Chɔŋ 6:​2, 11, 12) I hiou wa isɔvɛ ve, mi Chiisu chɔm maa ndu cho “nyɛdiaa yɔŋgu yoomoo” wo ni.—Chɔŋ 6:​35, 48.

¹⁶ Wanaa Chiisu veelu aa ‘saa cheleŋnda’ wa nɔ ma de beediiyo, ɔɔ ma kol muɛiyaŋ o Bɔŋaŋ Nyɛdiaa Ichɔl Masanɔɔ choo le. (Chɔŋ 10:16) A koŋ kpou, nda bɛɛ cho tɔnɔɔ sɔla o dialuŋ Chiisu woŋ vɛlɛ a kooma o soliŋ sala waŋ niŋ. A tosa hei sanaa a tiindaŋndo dɔwɔɔ o sala soliaŋ Chiisu wo niŋ, vɛlɛ a sɔɔŋ kɛndɛŋ o tosa woŋ. (Chɔŋ 6:53) O baa pilɔɔ choo, wanaa sɔla dikeŋnaŋndo le beediiyo dioo nduyɛ ma kol muɛiyaŋ nda luɛi o kpema sɛnɛiyo niŋ ni, le waa o Masale Mɛlɛkaleŋ niŋ choo choo. O yɔŋ bɛɛ aa Kilisiɔŋaa pɔyaŋnda ɔɔ saa cheleŋnda naŋ cho ni, nyɛ dimiŋ o Chɔŋ bolle 6 niŋndo nɔ sabu sɔviɔɔ le naa kpou. O chɔm naa nyɛ kpeekpei naŋ nɔ miŋ tosa le miŋ nɔ laalaŋndo, le halikpeŋ miŋ sɔla yoomu fafɛɛŋndo wo.