Tol Tamasi Chɛhowa Nda Chiisu Wo Kɔɔli a Mɛɛ Ŋ Yiyaŋ Yɛ

1-2. Yɛɛ Chɛhowa kaalaa sim yɛ, nduyɛ vɛɛ Chiisu chɔm yɛ hei o yoomu ndɔɔ niŋ?

“A NƆ ma kaala Chɛhowa Mɛlɛka numndo a kɔl numndo kpou, a yoomu numndo kpou, a kpaaya numndo kpou, a yiyaŋ numndo kpou.” (Luku 10:27) Mi Chiisu chɔm kpendekele o bolle Baabuileŋ ndeŋ niŋ maa, sawaa hoo hiou wa o sɔvɛ o sawala Mɛlɛka ndoo ke Muuse laŋ tɛɛŋ. Loonuŋ maa kaala naa le Chɛhowa nɔ mbo chɛŋ naa o kɔl di. Nduyɛ hei piiliaŋ yeemaŋ naŋ, yiyaŋnda naalaŋ, vɛlɛ a mɛɛ naŋ sinaŋ yɛ. I piiliaŋ vɛlɛ yɔŋgɔŋ naa a kɔllo kpou, vɛlɛ a yoomuma naŋ kpou. Kɛ, Chɛhowa kaalaa piiliaŋ vɛlɛ mɛɛ naŋ yiyaŋ o sɔɔŋ choo yɛ. A koŋ kpou, ŋ tiuba miŋ sina yiyaŋnda Chɛhowa laŋ fau le. Kɛ ŋ tiuba miŋ sina yiyaŋ Mɛlɛkaa te ŋ pɛɛku pɛ le yiyaŋ Kiliti wo nɔɔ. Kanifuule, Chiisu ndoo sina mɛɛ finya ndɔ yiyaŋ yɛ, nduyɛ mbo tual tamasi ndɔɔ kɔɔli o nɛi walaŋndo choo.—1 Kɔl. 2: 16.

² Chiisu ndoo kaala Chɛhowa a yiyaŋ ndɔɔ kpou. Ndoo sina nyɛ Mɛlɛka ndoo yeema ndu mbo tosa wo, nduyɛ mbo kɛɛsiaŋ o kɔl le ndu tosaa, mi che bɛɛ o wa saŋga tau le nyɛ cho o kɛndɔɔ wo tosaa. Le mɛɛ Chiisu ndoo handu kɔllo o hɛnaŋ Finya ndɔ wo tosaa choo yɛ, o chɛl mi nyɛ o nyɛ cheleŋ simnuŋ nyɛ sɔvɛ o yoomu ndɔɔ niŋ te.

3. Yɛɛ kiilanɔɔ Pitɛ pɛɛku yɛ Chiisu o ba, nduyɛ yɛɛ o dɛɛniaa yɛ chaaŋaa nduaa Kilisiɔŋnda le ma tosa? (1 Pitɛ 4:1)

³ Mi Pitɛ a kiilaa tuaa sɔla dikeŋnaŋndo le waa a Chiisu latulu, nduyɛ ma pɛɛku mɛɛ o yiyaŋ o sɔɔŋ choo yɛ. Mɛɛ Pitɛ poonyiaa yau ndɔ tasoo, mbo dɛɛniaa Kilisiɔŋnda le ma kindiŋ ma nɔ yiyaŋ pilɔɔ kpe maa Kiliti. (Nuawɔ 1 Pitɛ 4:1.) Mi Pitɛ soliŋ diom puaa chɔuwa kpeku mɛɛ o poonyiaa aa: “Nya bɛɛ la bɛɛndiaŋ.” Lelaŋ, te Kilisiɔŋnda tol pɛ tamasi Chiisu wo kɔɔli le yiyaŋndo maa ndu, a cho wolɔɔ chɔu nda yeema wo sɔla le yeemaŋ wɔɔŋ kɛ kɛ chɔulabaa, vɛlɛ a chieeŋ wɔɔŋ cho hoo o kpaaya Setana wo bɛŋgu wo.—2 Kɔl. 10:​3-5; Ɛfi. 6:12.

4. Vɛɛ buŋgɛi hei cho yɛ naa mala le miŋ tol sila Pitɛ wo kɔɔli?

⁴ Ŋ cho pɛɛku mɛɛ Chiisu ndoo yiyaŋ yɛ, vɛlɛ a mɛɛ naŋ tual tamasi ndɔɔ kɔɔli yɛ. Tamasi ndɔɔ cho naa chɔm (1) mɛɛ naŋ pɛɛku le yiyaŋ Chɛhowaa nɔɔ, okoŋ miŋ wa o diompilɔɔ niŋ a Puaapiliaa naa yɛ, (2) mɛɛ naŋ wa wanaa tusiaŋ yɛ, a (3) mɛɛ naŋ pɛɛku le Chɛhowa tiindaŋndo o piɛileŋ niŋ, le miŋ wa wanaa taasi yɛ.

TOL TAMASI CHƐHOWA WO KƆƆLI LE YIYAŊNDO MAA NDU

5. Vɛɛ Pitɛ kɛɛ yɛ yiyaŋ Chɛhowa wo nɔɔ teleŋ pilɛ?

⁵ Ŋ yaasiaŋ ndɔ nyɛ yɔŋnuŋ Pitɛ teleŋ pilɛ wo, mɛɛ o kɛɛ yiyaŋ Chɛhowa wo nɔɔ. Mi Chiisu dimul kiilaa nduaa maa o nɔ mbo kuɛ Chulusalɛm, okoŋ mi simlachiaa lepiɛiya bii ndu ma tusi ndu nyɛpalaa choo, nduyɛ ma dii ndu. (Mat. 16:21) Pitɛ ndoo sina maa Chiisu wa Mɛsayanɔɔ ni, wana wa hunɔɔ wanaa Mɛlɛkaa piŋi wo. Le sabu koŋ, i wa Pitɛ o ba ikala le laalaŋndo maa Chɛhowa wa chɛlɔɔ mi ndaa dii Chiisu. (Mat. 16:16) Lelaŋ, mi Pitɛ veelu Chiisu o le sɔŋgi mbo dimi aa: “Pɛŋgi sɔɔŋ waa lende dimioo Masanɔɔ. I waa lende nɔ mi i yɔŋnuŋ a num kposoŋ te.” (Mat. 16:22) Pitɛ chi sɔɔŋ mɛɛ Chɛhowa che muŋ yɛ le, lelaŋ ndoo nɔ yiyaŋ pilɛ maa Chiisu le.

6. O nɛi kuɛɛ choo Chiisu ndoo chɔm yɛ maa mɛɛ Chɛhowa yiyaŋ yɛ, ndu bɛɛ yiyaŋ ni?

⁶ Yiyaŋ Chiisu wo wa o chɛlaŋ a yiyaŋ Finya ndɔ wo o choo choo niŋ. Mi Chiisu dimi aa: “Faŋaŋ ya nanuŋ, Setana! Hɛnaŋ Mɛlɛkaa ŋ yeema ni ma kuuna ya tosaa. Kanifuule, nyɛ ŋ yiyaŋ hoo wo cho yiyaŋ Mɛlɛka le, kɛ yiyaŋ waŋchieeya.” (Mat. 16:23) Pitɛ ndoo nɔ yiyaŋ kɛndɔɔ kɛ Chiisu chɛl sila ndɔɔ le. Yɛɛ hei pɛɛku yɛ naa. Chiisu ndoo sina maa le hɛnaŋ Chɛhowa wo tosaa, ndoo nɔ mbo sɔla saŋgaa okoŋ mbo vi. Lelaŋ, mi Chiisu kɛɛ sila Pitɛ wo, mi che bɛɛ Pitɛ ndoo yiyaŋ maa malaa o wa ndu ni. Mi hei tosa mi Pitɛ sina maa o nɔ mbo nɔ yiyaŋ Mɛlɛkaa. Suɛi sɔvɛ hei naa bɛɛ nɔ ni miŋ sina.

7. Vɛɛ Pitɛ chɔm yɛ maa ndoo bii yiyaŋ Chɛhowa wo bila? (Tofa o kɔɔ.)

⁷ Mɛɛ teleŋ tiŋ hiou, mi Pitɛ chɔm maa ndu bɛɛ ndoo yeema mbo yiyaŋ mɛɛ Chɛhowa yiyaŋ yɛ. Mi teleŋ Chɛhowa wo fuuluu le mi wanaa ndaa sɔla hivi chiɛi kɔɔli le wa simnuŋ wanaa Mɛlɛkaa. Mi Mɛlɛka viam Pitɛ le mbo kɔ dimul Kɔniiliɔɔ yooŋgu kɛndɔɔ. Poo hoo wa waŋndo o pilɛ o wanaa tasiaa ve ŋChuu le wa tɛɛŋ, a ndaa simnuŋ kilisiɔŋnda wa. Chuuwa ndaa chɛl le holiaŋndo a wanaa ve ŋChuu le wa le. Lelaŋ, Pitɛ ndoo nɔ mi ndoo siŋga yiyaŋ ndɔɔ, le mbo nɔla nda yooŋgu kɛndɔɔ dimullo. Mɛɛ Pitɛ bii yiyaŋ Mɛlɛkaa a wanaa ve ŋChuu le wa okɔɔ bila, mbo siŋga yiyaŋ ndɔɔ. Lelaŋ, mɛɛ Kɔniiliɔɔ vem waŋnda le ndu veeloo, mbo chɛl le kɔlaŋ nda ndaa. (Walta. 10:​28, 29) Mbo dimul Kɔniiliɔɔ a yuŋgu ndɔɔ yooŋgu kɛndɔɔ, nduyɛ ma sɔla yiŋɔɔ.—Walta. 10:​21-23, 34, 35, 44-48.

8. Vɛɛ naŋ chɔm yɛ maa ŋ nɔ yiyaŋ pilɔɔ maa Chɛhowa? (1 Pitɛ 3:8)

⁸ Mɛɛ wɔsilaŋ latiŋ la hiou, mi Pitɛ dɛɛniaa chaaŋaa duaa Kilisiɔŋnda le ma “nɔ yiyaŋ pilɔɔ.” (Nuawɔ 1 Pitɛ 3:8.) Le miŋ nɔ diompilɔɔ a puaapiliaa vɛlɛ a ndepiliaa naa, ŋ nɔ miŋ yiyaŋ mɛɛ Chɛhowa yiyaŋ yɛ, a mɛɛ naŋ pɛɛku o Diom ndɔɔ niŋ yɛ. Le tamaseliiyo, mi Chiisu dɛɛniaa buɛiyaa duaa le ma kɛsi Masale Mɛlɛkaleŋ nyɛ tase o yoomu ndaa niŋ. (Mat. 6:33) Le hei, te wana dimiaa yooŋgu kɛndɔɔ o kundaa niŋ kɛɛsiaa pɛ le kɔɔfaleŋ tosaa ɔɔ walta cheleŋ o wali lɔɔlɔɔ Mɛlɛkaa niŋ, ŋ nɔ miŋ pɛɛsa ndu le. Kɛ ŋ nɔ miŋ toolu ndu, nduyɛ miŋ dimul ndu diomnda dɛɛniaa ndu kɔllo laŋ le mbo komal kpeleŋ ndɔɔ.

WA WANA TUSIAŊ

9-10. Vɛɛ Chiisu ndoo chɔm yɛ maa wana tusiaŋndo kpeekpei o wa ni?

⁹ Tuupa mi Chiisu sɔla piɔmndo o nyumma ndɔma mɛɛlaŋ choo, mbo pɛɛku Pitɛ a kiilaa apiliaa suɛi sɔvɛ sɔvɛi a tusiŋndo okɔɔ. Ndoo viu wɔ bɛɛ le, mbo viam Pitɛ nda Chɔŋ, le ma kɔ toosiaa fondaa le nyɛdiaa ndɔ mɛɛlaa dioo a nda tuupa mbo sɔla piɔmndo. O sɔɔŋ ndaa nɔ ma tosa woŋ tɛɛŋ, ndaa nɔ ma kɛsi hɛŋgɔɔ a mɛŋndaŋ leniŋ, a tawɛilaŋ le mi mialla ndaa pulu peloŋ tuupa ma de nyɛdiaa. Kɛ nɛɛ wa yɛ kaa tusiaŋndo chɔm le a tuaa peloŋ pulɔɔ?

¹⁰ Chiisu kiisaŋ le wallo hoo tosaa le, kɛ mbo chɔm maa wana tusiaŋndo pila o wa ni. Mi kɔndɔfillo bii kiilaa mɛɛ nda che Chiisu wali buɛiyo nɔ mbo tosa wo tosaa. Mi Chiisu soli doma ndɔ lechoo wo mbo yiinuŋ tawɛiyo o chaŋ mbo wou mɛŋndaŋ o hɛŋgɔɔ niŋ, okoŋ mbo kandu nda peloŋ pulɔɔ. (Chɔŋ 13:​4, 5) Naapum mbo chua Chiisu teleŋndo tau le kiilaa nduaa 12 nda kpou peloŋ pulɔɔ, hali Chuda o wa hunɔɔ ndu pisi wo bɛɛ. Kɛ, mi Chiisu tosa wali koŋ kpou o nɛi tusiaŋ niŋ. Mbo chua teleŋndo le nda tɛɛsiallo aa: “La bii pa nyɛ ya tosal nya hoo wo bila? La cho ya veeloo aa, ‘Wana Pɛɛkaa’ a ‘Masanɔɔ,’ nduyɛ lende i cho ni, kanifuule wana waa lende ya cho ni. Lelaŋ, te ya cho Masanɔɔ a Wana Pɛɛkaa wo pulu nya peloŋ pɛ, mɛɛ nya bɛɛ nɔ mi la pulaŋ peloŋ vellaa velle.”—Chɔŋ 13:​12-14.

11. Vɛɛ Pitɛ ndoo chɔm yɛ maa mbo pɛɛku le kaa tusiaŋndo nɔɔ? (1 Pitɛ 5:5) (Tofa vɛlɛ fotueiyo.)

¹¹ Mi Pitɛ pɛɛku o kaa tusiaŋ Chiisu wo niŋ. O faŋaŋ Chiisu wo kɔɔli, mi Pitɛ tosa kaamaa mbo siŋgi po veluŋ o bɛvɛiyo wo. (Walta. 1:​8, 9; 3:​2, 6-8) Mi kaamaa hoo tosa mi waŋnda faŋga bɛndoo huŋ naa Pitɛ chua. (Walta. 3:11) Mɛɛ Pitɛ ndoo fula o kɔɔlima waŋnda che foofolaŋ nyɛ sɔvɛ wo niŋ yɛ, baa o wa pa chɛlɔɔ mi waŋnda ndaa saŋgala ndu? Sako. Kɛ mbo tusiŋ, nduyɛ mbo dimul nda le ma saŋgala Chɛhowa nda Chiisu. Okoŋ mbo dimi aa: “O diola ndɔlaŋ niŋ, a laalaŋ naŋ dɔu o diola ndɔlaŋ niŋndo tosa ni mi po nya cho hoo chɔɔ, nduyɛ mi la sina wo simul.” (Walta. 3:​12-16) Okoŋ kɔɔli, mi Pitɛ poonyial Kilisiɔŋnda le sabu i cho suɛi sɔvɛ le miŋ nɔ kaa tusiaŋndo wo. Diom maKilikii o soliŋ kpeku le kaa tusiaŋndo chɔmndo wo velaŋ a nyɛ Chiisu tosa wo mɛɛ o yiinuŋ tawɛiyo o chaŋ le kiilaa nduaa peloŋ pulɔɔ.—Nuawɔ 1 Pitɛ 5:5.

12. Vɛɛ naŋ hiau yɛ lachi a tusiŋndo nɔɔ maa Pitɛ?

¹² Ŋ nɔ miŋ tol tamasi Pitɛ wo kɔɔli le hiouwɔɔ lachi a waa wanaa tusiaŋ. Kɛsiŋ o kɔl maa tusiŋndo cho ko o nyɛ naŋ dimi wo niŋ te. Diom Pitɛ soliŋ kpeku le tusiŋndo tɛɛsiaa wo chɔm maa, tusiŋndo nɔɔ piiliaŋ mɛɛ naŋ yiyaŋ a naapila vɛlɛ a acheleŋnda okɔɔ yɛ. Miŋ tosal acheleŋnda sɔɔŋ kɛndɔŋ kanifuule ŋ kaala Chɛhowa a waŋnda chieeya, kɛ o cho le ma saŋgala naa le. Te ŋ tosa pɛ wallo a kɔl kɛndɛ le Chɛhowa vɛlɛ a puaapiliaa naa mala naŋ tiuba wo yɔŋgoo, mi keŋ chɔm maa wanaa tusiaŋnda naŋ cho ni, o yɔŋ bɛɛ mi acheleŋnda chi nyɛ naŋ tosa wo le.—Mat. 6:​1-4.

“LA WA WANAA TAASI”

13. Tɛɛsiaa wɔ nyɛ o sim le waa ‘wana taasi’ wo?

¹³ Yɛɛ o sim yɛ le waa ‘wana taasi?’ (1 Pit. 4:7) Mi Kilisiɔŋnɔ nɔ taasioo wo yiyaŋ a mɛɛ Chɛhowa cha sɔɔŋ yɛ, te o wa pɛ kɛɛsiaalaŋ tosaa. Mi wana waa nuaa sina maa, nyɛ o nyɛ cho o sɔvɛ o yoomu ndɔɔ niŋ mbo hiau chaŋyɛi kɛndɛi nɔɔ a Chɛhowa le. O yiyaŋ a ndupila okɔɔ tau mbo hiou mɛɛ o cho kpeekpei yɛ le. Kanifuule, o sina maa o cho sɔɔŋ kpou le o sina le. Nduyɛ, mbo chɔm maa o nɔ tiindaŋndo o Chɛhowa niŋ sanaa a ndu nyunaa o piɛileŋ niŋ le nɛi chɔmaa.

14. Vɛɛ Pitɛ kɛɛ yɛ le Chɛhowa tiindaŋndo teleŋ pilɛ?

¹⁴ Tuupa mi Chiisu sɔla piɔmndo o nyumma ndɔma mɛɛlaŋ choo, mbo dimul buɛiyaa nduaa aa: “Le nyɛ cho ya yɔŋnɔŋndo, chuɛllɛŋ nya kpou la cho ya malɔɔ.” Kɛ mi Pitɛ muli a tiindaŋndo aa: “A tuaa kpou mal num bɛɛ, kɛ ya ya, I mel num te.” Ichɔl koŋ mi Chiisu sila buɛiyaa nduaa apum aa: “La wa lahɔl, mi la hiou lachi a piɛileŋ.” (Mat. 26:​31, 33, 41) Pitɛ tul sila Chiisu ke ndu wo kɔɔli le. Te ndoo tol ndu pɛ kɔɔli, siooŋii ve ndu biyɔɔ le ndu viinɔŋndo le. Kɛ mbo viinuŋ Masanɔ ndɔɔ nduyɛ mbo kial suei le hei.—Mat. 26:​69-75.

15. Vɛɛ Chiisu chɔm yɛ maa o wa wana taasi o nyumma ndɔma mɛɛlaŋ choo?

¹⁵ Mi Chiisu tiindaŋ Chɛhowa a kɔl ndɔɔ kpou. Mi che bɛɛ Chiisu wa walaŋ, kɛ mi ndoo piɛi teleŋ o teleŋ. Mi keŋ ke ndu kɔl simulaa le hɛnaŋ Chɛhowa wo tosaa. (Mat. 26:​39, 42, 44; Chɔŋ 18:​4, 5) Mi piɛile Chiisu piɛi o nyumma ndɔma mɛɛlaŋ choo tuupa mbo sɔla piɔmndo leŋ, le piiliaŋ Pitɛ tau o yoomu ndɔɔ niŋ.

16. Vɛɛ Pitɛ ndoo chɔm yɛ maa o simnuŋ wana taasi? (1 Pitɛ 4:7)

¹⁶ Mɛɛ teleŋ tiŋ hiou, mi Pitɛ pɛɛku le tiindaŋ ndɔɔ kpou dɔwɔɔ o Chɛhowa niŋ. Mɛɛ Chiisu miiŋgu yoomu, mbo ke Pitɛ a kiilaa tuaa tiindaŋndo maa o cho nda nyina diandaa ke le ma dimi yooŋgu kɛndɔɔ. Kɛ, mi Chiisu dimul nda le ma chum Chulusalɛm haaa ma sɔla nyina diandaa. (Luku 24:49; Walta. 1:​4, 5) Yɛɛ Pitɛ tosa yɛ mɛɛ nda wa chumndo? Mi ndu a chaaŋaa nduaa Kilisiɔŋnda wa hiouwɔɔ lachi a Mɛlɛka piɛiyo. (Walta. 1:​13, 14) O yau tase Pitɛ poonyiaa wo niŋ, mbo dɛɛniaa chaaŋaa nduaa Kilisiɔŋnda le ma wa wanaa taasi, nduyɛ ma dɔu tiindaŋ ndaa kpou o Chɛhowa niŋ sanaa a piɛileŋ. (Nuawɔ 1 Pitɛ 4:7.) Mbo pɛɛku le tiindaŋndo dɔwɔɔ o Chɛhowa niŋ, nduyɛ mbo tiuba le puaapiliaa a ndepiliaa nduaa yoomuaŋ lueiyo.—Kale. 2:9.

17. O yɔŋ bɛɛ miŋ chaa sɔɔŋ pum tosa a ba naa, yɛɛ naŋ nɔ yɛ miŋ hiou lachi a tosaa? (Tofa vɛlɛ fotueiyo.)

¹⁷ Le miŋ wa wanaa taasi, mɛɛ miŋ wa piɛileŋ o Chɛhowa lo teleŋ o teleŋ. Ŋ sina maa ŋ nɔ miŋ hiou lachi a piɛileŋ o Chɛhowa lo, o yɔŋ bɛɛ miŋ yiyaŋ maa ŋ tiuba sɔɔŋ pum tosaa a ba naa. Lelaŋ, te simullo komal naa pɛ le kɛɛsiaa sɔviɔɔ opum tosaa, ŋ nɔ miŋ piɛi o Chɛhowa lo le nɛi chɔmaa, kanifuule ŋ tiindaŋ maa o sina nyɛ cho o kɛndɔɔ le naa wo.

18. Vɛɛ naŋ tosa yɛ yɛlɛmiaalaŋ le yiyaŋndo maa Chɛhowa?

¹⁸ Ŋ cho bɔɔ a kɔl kɛndɛ le mɛɛ Chɛhowa toosiaa naa o velaŋ ndɔɔ niŋ yɛ. (Chɛn. 1:26) I cho tonya maa ŋ tiuba miŋ tol tamasi Chɛhowa wo kɔɔli o nɛi walaŋndo choo le. (Aisa. 55:9) Kɛ maa Pitɛ, ŋ tiuba miŋ nɔ yiyaŋ Chɛhowa wo. Maa ŋ hiounuŋ lachi a tamasi Mɛlɛka wo tolɔɔ kɔɔli le yiyaŋndo maa ndu, miŋ wa wanaa tusiaŋ, nduyɛ miŋ wa wanaa taasi.