Miŋ Pɛɛku a Wana Naa Pɛɛkaa Bɛndoo Okɔɔ o Yoomu Naa Niŋ Kpou

TAMASI WANAA VELU YA WA

O wɔsiŋ 1950 woŋ mɛɛlulaŋ, mi wanaa velu ya wa faŋaŋ Itali ma kua Kiŋdɛsili, o Saskachewaŋ niŋ Kanada. Teleŋ biŋgi okoŋ kɔɔli, ma pɛɛku tonyaa nduyɛ mbo simnuŋ nyɛ kpeekpei o yoomula naalaŋ niŋ. I loonuŋ teleŋ ya wa o pɔmbɔ wo, mi yaa niilu yooŋgu kɛndɔɔ dimioo kpɛŋ a yuŋgu nuu. Lelaŋ, mi yaa dimi o lamamɔɔ niŋ maa I wa wɔsilaŋ la ŋɔmaa mi tosa “kɔɔfale malalaŋndeŋ.”

Mi che bɛɛ wanaa velu ya wa ndaa nɔ nyɛsɔlaa bɔɔ le, kɛ ma kɛsi tamasi kɛndɔɔ le salaa soliŋndo le Chɛhowa. Le tamaseliiyo, o wɔsi 1963 niŋ, ma pisi nyɛm ndaŋ bɔɔbɔɔ le halikpeŋ ma sɔla kaniei tau le mi naa kpou kuɛ o bɔŋaŋ bɛndu teŋgeŋndo Pasadena, Kalifoniaa o Amɛlika niŋ. A wɔsi 1972, miŋ faŋaŋ fondaŋ naŋ wa wo le kilolaŋ 1,000, miŋ kua Tilɛl o Bilitisi Kolombiaa niŋ Kanada, le yooŋgu kɛndɔɔ dimioo o tanda wanaa dimi Italiaŋnde wa niŋ. Wali finya nuu ndoo tosa wo wa, nyɛm tambu woŋ miŋgioo bɛɛndiaa a fondaŋ nda pisi nyɔɔŋ ndo dindioo ni. Mbo kɛɛ wali ndoo sɔla kaniei tau wo le halikpeŋ mbo sɔla teleŋndo tau le wali Chɛhowa wo tosaa.

I cho bɔɔ a kɔl kɛndɛ le tamasi kɛndɛ wanaa velu ya wa kɛsi le ya wo, bɛ nuu, vɛlɛ a yemaa niaa ŋiɔɔŋnda. Tamasi ndaa wa pɛɛku tase ya sɔla o wali Chɛhowa wo niŋndo ni. Ma pɛɛku ya suɛi sɔvɛ ya loonuŋ o yoomu nuu niŋndo. Ndi cho ni: Te I kɛsi pɛ Masale Mɛlɛkaleŋ nyɛ tase o yoomu nuu niŋ, Chɛhowa cho ya mala.—Mat. 6:33.

WALI LƆƆLƆƆ WO KANDƆƆ

A wɔsii 1980, mi chua Dɛbi o nɔɔ niŋ. Ndepilɛnɔɔ ndoo handu kɔllo o Chɛhowa piɛiyo choo wo o wa ni, nduyɛ naŋɔɔ pila o naŋ ni. Naŋ yeema luɛiyɔɔ o wali lɔɔlɔɔ Mɛlɛkaa niŋ. Lelaŋ mɛɛ naŋ chal o nɔɔ niŋ, paŋgoŋ ŋgaa okoŋ kɔɔli, mi Dɛbi kandu kɔɔfaleŋ. Mɛɛ naŋ chii wɔsioo opilɛ o nɔɔ naa niŋ, miŋ kua o kunda pɔmbɔɔ niŋ naa yeemɛi wa tau le wanaa dimiaa yooŋgu kɛndiaa wa, nduyɛ mi ya bɛɛ kandu kɔɔfaleŋ.

Mɛɛ teleŋ tiŋ hiou miŋ tambu kɔl, miŋ yeema le kɔŋndaŋ naa cheleŋ. Kɛ, nyɛ tase naŋ tosa wo, wa suukaŋndo a buɛi ibuŋgaa ni. Mbo dimul naa kpendekele o nɛi kaalaa niŋ aa: “Nya pila cho tosaa ni mi sɔɔŋ wa ŋ kala le nya, kanifuule la cho kɔllo handɔɔ o simulta cho nya komallo laŋ choo. Kɛ te la handu pɛ kɔllo o sɔɔŋ kɛndɔŋ choo, la cho batiuwaa sɔla.” Sila kpeekpei naŋ yeema wa koŋ ni. (Sam 141:5) Miŋ duau sila koŋ o wali niŋ chɔ chɔ, nduyɛ nyɔɔ viu bɛɛ le miŋ kandu chɔɔ sɔɔŋ kɛndɛŋ bɔɔbɔɔ wa yɔŋnɔŋndo woŋ. Wanaa bɔɔbɔɔ o kundaa niŋ ndaa yeema tosaa tau le Chɛhowa, kɔ bii feleŋguaa a ndepiliaa piaandaa ndaa ve Chɛhowa piɛi le wa. Suɛi sɔvɛ sɔvɛi pila wa hei le naa ni. Miŋ pɛɛku le kɔllo handɔɔ o sɔɔŋ kɛndɔŋ choo, a le Chɛhowa chumndo mbo siɛɛnduu sɔɔŋ naŋ yiyaŋ maa, ŋ nɔla muŋ biuwɔŋ te woŋ. (Maika 7:7) Mi sɔɔŋ bɛnda, okoŋ miŋ miiŋgu vɛlɛ nyaaloo sɔla.

Wanaa wa naa pɛɛkoo o sukuu lekɔɔfa tase naŋ bii yo wa, ndaa tosa niŋ wali Mɛlɛkaa o lɛŋii cheleŋ niŋ. Ma chɔm naa fotueilaŋ, nduyɛ ma suaa a simulta nda keeku niŋndaŋ, vɛlɛ a salala nda sɔla laŋ teleŋ nda wa wali Mɛlɛkaa tosaa o lɛŋii cheleŋnde niŋnde. Mi keŋ chɔɔlu naa yeemɛi luei le wali lemisiɔnalueiyo tosaa. Okoŋ miŋ kɛɛsiaa le kpeleŋndo kɛsioo le luɛiyɔɔ o wali lemisiɔnalueiyo niŋ.

Le miŋ komal kpeleŋ koŋ, a wɔsii 1984 miŋ kua Kubɛki, naa nda dimi Filaŋsiiye wa, nduyɛ chɔŋ Bilitisi Kolombiaa kɔ loŋ, o hiou kilolaŋ 4,000. Hei ndii sim ni maa, naŋ nɔ vɛlɛ miŋ pɛɛku naamu sɛnɛiyo a suɛi maŋgalɛi sɛnɛiye. Simul cheleŋ wa vɛlɛ ni maa teleŋnda bɔɔbɔɔ naŋ nɔ nyɛsɔlaa bɔɔ le. Teleŋndaŋ lapum, te waŋnda nda kala pɛ yambɛi o kpelela ndalaŋ niŋ, i ndaa mɛi kɔɔli ve naŋ chɔɔviaa ni le dioo. Mi Dɛbi ndoo bɛɛndiaa yambɛi hei o nɛila teŋgeŋ teŋgeŋndaŋ niŋ, nduyɛ yeelaa pila ndii yeela ni. Mi che bɛɛ simulta la wa, kɛ mi naŋ kindiŋ le biuwɔŋndo le nyaale naa mandaa. I hiou kpou ve, miŋ sina kɛsɛ maa Chɛhowa wa naa mandaa.—Sam 64:10.

Paale pilɛ miŋ sɔla veelu naŋ ve kɔl te wo o foŋndo choo. Ma veelu naa le kɔlaŋ wallo o Lɛuve Kanada. Mi che bɛɛ ŋ wa a kɔl kɛndɛ le veeloo hoo, kɛ miŋ tambu tiŋ kɔl kanifuule, naŋ peelu niŋ vɛlɛ yauwo le kɔlaŋ o sukuuwo Kiliaadi. Kɛ miŋ chɛl veeloo hoo. Mɛɛ naŋ fuuluu loŋ miŋ nyuna Ŋgɔɔ Kɛnɛti Litul, wana pilɛ o Wanaa Chua Chilaŋ o Lɛuve Wa aa: “Yɛɛ naŋ cho yɛ tosa te a veelu naa pɛ le kɔlaŋ o sukuuwo Kiliaadi?” Mbo muli aa: “Ŋ cho tal koŋ taŋɔɔ te ŋ fuuluu pɛ loŋ.”

Lɔɔ o pilɛ okoŋ kɔɔli, miŋ fuuluu o tal koŋ, kanifuule ma veelu ya naa Dɛbi le kɔlaŋ o sukuuwo Kiliaadi. Le hei naŋ nɔ miŋ tosa kɛɛsiaa. Mi Ŋgɔɔ Litul dimul naa aa: “Nyɛ o nyɛ nya kɛɛsiaa pɛ le tosaa, boondii cho fuuluu mi la dimi aa, naŋ nɔ miŋ tosa kɛɛsiaa opilɔɔ. O cho kɛɛsiaa o pilɛ kpe le hiou bɛnda le, kɛ Chɛhowa nɔla mbo dɔu kɛɛsiaa kɛ kɛ sala.” Miŋ chɛl veeloo le kɔlaŋ o sukuuwo Kiliaadi, nduyɛ miŋ cha tonyaa o sila Ŋgɔɔ Litul ke naa wo niŋ o wɔsila hiou laŋ niŋ. Teleŋnda bɔɔbɔɔ miŋ dimul acheleŋnda nyɛ o dimul naa wo, le nda malaa ma tosa kɛɛsiaa le wali suu nda cho chɛlɔɔ o wali Chɛhowa wo niŋndo.

YOOMU LEMISIƆNALUEIYO

Ŋ wa bɔɔ a kɔl kɛndɛ le waa sukuuwa 24 tɛɛŋ le toŋgo 83 wo o sukuuwo Kiliaadi. Bulukiliŋ, Niu Yɔk naŋ bii sukuuwo hoo ni a Nyaakuɛiyo wɔsi 1987. Ŋgɔɔ Yulisi Kilasi nda Chak Lɛdifɔɔ wa wanaa pɛɛkaa kpeekpeiya ni. Mɛɛ paŋgoŋ hiou ŋuɛɛnu, miŋ chii sukuuwo a Tapioo 6, 1987. Ma yɔŋ naa Heti latulu a Chɔŋ nda Meele Kudi.

Chɔŋ a teleŋ masaleŋ le faŋa misiɔnalueiya Heti a wɔsi 1962 wo, ndaa yɔŋ ndɔ misiɔnalueiyaa fula Kiliaadi wa loŋ te. Lɔɔlaŋ layaa hiouwɔɔ chɔŋ a teleŋ naŋ chii sukuuwo wo, miŋ kandu wali lemisiɔnalueiyo o Heti niŋ, o kunda pɔmbɔ ndoo nɔ wanaa dimiaa yooŋgu kɛndiaa 35 wo. Nduyɛ, o foŋndaŋ yololiɔɔ o pemboŋ tɛɛŋ kundaa hoo wa ni. Ŋ wa feleŋguaa, naŋ nɔ wɔ taasi bɔɔ le, nduyɛ ŋ wa kpeele o chiɛi lemisiɔnalueiyo niŋ. Wanaa bala fonduaa wanaa wa loŋ nda wa ni, nduyɛ a bɔɔbɔɔ ndaa sina yau le. A teleŋ naŋ kandu wali lemisiɔnalueiyo sɛnɛiyo, sɔɔŋ wɔɔŋ wa yɔŋnɔŋndo woŋ ŋpum cho muŋ ni: Chɔulaba lemasaa, waŋnda kindiŋndo le masaa faŋaa, nyɔɔŋ luumuuwo o nɛi, a hueiyii fuku fukuei.

Miŋ pɛɛku tau o laalaŋ kala kala, vɛlɛ a kɔl kɛndɛ puaapiliaa a ndepiliaa o Heti niŋ ndaa nɔ wo niŋ. Mi che bɛɛ a bɔɔbɔɔ sɔɔŋ ve bɛɛŋ bɛɛŋ a nda le, kɛ ndaa kaala Chɛhowa a wali pollo. Ndepilɛnɔ yuu pilɛ wa loŋ, o ndoo vii pɔnɔɔ wo. Mi che bɛɛ ndoo chiee diomndaŋ veeloo le, kɛ mbo pɛɛku le bolii Baabuiye 150 loonɔŋndo o kɔl niŋ. Mi bahawɛila wa o tandaa hoo niŋndaŋ chɔɔlu naa yoomuaŋ luei le yooŋgu kɛndɔɔ dimioo maa, Masale Mɛlɛkaleŋ kinɛi le cho hunɔɔ bahawɛila waŋnda chieeya chii ni. Ŋ cho bɔɔ a kɔl kɛndɛ le chɔɔ maa wanaa bɔɔbɔɔ naŋ pɛɛku Baabuiyo wa, apum simnuŋ niŋ kɔɔfaa lɔɔlɔɔ wa, kɔɔfaa teŋgeŋnda, a bɛnduaa kundaa.

Teleŋ naŋ wa Heti wo, miŋ komal po feleŋgɔnɔɔ diolaŋ Tilevɔɔ, o wa misiɔnalueinɔɔ le kaŋnde Mɔɔmɔŋnda wo. Nduyɛ miŋ naŋ sɔla teleŋndaŋ lapum fondaa le suukaŋndo a ndu a Baabuiyo okɔɔ. Mɛɛ wɔsila latiŋ la hiou, mbo poonyial la yau ya ve kɔl te wo. Mbo dimi o yau koŋ niŋ aa: “I nɔ le yiŋɔɔ sɔlaa o bɔŋaŋ cho hunɔɔ wo, nduyɛ I yeema mi miiŋgu vɛlɛ Heti, mi kɔ wa kɔɔfanɔ teŋgeŋndo o fondaŋ ya wa paandu misiɔnalueileŋ tosaa o kaŋnde Mɔɔmɔŋndeŋ niŋndo.” Nduyɛ mbo tosa keŋ le wɔsiŋ bɔɔbɔɔ nda laa ndɔ latulu.

YULOPI A AFILIKA

Ma yɔŋ naa o tanda pilɛ niŋ Yulopi, naa sɔɔŋ wa niŋ tɛtɛlɛ le yooŋgu kɛndɔɔ dimioo wa. A wɔsii 1992, miŋ kua Lubiliaana o Siloveeniaa niŋ. Fondaa hoo wa kpɛɛluŋ a naa wanaa velu ya wa mandaŋ nda tuupa ma kua Itali. Chɔuwo wa wɔ o tandala wa laŋ paandu Yukɔsileeviaa o ba bɛŋgu laŋ. Lɛuvii wa o Vieena, Ɔsitiaa niŋnde, a fondaŋ nda wa wallo a Lɛuve latulu o Sakelɛbi, Koloesiaa niŋ vɛlɛ a Bɛlikelɛdi, Saabiaa niŋ, wa hɔlteŋ le wali dimiaa yooŋgu kɛndɔɔ o tanda koŋ niŋ ni. Kɛ le lɛŋ o lɛŋ lee nɔ niŋ mi lee nɔ lɛuve a ba ndɔ.

Keŋ ndii sim ni maa, naŋ nɔ mi naŋ pɛɛku suɛi maŋgalɛi cheleŋ vɛlɛ a naamu cheleŋ. Mi pilachieeya loŋ ndaa dimi aa: “Chesɛk che tesɛk.” Koŋ sim ni maa, “suɛi maŋgalɛi hei kendu bɔɔ.” Nduyɛ tonya kpeekpei hei wa ni. Ŋ wa a kɔl kɛndɛ tau le mɛɛ puaapiliaa a ndepiliaa wa a bɛɛndiaŋ le siŋgaŋndaŋ chɛlɔɔ o kɔɔnaa niŋ, nduyɛ miŋ cha mɛɛ Chɛhowa dɔu nda sala yɛ. Miŋ cha vɛlɛ mɛɛ Chɛhowa siɛɛnduu sɔɔŋ lɔɔlɔɔ o nɛi kaalaa niŋ a teleŋndo kinɛi yɛ. Wɔsila naŋ chii Siloveeniaa laŋ, miŋ pɛɛku sɔɔŋ bɔɔbɔɔ a boondii keŋ. Nduyɛ sɔɔŋ bɔɔbɔɔ naŋ pɛɛku tuupa miŋ huŋ loŋ ndoŋ, miŋ mala naa le simulta komal naa loŋ ndaŋ biuwɔŋndo.

Kɛ siŋgaŋnda cheleŋ la wɔ naa lachi. A wɔsii 2000, ma yɔŋ naa Kodivuaa, o Afilika niŋ ba paaleŋ le dello. A Bɛŋgufɔnɔɔ wɔsi 2002, le mɛɛ chɔuwo ndoo del Kodivuaa yɛ, miŋ nyaanuŋ Saloŋ. Nduyɛ nda bɛɛ chɔu nda tosa wɔsilaŋ 11 wo ndoo chuu ko sɛnɛi. O ve bɛɛŋ bɛɛŋ le malɔɔ Kodivuaa a teleŋ koŋ te. Kɛ mi sɔɔŋ naŋ pɛɛku woŋ mala naa le hiouwɔɔ lachi a waa a kɔl kɛndɛ.

Miŋ handu kɔllo o wanaa ndaa yeema ma pɛɛku Baabuiyo wa choo, vɛlɛ a puaapiliaa a ndepiliaa biunuŋ niŋ chɔuwo le wɔsila bɔɔbɔɔ wa. Mi che bɛɛ wanaa bala fonduaa nda wa ni, kɛ ndaa nɔ yeemɛi tau le nyɛ ndaa nɔ wo acheleŋnda kioo. Mi ndepilɛnɔ pilɛ ke Dɛbi nyɛla chuɛɛnaŋndaŋ. Mɛɛ Dɛbi wa kiɔɔ le nyɛlaŋ ndaŋ biyɔɔ, mi ndepilɛnɔɔ baŋ ndu, mbo dimi aa: “Teleŋ naŋ wa o chɔuwo niŋndo, mi puaapiliaa o lɛŋii cheleŋnde niŋ mala naa. Mɛɛ teleŋ naa fuuluu hoo ni le mi naa bɛɛ yɔŋgu malaa.” Miŋ tosa ndi maa kpeleŋ naa le tamasi ndaa tolɔɔ kɔɔli.

Mɛɛ teleŋndo hiou tiŋ, miŋ miiŋgu Kodivuaa, kɛ mi sɛɛŋgiaŋnda lemasalaŋ la tosa mi chɔulabaa kanduŋ vɛlɛ. Le hei, a Bɛŋgufɔnɔɔ wɔsi 2004 miŋ luɛi o dɛndɛ choo pɔmbɔ niŋ le nyaanɔŋndo. Nduyɛ bɔlɔ ndaa chɛl wana o wana le ma nyaanuŋ a ndu wo, lusul ndɔɔ ndoo nɔ mbo wa le kilolaŋ 10 kinɛi. Miŋ lɔl ichɔl koŋ lɛŋ o dɔɔŋgɔ puaa chɔuwaa Filaŋsiiya, nduyɛ diimandɔɔ miŋ kua Suisalaŋ. Mɛɛ naŋ fuuluu o Lɛuve Suisalaŋ a ditɛɛŋndo, mi Wanaa Chua Chilaŋ o Lɛuve Wa a wanaa ndaa pɛɛku waŋnda o Sukuu Bɛnduaa Kundaa a Buɛiyaa Malalaŋnda wa, a laandaa ndaa latulu kpou huŋ demul naa, ma ke naa nyɛdiaa tuu kpɛiyo, a katola yeelɛila nda toosiaa o lɛŋnde ndaleŋ niŋndo. Mi hei pilaŋ naa kɔllo tau.

Ma yɔŋ naa Kana le teleŋ biŋgi, okoŋ miŋ miiŋgu vɛlɛ Kodivuaa mɛɛ wooluŋ wooluŋ lemasaa pɔlul. Mi kɛndɛi puaapiliaa a ndepiliaa chɔm naa ve mala naa miŋ biunuŋ teleŋnda naŋ nyaanuŋ ndaŋ, vɛlɛ a fondaŋ nda yɔŋ naa le teleŋ biŋgi le wali naa tosa wo. Mi ya a Dɛbi chɛl maa, mi che bɛɛ kaama nɔ mbo bii naa le kaala suu waa nuaa chɔɔ puaapiliaa a ndepiliaa tɛɛŋ o kɔɔna Chɛhowa wo niŋ te, kɛ fɛɛŋ bɛɛ ŋ nɔ miŋ puɛɛnuŋ ndi le. A tonya miŋ sina kɛsɛ maa, simulta kala kalala keeku naa laŋ choo laŋ la cho nyɔɔ opilɛ o pɛɛku naŋ sɔla wo niŋ.

O LƐŊII BA PAALEŊ LE CHAŊ NDO NIŊ

A wɔsii 2006 miŋ sɔla yauwo fulaa o fondaŋnda leboltaŋ. Ma ke naa wali sɛnɛi cheleŋ le kɔlaŋ o Lɛŋii Ba Paaleŋ le Chaŋ Ndo niŋ. O fondaa hoo bɛɛ naŋ nɔ miŋ wa sɔɔŋ sɛnɛi cheleŋ kɔl, simultaŋ, sɔɔŋ maŋgalaŋ vɛlɛ a naamulaŋ. Naŋ nɔ le pɛɛku tau o fondaŋ ndoo nɔ hoo bahawɛila bɔɔbɔɔ a sɔɔŋ lemasaŋ, vɛlɛ a laalaŋnda waŋnda ndaa nɔ laŋ okɔɔ wo. Miŋ hɛnaŋ a sɔɔŋ maŋgalaŋ yɛ yɛ ndaa dimi o kundalaŋ niŋndoŋ, nduyɛ fulamakɔɔlioo wa ni, miŋ cha mɛɛ nɛi chɔmaa Mɛlɛkaa tolɔɔ kɔɔli huŋ a diompilɔɔ yɛ. Naŋ nɔ bɛɛleŋ tau le puaapiliaa a ndepiliaa kanifuule, a wa biuwɔŋndo simul yuŋgula ndalaŋ, chaaŋaa ndaa sukuuwa, wanaa nda tosa wallo wa, vɛlɛ a wanaa nda chiɛɛliaŋnda wa nda wo.

Miŋ bii bɔŋaŋ bɛndu teŋgeŋndo a wɔsi 2012 o Tɛlaviv niŋ, Isɔluɛi. Teleŋ tasoo wa hoo ni, le mi wanaa Chɛhowaa chuuŋgiaŋ faŋga bɛndu waa lende, chɔŋ a paale Pɛŋtikɔɔsileŋ wɔsi 33 o Faŋaŋ Chiisu Wo Kɔɔli. Bɔŋaŋndo hoo wa bɔɔ bɔŋaŋ sɔvɛ bɛndu!

O wɔsila laŋ bɛŋgu, ma viam naa le kɔlaŋ puaapiliaa yilɔɔ o lɛŋnde nda kuuna wali naa otiŋ ndo niŋ. Mɛɛ naŋ wa kɔlaŋ, miŋ kua a yaula naalaŋ o ba, miŋ ke waŋnda o wali pollo niŋ, nduyɛ miŋ bii bɔŋaŋndaŋ a puaapiliaa o kundala pɔmbɔlaŋ niŋ. Puaa chɔuwa wa a nyɛm chɔuwoŋ o laba, nduyɛ fondaŋnda ndaa simi waŋnda o nɛi laŋ la wa ba o ba fee. Kɛ ŋ wa yekeŋ mɛɛ naŋ wa kɔlaŋ a puaapiliaa a ndepiliaa, nduyɛ siooŋii ve naa le.

MIŊ MIIŊGU VƐLƐ AFILIKA

A wɔsii 2013, miŋ sɔla vɛlɛ wali sɛnɛi cheleŋ wa teŋgeŋndo le kɔlaŋ o Lɛuve Kiŋsasa, o Koŋgo niŋ. Lɛŋnde kɛndɛ kɛndɛleŋ pila le cho ni, kɛ waŋnda cho saŋgaa loŋ a bala fondolaŋ vɛlɛ a chɔulaba lemasaa. O tasela ndɔ miŋ yiyaŋ maa, “ŋ sina niŋ Afilika, nduyɛ ŋ cho a bɛɛndiaŋ le kɔlaŋ.” Kɛ naŋ nɔ sɔɔŋ tau le pɛɛkoo, taama taama te o hiŋ pɛ le kɔlaŋ o fondaŋnda nɛila wɔɔŋnda nɔ talta le laŋ. Miŋ saaluŋ sɔɔŋ kɛndɔŋ tau, ŋ naŋ nɔ miŋ handu kɔllo choo woŋ. Mɛɛ biuwɔŋ puaapiliaa a nyaale nda wa tueiyɔɔ yeela wo cho nuaa yɛ, mi che bɛɛ ndaa nɔ bahawɛi nyɛsɔlaa. Ndaa kaala vɛlɛ yooŋgu kɛndɔɔ dimioo, nduyɛ ndaa nɔ sɛmbɔɔ tau le kɔlaŋ o bɔŋaŋndaŋ a bɔŋaŋnda ibuŋgalaŋ. Miŋ cha kɛsɛ mɛɛ Chɛhowa dɔu wali dimiaa yooŋgu kɛndɔɔ sala yɛ, nduyɛ mi wanaa bɔɔbɔɔ huŋ o tonyaa niŋ. Mi wɔsila naŋ tosa o wali lɔɔlɔɔ wo niŋ o Lɛŋnde Koŋgo leŋ niŋndaŋ la pɛɛku naa sɔɔŋ sɔviɔŋ tau, nduyɛ miŋ chɔɔlu chaŋyaŋ sɔla o kɔɔna Chɛhowa wo niŋ.

A wɔsii 2017 mɛɛlulaŋ, miŋ sɔla vɛlɛ wali sɛnɛi cheleŋ le kɔlaŋ Saut Afilika. O lɛuwuŋ naŋ keeku woŋ niŋ kpou lɛuve hei hiou wa. Nduyɛ teleŋ naa tasoo wa hoo ni le wallo tosaa o Bɛtɛɛl. Naŋ nɔ vɛlɛ sɔɔŋ tau le pɛɛkoo, kɛ miŋ duau sɔɔŋ naŋ pɛɛku o paandoo niŋndoŋ o wali niŋ le naa malaa. Ŋ kaala puaapiliaa a ndepiliaa, a bii niŋ lo lechoo wo chɔmndo o Chɛhowa lo le wɔsilaŋ tau wa. I cho bɔɔ suɛi kɔndɔfili le chɔɔ yuŋgoo o Bɛtɛɛl wallo tosaa o diompilɔɔ niŋ, mi che bɛɛ a fula o kɔɔlima yɛ yiaŋ niŋ a naamula yɛ yɛlaŋ. I cho tɛtɛlɛ le chɔɔ maa, Chɛhowa cho wanaa nduaa salaa dɔwɔɔ le waa o kɔl nyulu niŋ kanifuule, a chuɛɛnuŋ wanachieeyɛi sɛnɛiye, nduyɛ ma wa sawala mandaala Baabuiyo dɔwɔɔ o wali niŋ.

O wɔsila hiou laŋ niŋ, mi ya naa Dɛbi sɔla walta sɛnɛilaŋ, miŋ dɛli a naamula yɛ yɛlaŋ, nduyɛ miŋ pɛɛku sɔɔŋ maŋgalaŋ cheleŋ tau. Mi che bɛɛ sɔɔŋ muŋ ve bɛɛŋ bɛɛŋ lepum te, kɛ miŋ sinaŋ kaala lo lechoo Chɛhowa wo sanaa a kɔɔna ndɔɔ vɛlɛ a puaapiliaa a ndepiliaa. (Sam 144:2) Ŋ laalaŋ maa pɛɛku naŋ sɔla o wali lɔɔlɔɔ Mɛlɛkaa niŋndo siiŋguu naa buɛiyaa sɔviaa le Chɛhowa ni.

I mel wanaa velu ya wa balikaa, le manda sɔvɛ nda ke ya wo, toolu laa ni kaalaa Dɛbi toolu ya wo, vɛlɛ a tamasi kɛndɛ ya saaluŋ puaapiliaa a ndepiliaa tɛɛŋ chieeŋndo balɔɔ silɔ wo. Mɛɛ ya a laa nuu cho yiyaŋndo a chilaŋ okɔɔ yɛ, ŋ kɛɛsiaa le miŋ hiou lachi a pɛɛkoo sɔɔŋ Wana naa Pɛɛkaa Bɛndoo cho naa pɛɛkoo woŋ.