“Chɛhowa Tosa ni Mi Wana Yem Chɔuwo”

A wɔsii 1999, mi masaleŋ Filaŋsi le dimi maa lɛuvii nɛi Filaŋsi ndii nɔ mi i mal paawaa le toolula puaapiliaa ndaa yɔŋgu laŋ, chɔŋ wɔsi 1993 kɔ bii a wɔsi 1996. Miŋ kindiŋ le dioo sɔlaa o suɛi hei niŋ o toŋgola kialaa ŋyama laŋ o Filaŋsi niŋ, kɛ ŋ sɔla batiuwaa le. Mɛɛ naŋ hivi suɛi nɛi o toŋgo kialaa ŋyama cheleŋ, ŋ sɔla vɛlɛ batiuwaa le. Okoŋ, mi masaleŋ le chua nyɛsɔlaa Seiyaa Chɛhowaa dalalaŋ 6,300,000 o fondaŋ Lɛuve kɛsi nyɛsɔlaa wo. Tiindaŋ naa le kanii keŋ sɔlaa kinɛi wa niŋ ni, mɛɛ miŋ naŋ kuɛ a suɛi nɛi o Toŋgo Kialaa Ŋyama Bɛndoo o Yulopi Niŋ. Kɛ tuupa ma chal o suɛi nɛi choo, ma nyuna naa le miŋ bii bɔŋaŋndo a wanaa masaleŋ Filaŋsi vem hɔlte ndɔ wa, latulu a wanaa Toŋgo Kialaa Ŋyama Bɛndoo vem hɔlte ndɔ wa, le miŋ toosiaŋ tɛɛŋ tuupa miŋ naŋ chal le kɔɔsɔɔ.

Miŋ yiyaŋ maa, wana toŋgo kialaa ŋyama bɛndoo vem hɔlte ndɔ wo wa naa nyuna le miŋ ke masaleŋ Filaŋsi nyɛsɔlaa pɔmbɔ o kanii nda nyuna naa ve choo. Kɛ, miŋ bii bila maa hali kanii mapuuluei ipilɛ bɛɛ naŋ paawaa ni, ŋ wa sawala mandaala Baabuiyo tɛɛmbuu. Le Masale Mɛlɛkaleŋ tooloo puaapiliaa a ndepiliaa yɔŋgu toolulaŋ ni, kɛ o cho le masale waŋnda chieeya tooloo le. (Mat. 22:21) A koŋ kpou, le miŋ chɔm bɛɛleŋ le Toŋgo Kialaa Ŋyamaa, miŋ kɔ bii bɔŋaŋndo hoo.

Miŋ bii ndu o lumuila kɛndɛ kɛndɛla nda bii bɔŋaŋndaŋ o Toŋgo Kialaa Ŋyamaa niŋndaŋ o pilɛ. Mɛɛ naŋ kandu dɔɔ, mi wana Toŋgo Kialaa Ŋyama Bɛndoo vem hɔlte ndɔ wo dimi maa, Seiyaa Chɛhowaa nɔ ma paawaa kaniŋ masaleŋ Filaŋsi nyuna nda woŋ ŋtiŋ. Mi nyina Chɛhowa wo mala naa miŋ nyuna chua wa suɛi keŋ chilaŋ ndo aa: “La sina pa maa masaleŋ le bii niŋ nyɛsɔlaa naa dalalaŋ 6,300,000 o fondaŋ kɛsiaa nyɛsɔlaa naa?”

Mɛɛ chuaa hoo tuei hei, mi hɔlla siŋgaŋ ndu o lepilɛ niŋ kpe. Mɛɛ wanaa masaleŋ Filaŋsi vem hɔlte ndɔ wa chɛl maa tonya i cho ni, mi yiyaŋ tase chuaa hoo ndoo nɔ a suɛi hei okɔɔ wo siŋgaŋ. Mbo duaunuŋ tumbe a nda, nduyɛ mi bɔŋaŋndo mɛɛlu loŋ. Mi sina kɛsɛ maa Chɛhowa tosa ni miŋ sɔla dioo o suɛi hei niŋ, o nɛi naŋ ve kɔl te wo choo. Miŋ naŋ kɔl tau mɛɛ naŋ mal bɔŋaŋ koŋ, nduyɛ mi kɔndɔfillo bii naa le nyɛ yɔŋnuŋndo.

A Kooŋndo 30, 2011, mi Toŋgo Kialaa Ŋyama Bɛndoo o Yulopi niŋ suŋgu le di naa. Ma dimul masaa waa maa a nɔ ma bii naa nyɛsɔlaa waa lende o ba le. Nduyɛ ma dimi maa, a nɔ ma miŋgi nyɛsɔlaa nda bii naa koŋ o ba wo a tɔnɔɔ lechoo. Mi yamɛi keluŋ hei ve tosa, mi Seiyaa Chɛhowaa wa fɛɛsɛŋ le Chɛhowa piɛiyo o lɛŋnde Filaŋsi leŋ niŋ haaa a paale hauleŋ. Nyuna naŋ bɛɛndiaŋ hoo pɛŋ le nyuna le wo wa ko maa pou dii Koolaya wo. Mi nyunaa hoo siŋga nyɛ o nyɛ o kɔɔsɔɔ hoo niŋ. Yɛɛ tosa miŋ sɔla dioo o suɛi hei niŋ? Kanifuule mi Deeve dimul Koolaya aa: “Chɛhowa tosa ni mi wana yem chɔuwo.”—1 Sam. 17:​45-47.

O cho ko o kɔɔsɔɔ hoo choo le naŋ sɔla dioo le. Mi che bɛɛ masɛi kpaaya bɛnduei a piɛiye simul naa niŋ, kɛ ŋ sɔla niŋ dilaŋ 1,225 o toŋgola kɔɔsɔlaŋ o lɛŋnde 70 niŋ, a o toŋgola kɔsɔla bɛndula bɔɔbɔɔ niŋ. Batiuwaa naŋ sɔla hoo o toŋgola kialaa ŋyama laŋ ndaŋ niŋndo ke naa dioo le Mɛlɛka naa piɛiyo, waŋnda yooŋgu kɛndɔɔ dimullo, balaŋ kiɔɔ lueiyo o naamula Baabuiyo kɛɛ laŋ niŋ, a kiɔɔ naa koowaŋ hivioo o ŋdial.

O lɛuvii fondaŋnda lebolta Seiyaa Chɛhowaa o Amɛlika niŋ ya tosa wallo ni. Kɛ vɛɛ ya looku yɛ simnɔŋ wana suaa le dila Seiyaa Chɛhowaa o Toŋgo Kialaa Ŋyamaa niŋ Yulopi wo?

WANAA VELU YA WA NDAA KAALA WALI LEMISIƆNALUEIYO

Finya nuu ndoo nɔ diolaŋ ni aa Chɔɔchi, kala nuu a Lusili. Mɛɛ nda chii toŋgo 12 o sukuuwo Kiliaadi, ma yɔŋ nda Itoopiaa. Nduyɛ loŋ nda velu ya ni, a wɔsi 1956. Ma ke ya diolaŋ a Filipi, le loonɔŋndo a Filipi ndoo dimi yooŋgu kɛndɔɔ o wɔsiŋ kɛmɛ tasoŋ niŋndo. (Walta. 21:8) O wɔsioo pilɔɔ niŋ, mi masaleŋ le kuuna piɛile naalaŋ. Mi che bɛɛ I wa wɔ poombɔ pɔmbɔ, kɛ I loonuŋ ndɔ nyɛkɛndɛi mɛɛ yuŋgu naa ndoo tosa sɔɔŋ ŋMɛlɛkayaŋ sɔɔsɔɔ yɛ. Le mɛɛ ya wa poombɔ pɔmbɔ yɛ, mi yiyaŋ maa keŋ wa bɔɔ suɛi kɛndɛ. Kɛ i cho suɛi kɔl tambɛi le sinaa maa, mi masaleŋ le dimul naa le miŋ mal lɛŋnde leŋ a wɔsi 1960.

Mi yuŋgu naa kua Wichita, o tanda Kaŋsasi wo niŋ Amɛlika. Kɛ kaala wanaa niaa ndaa nɔ le yooŋgu kɛndɔɔ dimioo teleŋ nda wa wali lemisiɔnalueiyo wo, ndaa puɛɛnuŋ ndɔ a ndu okɔɔ le. Ma pɛɛku ya a yema ni chuu ya o kɔɔ wo diolaŋ a Chudi, vɛlɛ a pɔmbɔ nuu diolaŋ aa Lɛsili, le miŋ kaala Chɛhowa nduyɛ miŋ piɛi ndu a kɔl naa kpou. Yema nuu hoo, vɛlɛ a pɔmbɔ nuu bɛɛ, o Itoopiaa niŋ nda velu nda ni. Mi sɔla yiŋɔɔ mɛɛ ya fuuluu wɔsilaŋ 13. Wɔsilaŋ layaa okoŋ kɔɔli, mi yuŋgu nuu kua Alikipa, Pɛlu, naa yeemɛi wa tau le wanaa dimiaa yooŋgu kɛndiaa wa.

Mɛɛ ya fuuluu wɔsilaŋ 18 a wɔsi 1974, mi lɛuve Pɛlu dimul la a puaapiliaa cheleŋ a hiɔɔlu, le kɔɔfale teŋgeŋndeŋ tosaa. Naŋ nɔ miŋ dimi yooŋgu kɛndɔɔ o tandala ndaa dimi wɔ yooŋgu kɛndɔɔ kani bɛɛ le laŋ niŋ, o fondaŋ ŋpemboo Andɛsi. Hei ndii sim ni maa naŋ nɔ mi naŋ dimul wanaa ndaa dimi suɛi maŋgalɛi Kechua ve wa, a wanaa ndaa dimi Aimalua ve wa yooŋgu kɛndɔɔ. O mɔmbil naŋ balu wo niŋ naŋ lɔl vɛlɛ ni, nduyɛ mi naŋ veelu ndu aa Dɛndɔɔ kanifuule, wanaa che ndu pɛ aa kɔfu bɛndoo ni. I kaala bɔɔ yiyaŋndo a mɛɛ yaa soliŋ Baabuiyo kpeku le wanaa wa o tanda koŋ niŋnda chɔmndo maa, Mɛlɛka cho hunɔɔ bala fondolaŋ chii, naalaŋ vɛlɛ a piɔmndo. (Sɔɔŋ. 21:​3, 4) Mi wanaa bɔɔbɔɔ chɛl yooŋgu naŋ wa hoo dimioo a Masale Mɛlɛkaleŋ okɔɔ wo.

MI KANDU WALLO TOSAA O FONDAŊNDA LEBOLTA SEIYAA CHƐHOWAA

Mɛɛ Alibɛti Sukuluda o wa o Dialii Kuumbaŋ Choo Ve choo le Seiyaa Chɛhowaa wo hiŋ yilɔɔ Pɛlu a wɔsii 1977, mbo dɛɛniaa ya le mi peelu yauwo le kɔlaŋ wallo tosaa o Bɛtɛl o fondaŋnda leboltaŋ, nduyɛ mi tosa. Nyɔɔ viu bɛɛ le, a Kooŋndo 17, 1977, mi kandu wallo tosaa o Bɛtɛllo Bulukiliŋ. Le wɔsilaŋ la hiɔɔlu, i wa wallo a Kunda Dindiaa vɛlɛ a Kunda Miŋgi Nyɔɔŋ Bɛɛndiaa Wo.

A Kooŋndo 1978, miŋ chiikaŋ naa Elisabɛɛ Alivani o bɔŋaŋ bɛndu lelɛŋ naŋ bii Niu Ɔliaŋ, o Lusiana niŋndo. Ndu bɛɛ wanaa velu ndu wa wa ko maa wanaa velu ya wa, a ndaa kaala Chɛhowa tau wa. Elisabɛɛ ndoo tosa kɔɔfaleŋ le wɔsilaŋ la hiɔɔlu, nduyɛ ndoo yeema waa o wali lɔɔlɔɔ wo niŋ haaa a yoomu ndɔɔ mɛɛlulaŋ. Ŋ wa hiouwɔɔ lachi a suukaŋndo. Miŋ siiniaŋ nyɛkɛndɛi nduyɛ miŋ kaaliaŋ tau. Mɛɛ naŋ chal o nɔɔ niŋ a Saa 20, 1979, mbo huŋ o Bɛtɛl miŋ kandu wallo tosaa loŋ naa ŋiɔɔŋ.

Mi puaapiliaa a ndepiliaa o kunda naa tasoo niŋ bii naa nyɛkɛndɛi. Nduyɛ o Spanisiiye niŋ kundaa hoo ndoo bii bɔŋaŋndaŋ ni o Bulukiliŋ niŋ. Miŋ keeku o kundala yɛ yɛla chɔm naa kaalaa laŋ niŋ layaa, nduyɛ ma dɛɛniaa naa le miŋ hiou lachi a wali naa tosaa o Bɛtɛl. Ŋ nɔ balika melaa le mala ndaa, chaaŋaa naa, vɛlɛ a yuŋgula naala toolu naa laŋ, le mɛɛ nda mala naa wanaa velu naa wa mandaa o yuwɛi ndɛi niŋ yɛ.

MI PƐƐKU LE SUƐI LE DILA WAŊNDA O TOŊGOLA KƆƆSƆLAŊ NIŊ

Mi kɔndɔfillo bii ya mɛɛ nda dimulla a Tɛɛkpaa 1982, le wallo tosaa a Kunda Suaa le Dila Seiyaa Chɛhowaa Wo o Bɛtɛl. Mɛɛ wɔsilaŋ la hiou layaa, ma dimul la le mi kuɛ o sukuu nda pɛɛku a sawaa okɔɔ wo, le mi simnuŋ wana suaa le dila waŋnda o toŋgola kɔɔsɔlaŋ niŋndo. Mi pɛɛku maa waŋnda o Amɛlika niŋ a lɛŋii cheleŋnde nɔ dioo le sɔɔŋ bɔɔbɔɔ tosaa, le mɛɛ Seiyaa Chɛhowaa sɔla niŋ batiuwaa o toŋgola kialaa ŋyama laŋ niŋ o sɔɔŋ bɔɔbɔɔ niŋ yɛ. Mi naŋ yaasiaa tau a sɔɔŋ waa nuaa okɔɔ teleŋ ya wa sawaa pɛɛkoo wo.

Mɛɛ ya fuuluu wɔsilaŋ 30 a wɔsii 1986, ma yulu ya iso le mi wa chilaŋ le Kunda Suaa le Dila Seiyaa Chɛhowaa Wo. I wa a kɔl kɛndɛ tau le dikeŋnaŋndo hoo vɛlɛ a bɛɛle ya sɔla leŋ ndeŋ, mi che bɛɛ i wa wɔ feleŋgɔnɔ. I wa vɛlɛ buulaŋndo kanifuule, yaa sina wɔ sɔɔŋ bɔɔbɔɔ le, nduyɛ o cho wali bɛɛŋ bɛɛŋ te o wa le.

Mi simnuŋ wana suaa le dila waŋnda o toŋgola kɔɔsɔlaŋ niŋndo a wɔsii 1988. Kɛ, I ve o sina choo maa mi batiuwaa ya sɔla o pɛɛkoo hoo niŋndo wa chaŋyɛi nii paaliaŋndo a Chɛhowa le. Mi pɛɛkoo o sukuula bɛndulaŋ tosa mi waŋndo heeluŋ, nduyɛ mbo yiyaŋ maa o cho o sɔvɛ mbo hiau wanaa cheleŋaa sɔla pɛɛku waa lende le wa. Kɛ mi Elisabɛɛ kindiŋ le ya malaa. Mbo mala ya le mi miiŋgu sɔɔŋ ŋMɛlɛkayaŋ tosaa maa paandu tuupa mi kua o sukuu lasawaa niŋ. Mbo chua ya teleŋndo tau, kɛ o pɔmpɔmbɔ, mi miiŋgu vɛlɛ o chaŋyɛi kpɛɛluŋnde niŋ a Chɛhowa. I sina niŋ kɛsɛ maa kɔl kalu bɛndoo nɔɔ cho suɛi sɔvɛ o yoomoo niŋ te. Nyɛ tosa ma nɔ yoomu sɔviɔɔ wo cho chaŋyɛi kpɛɛluŋnde nɔɔ a Chɛhowa, nduyɛ ma nɔ kaala yiŋgoloŋndo le ndu vɛlɛ a waŋnda chieeya ni.

MIŊ CHƆULABA LE MI YOOŊGU KƐNDƆƆ SIM YI

Mɛɛ ya chii sukuuwo le pɛɛkoo a sawaa okɔɔ, mi handu kɔllo le sɔɔŋ kɔɔnaa o Kunda Suaa le Dila Seiyaa Chɛhowaa Wo, le kɔɔna Chɛhowaa mandaa, vɛlɛ a di Seiyaa Chɛhowaa nɔ le yooŋgu kɛndɔɔ dimioo wo mandaa. Mi wali nuu ndoo chuu ya nyaaloo tau, kɛ ndoo nɔ vɛlɛ simullo kanifuule, sɔɔŋ wa tuŋ hiouwɔɔ lachi a siŋgaŋndo o kɔɔna naa niŋ. Le tamaseliiyo, mi naŋ nyuna paandu le nyɛsɔlaa pɔmbɔ yɔŋgoo le yaula naalaŋ baŋaa, kɛ kanduŋ a wɔsi 1991, ma nyuna Kunda Suaa le Dila Seiyaa Chɛhowaa Wo le ma nuuviaa nɛilaŋ mɛɛ naŋ pɛŋgi keŋ tosaa yɛ. Chɔŋ niŋ a teleŋ koŋ huŋ bii a hau, Seiyaa Chɛhowaa nyuna lɛ waŋnda le ikani le yaula ndalaŋ te. Mi hei tosa wali naa tɛtɛlɛ o Bɛtɛl vɛlɛ a o yooŋgu kɛndɔɔ dimioo niŋ, nduyɛ mi i mala tau le fafaŋndo bahawɛila huŋ a paawaa malɔɔ laŋ okɔɔ. Mi apum yiyaŋ maa siŋgaŋndo hoo cho tosa ŋ ve niŋ nyɛsɔlaa bɔɔ sɔla le, nduyɛ mi keŋ paaliaŋ wali dimiaa yooŋgu kɛndɔɔ. Kɛ mi nyɛ naŋ ve kɔl te wo yɔŋnuŋ. Wanaa cho niŋ Chɛhowa piɛiyo wa chɔŋ wɔsii 1990 handuŋ niŋ lechoo tau. Nduyɛ hau, mi wanaa bɔɔbɔɔ sɔla nyɛm mala naa le pɛɛkoo a Mɛlɛka okɔɔ woŋ a paawaa nyɛ o nyɛ le. I pɛɛku maa mala Chɛhowa wo kinɛi a nɛila chɔmaala fula Dialii Kuumbaŋ Choo Ve o ba laŋ la tosa ni, miŋ sɔla batiuwaa o siŋgaŋnda bɛndula yɔŋnuŋ o kɔɔna Chɛhowa wo niŋndaŋ.—Ɛso. 15:2; Mat. 24:45.

O cho ko le mɛɛ naŋ nɔ wanaa sina a sawaa okɔɔ wa le naŋ sɔla batiuwaa o toŋgola kialaa ŋyama laŋ niŋ te. Teleŋnda bɔɔbɔɔ, nyɛ nyindu wanaa kialaa ŋyamaa a wanaa cho o masaleŋ choo wa le ma suŋgu le dila Seiyaa Chɛhowaa wo cho kaa kɛndɛ nda chɔmndo ni. Mi cha tamaseliiyo a hei okɔɔ a wɔsii 1998, mɛɛ wanaa wa o Dialii Kuumbaŋ Choo Ve choo wa a yaa, a laandaa ndaa kuɛ yilɔɔ o bɔŋaŋnda teŋgeŋndaŋ Kiuba. Mi kaa nda kɛndɔɔ a bɛɛle ndaleŋ le chɔm masaleŋ kɛsɛ maa bala naa cho o sɔɔŋ lemasa niŋ te.

Kɛ teleŋndaŋ lapum, te masaleŋ le chɛl le sɔɔŋ biyɔɔ o nɛi bɛɛŋ bɛɛŋ ndo niŋ te, miŋ kuɛ a ndi o lemasa o nɛi sawaa choo. (Filip. 1:7) Le tamaseliiyo, le wɔsiŋ bɔɔbɔɔ masaleŋ Yulopi a Saut Kooliaa ndaa chɛl di Seiyaa Chɛhowaa nɔ le wali cheleŋ tosaa le, mɛɛ wali chiɛɛliaŋ a wali le sovɛiyo wo. Mi hei tosa ma duau puaapiliaa le 18,000 o Yulopi niŋ, a puaapiliaa hiouwɔɔ 19,000 o Saut Kooliaa niŋ o chiɛila manyumndaŋ niŋ le mɛɛ nda kɛɛ wali le sovɛiyo yɛ.

O mɛɛlulaŋ kpɔŋ, a Suɛɛsɔɔ 7, 2011, mɛɛ Toŋgo Kialaa Ŋyamaa le Yulopi kialu yamɛi le suɛi yɔŋnuŋ Bayatyaŋ a masaleŋ Ameeniaa tɛɛŋ ndo. Mi keŋ mala mi lɛŋnde o Yulopi niŋ kpou chɛl le mi waŋnda tosa walta cheleŋ, la chiɛɛliaŋ a wali le sovɛiyo le laŋ, le laalaŋnda ndalaŋ. Mi Toŋgo Kialaa Ŋyama Bɛndoo o Saut Kooliaa niŋ bɛɛ tosa nyɛ pilɔɔ hoo kpe, a Kooŋndo 28, 2018. Kɛ nyɛɛmbɔ bɛɛ puaapiliaa naa feleŋguaa ndaa kɛɛ pɛ le loo yuŋyeŋ, batiuwaa hoo ve sɔlaŋ te.

Kunda suaa le dila Seiyaa Chɛhowaa o fondaŋnda leboltaŋ vɛlɛ a lɛuwoŋ chieeŋndo balɔɔ silɔ wo cho wallo tosaa kalaŋ, le chɔulabaa le di naŋ nɔ le Chɛhowa piɛiyo vɛlɛ a yooŋgu kɛndɔɔ dimioo wo. Dikeŋnaŋndo pila naŋ sɔla ni le suɛi le puaapiliaa a ndepiliaa masaa waa cho simullo wa. O yɔŋ bɛɛ miŋ sɔla batiuwaa o toŋgo kialaa ŋyamaa niŋ te, kɛ fulamakɔɔlioo wa ni, miŋ timbi seileŋ o wanaa bɛnduaa lo, masaa waa, vɛlɛ a o wana o wana lo. (Mat. 10:18) Mi wanaa kialaa ŋyamaa, wanaa masaleŋ le vem hɔlte nda wa, wanaa dimi yooŋgulaŋ nda, vɛlɛ a wana o wana fee sina a bolii Baabui naŋ soliŋ kpeku ve okɔɔ o konala naŋ poonyiaa laŋ niŋ, vɛlɛ a teleŋ naŋ wa kɔɔsɔɔ wo. Mi wanaa nɔ kaa tusiaŋndo wa pɛɛku le sinaa wanaa suu Seiyaa Chɛhowaa cho wa, vɛlɛ a nyɛ laalaŋ ndaa tɔlnuŋ choo wo. Waŋnda haa apum simnuŋ niŋ chaaŋaa naa laalaŋnda.

NUWALI TAU CHƐHOWA!

O wɔsila 40 la hiou laŋ niŋ, I sɔla niŋ dikeŋnaŋndo le wallo latulu a kundala suaa le dila Seiyaa Chɛhowaa o lɛuwuŋ yɛ yiɔɔŋ chieeŋndo balɔɔ silɔ wo. Nduyɛ I sim niŋ vɛlɛ wanaa bɛnduaa o hɔl, o toŋgola kɔsɔla bɛndula bɔɔbɔɔ niŋ. I nɔ kaalaa a bɛɛleŋ le chaaŋaa niaa naŋ tosa wallo o kundaa hoo choo wa, o fondaŋnda lebolta Seiyaa Chɛhowaa vɛlɛ a haa o lɛuwuŋ yɛ yiɔɔŋ chieeŋndo balɔɔ silɔ. I sɔla niŋ salalaŋ tau o yoomu nuu niŋ, nduyɛ mi keŋ chuu ya nyaaloo.

O wɔsila 45 hiou laŋ niŋ, Elisabɛɛ bii ya niŋ tooloo o nɛi kaalaa niŋ, o wa a teleŋ kɛndɛ, o wa a teleŋ wɔɔŋ. I nɔ balika melaa tau le ndu kanifuule, mbo toolu ya mi che bɛɛ mi kɛndiaa lepɛŋndo tosa o nɔ lɛ yoomuma bɔɔ le.

Ŋ che niŋ kɛsɛ maa yoomuma naŋ a batiuwaa naŋ sɔla wo, o cho le kɔl kalu naa le. Kɛ a mɛɛ Deeve dimi yɛ, “Chɛhowa cho kpaaya wanaa nduaa ni.” (Sam 28:8) A tonya, “Chɛhowa tosa ni mi wana yem chɔuwo.”