Baa A ‘Pɛɛku Niŋ Pa le Kɔl Hiniaa Nɔɔ’?

1. Yɛɛ kɔl hiniaa sim yɛ, nduyɛ yɛɛ o sim yɛ le?

BAA a hini pa kɔl a nyɛ ŋ nɔ wo? Mi wana nɔ kɔl hiniaa wo nɔ nyaaloo, nduyɛ mbo wa o kɔl nyulu niŋ te o handu pɛ kɔllo o tɔnɔla o cho sɔlaa suŋ suŋndaŋ choo. O doonuŋ tumbe ɔɔ mbo tambu kɔl le mɛɛ o sɔla nyɛ o yeema wo yɛ le. A koŋ kpou, te waŋndo wa pɛ wana kɔl hiniaa, keŋ chɔm nuaa maa o buulaŋ te le. Le tamaseliiyo, i cho suɛi wɔɔŋ le mi Kilisiɔŋnɔɔ nuuviaa nɛilaŋ le tosaa tau o wali Chɛhowa wo niŋ te. (Luom. 12:1; 1 Tim. 3:1) Kɛ te o yala dilakeŋnaŋnda o wa kɔl taŋ sɔla le, o tembu vɛlɛ kɔl te.

2. Le yɛɛ i cho yɛ suɛi kpundɛ le kiɔɔ kɔl hiniaa nɔɔ?

² Te ŋ hini kɔl a nyɛ naŋ nɔ wo le, mi keŋ nyindu naa le kɛɛsiaala wɔɔŋndaŋ tosaa. Mi wanaa nɔ kɔl hiniaa le wa tosa wallo le hawɛila bɔɔbɔɔ, le halikpeŋ ma sɔla nyɛm nda heuba le muŋ te woŋ. I cho suɛi imɔnɔ le sinaa maa, Kilisiɔŋnda apum chiimbuu niŋ nyɛsɔlaa a nyɛm cheleŋ ndaa nɔ yeemɛi le muŋ ndoŋ. Ma dimi o kɔl niŋ aa: ‘I nɔ mi sɔla ndu,’ ‘I viou niŋ bɔɔ chumndo le ndu,’ ɔɔ ‘I cho kanii nduɛi miŋgi lɔɔ cheleŋ.’ A koŋ kpou, Chɛhowa tul viile kɛ kɛ leyɛ. (Polo. 30:9) Apum tambu niŋ kɔl tau le mɛɛ nda sɔla dikeŋnaŋ nda wa kɔl lo yɛ le, nduyɛ mi hei tosa ma mal Chɛhowa piɛiyo. (Kale. 6:9) Yɛɛ tosa yɛ mi wana cho Chɛhowa piɛiyo wo yiyaŋ le i waa lende tosaa? Naapum nyɛ huŋ a bahawɛiyo wo wa ni, mi wana koŋ kandu kɔl hiniaa o nɔ wo malɔɔ o pɔmpɔmbɔ.

3. Suɛi kɔl dɛɛniaa kuɛɛ naŋ pɛɛku yɛ o Filipiaŋnda 4:​11, 12 niŋ?

³ Naa kpou tiuba miŋ nɔ kɔl hiniaa. Mi kiilanɔɔ Pɔɔl poonyiaa maa, o “pɛɛku niŋ le kɔl hiniaa nɔɔ o nyɛ o nyɛ niŋ.” (Nuawɔ Filipiaŋnda 4:​11, 12.) Teleŋ o wa o chiɛi manyumndo niŋndo o poonyiaa diomndaŋ ndaŋ ni. A koŋ kpou, nyaale ndɔɔ heluŋ ndu le. Mbo “pɛɛku le kɔl hiniaa nɔɔ.” Te a che ndi pɛ ikala le waa wana kɔl hiniaa, diomnda Pɔɔl laŋ a suɛi nduɛi yɔŋnaŋnde dɛɛniaa num kɔllo le kɔl hiniaa nɔɔ. Ŋ nɔ miŋ yiyaŋ nuaa maa, i cho wa bɛɛŋ bɛɛŋ le kɔl hiniaa nɔɔ o nyɛ o nyɛ niŋ te le. Kɛ, ŋ nɔ miŋ pɛɛku le kɔl hiniaa nɔɔ. Vɛɛ naŋ tosa hei? Ŋ yaasiaŋndɔ suliŋnda mala naa le miŋ pɛɛku le kɔl hiniaa nɔɔ wo.

CHƆM BALIKA MELAA

4. Vɛɛ kaa balika melaa nɔɔ mala yɛ naa miŋ nɔ kɔl hiniaa? (1 Tɛsaloniaŋ 5:18)

⁴ Te waŋndo nɔ pɛ balika melaa, i wa tɛtɛlɛ le mbo nɔ kɔl hiniaa. (Nuawɔ 1 Tɛsaloniaŋ 5:18.) Le tamaseliiyo, te ŋ nɔ pɛ balika melaa le nyɛm kpeekpei naŋ hauba le muŋ o yoomoo niŋndoŋ, ŋ ve o buulaŋ bɛndoo niŋ le nyɛm naŋ yeema, kɛ ŋ nɔ muŋ te wo le. Te ŋ nɔ pɛ balika melaa le dilakeŋnaŋnda naŋ cho tueiyɔɔ yeela suŋ suŋ o Chɛhowa piɛiyo niŋ ndaŋ, ŋ cho kɔllo handɔɔ le o naŋ tiuba wo tosaa o walta keŋnuŋ naa laŋ choo, mbo hiau kɔl landɛi bɛndoo nɔɔ le dilakeŋnaŋnda naŋ sɔla wɔ le laŋ. Le sabu koŋ kpeekpei Baabuiyo dɛɛniaa naa ni le miŋ mel Chɛhowa balikaa o piɛileŋ niŋ. Balika melaa nɔɔ mala naa le miŋ nɔ “kɔl nyulu Mɛlɛka yɔŋgu wo, o wanachiee nɔla bɛɛ mbo sina pɛŋgu le wo.”—Filip. 4:​6, 7.

5. Sabula yɛɛ Isɔluɛiya ndaa nɔ yɛ le balika melaa chɔmndo? (Tofa vɛlɛ fotueiyo.)

⁵ Ŋ yaasiaŋndɔ nyɛ yɔŋnuŋ Isɔluɛiya wo. Teleŋnda bɔɔbɔɔ, mi ndaa ŋɔɔchiaŋ o Chɛhowa lo le mɛɛ nda ve nyɛdiaa nda wa tueiyɔɔ yeela Ichipi wo sɔla le yɛ. (Nɔm. 11:​4-6) O kpeekpei niŋ, yoomoo o pollo niŋ ve bɛɛŋ bɛɛŋ te. Kɛ, yɛɛ ndoo mala yɛ nda le ma nɔ kɔl hiniaa? Ndaa nɔ mi ndaa chɔm Balika melaa le nyɛ Chɛhowa ndoo tosal nda niŋ paandu wo. Ndaa nɔ ma loonuŋ maa, teleŋ nda wa chiaa ma wa nda biyɔɔ wɔɔŋndo Ichipi wo, mi Chɛhowa tusi Ichipiaŋnda kpundɛla tɔ laŋ choo le nda chiindiaa. Teleŋ Isɔluɛiya wa malɔɔ Ichipi wo, mi Chɛhowa mala nda ma sɔla kaniŋ humboŋ, kooliiyoŋ, a nyɛla chuɛɛnaŋndaŋ tau Ichipiaŋnda o ba. (Ɛso. 12:​35, 36) Mɛɛ Isɔluɛiya del o yaŋɔɔleŋ niŋ puaa chɔuwaa Feloo wa tɛɛŋ a Pee Siaŋa Mɛŋma Ihɛllo, mi Chɛhowa kumbul nda nɛiyo o pioo tɛɛŋ ma taŋ kɔŋgɔɔ o pilɔɔ. Nduyɛ mɛɛ nda wa kɔlaŋ o lɛŋnde polteŋ niŋ, mi ndoo ke nda manɛiyo lepaa o lepaa le dioo. Yɛɛ wa yɛ niko bahawɛiyo? Mi che bɛɛ mi Chɛhowa ke nda nyɛdiaa tau le dioo, ke ndaa nɔ balika melaa le nyɛm o ke nda woŋ te.

6. Ɔɔ nɛilaŋ lapum la naŋ chɔm balika melaa laŋ?

⁶ Yɛɛ mala yɛ naa le balika melaa chɔmndo? I tasei, chua teleŋndo lepaa o lepaa le yiyaŋndo a sɔɔŋ kɛndɛŋ yɔŋnuŋ num niŋndoŋ okɔɔ. Naapum a poonyiaa sɔɔŋ ŋmuuŋ ɔɔ ŋgaa ŋ nɔ balika melaa le muŋ ndoŋ. (Chaŋ Imɔ. 3:​22, 23) I diiŋ nduɛi, chɔm balika melaa. Wa wana tasoo le acheleŋnda balikaa mello le nyɛ nda tosal numndo. I hiou kpou ve, wa Chɛhowa balikaa mello teleŋ o teleŋ. (Sam 75:1) I yaa nduɛi, tosa chaŋyɛi a wanaa nɔ balika melaa wa. Te chaaŋaa naa nɔ pɛ balika melaa, kaa nda kɛndɔɔ tosa miŋ simnuŋ maa nda. Kɛ te a nɔ balika melaa le, nduyɛ ma wa wanaa ŋɔɔchiaŋ, o tosa naa vɛlɛ miŋ simnuŋ maa nda. (Ditɔ. 1:​26-28; 2 Tim. 3:​1, 2, 5) Te ŋ nuuviaa pɛ nɛilaŋ le balika melaa chɔmndo, keŋ luei naa o buulaŋ niŋ le bahawɛila cho naa choo ɔɔ nyɛm naŋ yeema kɛ ŋ nɔ le woŋ te.

7. Yɛɛ mala yɛ Achi le kɔl hiniaa nɔɔ?

⁷ Ŋ yaasiaŋndɔ tamasi ndepilɛnɔ pilɛ o cho ichali Indoniisiaa wo diolaŋ Achi. Mbo dimi aa: “Teleŋ naa Kolonaa dello, mi kandu bahawɛila ni laŋ tuuwo, a bahawɛila chaaŋaa niaa laalaŋnda nɔ laŋ. Fulamakɔɔlioo wa ni, yaa nɔ kɔl hiniaa le.” (Kale. 6:4) Yɛɛ mala yɛ ndu mbo siŋga yiyaŋ ndɔɔ? Mi Achi dimi aa: “Mi kandu yiyaŋndo a sɔɔŋ kɛndɛŋ Chɛhowa wa ya tosallo lepaa o lepaa woŋ okɔɔ. Mi yiyaŋ vɛlɛ yiŋgoloŋ a sɔɔŋ kɛndɛŋ yɔŋnuŋ ya niŋndoŋ okɔɔ, le mɛɛ ya cho o kɔɔna Chɛhowa wo niŋ yɛ. Okoŋ, mi mel Chɛhowa balikaa le sɔɔŋ muŋ kpou. Mi hei mala ya mi nɔ kɔl hiniaa kpeekpeiyo.” Te a tambu kɔl pɛ le bahawɛila cho num choo laŋ, tol tamasi ndepilɛnɔɔ hoo kɔɔli le balika melaa chɔmndo.

WA YIYAŊNDO O SƆƆŊ KƐNDƆŊ CHOO NDUYƐ MA NƆ KAA TUSIAŊNDO

8. O yaŋɔɔle kuɛɛ niŋ Baluki ndoo del lɛ?

⁸ Mi Baluki, wana ndoo poonyiaa le Chɛluimaya wo del o yaŋɔɔleŋ ndeŋ niŋ. Baluki ndoo nɔ wali kala kalaa le tosaa. Teleŋ Chɛluimaya wa Isɔluɛiyaa kɛɛ balika melaa chɔmndo wa yooŋgu tuu kpɛiyo dimullo wo, ndoo nɔ mbo toolu ndu. Kɛ a teleŋ pum, mi Baluki faŋa kɔllo o wali ndɔɔ choo. Yɔŋii ndoo handu kɔllo o nyɛ Chɛhowa ndoo yeema ndu mbo tosa wo choo, mbo kandu yiyaŋndo tau a ndupila okɔɔ vɛlɛ a nyɛ ndoo yeema mbo tosa wo. Mi Chɛhowa dimul Baluki sanaa a Chɛluimaya aa: “A cho nyɛm bɛndoŋ nuuviaa le numpila. Pɛŋgi nyɛm waa lende nuuviaa.” (Chɛl. 45:​3-5) O baa pilɔɔ choo, dimullo o wa ndu ni aa: “Hini kɔl a nyɛ ŋ cho tosaa suŋ suŋndo.” Mi Baluki yaŋ nilaŋ o sila nda ke ndu wo, nduyɛ mbo hiau lachi a chaŋyɛi kpɛɛluŋnde nɔɔ a Chɛhowa.

9. Vɛɛ 1 Kɔliŋtiaŋ 4:​6, 7 mala yɛ naa miŋ nɔ yiyaŋ kɛndɔɔ a dilakeŋnaŋndaŋ okɔɔ? (Tofa vɛlɛ fotueilaŋ.)

⁹ Lepum, mi Kilisiɔŋnɔɔ yiyaŋ maa o nɔ mbo sɔla dikeŋnaŋndo o pum. Nyɛ tosa mbo nɔ yiyaŋ waa nuaa wo cho ni maa, o nɔ taasioo le sɔɔŋ bɔɔbɔɔ tosaa, o tosa wallo tau, nduyɛ o viou niŋ Chɛhowa piɛiyo le wɔsiŋ bɔɔbɔɔ. A koŋ kpou, ma ke acheleŋnda dikeŋnaŋ ndoo yeema ma ke ndu wo. Yɛɛ mala yɛ ndu le yiyaŋ kɛndɔɔ nɔɔ te o tambu pɛ kɔl? O nɔ mbo yiyaŋ a nyɛ kiilanɔɔ Pɔɔl poonyiaa o 1 Kɔliŋtiaŋ 4:​6, 7 niŋndo. (Nuawɔ.) Dikeŋnaŋ kɛ kɛ naŋ sɔla pɛ, vɛlɛ a kɔl kalu kɛ kɛ naŋ nɔ pɛ, Chɛhowa ke naa ni. O cho nuaa maa, le mɛɛ naŋ cho a sɔvɛ miŋ hiau acheleŋnda yɛ le Chɛhowa ke naa ndu le. Kɛ le mɛɛ o kaala naa, nduyɛ mbo nɔ kɛndɛi yɛ o ke naa ndu ni.—Luom. 12:​3, 6; Ɛfi. 2:​8, 9.

10. Vɛɛ naŋ chɔm yɛ kaa tusiaŋndo?

¹⁰ Ŋ tiuba miŋ chɔm kaa tusiaŋndo te ŋ yiyaŋ pɛ yiŋgoloŋ a tamasi Chiisu kɛsul naa wo okɔɔ. Yiyaŋndɔ a nyɛ yɔŋnuŋ o nyumma Chiisu pulu kiilaa nduaa peloŋ ndo choo. Mi kiilanɔɔ Chɔŋ poonyiaa aa: “Chiisu ndoo sina maa [1] Finya ndɔ chii ndu nyɛ o nyɛ fee ke. [2] Ndoo sina maa o Mɛlɛka lo o fula ni, nduyɛ [3] maa loŋ o wa vɛlɛ miiŋgoo ni. . . . Mbo kandu buɛiyaa nduaa peloŋ pulɔɔ.” (Chɔŋ 13:​3-5) Chiisu ndoo tiuba mbo yiyaŋ maa, kiilaa nduaa ndaa nɔ ni ma pulu ndu peloŋ. Teleŋ Chiisu wa o lɛŋndeŋ choo wo, lepilɛ bɛɛ o yiyaŋ nuaa maa o nɔ mbo fula tɔɔ, nduyɛ sɔɔŋ palaŋ komal ndu le le. (Luku 9:58) Wana tusiaŋndo Chiisu wa ni, nduyɛ ndoo nɔ kɔl hiniaa. Mbo kɛsi tamasi kɛndɛ kɛndɔɔ le naa.—Chɔŋ 13:15.

11. Vɛɛ kaa tusiaŋndo mala yɛ Dɛnisi le mbo nɔ kɔl hiniaa?

¹¹ Mi Dɛnisi, o cho o lɛŋnde Nidalaŋndeŋ niŋndo kindiŋ le tamasi Chiisu wo tolɔɔ kɔɔli le kaa tusiŋndo chɔmndo, kɛ i ve suɛi bɛɛŋ bɛɛŋ te. Mbo dimi aa: “Te waŋndo ndoo sɔla pɛ wali yaa yema wo, lepum mi yaa tambu kɔl, kanifuule mi yiyaŋ maa ya ndaa nɔ ni ma ke wali koŋ. Te keŋ yɔŋnuŋ pɛ, mi kindiŋ le pɛɛkoo a tusiŋndo okɔɔ. O JW Library^® app, mi kɛsi bolii Baabuiye ipum i soo a tusiŋndo okɔɔ ve, naa ya keleŋa ndi saalɔŋ nduyɛ mi miŋgi diomndaŋ veelu leniŋ nda. Mi tusi vɛlɛ sɔɔŋ nda yɔŋgu a tusiŋndo okɔɔ woŋ o foŋ nuu choo, nduyɛ mi yaŋ muŋ nilaŋ teleŋnda bɔɔbɔɔ. Mi pɛɛku maa wali o wali naŋ cho tosaa, le Chɛhowa saŋgalaa naŋ cho ndu tosaa ni, kɛ o cho le naapila le. Naa pilɛŋ pilɛŋnda, nyɛɛmbɔ koni naŋ tosa o wali keŋnuŋ naa wo niŋ ni, kɛ Chɛhowa tosa ni miŋ sɔla batiuwaa.” Te a kandu pɛ kɔl tambeiyo nɔɔ le dikeŋnaŋ ŋ yeema kɛ a sɔla ndu le wo, kindiŋ le ma wa wana tusiaŋ. Hei cho num mala ma kindi chaŋyɛi numnde a Chɛhowa, nduyɛ ma nɔ kɔl hiniaa.—Chemi. 4:​6, 8.

YIYAŊ O TIINDAŊ Ŋ NƆ LE CHILAŊNDO CHOO

12. Tiindaŋ yɛɛ naŋ nɔ yɛ le chilaŋ, o mala naa miŋ nɔ kɔl hiniaa wo? (Aisaya 65:​21-25)

¹² Miŋ nɔ kɔl hiniaa te ŋ yiyaŋ pɛ a chila kɛndɛla cho naa lachi laŋ. O yau Aisaya poonyiaa wo niŋ, mi Chɛhowa dimul naa maa o bii bila sɔɔŋ palaŋ cho naa choo woŋ kpou. Kɛ, o chuel naa vɛlɛ buŋgɛi maa o cho hunɔɔ bahawɛila naalaŋ faŋa. (Nuawɔ Aisaya 65:​21-25.) Ŋ cho hunɔɔ wa o chiɛila sɔvɛ sɔvɛlaŋ niŋ. Ŋ cho walta sɔvɛ sɔvɛlaŋ nɔ le tosaa, nduyɛ miŋ nɔ nyɛdiaa yeelɛi sɔvɛ sɔviɔɔ le dioo. Buulaŋ cho lɛ naa wa maa kpundɛ cho naa komal ɔɔ chuauwaa naa le. (Aisa. 32:​17, 18; Isi. 34:25) Ŋ nɔ tiindaŋndo le chila sɔvɛ sɔvɛlaŋ sɔlaa, nduyɛ i nɔ le peelɔŋndo.

13. O sɔɔŋ kuɛɛ niŋ naŋ nɔ yɛ miŋ handu kɔllo o tiindaŋ naŋ nɔ le chilaŋndo choo?

¹³ Le yɛɛ i cho yɛ suɛi sɔvɛ le miŋ wa yiyaŋndo teleŋ o teleŋ a tiindaŋ naŋ nɔ le chilaŋndo okɔɔ? Le mɛɛ naŋ cho o “palɛi mɛɛlɛi niŋ” nduyɛ miŋ nɔ bahawɛila kala kalaŋ yɛ. (2 Tim. 3:1) Mi Chɛhowa mala naa teleŋ o teleŋ le miŋ biunuŋ sanaa a naa nɛi chɔmaa kioo, yoomuaŋ naa lueiyo, vɛlɛ a toolu naŋ yeema wo. (Sam 145:14) Le handɔɔ lechoo, mi tiindaŋ naa leKilisiɔŋndo luei naa yoomuaŋ te ŋ wa pɛ o teleŋnda kala kalaŋ bɛŋgu. Naapum a cho kindi kindiŋndo le yuŋgu numndo kioo nyɛm nda hauba woŋ. Baa hei sim ni maa a cho wa o bala fondolaŋ niŋ lɔɔ lɔɔ? Sako! Kanifuule Chɛhowa mɛi lediom le num kioo nyɛm ŋ hauba woŋ ŋ hɔbɛi o kpele hɛnɛkiɔɔ niŋ. (Sam 9:18; 72:​12-14) Naapum, a cho o nyɛ nɛiyaa niŋ lepaa o lepaa, kɔl tambɛiyo, ɔɔ naa ŋkɔŋjaa. Baa a yiyaŋ pa maa naa ŋ cho lo o saŋgaa niŋ ni fɛɛŋ bɛɛ a sɔla niŋ batiuwaa le? Keŋ cho tonya le. Naalaŋ a piɔmndaŋ la cho lɛ wa o chieeŋ sɛnɛi Mɛlɛkaa niŋ te. (Sɔɔŋ. 21:​3, 4) Tiindaŋndo hoo mala naa ŋ tembu kɔl ɔɔ miŋ dɔɔnuŋ tumbe le nyɛ cho naa yɔŋnɔŋndo suŋ suŋndo le. Ŋ tiuba miŋ wa a kɔl kɛndɛ nduyɛ miŋ nɔ kɔl nyuloo, o yɔŋ bɛɛ ma chiee naa biyɔɔ le, mi wana naa kaalaa vi, ɔɔ mi sɔɔŋ wɔɔŋ cheleŋ yɔŋnuŋ naa o yoomoo niŋ. Le yɛɛ? Kanifuule ŋ sina maa nyɛpalaa cho naa choo wo, le teleŋ biŋgi koni o cho ni. Nduyɛ o chieeŋ sɛnɛiyo niŋ, Mɛlɛka cho ndu hunɔɔ faŋa le fɛɛŋ a fɛɛŋ.—2 Kɔl. 4:​17, 18.

14. Vɛɛ naŋ kindi yɛ tiindaŋ naa?

¹⁴ Le mɛɛ tiindaŋ naŋ nɔ le chilaŋndo cho nyɛ sɔvɛ le kɔl hiniaa nɔɔ yɛ, vɛɛ naŋ kindi yɛ ndu? Mɛɛ waŋndo wounuŋ nuaa hɔlta mapuululaŋ le nyɛ cho landaŋndo chɔɔ nyɛkɛndɛi yɛ, naa bɛɛ nɔ miŋ nuuviaa nɛilaŋ le tiindaŋ naa kindioo le halikpeŋ miŋ cheŋnuŋ naapila o kpele hɛnɛkiɔɔ niŋ. Te ŋ hiu pɛ buulaŋndo maa ŋ sɔla niŋ ŋkani tau le nyɛm naŋ hauba woŋ sɔlaa le, ŋ nɔ miŋ yiyaŋ a mɛɛ yoomoo wa niŋ o chilaŋ niŋ yɛ, naa bahawɛi nyɛsɔlaa cho lɛ wa le wa, nduyɛ wana o wana ve niŋ a bala fondo le. Te ŋ hiu pɛ kɔllo landɔŋ le dilakeŋnaŋnda naŋ sɔla wɔ o Mɛlɛka piɛiyo niŋ te laŋ, ŋ nɔ miŋ yiyaŋ mɛɛ kɔl landɛi suu waa nuaa cho hunɔɔ chuwɔɔ yɛ, te ŋ huŋ simnuŋ pɛ wanaa walaŋ nda, nduyɛ miŋ wa Chɛhowa piɛiyo le wɔsilaŋ o waalaŋ niŋ. (1 Tim. 6:19) Lepum miŋ buulaŋ a sɔɔŋ bɔɔbɔɔ cho hau yɔŋnɔŋndo woŋ, nduyɛ mi hei wa ikala le yiyaŋndo a mɛila kɛndɛla cho wa o chilaŋ niŋndaŋ okɔɔ. Kɛ, mɛɛ naŋ chua teleŋndo fau le yiyaŋndo o mɛila kɛndɛla Chɛhowa laŋ choo yɛ, lende koni i wa tɛtɛlɛ le kɔllo handɔɔ o laŋ choo ni, mbo hiau buulaŋndo le bahawɛila naalaŋ.

15. Yɛɛ ŋ pɛɛku yɛ o nyɛ Kilisita dimi wo niŋ?

¹⁵ Ŋ yaasiaŋndɔ mɛɛ tiindaŋndo mala Kilisita yɛ. Lanɔɔ Dɛnisi naŋ soo suŋ a ndu okɔɔ wo o cho ni. Mbo dimi aa: “I nɔ naa tosa mi boondoŋ vi ya pɛ pɛ wo. Le hei, o kandu namtaa niŋ ya kua ni, nduyɛ teleŋnda bɔɔbɔɔ ihini ya niilu ni. I cho o nyɛ nɛiyaa niŋ lepaa o lepaa. O teleŋnda biŋgila hiou laŋ niŋ, mi wana ni chiɔuwaa dimul la maa I nɔ lɛ le sioŋgɔɔ le. Kɛ o lepilɛ niŋ kpe, mi dimiŋ o kɔl niŋ aa: ‘O cho chilaŋ chɔ mɛɛ ya cho laŋ chɔɔ yɛ le.’ O tiindaŋ ya nɔ le chilaŋndo choo ya handu kɔllo ni, nduyɛ mi hei ke ya kɔl nyuloo. Le suŋ suŋndɔ, I nɔ mi biunuŋ o chieeŋndo hoo niŋ. Kɛ, I cho hunɔɔ yoomoo tueiyɔɔ yeela nyɛkɛndɛi o chieeŋ sɛnɛiyo niŋ!”

“WANAA NƆ SIOOŊII NDUƐI YA, NYƐ O NYƐ VE NDA LEPƐŊ TE”

16. Le yɛɛ Masaa Deeve poonyiaa yɛ maa wanaa nɔ siooŋii Chɛhowa ve wa “nyɛ o nyɛ ve nda lepɛŋ te”?

¹⁶ Wanaa cho Chɛhowa piɛiyo ma nɔ kɔl hiniaa wa bɛɛ, mi bahawɛilaŋ la komal nda. Yiyaŋndɔ a Masaa Deeve okɔɔ. Mi chuauwaa nduaa a yaa kpulukuu sɔla piɔmndo, ma nyiinduu ndu choolaŋ choo, ma yii ndu dumbu, nduyɛ le wɔsiŋ bɔɔbɔɔ Masaa Sɔɔ wa ndu nuuviaa le ndu diyɔɔ. Kɛ o wa hiouwɔɔ lachi a sɔɔŋ palaŋ muŋ biuwɔŋndo. Mbo dimul Chɛhowa aa: “Wanaa nɔ siooŋii nduɛi ya, nyɛ o nyɛ ve nda lepɛŋ te.” (Sam 34:​9, 10) Le yɛɛ o dimi yɛ lende? Mi che bɛɛ ŋ cho Chɛhowa piɛiyo, kɛ keŋ chɔm nuaa maa bahawɛila komal naa o yoomoo niŋ te le. Kɛ, ŋ nɔ tiindaŋndo maa Chɛhowa cho naa ke nyɛm naa hauba woŋ. (Sam 145:16) Maa Deeve, naa bɛɛ nɔ tiindaŋndo o Chɛhowa niŋ maa, o cho naa mala miŋ biunuŋ simul kɛ kɛ komal naa pɛ, nduyɛ miŋ nɔ kɔl hiniaa.

17. Lɛ yɛɛ ŋ yeema yɛ ma wa wana kɔl hiniaa?

¹⁷ Chɛhowa yeema naa miŋ nɔ kɔl hiniaa. (Sam 131:​1, 2) Lelaŋ, tosa nyɛ o nyɛ ŋ tiuba le ma wa a kɔl hiniaa. Te a tosa pɛ wallo kalaŋ le ma nɔ balika melaa, ma wa yiyaŋndo o sɔɔŋ kɛndɔŋ choo nduyɛ ma wa wana tusiaŋ, okoŋ ma kindi tiindaŋ ŋ nɔ le chilaŋndo, a tiuba ma dimi aa: “A tonya, I hini kɔl.”—Sam 16:​5, 6.