Nyunala Wanaa Nua o Yaula Naalaŋ Niŋnda
Yɛɛ Chɛhowa cho yɛ masɛi dɔwɔɔ o lakɔl le tosaa o chilaŋ niŋ?
Sɔɔŋ Chɔɔmaŋndoŋ 17:16, 17 dimi a teleŋ nyɛpalaa bɛndoo cho kandɔŋndo okɔɔ aa: “Leela tɔla ŋ che laŋ, a visi biyaa, a cho wana lanɔ suundɛiyo hoo yɛleŋ tul, ma poondiaa nyɛm ndɔŋ kpou, ma mɛi ndu tum fondo. A cho dialuŋ ndɔŋ dio, nduyɛ ma lom ndu chilikɔ. Mɛlɛka pila dɔu nda o lakɔl ni le ma tosa nyɛ o yeema wo. Koŋ cho ni, ma nɔ yiyaŋ pilɔɔ le ma ke visi biyaa masale ndaleŋ.” Mi yaula naalaŋ la dimi paandu maa, Chɛhowa cho masaa waa dɔwɔɔ o lakɔl le ma tosa “nyɛ o yeema wo.” Ndu cho yɛ le piɛiyii lachoowɛi tɛɛmbuuwo ni.
Kɛ, ŋ nɔ miŋ tosa yɛlɛmiaa a hei okɔɔ. Nyɛ Chɛhowa cho dɔwɔɔ masaa waa o lakɔl le ma tosa wo cho “le ma ke visi biyaa masale ndaleŋ” ni. Le sinaa mɛɛ hei cho peelɔŋ yɛ, ŋ yaasiaŋndɔ nyunalaŋ ndaŋ.
A nɛɛ waa okɔɔ kpeekpei huuluei hei cho yɛ? “Wana lanɔ suundɛiyo” hoo nda veelu vɛlɛ ni aa “Babilɔŋ Bɛndoo.” Ndu sim lewundu le piɛiyii lachoowɛi kpou ni. “Visi biyaa siaŋa sɔɔtɔtɔɔ” sim lewundu le kɔɔna cho le kɔl nyuloo wo. O kanduŋ a wɔsii 1919, mi ndaa veelu ndu aa League of Nations, kɛ suŋ suŋ niŋ ma veelu ndu aa United Nations. (Sɔɔŋ. 17:3-5) ‘Leela tɔlaŋ’ la sim lewundu le kpaayala lemasala cho visi biyaa tooloo laŋ.
Chaŋyɛi yɛɛ cho yɛ wana lanɔ suundɛiyo tɛɛŋ nda visi biyaa siaŋa sɔɔtɔtɔɔ? Wana lanɔ suundɛiyo hoo cho “ichali” visioo hoo o kɔɔ mbo wa ndu salaa dɔwɔɔ a ndu tooloo, nduyɛ mbo wa kindiŋndo le ndu waa choo masa.
Yɛɛ cho yɛ yɔŋnɔŋ a wana lanɔ suundɛiyo hoo? Visi biyaa a leela tɔla cho ndu tooloo laŋ, “cho wana lanɔ suundɛiyo hoo yɛleŋ tul.” A cho nyɛm ndɔŋ poondiaa, nduyɛ ma chɔm waŋnda mɛɛ o cho wana wɔɔŋ yɛ. A cho ndu tɛɛmbuu a mɛɛ Chɛhowa dimi maa i cho yɔŋnɔŋ yɛ. (Sɔɔŋ. 17:1; 18:8) Hei cho wa mɛɛlula piɛiyii lachoowɛi ni. Kɛ tuupa mi keŋ yɔŋnuŋ, Chɛhowa cho dɔwɔɔ masaa waa o lakɔl le ma tosa nyɛ yɔŋnuŋ ndɔ kani bɛɛ le wo.
Yɛɛ Chɛhowa cho yɛ masaa waa dɔwɔɔ o lakɔl le ma tosa? O cho leela tɔlaŋ dɔwɔɔ o lakɔl “nyɛ o yeema wo,” ndu cho yɛ le “ma ke visi biyaa [siaŋa sɔɔtɔtɔɔ] kpaaya ndaa a masale ndaleŋ” ni. (Sɔɔŋ. 17:13) Yiyaŋndɔ a nyɛ keŋ simndo okɔɔ. Baa a ba nda masaa waa cho kɛɛsiaa ni le visi biyaa kpaaya nda lemasaa kioo? Sako! Huuluei chɔm maa Mɛlɛka pila cho nda nyindɔɔ ni le hei tosaa. (Polo. 21:1; tuuwɔ Aisaya 44:28.) Baa o pɔm pɔmbɔ nda cho hei tosa ni? Sako! O lepilɛ niŋ kpe hei cho yɔŋnɔŋ ni. Okoŋ, mi visi biyaa hoo tɛɛmbuu piɛiyii lachoowɛi kpou.
Mɛɛ yɛɛ naŋ nɔ yɛ miŋ wa kɔl le yɔŋnɔŋndo o chilaŋ niŋ? Ŋ nɔ miŋ wa kɔl le yooŋgulaŋ sɔlaa maa masɛi kandu United Nations tooloo o pɔm pɔmbɔ le. Nyɛ naŋ nɔ miŋ wa kɔl lo cho ni, le mi Chɛhowa dɔu masaa waa o lakɔl o lepilɛ niŋ kpe le ma ke visi biyaa kpaaya nda lemasaa. Te keŋ yɔŋnuŋ pɛ, ŋ cho sina kpendekele maa nyɛpalaa bɛndoo hiŋ kandɔŋndo. Kɛ haaa mi teleŋ koŋ fuuluu, maa “ŋ waŋnuŋ lahɔl, nduyɛ miŋ wa yekeŋ,” kanifuule siŋgaŋndaŋ la cho suŋ yɔŋnɔŋ o lepilɛ niŋ kpe.—1 Tɛsa. 5:6.