Tol Tamasi Chaaŋaa Chɛhowaa Kɔɔli

1-3. (a) Le yɛɛ naŋ nɔ yɛ tiindaŋndo maa ŋ tiuba miŋ simnuŋ chaaŋaa Mɛlɛkaa? (b) A nɛɛ yaa okɔɔ naŋ cho yɛ yaasiaa o buŋgɛi hei niŋ?

BƐMBƆƆ le yaa Baabuiyo veelu Ebilaham ni aa chaaŋ o Mɛlɛka. (Koloniko Diiŋ Ndɔɔ 20:​7; Aisaya 41:​8; Chemisi 2:​23) Ndupilɛ kpe Baabuiyo veelu ni aa chaaŋ o Mɛlɛka. Baa koŋ chɔm ni maa Ebilaham koni simnuŋ chaaŋ o Chɛhowa ni? Sako bɛɛ. Baabuiyo dimi maa naa kpou nɔ dikeŋnaŋ koŋ le simnɔŋndo chaaŋaa nduaa.

² Diom Mɛlɛkaa soo a wanaa laalaŋnda okɔɔ tau, puaa a waŋlaanduaa a ndaa nɔ siooŋii Chɛhowɛi ma duau laalaŋndo o ndu niŋnda. Nduyɛ ma simnuŋ chaaŋaa nduaa. (Nuawɔ Sam 25:​14.) Mi Pɔɔl suaa a “faŋga bɛndoo” okɔɔ. Nduyɛ waŋnda haa cho o faŋga koŋ tɛɛŋ. Wanaa yɛ yiaa haa kpou, chaaŋaa Mɛlɛkaa nda wa ni.​—⁠Hibuluiya 12:​1.

³ Ŋ yaasiaŋndɔ nyɛkɛndɛi miŋ che chaaŋaa Chɛhowaa a yaa a Baabuiyo soo a nda okɔɔ wa. (1) Lufu, Mowabaitiinɔɔ o wa ni. Nduyɛ chua laandu pɔnɔ ndɔ vi mbo chɔm lo lechoo wo wo o wa ni. (2) Hɛsɛkiya, masaa le Chuda o wa ni, nduyɛ ndoo laalaŋ o Chɛhowa niŋ. (3) Meele, kalaa Chiisu o wa ni, nduyɛ ndoo tuisiŋ bɔɔ. Yɛɛ naŋ cho yɛ pɛɛku a mɛɛ o kɛ kɛ looku simnɔŋ chaaŋ o Mɛlɛka yɛ?

MBO CHƆM KAALA LO LECHOO WO

4, 5. Kɛɛsiaa kala kala kuɛɛ Lufu ndoo nɔ yɛ mbo tosa, nduyɛ le yɛɛ kɛɛsiaa hoo wa yɛ o kala? (Tofa fotueiyo o peele naŋ kandu leŋ choo.)

⁴ Naomi, a laandaa puaa nduaa Lufu nda Ɔpaa, wa kɔlaŋ o tiŋ vilɛiyo niŋ chɔŋ Mowaabi le kɔlaŋ Isɔluɛi. O nɛi tɛɛŋ, mi Ɔpaa ndu kɛɛsiaa le mbo miiŋguŋ o ndu lo Mowaabi. Kɛ mi Naomi bii kɔllo kpiŋ le mbo miiŋguŋ o ndu lo Isɔluɛi. Yɛɛ Lufu ndu kɛɛsiaa yɛ le tosaa? Ndoo nɔ mbo tosa kɛɛsiaa kala kalaa. Baa ndoo nɔ pa mbo miiŋgu o ndu lo Mowaabi mbo wa latulu a yuŋgu ndɔɔ, ɔɔ o cho lakɔ a Naomi kalalɛi ndɔ Bɛtilihɛm?​—⁠Lufu 1:​1-8, 14.

⁵ Mowaabi yuŋgu Lufu wo wa ni. Kɛlɛŋgaa ndoo miiŋguŋ o wanaa nduaa lo mi ndaa manda ndu. Ndoo sina waŋnda, suɛi ndɛi maŋgalɛi, vɛlɛ a naamu ndaa. Naomi ndoo chuel Lufu ibuŋga maa nyɔɔŋ muŋ kpou cho Bɛtilihɛm te. Nduyɛ Naomi wa buulaŋndo maa o sɔla niŋ pɔnɔ ɔɔ chiɛi le Lufu le. Lelaŋ, mi Naomi dimul ndu le mbo miiŋgu Mowaabi. A mɛɛ naŋ che yɛ, mi Ɔpaa ‘miiŋguŋ o wanaa nduaa lo a o mɛlɛkaa nduaa lo.’ (Lufu 1:​9-15) Kɛ mi Lufu kɛɛsiaa maa o cho miiŋgu o wanaa nduaa lo a o mɛlɛkaa nduaa lo le.

6. (a) Kɛɛsiaa taasi kuɛɛ Lufu ndoo tosa yɛ? (b) Le yɛɛ Bowaa dimi yɛ a Lufu okɔɔ maa o tofa le naa viaŋnaŋnda o ba Chɛhowaa bɛŋgu?

⁶ Wana che pɛ maa pɔnɔɔ Lufu ɔɔ Naomi pɛɛku Lufu a Chɛhowa okɔɔ ni. Mbo pɛɛku maa Chɛhowa cho maa mɛlɛkaa Mowaabi le. Ndoo nɔ kaalaa le Chɛhowa nduyɛ mbo sina maa Chɛhowa chɛl kaala o nɔ le ndu wo a piɛile ndɔleŋ. Le hei, mi Lufu tosa kɛɛsiaa kɛndɔɔ. Mbo dimul Naomi aa, “Wanaa numnda cho wa wanaa niaa ni. Nduyɛ Mɛlɛka ŋ piɛiyo, Mɛlɛka koŋ ya I cho wa piɛiyo ni.” (Lufu 1:​16) Te ŋ yiyaŋ pɛ a mɛɛ Lufu ndoo kaala Naomi yɛ, miŋ naŋ kɔl tau. Kɛ nyɛ hiou wa o sɔvɛ kpou wo cho kaala Lufu ndoo nɔ le Chɛhowa wo ni. Mi hei nɛŋi vɛlɛ Bowaa kɔl. Lelaŋ, mbo chandu ndu le mɛɛ ‘o tofa le naa viaŋnaŋnda o ba Mɛlɛkaa bɛŋgu le ndu mandaa yɛ.’ (Nuawɔ Lufu 2:​12.) Diomnda Bowaa dimilaŋ ndaŋ la yiyalaŋ naa mɛɛ you chuaa luɛi naa o kumbaŋnda kala ndɔlaŋ bɛŋgu le ndu mandaa yɛ. (Sam 36:​7; 91:​1-4) O nɛi pilɛ koŋ niŋ kpe Chɛhowa manda Lufu ni, nduyɛ mbo fanda ndu le laalaŋ ndɔɔ. Lufu tembu kɔl kposoŋ le kɛɛsiaa o tosa hoo wo le.

7. Yɛɛ mala yɛ wanaa kiisaŋ le yoomula ndalaŋ yɔŋgoo o Chɛhowa lo wa?

⁷ Wanaa bɔɔbɔɔ pɛɛku niŋ a Chɛhowa okɔɔ kɛ a tofa naa viaŋnaŋ o ndu lo le. Ma kiisaŋ le yoomula ndalaŋ yɔŋgoo o ndu lo le ma yiŋ. Te yiyaŋ pilɛ koŋ kpe num bɛɛ nɔ ni, yiyaŋ a sabu ŋ cho kiisaŋndo wo okɔɔ. Wana o wana piɛi mɛlɛka o yeema wo. (Chɔɔsuaa 24:​15) Chuaŋ chua kɛndɛ ŋ tosa wo cho le Mɛlɛka tonyaa piɛiyo ni. Te a yɔŋgu pɛ yoomu numndo o Chɛhowa lo, a chɔm kɛsɛ maa a laalaŋ o ndu niŋ nduyɛ maa o cho wa naa numaa viaŋnaŋnda. Nduyɛ o cho num mala ma hiou lachi a ndu piɛiyo o yɔŋ bɛɛ ma nɔ bahawɛilaŋ tau. Keŋ Mɛlɛka tosal Lufu ni.

MBO ‘YƆŊGUŊ O CHƐHOWA LO A KƆL NDƆƆ KPOU’

8. Tɛɛsiaawɔ kɔɔlima Hɛsɛkiya waŋ.

⁸ Kɔɔlima Hɛsɛkiya waŋ ma wa teŋgeŋ a Lufu. O kaale wanaa ndaa piɛi Chɛhowa wa choo Hɛsɛkiya fula ni. Kɛ o ve Isɔluɛiya kpou le lo o laalaŋndo choo le. Finyaa Hɛsɛkiya Masaa Ehaasi, wana dɛnɛ wɔɔŋndo o wa ni. Ndoo nɔ lebɛɛ kposoŋ le chiɛi Mɛlɛkaa le nduyɛ mbo dimul waŋnda le mɛlɛkaa lachoowaa sooluu wo. Mi Ehaasi luam chuauwaa nduaa le mɛlɛkaa nduaa lachoowaa sooluu wo. O ve suɛi kpɛdɛ a Hɛsɛkiya teleŋ o wa chuaambɔ wo le!​—⁠Masaa Bɛnduaa Diiŋ Nduaa 16:​2-4, 10-17; Koloniko Diiŋ Ndɔɔ 28:​1-3.

9, 10. (a) Le yɛɛ ndii wa yɛ tɛtɛlɛ le mi Hɛsɛkiya ndoo dɔunuŋ tumbe? (b) Le yɛɛ ŋ nɔ miŋ dɔunuŋ tumbe a Mɛlɛka le? (c) Le yɛɛ ŋ nɔ miŋ yiyaŋ maa kɔɔlima naŋ fula choo waŋ te ma chɔm wana suu naŋ nɔ miŋ wa wo le?

⁹ Tamasi wɔɔŋ Ehaasi wo ndoo tosa mi Hɛsɛkiya po ndɔ ndoo tambu kɔl a Chɛhowa. Hau bɛɛ, mi apum biunuŋ maa Hɛsɛkiya kɛ o sulaŋ maa ndu le. Ma yiyaŋ maa o bɛnda ma ‘bii Mɛlɛka Chɛhowa tɛɛ’ ɔɔ kɔɔna ndɔɔ. (Pulɔwaa 19:​3) Apum yiyaŋ maa kɔɔlima nda ma wɔɔŋndaŋ ma tosa ni ma luɛi o kaa wɔɔŋndo niŋ, ɔɔ ma miiŋgu vɛlɛ sɔɔŋ wɔɔŋ wanaa velu nda wa tosaa. (Isikiaa 18:​2, 3) Kɛ tonya pa sɔɔŋ muŋ kpou cho ni?

¹⁰ Nyɛ Hɛsɛkiya tosa o yoomu ndɔɔ niŋndo muli nyunaa hoo maa o cho tonya le! Sabu o sabu sɔvɛ cho miŋ dɔunuŋ tumbe a Chɛhowa le. O cho ndu le tosa mi sɔɔŋ wɔɔŋndoŋ yɔŋnuŋ waŋnda le. (Choobu 34:​10) Tonya i cho ni maa kalaŋ chuauwa pɛɛku chuauwaa ndaa ni ma tosa o kɛndɔɔ ɔɔ o wɔɔŋndo. (Pulɔwaa 22:​6; Kolosiaŋnda 3:​21) Kɛ hoo chɔm naa maa kɔɔlima naŋ te ma chɔm wana suu naŋ cho simnɔŋndo le. Le yɛɛ? Kanifuule Chɛhowa ke naa dioo le kɛɛsiaa tosaa a ba naa. Hoo sim ni maa ŋ yeema pɛ ŋ hɛli le o kɛndɔɔ tosaa ɔɔ o wɔɔŋndo. (Ditɔnɔmii 30:​19) Vɛɛ Hɛsɛkiya soliŋ yɛ ke sɔviɔɔ hoo kpeku?

11. Yɛɛ ndoo tosa yɛ Hɛsɛkiya masa kɛndɔɔ le Chuda?

¹¹ Mi che bɛɛ masa wɔɔŋndo pila finyaa Hɛsɛkiya wa o Chuda niŋ ni, kɛ mi Hɛsɛkiya simnuŋ wana sɔvɛ. (Nuawɔ Masaa Bɛnduaa Diiŋ Nduaa 18:​5, 6.) O chɛl mbo tol tamasi wɔɔŋ finya ndɔ wo kɔɔli le. Kɛ mbo yaŋ wanaa ndaa suaa le Chɛhowa wa nilaŋ nyɛkɛndɛi mɛɛ Aisaya, Maika, a Hoosiaa wa naa yɛ. Mbo yaŋ nilaŋ nyɛkɛndɛ yekeŋ o silaa a nɛi chɔmaa nda wa ndu kioo wo. Hei mala ndu ni mbo toosiaa sɔɔŋ finya ndɔ tɛɛmbuu woŋ. Mbo dindi chiɛi Mɛlɛkaa, mbo nyuna Mɛlɛka le mbo mal waŋnda le hakila ndalaŋ, nduyɛ mbo tɛɛmbuu piɔmaa waŋnda ndaa sooluu wa kpou o lɛŋndeŋ niŋ. (Koloniko Diiŋ Ndɔɔ 29:​1-11, 18-24; 31:​1) Mɛɛ masa Asiiliaŋnda Sɛnachɛluibi kɔŋgɔlaŋ le delɔɔ Chulusalɛm choo a sɔŋgaa, mi Hɛsɛkiya chɔm kɔl sikpaa a laalaŋndo. Mbo tiindaŋ o manda Chɛhowaa niŋ nduyɛ mbo duau wanaa nduaa yoomuaŋ. (Koloniko Diiŋ Ndɔɔ 32:​7, 8) O teleŋ pilɛ niŋ, mi Hɛsɛkiya chɔm kaa heelaŋndo, kɛ mɛɛ Chɛhowa sila ndu, mbo tuisiŋ. (Koloniko Diiŋ Ndɔɔ 32:​24-26) A tonya, Hɛsɛkiya cho tamasi kɛndɛ naŋ nɔ miŋ tol kɔɔli wo ni. O chɛl mi kɔɔlima yuŋgu ndɔɔ paaliaŋ yoomu ndɔɔ le. Kɛ mbo chɔm kɛsɛ maa chaaŋ o Chɛhowa o wa ni.

12. Vɛɛ wanaa bɔɔbɔɔ simnuŋ yɛ hau chaaŋaa Chɛhowaa maa Hɛsɛkiya?

¹² Chieeŋndo cho hau ŋuasu ŋuasu nduyɛ kaala bɛɛ cho leniŋ te. Lelaŋ mi chuauwaa bɔɔbɔɔ sul wanaa velu nda wa buulaŋ le nda le. (Timoti Diiŋ Ndɔɔ 3:​1-5) Mi che bɛɛ Kilisiɔŋaa bɔɔbɔɔ fula o kɔɔlima kpɔkɔsi waŋ niŋ, kɛ ma tosa chuaŋ chuaa le chaŋyɛi tosaa a Chɛhowa. Maa Hɛsɛkiya, ma chɔm kɛsɛ maa o cho kɔɔlima nda fula niŋndaŋ te ma kɛɛsial nda wanaa suu nda nɔ ma simnuŋ o chilaŋ niŋndo le. Mɛlɛka ke naa chuaŋ chuaa le miŋ tosa. Nduyɛ ŋ chua le miŋ piɛi ndu a ndu bɛɛleŋ kioo mɛɛ Hɛsɛkiya ndoo tosa yɛ.

“BUƐI MASANƆƆ MƐLƐKAA YA CHO NI”

13, 14. Le yɛɛ wali ndoo keŋnuŋ Meele wo wa yɛ o kala kala, kɛ vɛɛ ndoo muli yɛ Keebilɛ diom?

¹³ Mɛɛ wɔsila siaama hiou o boondii Hɛsɛkiya ve kɔɔli, mi chuaambɔ laandu tuisiaŋ pum diolaŋ Meele tosa chaŋyɛi teŋgeŋnde a Chɛhowa. Nduyɛ mbo sɔla wali teŋgeŋndo le tosaa. O nɔ mbo chua folioo mbo velu Po Mɛlɛkaa nduyɛ mbo manda ndu! Chɛhowa ndoo kaalaa Meele nyɛ koŋ o tiindaŋ ndu ni mbo ke ndu wali lebiɔɔ hoo. Kɛ yɛɛ Meele ndoo tosa yɛ mɛɛ o tuei a wallo hoo okɔɔ?

¹⁴ Miŋ soo tau a wali lebɛɛ bɛndu keŋnuŋ hoo Meele wo okɔɔ. Kɛ a yɛɛ okɔɔ Meele wa yɛ buulaŋndo? Le tamaseliiyo, mi maalikɛinɔ Mɛlɛkaa Keebilɛ dimul ndu maa o cho suɛi wana pɔnɔ sina le mbo chua folioo. Kɛ Keebilɛ tɛɛsial yuŋgu ndɔɔ vɛlɛ a wanayaŋ ndɔŋ mɛɛ o cho looku folioo chua yɛ le. Vɛɛ nda cho yɛ yiyaŋ? Vɛɛ Meele cho yɛ looku isɔɔ o Choosɛ lo mbo laalaŋ maa o cho wana le ke ndu folioo le? Le handɔɔ lechoo, Meele ndoo nɔ vɛlɛ kalaŋ lusulɛiyo le mbo manda Po Mɛlɛkaa! Ŋ sina nyɛ wa buulaŋ Meele wo kpou le, kɛ ŋ sina nyɛ o tosa wo mɛɛ Keebilɛ soo o ndu lo. Mbo dimi aa, “Buɛi masanɔɔ Mɛlɛkaa ya cho ni. I yɔŋnuŋ mɛɛ ŋ dimi yɛ fɔ.”​—⁠Luku 1:​26-38.

15. Le yɛɛ laalaŋ Meele wo cho yɛ nyɛ sɔvɛ?

¹⁵ Laalaŋ kpeekpeiyo Meele ndoo nɔ ni! O wa o bɛɛndiaŋ le tosaa nyɛ o nyɛ nda dimul ndu maa buɛi. Mbo tiindaŋ Chɛhowa maa o cho wa a ndu latulu nduyɛ mbo manda ndu. Vɛɛ Meele looku yɛ laalaŋ kala wanaa sɔla? A vilu naa a laalaŋndo le. Kɛ ŋ tiuba miŋ sɔla laalaŋndo te ŋ wou pɛ sɛmbɔɔ le ndu nduyɛ miŋ nyuna Mɛlɛka le mbo dɔu sɛmbɛ naa koŋ sala. (Kaleesiaŋnda 5:​22; Ɛfisiaŋnda 2:​8) Mi Meele tosa wallo kalaŋ le laalaŋ ndɔɔ kindioo. Vɛɛ naŋ looku yɛ hei sina? Ŋ yaasiaŋndɔ mɛɛ o yaŋ nilaŋ yɛ nduyɛ a nyɛ o soo okɔɔ wo.

16. Yɛɛ chɔm yɛ maa Meele ndoo yaŋ nilaŋ nyɛkɛndɛi?

¹⁶ Mɛɛ Meele yaŋ nilaŋ yɛ. Baabuiyo dimi aa, “Wana o wana wa wana keleŋa isɔɔ nila yaŋɔɔ. Kɛ wa wana soo chɔ chɔ le.” (Chemisi 1:​19) Meele ndoo yaŋ nilaŋ nyɛkɛndɛi. Baabuiyo dimi maa mbo yaŋ nilaŋ yekeŋ o sɔɔŋ o tuei yoŋ, o biimakala fau sɔɔŋ o pɛɛku a Chɛhowa okɔɔ woŋ. Mi ndoo chua teleŋndo le yiyaŋndo o sɔɔŋ sɔviɔŋ muŋ choo. Tamaseliiyo opilɛ a hei okɔɔ cho teleŋ Chiisu veluŋndo ni mɛɛ wanaa mandaa lasaa dimul Meele a yooŋgu maalikɛinɔɔ dimul nda wo okɔɔ. Mɛɛ Chiisu fuuluu wɔsilaŋ 12, mbo dimi isɔɔ mi kɔndɔfillo bii Meele. O sɔɔŋ muŋ niŋ kpou, mi Meele yaŋ nilaŋ, mbo loonuŋ muŋ, nduyɛ mbo wa yiyaŋndo a sɔɔŋ o tuei muŋndoŋ okɔɔ.​—⁠Nuawɔ Luku 2:​16-19, 49, 51.

17. Yɛɛ naŋ pɛɛku yɛ a Meele okɔɔ o suɛi nduɛi niŋ?

¹⁷ A nyɛ Meele soo okɔɔ wo. Baabuiyo dimul naa tau a nyɛ Meele soo okɔɔ wo le. Suɛi nduɛi bɛnduii o soo ve cho o Luku 1:​46-55 niŋ. Diomndaŋ ndaŋ la chɔm maa Meele ndoo sina Diom Mɛlɛkaa o Hibuluiye niŋ nyɛkɛndɛi. Vɛɛ i cho yɛ tonya? Nyɛ Meele soo wo sɔŋgɔ nyɛpilɛ a piɛile Hanaleŋ, kalaa Saamiɛɛ. (Saamiɛɛ Tasoo 2:​1-10) Wana che pɛ maa mi Meele veelu bolii Baabuiye le bɛmbɔɔ 20 o suɛi nduɛi niŋ. Hei chɔm kpendekele maa ndoo yeema bɔɔ suɛi a tonya o pɛɛku a Chaaŋ ndɔ kɛndɛ kɛndɔɔ okɔɔ wo, Chɛhowa.

18. O nɛila kuɛɛ niŋ naŋ tuallɛ tamasi laalaŋ Meele wo kɔɔli?

¹⁸ Maa Meele, naapum mi Chɛhowa ke naa wallo miŋ yiyaŋ maa o kendu bɔɔ le miŋ tosa ndu. Ŋ tolnuŋ tamasi ndɔɔ kɔɔli, miŋ chɛl wali koŋ a lebɛɛ, nduyɛ miŋ tiindaŋ maa Chɛhowa cho naa mala. Ŋ tual vɛlɛ tamasi laalaŋ Meele wo kɔɔli te ŋ yaŋ pɛ Chɛhowa nilaŋ nyɛkɛndɛi nduyɛ miŋ wa yiyaŋndo a nyɛ naŋ pɛɛku a ndu okɔɔ wo vɛlɛ a sabu ndɔɔ. Koŋ tosa miŋ dimul acheleŋnda nyɛ naŋ pɛɛku wo a nyaale.​—⁠Sam 77:​11, 12; Luku 8:​18; Luomaŋnda 10:​15.

19. Te ŋ tol pɛ tamasi wanaa laalaŋaa Baabuiyo soo okɔɔ wa kɔɔli, tiindaŋ yɛɛ cho yɛ wa le naa?

¹⁹ I cho kpendekele maa Lufu, Hɛsɛkiya a Meele, chaaŋaa Chɛhowaa nda wa ni mɛɛ Ebilaham wa yɛ koni. A wa seiyaa faŋga bɛndu chuu chɔm te wa choo a sɔla dikeŋnaŋndo ma simnuŋ chaaŋaa Mɛlɛkaa wa. Maa naa kpou hiounuŋ lachi a tamasi wanaa laalaŋaa kɛndiaa haa tolɔɔ kɔɔli fɔ! (Hibuluiya 6:​11, 12) Te ŋ tosa lende pɛ, ŋ cho wa lehɔl o nɛi le mi Chɛhowa fanda naa le simnɔŋndo chaaŋaa nduaa lefafɛɛŋ!