Nyunala Wanaa Nua O Yaula Naalaŋ Niŋnda

O yilaŋii Isikiaa ve niŋ, yɛɛ po nɔ nyɛ poonyiaa o ba wo, a puaa ŋɔmpumaa nɔ wolɔɔla chɔulaŋ o ba le diyɔɔ wo sim yɛ?

Puaa haa sim le maalikɛiyaa chɔuwa o choo choo niŋ. Nda Mɛlɛka soliŋ kpeku le Chulusɛlɛm tɛɛmboo ni. Maalikɛiyaa kaŋ koni Mɛlɛka cho vɛlɛ soliŋ kpeku ni le chieeŋ dɛnɛ wɔɔŋ Setenaa tɛɛmboo o paale Amakɛdɔŋ ndeŋ choo. Sinapɛŋgu sɛnɛiyo cho hoo ni. Le yɛɛ sinapɛŋgoo hoo yeemaŋ yɛ?

Tuupa mi wɔsi 607 B.C.E fuuluu, mi Chɛhowa chɔm Isikiaa yilaŋnde a nyɛ ndoo nɔ le yɔŋnɔŋndo o Chulusɛlɛm niŋndo tuupa mbo sɔla tambei. O yilaŋii keŋ niŋ, mi Isikiaa cha dɛnɛ wɔɔŋndo yɔŋnɔŋndo o hɔbɛi o Chulusɛlɛm niŋ. Okoŋ, mi Isikiaa cha puaa a ŋɔmpum. Nduyɛ “puaa haa o kɛ kɛ ndu oo nɔ wolɔɔ ndɔ chɔuwo o ba le diyɔɔ.” Poo wa vɛlɛ “nda tɛɛŋ o douviaŋ o kolala kɛndɛ kɛndɛlaŋ niŋ.” Nduyɛ “nyɛ nda poonyiaa a ndu wo o wa ndu o ba.” (Isikiaa 8:​6-12; 9:​2, 3) Ma dimul poo hoo le mbo “balu o bɛɛlaŋ Chulusɛlɛm kpou” le mbo handu taamasilaŋ “wana o wana cho a kɔl tambɛiyo le sɔɔŋ wɔɔŋ bɛnduŋ cho muŋ yɔnɔŋndo o chioo hoo niŋ, mi ya Mɛlɛka tul muŋ yɛleŋ, nduyɛ mi kɔl nuu wa mɔnɛi biyɔɔ” wo o ŋtendu. Okoŋ, mbo dimul puaa ŋumpumaa ndaa nɔ wolɔɔla chɔulaŋ nda le ma dii wanaa ndaa nɔ taamasilaŋ o ŋtendu le wa kpou. (Isikiaa 9:​4-7) Yɛɛ naŋ pɛɛku yɛ o yilaŋnde hei niŋ? Nduyɛ nɛɛ cho yɛ po nɔ hoo nyɛ poonyiaa o ba wo?

O wɔsi 612 B.C.E niŋ Isikiaa sɔla yilaŋnde hei ni. Nduyɛ wɔsioŋ ŋuɛɛnu hiou ni tuupa mi yilaŋnde hei peeluŋ. Mi Chɛhowa chɛl puaa chɔuwaa Babiloniaŋnda le Chulusɛlɛm tɛɛmboo. O nɛiyo hoo choo, mi Chɛhowa soliŋ Babiloniaŋnda kpeku le wanaa nduaa nila kaluaa kotaa dɔuwɔɔ choo. (Chɛluimaya 25:​9, 15-18) Kɛ ɔɔ niŋ Chuuwaa sakpuaa, a ndaa kɛɛ le balaŋ lueiyo o sɔɔŋ wɔɔŋ wa yɔŋnɔŋndo o Chulusɛlɛm niŋndoŋ? Mi Chɛhowa tosa a sabu le nda mandaa.

O yilaŋnde hei niŋ, Isikiaa ndoo hendu wana o wana taamasi o itendu kpendekele le, ɔɔ mbo wa waŋndo opilɛ le Chulusɛlɛm tɛɛmboo le. Kɛ, maalikɛiya sim lachi le Chulusɛlɛm tɛɛmboo ni. Lelaŋ, bundɛi hei ke naa saboo le chɔɔ nyɛ yɔŋnuŋ o choo choo niŋndo. Mi Chɛhowa dimul maalikɛiyaa nduaa le bɛɛndiaa mɛɛ nda cho Chulusɛlɛm tɛɛmbuu yɛ, nduyɛ ma tosa a sabu le kiindiaa wanaa cho sakpo wa.a

Nyɛ Baabuiyo dimi hoo wo cho vɛlɛ peelɔŋ o chilaŋ niŋ. Mi naŋ dimi paandu maa po nɔ hoo nyɛ poonyiaa o ba wo ndoo sim le Kilisiɔŋaa pɔyaŋnda, a cho wɔ yoomu o lɛŋndeŋ choo wa. Mi naŋ dimi vɛlɛ maa te waŋnda yaŋ pɛ nilaŋ o yooŋgu kɛndɛ naŋ cho nda dimullo wo nduyɛ ma chɛl ndu, mɛɛ a sɔla taamasilaŋ o ŋtendu. Kɛ ŋ laŋga saaluŋ maa ŋ nɔ miŋ siŋga mɛɛ naŋ tɛɛsiaa bolle Baabuileŋ ndeŋ yɛ. Ŋ pɛɛku o Maatiu 25:​31-33 maa Chiisu kilul waŋnda yamɛi ni. O cho hei tosa o chilaŋ niŋ a teleŋ nyɛpalaa bɛndoo. A teleŋ koŋ, wanaa o cho yamɛi kilul maa saa wa cho kindaa sɔla. Nduyɛ wanaa o cho yamɛi kilul maa chuiŋnda wa cho tambei sɔla.

Lelaŋ, yɛɛ yilaŋii Isikiaa ve pɛɛku yɛ naa? Ŋ soonuŋndɔ a sɔɔŋ ŋuɛɛnu okɔɔ.

1.  Tuupa mi Chulusɛlɛm sɔla tambei, mi Isikiaa, Chɛluimaya, vɛlɛ a Aisaya sila waŋnda a nyɛ ndoo nɔ le Chulusɛlɛm yɔŋnɔŋndo wo. A wa maa wanaa mɛŋgɛlaa. Hau, Chɛhowa cho Kilisiɔŋaa pɔyaŋaa kunda pɔmbuaa soliŋndo kpeku le waŋnda pɛɛkoo nduyɛ le acheleŋnda silaa tuupa mi nyɛpalaa bɛndoo kanduŋ. Nduyɛ wanaa Mɛlɛkaa kpou, nda cho yɛ buɛiyaa Chiisuaa ni, cho wali silaa hoo tosaa.​—Maatiu 24:45-47.

2.  Isikiaa ndoo hendu wanaa ndaa nɔ le kindaa sɔlaa wa taamasi o ŋtendu le. Wanaa Mɛlɛkaa hau bɛɛ tosa lende le. Kɛ yooŋgu kɛndɔɔ nda dimul waŋnda ni, nduyɛ ma sila nda a nyɛ nɔ le yɔŋnɔŋndo o chilaŋ niŋndo. Yooŋgu kɛndɔɔ hoo cho dimiŋndo chieeŋndo balɔɔ silɔ a mala maalikɛiya.​—Sɔɔŋ Chɔɔmaŋndoŋ 14:​6.

3.  Wanaa ndaa sɔla kindaa o teleŋ Isikiaa wo niŋnda ndaa nɔ taamasilaŋ o ŋtendu kpendekele le. Hau bɛɛ, wanaa cho kindaa sɔla wa cho nɔ taamasilaŋ kpendekele o ŋtendu le. Yɛɛ waŋnda nɔ yɛ ma tosa le kindaa sɔlaa a teleŋ nyɛpalaa bɛndoo? Te a tuei pɛ silaa, a nɔ ma pɛɛku le taamasi Chiisoo tolɔɔ kɔɔli, ma yɔŋguŋ o Mɛlɛka lo, nduyɛ ma toolu pɔmbuaa Kilitiaa o yooŋgu kɛndɔɔ dimioo niŋ. (Maatiu 25:​35-40) A boondii nyɛpalaa bɛndoo, a cho waŋnda haa taamasilaŋ handɔɔ o ŋtendu. Ndu sim ni, a cho hɛlioo sɔla le kindaa sɔlaa.

4.  Po nɔ nyɛ poonyiaa o ba wo sim le Chiisu. A teleŋ nyɛpalaa bɛndoo, Chiisu cho wanaa faŋga chuu chɔm te wa taamasilaŋ handɔɔ o ŋtendu te o kilul nda pɛ yamɛi maa ŋsaa. Okoŋ, a cho dioo sɔla le waa o lɛŋndeŋ choo naŋ lefafɛɛŋ.​—Maatiu 25:34, 46.b

5.  Hau, puaa ŋɔmpumaa nɔ wolɔɔla chɔulaŋ o ba le diyɔɔ wa sim le puaa chɔuwa o choo choo niŋ a Chiisu sim lachi wa. A cho suŋ kaalaŋ tɛɛmbuu, a dɛnɛ wɔɔŋ kɛ kɛ fee faŋa.​—Isikiaa 10:2, 6, 7; Sɔɔŋ Chɔɔmaŋndoŋ 19:11-21.

Sɔɔŋ naŋ pɛɛku o yilaŋnde hei niŋndo mala naa le tiindaŋndo nɔɔ maa Chɛhowa tɛɛmbuu niŋ kposoŋ wanaa cho sakpo wa a wanaa dɛnɛ wɔɔŋnda latulu le. (Pitɛ Diiŋ Ndɔɔ 2:​9; 3:​9) Sɔɔŋ naŋ pɛɛku woŋ loonuŋ naa vɛlɛ maa nyɛ sɔvɛ bɛndoo pila yooŋgu kɛndɔɔ dimioo cho o teleŋ naa hoo niŋ ni. Wana o wana nɔ mbo tuei silaa hoo tuupa mi mɛɛlulaŋ la fuuluu!​—Maatiu 24:14.