A Sina Pa?

A laalaŋ pa kpeekpei maa mi waŋndo ndoo saŋ kulula bil wɔɔŋndo o chiɛi wana cheleŋ niŋ o sindɔɔ niŋ?

MI CHIISU dimi o Maatiu 13:24-26 niŋ aa, “Masale Mɛlɛkaleŋ le cho machuaa mɛɛ i yɔnuŋ o taloo hoo niŋ yɛ. Po pilɛ chɛŋ ni mbo saŋ yɛiyii kɛndɛi o chiɛi nduɛi niŋ. Nyumma pilɛ mɛɛ waŋnda lɔl kpede, mi yaamɔɔ ndɔɔ chaŋ mbo kɔ saŋ kululla wɔɔŋ pum leniŋ. Mbo kuanuŋ. O koŋ kɔɔli, mi yɛiyii kɛndɛi hei i mɔsɔŋa wulɔɔ a bil koŋ. Mi i hindu. Mɛɛ i chuulu, ma sina maa bil wɔɔŋndo vil latulu a yɛiye hei.” Wanaa poonyiaa apum kiisaŋ maa taloo hoo cho tonya le. Kɛ yaula maLuomaŋnda waŋnda laalaŋ ndaŋ la dimi maa, mi hei ndii yɔŋnuŋ.

Mi Baabui tɛɛsiaa ŋsɔɔ pum dimi maa o sawa maLuomaŋndo bɛŋgu, suɛi sawa tɛɛmbaa i wa ni le mi waŋndo saŋ kulula bil wɔɔŋndo o chiɛi wana cheleŋ niŋ le maa miŋgioo. Sawa ndaa dɔu a hei okɔɔ wo chɔm maa mi hei ndii yɔŋnuŋ kɛsɛ. Mi wana pɛɛkaa lasawa pilɛ diolaŋ Alɛsta Kɛɛ tɛɛsiaa o wɔsi 533 niŋ o violɔŋ Chiisoo kɔɔli, maa mi Masa maLuomaŋndo diolaŋ Chɔstiniaŋ soli yauwo diolaŋ aa “Digest.” Mi yauwo hoo yaandiaa sawa maLuomaŋndo, nduyɛ sɔɔŋ wanaa sina sawaa tau wa wa leniŋ. Kɛlɛŋgaa sɔɔŋ ndaa poonyiaa o wɔsila 100-250 laŋ niŋ o violɔŋ Kilitioo kɔɔli wo. A mɛɛ yau koŋ “Digest” dimi yɛ, wanaa ndaa sina kaŋ sawaa tau wa opilɛ wa Yulpiaŋ ni. Ndu baŋ sawa koŋ kandɔŋndo o wɔsiŋ kɛmɛ lediiŋ ndoŋ niŋ ni. Mi ndaa saŋ kulula bil wɔɔŋndo o chiɛi waŋndo niŋ, nduyɛ mi bil koŋ ndoo tɛɛmbuu kulula kɛndɛla nda saŋ ndaŋ kpata kpata. Mi yauwo hoo “Digest” tɛɛsiaa maa wana ichiɔɔ ndoo nɔ di le mi wana dɛnɛ wɔɔŋ koŋ ke ndu kanioŋ le chiɛi nduɛi o tɛɛmbuu ve.

Mi sɔɔŋ waa naa yɔŋnɔŋ o Masale maLuomaŋndeŋ bɛŋgu sindɛ. Hei chɔm ni maa tale Chiisu dimi hoo wo ndoo nɔla mbo yɔŋnuŋ.