A Cho pa Chɛhowa Siiŋgoo Naa Viaŋnaŋnda?

1. Yiyaŋ yɛɛ hakioo ke yɛ wanaa bɔɔbɔɔ dɔu tiindaŋndo o Mɛlɛka niŋnda?

MI PƆƆL, wana Chiisu vem hɔlte ndɔ wo poonyiaa a ndupila okɔɔ aa, “Nyɛ palaa hoo cho o bana bana ya choo fɔ.” (Luomaŋnda 7:​24) Hau, mi buɛiyaa bɔɔbɔɔ dɔu tiindaŋndo o Mɛlɛka niŋnda tambu kɔl maa Pɔɔl. Le yɛɛ? Kanifuule, mi che bɛɛ miŋ yeema le Chɛhowa kɔllo nɛŋioo, kɛ wanaa lahakiaa naa kpou cho ni. Lelaŋ, miŋ tambu kɔl te ŋ tosa pɛ nyɛ Chɛhowa hɛnaŋ te wo. Kilisiɔŋnda apum, a tosa haki wɔɔŋ wɔɔŋndo wa nɔ yiyaŋndo maa Chɛhowa mel lɛ nda haki kposoŋ te.

2. (a) Vɛɛ Sam 34:​22 chɔm yɛ maa buɛiyaa Chɛhowaa nɔ ma hiu kɔllo tambu le? (b) Yɛɛ naŋ cho yɛ pɛɛku o buŋgɛi hei niŋ? (Tofa kɔfoo “Yɛɛ Naŋ Pɛɛku yɛ o Sɔɔŋ Sim Lewundu Woŋ Niŋ?”)

² Baabuiyo ke naa tiindaŋndo maa te ŋ siiŋguu pɛ Chɛhowa naa viaŋnaŋnda, kɔl tambɛiyo hiu naa mayoomu le. (Nuawɔ Sam 34:​22.) Kɛ yɛɛ o sim yɛ le Chɛhowa siiŋgoo naa viaŋnaŋnda? Yɛɛ naŋ nɔ yɛ miŋ tosa te ŋ yeema pɛ mi Chɛhowa tuiinuŋ naa inyiɛɛ nduyɛ mbo mal naa haki? Ŋ nɔla miŋ sɔla mulilaŋ le nyunalaŋ ndaŋ te ŋ pɛɛku pɛ o kɛɛsiaa wa o Isɔluɛi niŋ sindɛ le chieeŋ viaŋnaŋndoŋ nɔɔ wo. A boondii kpema Sawaa kɛɛsiaa koŋ wa ni, nduyɛ mbo siŋgaŋ a boondii Pɛŋtikɔɔsi ve o wɔsi 33 niŋ. Kɛ o Chɛhowa lo Sawaa ndoo fula ni. Lelaŋ, o kɛɛsiaa wa a chieeŋ viaŋnaŋndoŋ okɔɔ wo, ŋ pɛɛku mɛɛ Chɛhowa che hakioo, wanaa lahakiaa, a wanaa mal yɔŋnda wɔɔŋndo wa yɛ. O tasoo, ŋ pɛɛkuŋ ndɔ le sabu Isɔluɛi ndoo nɔ chieeŋ viaŋnaŋndoŋ ndo a nyɛ ndoo yɔŋnuŋ o chieeŋ muŋ niŋndo.

LA HƐLI CHIEEŊ VIAŊNAŊNDOŊ LE NYAPILA

3. Yɛɛ Isɔluɛiya ndaa nɔ yɛ ma tosal wana dii waŋndo wo?

³ Mi Chɛhowa ndoo buulaŋ tau te ndaa dii pɛ waŋndo. Te Isɔluɛinɔɔ ndoo dii pɛ waŋndo, wanayɛi nduɛi ndoo nɔ di mbo “miŋgi maa.” (Nɔmbaa 35:​19) O nɛi koŋ choo, a nɔ ma dii wana koŋ le mɛɛ o dii wana tɛɛmbuu isɔɔ le wo a siɛlɛi fuu yɛ. Te ndaa dii wana koŋ chɔ chɔ le, Lɛŋnde Mɛyaaleŋ lee ve lɛ le diandaa le. Mi Chɛhowa dimi maa, kooma wana chioo solioo o fondo fuu wo choo “tosa mi lɛŋndeŋ le simnuŋ le nɔɔlɛi.”—Nɔmbaa 35:​33, 34.

4. Yɛɛ ndoo yɔŋnuŋ yɛ te sulɛi ndii hɛluŋ pɛ Isɔluɛinɔɔ mbo dii waŋndo?

⁴ Kɛ yɛɛ ndoo yɔŋnuŋ yɛ te sulɛi ndii hɛluŋ pɛ Isɔluɛinɔɔ mbo dii waŋndo? Mi che bɛɛ sulɛi ndii hɛluŋ waŋndo ni, kɛ mi tɔɔyaŋ piɔm wana tɛɛmbuu isɔɔ le wo wa ndu choo. (Chɛnɛsee 9:​5) O suɛi waa naa niŋ, mi Chɛhowa dimi maa a nɔ ma chɔm wana koŋ nyiɛɛye. Wana sulɛi hɛluŋ koŋ mbo dii waŋndo wo nɔ mbo nyaanuŋ o chieeŋ viaŋnaŋndoŋ niŋ opilɛ, yɔŋi wana miŋgiaa maa dii ndu. Te ndaa chɛl ndu pɛ le waa o chiee koŋ niŋ, ndaa nɔ lɛ ma dii ndu le. Ndoo nɔ mbo wa o chiee koŋ niŋ haaa mi masa wanaa soliaa lasalaa vi.—Nɔmbaa 35:​15, 28.

5. Le yɛɛ kɛɛsiaa chieeŋ viaŋnaŋndoŋ mala yɛ naa le Chɛhowa biyɔɔ bila nyɛkɛndɛi?

⁵ O ve wana chiee le ndoo kɛɛsiaa le chieeŋ viaŋnaŋndoŋ nɔɔ le. Chɛhowa pila ndoo kɛɛsiaa ni. Mbo dimul Chɔɔsuaa aa, ‘Dimul Isɔluɛiya ma hɛli chiooŋ ŋ tiŋ mi muŋ wa teŋgeŋ.’ (Chɔɔsuaa 20:​1-3, 7, 8) Mi Chɛhowa kɛɛsiaa maa chiooŋ muŋ nɔ miŋ wa teŋgeŋ. Kɛɛsiaa hoo pɛɛku naa tau a Chɛhowa okɔɔ. Le taamaseliiyo, kɛɛsiaa hoo mala naa le nyiɛɛyii Chɛhowɛi biyɔɔ bila nyɛkɛndɛi. Nduyɛ hei pɛɛku naa mɛɛ naŋ siiŋguu Chɛhowa naa viaŋnaŋnda hau yɛ.

O NƆ MBO CHƆM WAŊ BANAA NYƐ YƆŊNUŊNDO

6, 7. (a) Tɛɛsiaa wɔ nyɛ waŋ banaa ndaa nɔ ma tosa wo te a wa pɛ wana sulɛi ndii hɛluŋ mbo dii waŋndo wo kɔɔsaa. (Tofa fotueiyo o peele naŋ kandu leŋ choo.) (b) Le yɛɛ i wa yɛ suɛi taasi le mi wana nyaanuŋ koŋ ndo soo o waŋ banaa lo?

⁶ Te sulɛi ndii hɛluŋ pɛ Isɔluɛinɔɔ mbo dii waŋndo, ndoo nɔ mbo nyaanuŋ o chiee viaŋnaŋndo mbo “kɔ chɔm” waŋ banaa cho o dio saasa chioo sondoo wa “nyɛ yɔnuŋ ndo.” Waŋ banaa kaŋ ndaa nɔ ma demul ndu. (Chɔɔsuaa 20:​4) Te teleŋ tiŋ hiou pɛ, ndaa nɔ ma miŋgi ndu pila o chiee o dii koŋ waŋndo wo niŋ le mi waŋ banaa loŋ kɔɔsa a ndu. (Nuawɔ Nɔmbaa 35:​24, 25.) Te waŋ banaa kaŋ ndaa kɛɛsiaa pɛ maa sulɛi hɛluŋ wana koŋ ni, ndaa nɔ ma miŋgi wana nyaanuŋ koŋ ndo pila o chiee viaŋnaŋndo niŋ.

⁷ Le yɛɛ wana nyaanuŋ koŋ ndo ndoo nɔ yɛ mbo soo o waŋ banaa lo? Le mi waŋ banaa ndaa tosa a sabu le Isɔluɛiya kɛsioo a diandaa, nduyɛ le mi wana sulɛi hɛluŋ koŋ ndo ndoo sɔla tɔnɔɔ o nyiɛɛyii Chɛhowɛi niŋ. Mi wana pɛɛkaa Baabui pilɛ poonyiaa maa, te wana nyaanuŋ koŋ ndo ndoo kue o waŋ banaa lo le, ndaa dii ndu. Mbo dimi vɛlɛ maa wana nyaanuŋ koŋ ndo tɔɔyaŋndo wa wa choo le piɔm ndɔɔ ni, kanifuule, o tosa nyɛ Mɛlɛka dimi wo le. Wana sulɛi hɛluŋ koŋ mbo dii waŋndo wo ndoo nɔ mbo nyuna le malaa le mbo lo yoomu. Te ndoo kue o chieeŋ viaŋnaŋndoŋ opilɛ niŋ te, mɛɛ wanayɛi kpɛɛluŋ wana o dii koŋ ndo ndoo nɔ dioo mbo dii ndu.

8, 9. Le yɛɛ Kilisiɔŋnɔ tosa haki wɔɔŋ wɔɔŋndo wo nɔ yɛ mbo soo o bɛnduaa lo?

⁸ Hau, Kilisiɔŋnɔ tosa haki wɔɔŋ wɔɔŋndo wo nɔ mbo kuɛ o bɛnduaa lo le halikpeŋ ma mala ndu le mi chaŋyɛi miiŋgu ndu tɛɛŋ nda Chɛhowa. Le yɛɛ hei cho yɛ suɛi sɔvɛ bɛndu? O tasoo, Chɛhowa kɛɛsiaa ni le mi bɛnduaa chal a wanaa tosa hakila wɔɔŋ wɔɔŋndaŋ nda. (Chemisi 5:​14-16) O diiŋ ndɔɔ, bɛnduaa cho loŋ le ma mala wanaa mal hakila ndalaŋ nda le mi Mɛlɛka chɛl nda vɛlɛ nduyɛ le ma kpakpala vɛlɛ haki ndaa tosaa. (Kaleesiaŋnda 6:​1; Hibuluiya 12:​11) O yaa ndɔɔ, bɛnduaa nɔ dioo ni le malaa wanaa mal yɔŋnda ndala wɔɔŋndaŋ nda, le ma pɛŋgi kɔl tambɛi yɔŋ wɔɔŋ nda tosa wo. Chɛhowa dimi maa “mɛɛ hueiyii tɔɔmɛi bɛnduei i wa nuaa hɔŋndo, mi waŋnda sɔla naa nda nyaanuŋ ma kɔ vioŋnuŋ nda yɛ” lende bɛnduaa cho ni. (Aisaya 32:​1, 2) Kɛɛsiaa hoo cho nɛiyo opilɛ ni o Mɛlɛka tuiinuŋ naa inyiɛɛyo.

⁹ Mɛɛ Buɛiyaa Mɛlɛkaa a bɔɔbɔɔ soo o bɛnduaa lo, ma sɔla mala nda yeema nda o ba wo nduyɛ ma sinaŋ nyɛkɛndɛi. Le taamaseliiyo, mi puaapilɛnɔɔ diolaŋ Daaniɛɛ tosa haki wɔɔŋ wɔɔŋndo. Kɛ le paŋguŋ bɔɔbɔɔ, ndoo kue o bɛnduaa lo le. Mbo dimi aa, “Mɛɛ teleŋndo hiou tiŋ chalaŋ, mi yiyaŋ maa bɛnduaa tiu lɛ ba ma tosa nyɛ o nyɛ le ya le.” Kɛ, o wa wɔ a siooŋnde maa waŋndo cho sina haki o tosa wo. Nduyɛ mbo yiyaŋ maa piɛile kɛ kɛ o wa pɛ, o nɔ mbo kandu leŋ a Chɛhowa nyɔɔloo. O mɛɛlulaŋ kpɔŋ, mbo nyuna bɛnduaa le malaa. Mɛɛ o yiyaŋ a nyɛ yɔŋnuŋndo, mbo dimi aa, “A tonya, yaa nɔ siooŋnde le nda dimullo. Kɛ mɛɛ ya dimul nda, mi sinaŋ maa wolɔɔla lusulɛilaŋ nda faŋa ya o lebol ni.” Mi Daaniɛɛ sɔla vɛlɛ hɛnɛkɛyɛi le suɛi o Chɛhowa lo. O nɔ niŋ suŋ suŋ kɔl iyama walaŋndo, nduyɛ o laŋga simnuŋ buɛi malalaŋndo.

“O NYAANUŊ O CHIOOŊ MUŊ O PILƐ”

10. Le malɔɔ hakioo sɔlaa, yɛɛ wana sulɛi hɛluŋ mbo dii waŋndo wo ndoo nɔ yɛ mbo tosa?

¹⁰ Le malɔɔ hakioo sɔlaa, wana sulɛi hɛluŋ mbo dii waŋndo wo ndoo nɔ mbo nyaanuŋ chɔ chɔ o chieeŋ viaŋnaŋ wa ndu ikɛiyoŋ opilɛ niŋ. (Nuawɔ Chɔɔsuaa 20:​4.) Ndoo nɔla mbo lo yoomu te o nyaanuŋ pɛ o chiee viaŋnaŋndo nduyɛ mbo lo loŋ haaa mi masa wanaa soliaa lasalaa vi. Sala soliaŋndo wa hoo le wana nyaanuŋ koŋ ndo ni. Ndoo nɔ mbo mɛi wali ndɔɔ, chalta ndɔla sɔvɛlaŋ, a hɛnɛkɛyɛi nduɛi le kelaa.a (Tofa tɛɛsiaa amatou.) (Nɔmbaa 35:​25) Kɛ keŋ wa suɛi sɔvɛ. Te wana nyaanuŋ koŋ ndo ndoo mal pɛ chiee viaŋnaŋ koŋ a teleŋ kɛ kɛ, o wa chɔm maa o buulaŋ le wana o dii wo le, nduyɛ o wa yoomu ndɔɔ luei o kpundɔɔ niŋ.

11. Vɛɛ Kilisiɔŋnɔ mal yɔŋ ndɔ wɔɔŋndo wo chɔm yɛ maa o nɔ balika melaa le nyiɛɛyii Mɛlɛkɛi?

¹¹ Hau bɛɛ, wana mal yɔŋ ndɔ wɔɔŋndo wo nɔ mbo tosa sɔɔŋ pum le mi Mɛlɛka mal ndu haki. O nɔ mbo pɛŋgi hakioo tosaa. Koŋ cho ni, kpakpalaa nyɛ o nyɛ tosa mbo luei balaŋ o hakioo niŋ. Mi Pɔɔl, wana Chiisu vem hɔlte ndɔ wo tɛɛsiaa nyɛ Kilisiɔŋnɔ mal yɔŋ wɔɔŋndo o Kɔliŋ niŋ ndoo tosa wo. Mbo poonyiaa aa, “Kɔl tambɛi Mɛlɛka chɛl hoo maa o komal nya wo, . . . o tosa mi la baŋ bolleŋ o suɛi hei niŋ. O tosa mi la chɔm yeemɛi le mi tɔɔ wɔɔŋndo faŋaŋ nya o lebol. O tosa mi la chɔm maa la tambu kɔl a nyɛ yɔnuŋ ndo. O tosa mi siooŋnde i bii nya a nyɛ yɔnuŋ ndo. O tosa mi la chɔɔlu yeemɛi sɔla le mi la che ya. Nduyɛ, o tosa mi la wa a bɛɛndiaŋ le suɛi le ya. O tosa mi la wa a bɛɛndiaŋ, wana tosa suɛi hei yo le mi la tosa mbo sɔla nyɛ palaa le ndu silaa.” (Kɔliŋtiaŋ Diiŋ Ndɔɔ 7:​10, 11) Lelaŋ, te ŋ kindiŋ pɛ o nɛi o nɛi niŋ le yɔŋ wɔɔŋndo malɔɔ, ŋ cho Chɛhowa chɔm maa ŋ buulaŋ tau a nyɛ naŋ tosa wo, nduyɛ ŋ yiyaŋ naa maa o cho naa nyiɛɛye tuiinɔŋ o lepilɛ niŋ kpe le.

12. Yɛɛ Kilisiɔŋnɔɔ nɔ yɛ mbo mal le mi Chɛhowa hiou lachi a ndu nyiɛɛye tuiinɔŋndo?

¹² Yɛɛ Kilisiɔŋnɔɔ nɔ yɛ mbo mal le mi Chɛhowa hiou lachi a ndu nyiɛɛye tuiinɔŋndo? O nɔ vɛlɛ mbo mal nyɛm o hɛnaŋndoŋ te o yɔŋ pɛ maa ŋ cho ndu balaŋ luei o hakioo niŋ. (Maatiu 18:​8, 9) Le taamaseliiyo, te chaaŋaa numnda wa num pɛ nyindɔɔ le sɔɔŋ tɛɛmbuu Chɛhowa kɔllo woŋ tosaa, a cho pa kɛɛ chaŋyɛi tosaa a nda? Te a che ndi pɛ ikala le muɛiyaŋ yɛlɛmaa kolɔɔ, a cho sɔɔŋ tosa ma kol tau woŋ kpakpala? Te a che ndi pɛ ikala le yeemaŋ kaa ihini nɔɔlɛiyoŋ dɔwɔɔ o mandaa bɛŋgu, a cho pa vidueilaŋ, tɛɛŋgoŋ, ɔɔ sɔɔŋ tosa ma nɔ yiyaŋnda nɔɔlɛilaŋ ndo kpakpala? Loonuŋ maa, tɔnɔɔ cho le sala soliaŋ kɛ kɛ naŋ tosa pɛ le sawala Chɛhowalaŋ diikɔŋndo. I cho bɔɔ suɛi wɔɔŋ le yiyaŋndo maa Chɛhowa kɛɛ naa. Nduyɛ nyɛ o nyɛ bɛnda mbo hiau kaala Chɛhowa nɔ le naa “le fɛɛŋ a fɛɛŋ” ndo le.—Aisaya 54:​7, 8.

“O NYAANUŊ . . . O NAA WANA YƆŊ NDU NYƐ LE WA”

13. Tɛɛsiaawɔ le sabu wana nyaanuŋ ndo ndoo nɔ mbo wa hɛnɛkɛ nduyɛ a nyaaloo o chiee viaŋnaŋndo niŋndo.

¹³ Te wana nyaanuŋ ndo ndoo wa pɛ o chiee viaŋnaŋndo niŋ, ndaa yɔŋ ndu nyɛ o nyɛ le. Mi Chɛhowa dimi a chieeŋ muŋ okɔɔ aa, ‘A hɛli chiooŋ ŋ tiŋ mi muŋ wa teŋgeŋ.’ (Chɔɔsuaa 20:​2, 3) Chɛhowa ndoo yeema lɛ ma kɔɔsa wana nyaanuŋ koŋ ndo le suɛi o tosa ve le. Nduyɛ, ndaa chɛl wana miŋgiaa maa le luɛiyɔɔ o chiee viaŋnaŋndo niŋ le mbo kɔ dii wana koŋ te. Te wana nyaanuŋ koŋ ndo wa pɛ o chiee koŋ niŋ, ndaa yɔŋ ndɛ ndu nyɛ le kanifuule, o wa o manda Chɛhowaa bɛŋgu. O ve o biyɔɔ niŋ te. Ndoo nɔ mbo tosa wallo, mala acheleŋnda, nduyɛ mbo piɛi Chɛhowa a kɔl nyulu. A tonya, ndoo nɔ mbo tuei yoomu ndɔɔ yeela!

14. Tiindaŋ yɛɛ Kilisiɔŋnɔ mal yɔŋ ndɔ wɔɔŋndo wo nɔ yɛ?

¹⁴ Wanaa Mɛlɛkaa apum, a tosa haki wɔɔŋ wɔɔŋndo wa cho wɔ a kɔl tambɛiyo, mi che bɛɛ a mal niŋ yɔŋnda wɔɔŋndo. Apum cho wɔ pɛɛŋ yiyaŋndo maa Chɛhowa puɛɛnuŋ kposoŋ a nyɛ nda tosa wo le. Te lende ŋ cho yiyaŋndo ni, yandii, nɔ tiindaŋndo maa te Chɛhowa mal num pɛ haki, o yiyaŋ ndɛ pɛɛŋ a nyɛ ŋ tosa wo okɔɔ le. A nɔ lɛ ma tambu kɔl kposoŋ te. Hei ndii yɔŋnuŋ Daaniɛɛ naŋ soo suŋ a ndu okɔɔ wo ni. Mɛɛ bɛnduaa miŋgi ndu o nɛi nduyɛ ma mala ndu le kɔl iyama walaŋndo nɔɔ, mbo sinaŋ nyɛkɛndɛi. Mbo dimi aa, “I nɔ lɛ mi tambu kɔl kposoŋ te. Haki koŋ o hiou, nduyɛ I puɛɛnuŋ a ndu. A mɛɛ Chɛhowa dimi yɛ, mbo faŋa num wolɔɔla lusulɛilaŋ o lebol nduyɛ mbo kɛsi laŋ landaŋ a num. A chi lɛ laŋ pɛɛŋ te.” Te wana nyaanuŋ ndo ndoo wa pɛ o chiee viaŋnaŋndo niŋ, ndoo nɔ lɛ isiooŋ maa wana miŋgiaa maa cho hunɔɔ ndu diyɔɔ le. Lende koni, te Chɛhowa mal naa pɛ haki, ŋ nɔ miŋ yɔŋ isiooŋ maa o cho vɛlɛ suɛi keŋ buusiaa nduyɛ mbo sila naa le ndi le.—Nuawɔ Sam 103:​8-12.

15, 16. Vɛɛ sala baŋaa Chiisoo a sinaa maa ndu cho Masa Wanaa Soliaa Lasala naa ni kindi yɛ tiindaŋ numndo o nyiɛɛyii Mɛlɛkɛi niŋ?

¹⁵ Ŋ nɔ sabulaŋ tau le tiindaŋndo dɔwɔɔ o nyiɛɛyii Chɛhowɛi niŋ mbo hiau pɛɛŋ Isɔluɛiya. Mi Pɔɔl dimi maa o cho o “nyɛ palaa” niŋ kanifuule, ndoo tiuba Chɛhowa diikɔŋndo o sɔɔŋ niŋ kpou le. Kɛ mbo dimi aa, ‘Mɛlɛka ndu cho ndu soli leniŋ o sabu Masanɔ naa Chiisu Kilitioo niŋ ni. Nduyɛ o mel Mɛlɛka balika tau le keŋ.’ (Luomaŋnda 7:​25) Yɛɛ ndoo yiyaŋ yɛ? Mi che bɛɛ Pɔɔl wa yeemaŋ ndɔŋ hakioŋ chɔulabaa, nduyɛ mbo tosa hakioo paandu, kɛ mbo siŋgaŋ. Lelaŋ, ndoo nɔ tiindaŋndo maa Chɛhowa mal ndu haki o sala baŋaa Chiisoo niŋ. Le mɛɛ Chiisu baŋa naa yɛ, ŋ nɔla miŋ sɔla kɔl iyama walaŋndo, a kɔl nyulu kpeekpeiyo. (Hibuluiya 9:​13, 14) Maa Masa Wanaa Soliaa Lasala naa, “pɛŋgu o pɛŋgu [Chiisu] nɔla mbo piŋi wanaa huŋ naa Mɛlɛka chua sanaa o ndu niŋ nda. Kani fuule, haaa mbo wa yoomu le fɛɛŋ a fɛɛŋ, o cho suɛi le naa o Mɛlɛka lo.” (Hibuluiya 7:​24, 25) O sindɔɔ niŋ, mi masa wanaa soliaa lasalaa ndoo mala Isɔluɛiya le tiindaŋndo nɔɔ maa Chɛhowa nɔla mbo mal hakila ndalaŋ. Le mɛɛ Chiisu cho Masa Wanaa Soliaa Lasala naa yɛ, ŋ nɔ saboo le tiindaŋndo chɔɔloo nɔɔ maa “o nɔla mbo tuiinuŋ naa inyiɛɛ mbo tosal naa kɛndɛi nduɛi nduyɛ, mbo mala naa boondii naŋ yeema malaa ve.”—Hibuluiya 4:​15, 16.

¹⁶ Le Chɛhowa siiŋgoo naa viaŋnaŋnda, ŋ nɔ miŋ dɔu tiindaŋndo o sala Chiisoo niŋ. Yiyaŋ naa maa le waŋnda koni le sala baŋaa cho le. Nɔ tiindaŋndo maa a cho niŋ tɔnɔɔ sɔlaa o sala baŋaa niŋ. (Kɔliŋtiaŋ Diiŋ Ndɔɔ 5:​15) Nɔ tiindaŋndo maa Chɛhowa nɔla mbo soliŋ sala baŋaa kpeku, le num malɔɔ haki. Nɔ tiindaŋndo maa sala baŋaa ke num tiindaŋndo le yoomu fafɛɛŋndo sɔlaa. Sala Chiisoo cho ke Chɛhowa ke numndo ni!

17. Le yɛɛ ŋ yeema yɛ Chɛhowa siiŋgoo naa viaŋnaŋnda?

¹⁷ Chieeŋ viaŋnaŋndoŋ mala naa le sinapɛŋgoo sɔlaa a nyiɛɛyii Chɛhowɛi okɔɔ. Kɛɛsiaa Mɛlɛkaa hoo pɛɛku naa maa nyɛ sɔviɔɔ pila yoomoo cho ni. Ŋ pɛɛku vɛlɛ mɛɛ bɛnduaa mala naa yɛ, nyɛ o sim kɛsɛ le haki naa malɔɔ wo, nduyɛ a tiindaŋ naŋ nɔ maa Chɛhowa mal naa haki fasɛi yo. A cho pa Chɛhowa siiŋgoo naa viaŋnaŋnda? Fondaŋ sɔvɛ cho le waa loŋ mbo hiau hoo le! (Sam 91:​1, 2) O buŋgɛi cho lachi ve niŋ, ŋ cho chɔ mɛɛ chieeŋ viaŋnaŋndoŋ mala naa le taamasi Chɛhowaa tolɔɔ kɔɔli yɛ, wana taamasi bɛndoo le sakpoyɛi a nyiɛɛye.