Hiou Lachi a Kaalaa Chɔmndo, O Luei Acheleŋnda Yoomuaŋ

1. A suɛi sɔvɛ kuɛɛ okɔɔ Chiisu soo yɛ nda buɛiyaa nduaa o nyumma ndɔ ma mɛɛlaŋ choo?

O NYUMMA ndɔ ma mɛɛlaŋ choo nda buɛiyaa nduaa tuupa mbo sɔla piɔmndo, mi Chiisu suaa a kaalaa okɔɔ le bɛmbɔɔ 30. Mbo dimul buɛiyaa nduaa maa a nɔ ma “kaaliaŋ vellaa velle.” (Chɔŋ 15:​12, 17) Kaala ndaa ndoo nɔ mbo wa teŋgeŋ, okoŋ mi acheleŋnda ndaa che, nduyɛ ma sina maa nda wa buɛiyaa Kilitiaa kpeekpei ni. (Chɔŋ 13:​34, 35) Kaala Chiisu wa suɛi a ndu okɔɔ wo, o ve kaala kɔl choo le, kɛ kaala sala soliaŋndo. Mi Chiisu dimi aa, “Kaala o kaala hiu lɛ hoo le, o waŋndo kaala ndiaamɔɔwaa nduaa, okoŋ kɔɔli mbo sɔla piɔmndo le nda wo. Te la tosa nyɛ ya l dimul nya wo pɛ, mɛɛ ndiaamɔɔwaa niaa nya cho ni.”—Chɔŋ 15:​13, 14.

2. (a) A yɛɛ waŋnda sina yɛ hau buɛiyaa Mɛlɛkaa? (b) Nyunala kuɛɛ naŋ cho yɛ muli o buŋgɛi hei niŋ?

² Waŋnda sina hau buɛiyaa Chɛhowaa le kaala sala soliaŋ nda nɔ wo, vɛlɛ a diompilɛ kpeekpei cho nda tɛɛŋndo. (Chɔŋ Tasoo 3:​10, 11) Lɛŋnde naŋ fula leŋ ɔɔ kaale naaleŋ, suɛi maŋgalɛi naŋ dimi ve, ba o ba naŋ fula ɔɔ mɛɛ mɛɛ nda manda naa, ve bahawɛi le naa le. Chieeŋndo balɔɔ silɔ, buɛiyaa Chɛhowaa nɔ kaala kpeekpeiyo ndapila tɛɛŋ. Le yɛɛ kaalaa yeemaŋ yɛ hau? Vɛɛ Chɛhowa nda Chiisu luei yɛ naa yoomuaŋ a kaalaa? Vɛɛ naŋ chɔm yɛ kaalaa hoo le acheleŋnda dɛɛniaa vɛlɛ a nda yoomuaŋ lueiyo?—Kɔliŋtiaŋ Tasoo 8:​1.

LE YƐƐ KAALAA YEEMAŊ YƐ SUŊ SUŊ?

3. Vɛɛ teleŋ “nyɛ palaa” naŋ cho hoo niŋndo piiliaŋ yɛ waŋnda?

³ Ŋ cho o teleŋ “nyɛ palaa” niŋ, nduyɛ yoomoo cho o piaa cha a “saŋga bɛndoo . . . nduyɛ a kɔl tambɛi bɛndoo.” (Timoti Diiŋ Ndɔɔ 3:​1-5; Sam 90:​10) Wanaa bɔɔbɔɔ cho hau hiuwo saŋgaa nduyɛ ma saŋga pɛɛŋ a waa achal. Wɔsi o wɔsi, waŋnda hiouwɔɔ 800,000 o kpɛkpɛla 40 kɛ kɛ bɛŋgu, diinuŋ ndapila ni. O cho bɔɔ suɛi imɔnɔ le sinaa maa mi puaapiliaa naa apum nɔ yiyaŋ waa naa, nduyɛ apum diinuŋ niŋ ndapila.

4. Nɛɛ yaa o Baabuiyo niŋ ndaa yeema yɛ piɔmndo a teleŋ pum?

⁴ O sindɔɔ niŋ, mi buɛiyaa Mɛlɛkaa apum bɛɛ ma hiu kɔllo tambei a bahawɛila wa nda choo laŋ, nduyɛ ma yeema pɛɛŋ le ma sɔla piɔmndo. Le taamaseliiyo, o nyɛ nɛiyaa suu waa naa niŋ Choobu wa ni mbo dimi aa, “Piɔmndo ndu ya I hiau yeema a waa yoomu mi dialluŋ nuŋ ŋ wa o saŋga waa nuaa niŋ.” (Choobu 7:​15; 14:​13) Mɛɛ Chona tambu kɔl tei mbo dimi aa, “Lelaŋ chua yoomu nuu Mɛlɛka Yaawɛɛ. O wa o kɛndɛ mi vi, mbo hiau a waa yoomu.” (Chona 4:​3) Mi wana ndoo suaa le Mɛlɛka wo Ilaacha yiyaŋ maa ndoo nɔ lɛ tiindaŋ te, okoŋ mbo dimi aa, “Oo Mɛlɛka Yaawɛɛ, I tosa niŋ o bɔɔ, o bɛnda niŋ ma chua yoomu nuu.” (Masaa Bɛnduaa Tasiaa 19:​4) Chɛhowa ndoo kaala buɛiyaa nduaa chɔm kaŋ lo lechoo wo wa, nduyɛ ndoo yeema mi ndaa wa yoomu. O pɛɛsa mɛɛ ndaa yiyaŋ yɛ le. Kɛ mbo mala nda ma sɔla vɛlɛ yeemɛi le waa yoomu, nduyɛ ma hiau lachi a ndu piɛiyo o laalaŋndo choo.

5. Le yɛɛ kpeekpei puaapiliaa a ndepiliaa naa yeema yɛ kaala naa suŋ suŋ?

⁵ Hau, puaapiliaa a ndepiliaa naa bɔɔbɔɔ cho o bahawɛila kala kalaŋ bɛŋgu, nduyɛ a yeema miŋ chɔm nda kaalaa. Apum, waŋnda cho nda mamɔɔ ɔɔ nyɛpalaa tusioo choo. Apum yɛ, ma luei nda siooŋnde ɔɔ ma wa nda choŋgulaŋ o fondaŋ nda wallo. Ɔɔ apum wa a saŋgɛi yɔkɔɔ kanifuule, ma chua hawɛilaŋ tau le kɔlaŋ o wallo niŋ ɔɔ ma nɔ walta kala kalalaŋ le tosaa. A koŋ kpou, apum nɔ bahawɛila kala kalalaŋ o yuŋgoo niŋ. Naapum a cho o nɔɔ niŋ a wana cho Chɛhowa piɛi le wo, nduyɛ mbo wa nda pɛɛsaa teleŋ o teleŋ. Le sɔɔŋ muŋ vɛlɛ a nyɛm kindilaŋ cheleŋ, mi a bɔɔbɔɔ yiyaŋ maa a nɔ lɛ mayoomu le, nduyɛ pɛɛŋ ma kandu kiisaŋndo te a cho pɛ a sɔvɛ. O nɛɛnɛ nɔ yɛ mbo mala nda?

KAALA CHƐHOWAA LUEI NAA YOOMUAŊ

6. Vɛɛ kaala Chɛhowaa luei yɛ buɛiyaa nduaa yoomuaŋ?

⁶ Chɛhowa ke buɛiyaa nduaa tiindaŋndo maa o nɔ kaalaa le nda suŋ suŋ nduyɛ o cho nda kaala lefafɛɛŋ. Yiyaŋndɔ mɛɛ kɔllo wa Isɔluɛiya yɛ a nyɛ Chɛhowa dimul nda wo aa, “La cho wanaa kpeekpei ya o hɔl, I nɔ bɛɛleŋ le nya, nduyɛ mi kaala nya.” Mbo dimi vɛlɛ aa, “La yɔŋ isiooŋ te, fondole, l cho a nya latulu.” (Aisaya 43:​4, 5) Ŋ sina maa naa kpou cho a sɔvɛ Chɛhowa o hɔl.a (Tofa tɛɛsiaa amatou.) Baabuiyo mɛi lediom aa, “Ndu cho kuubanɔ ke waŋnda kpaayaa ma yem ndo ni. O cho wa a nyaaloo a kɔl kɛndɔɔ le nya.”—Sɛfanaya 3:​16, 17.

7. Vɛɛ kaala Chɛhowaa cho yɛ maa kala chua cho wɛsioo wo? (Tofa fotueiyo o peele naŋ kandu leŋ choo.)

⁷ Chɛhowa mɛi lediom maa o cho wanaa nduaa yoomuaŋ luei nduyɛ mbo ke nda kɔl dɛɛniaa mɛɛ mɛɛ bahawɛilaŋ la wa nda choo. Mbo dimi aa, “Mɛɛ kala chuaa o bii naa chua ndɔɔ, wɛsioo ndu, mbo bii ndu o choŋgu, te koŋ te, o kɛsiŋ ndu o bɛŋgu yɛ, lende ya I bii niŋ nya ni. Mɛɛ kala chuaa o dɛɛniaa nuaa chɛlɛkpɛ ndɔɔ yɛ, lende ya I dɛɛniaa niŋ nya ni.” (Aisaya 66:​12, 13) Yiyaŋndɔ mɛɛ chɛlɛkpɔɔ sinaŋ nyɛkɛndɛi yɛ te kala ndɔ bii ndu pɛ ɔɔ mbo wa pisultaŋ a ndu! Chɛhowa nɔ kaala yiŋgoloŋndo le num, nduyɛ o yeema num ma wanuŋ hɛnɛkɛ. Fɛɛŋ bɛɛ kiisaŋ ko a cho wana sɔvɛ bɛndu Chɛhowa o hɔl te.—Chɛluimaya 31:​3.

8, 9. Vɛɛ Kaala Chiisoo luei yɛ naa yoomuaŋ?

⁸ Sabu cheleŋ chɔm maa Chɛhowa kaala naa wo cho hoo ni. “Mɛlɛka kaala waŋnda chieeya. O koŋ, mbo yɔŋgu Po ndɔ pilɔɔ kpe le nda, maa wana o wana dɔu tiindaŋ ndɔɔ o Po ndɔ pilɔɔ hoo niŋ pɛ, wana koŋ o vi lɛ le. Yoomu kpeekpeiyo o nɔ lamɛɛlu le wo, ndu o sɔla ni.” (Chɔŋ 3:​16) Sala soliaŋ Chiisoo chɔm maa ndu bɛɛ kaala naa nduyɛ kaalaa hoo luei naa yoomuaŋ. Baabuiyo dimi maa ‘kpundɔɔ ɔɔ dɛnɛ palaa,’ nɔla naa “faŋa o kaala Kilitioo bɛŋgu le.”—Luomaŋnda 8:​35, 38, 39.

⁹ Lepum, miŋ nɔ bahawɛilaŋ nduyɛ mi la dii naa dialloŋ ɔɔ mi la dɔɔniaa nyaale naa o Chɛhowa piɛiyo niŋ. Kɛ loonɔŋndo a kaala bɛndu Kiliti nɔ le naa wo, luei naa yoomuaŋ le miŋ biunuŋ. (Nuawɔ Kɔliŋtiaŋ Diiŋ Ndɔɔ 5:​14, 15.) Kaala Chiisoo ke naa yeemɛi le hiouwɔɔ lachi a waa yoomu vɛlɛ a Chɛhowa piɛiyo. Kaalaa hoo mala naa ŋ vi ŋdial te o yɔŋ bɛɛ mi kpundɔɔ, nyɛ kindilaa, kɔl tambɛiyo ɔɔ buulaŋndo komal naa.

PUAAPILIAA NAA YEEMA MIŊ CHƆM NDA KAALAA

10, 11. Nɛɛ nɔ yɛ kalaŋndo le puaapiliaa a ndepiliaa cho a kɔlta tambɛilaŋ nda dɛɛniaa?

¹⁰ Chɛhowa soliŋ vɛlɛ kunda leKilisiɔŋndo kpeku le naa malaa a kaala ndɔɔ. Te ŋ kaala puaapiliaa a ndepiliaa naa pɛ, mɛɛ kaala naŋ nɔ le Chɛhowa wo naŋ cho koŋ chɔmndo ni. Ŋ nɔ miŋ tosa nyɛ o nyɛ le miŋ mala puaapiliaa naa le ma sina maa a cho a sɔvɛ nduyɛ maa Chɛhowa kaala nda. (Chɔŋ Tasoo 4:​19-21) Mi kiilanɔɔ Pɔɔl poonyiaa aa, “La wa kɔltaŋ dɛɛniaŋndo vellaa velle. Nduyɛ la wa maaliaŋndo vellaa velle le dialuŋ kalaŋ sɔlaa mɛɛ nya cho nuaa tosaa yɛ.” (Tɛsaloniaŋ Tasoo 5:​11) O cho ko bɛnduaa kundaa le nɔ ma tosa hei le. Naa kɛ kɛ nɔ miŋ tol taamasi Chɛhowa nda Chiisu wo kɔɔli le puaapiliaa a ndepiliaa naa dɛɛniaa.—Nuawɔ Luomaŋnda 15:​1, 2.

¹¹ Apum o kundaa niŋ cho saŋgaa kanifuule, a cho a kɔl tambɛi bɛndoo ɔɔ buulaŋndo. Nduyɛ naapum a nɔ ma che wana chiɔuwaa le bahawɛiyo hoo. (Luku 5:​31) Bɛnduaa vɛlɛ a acheleŋnda o kundaa niŋ sina maa nda cho wanaa chiɔuwaa sɔla pɛɛkoo wa le, kɛ mala nda ke waŋndo wo vɛlɛ a kɔl dɛɛniaa nda yɔŋgu wo cho bɔɔ suɛi sɔvɛ. Wana o wana cho o kundaa niŋ nɔ mbo ‘dɛɛniaa wanaa cho a kɔlta tambɛilaŋ nda. Nduyɛ mbo mala wanaa nɔ dialluŋ kala o tiindaŋ ndaa o Mɛlɛka niŋ te wa. Mbo nɔ kɔl biuwaŋndo a wana o wana fee.’ (Tɛsaloniaŋ Tasoo 5:​14) Ŋ yeema miŋ kindiŋ le yiyaŋnda puaapiliaa naa biyɔɔ bila. Ŋ nɔ miŋ wa wanaa biuwaŋ, nduyɛ miŋ dɛɛniaa nda kɔltaŋ te a tambu pɛ kɔl. Baa a kindiŋ pa le acheleŋnda yoomuaŋ lueiyo? Yɛɛ ŋ nɔ yɛ ma tosa le waŋnda chɔɔloo kɔltaŋ dɛɛniaa?

12. Chɔmndɔ taamaseliiyo a mɛɛ waŋndo sɔla kɔl dɛɛniaa a kaala kunda ndɔɔ chɔm ndu wo.

¹² Mi ndepilɛnɔ pilɛ o Yulopi niŋ dimi aa, “Lepum mi wa yiyaŋndo le diinɔŋndo, kɛ I nɔ wanaa malaa kɛndiaa. Kunda ya cho niŋndo piŋi niŋ yoomu nuu. Puaapiliaa a ndepiliaa cho ya kaalaa chɔmndo lɔɔlɔɔ vɛlɛ a ya dɛɛniaa. Mi che bɛɛ waŋnda nyɛɛmbɔ koni sina ni maa I cho a kɔl tambɛi bɛndoo, kɛ kundaa cho ya malaa lɔɔlɔɔ. Pɔnɔɔ a lanɔ pilɛ o kundaa niŋ chua ya ko maa chua nda. A cho ya biyɔɔ nyɛkɛndɛi nduyɛ le teleŋ o teleŋ a cho ya malaa.” I cho tonya maa o cho wana o wana le nɔla mbo yɔŋgu mala o nɛi pilɔɔ niŋ te. Kɛ naa kpou tiuba miŋ tosa tau le puaapiliaa a ndepiliaa naa malaa.b (Tofa tɛɛsiaa amatou.)

MƐƐ NAŊ LUEI ACHELEŊNDA YOOMUAŊ A KAALAA YƐ

13. Yɛɛ naŋ nɔ yɛ miŋ tosa le acheleŋnda kɔltaŋ dɛɛniaa?

¹³ Wa wana nila yaŋaa kɛndɛ. (Chemisi 1:​19) Ŋ chɔm kaalaa te ŋ nɔ pɛ nyiɛɛye nduyɛ miŋ yaŋ nilaŋ nyɛkɛndɛi. Nyuna nyunala mala num le ma sina yiyaŋ puaapilɛnɔ numndo wo. Puaapilɛnɔ numndo tiuba mbo sina maa a buulaŋ kpeekpei a ndu, a mɛɛ o cho num chɔ o lahɔl lɛ. Te o wa pɛ suɛi o numndo, biunuŋ nduyɛ ma mal ndu mbo soo nyɛ o nyɛ cho ndu o kɔl. Kialu ndu suɛi o sondo le. Te a wa pɛ wana yaŋ nilaŋ nyɛkɛndɛiyo, a tiuba ma bii ndu bila nyɛkɛndɛi, nduyɛ koŋ mala ndu mbo laalaŋ a num. Mi hei tosa ndi tɛtɛlɛ le mbo yaŋ nilaŋ o nyɛ ŋ nɔ le dimioo wo, a mɛɛ ŋ cho kindiŋndo le ndu malaa yɛ. Te acheleŋnda sina pɛ maa a buulaŋ kpeekpei a nda, a nɔla ma wa wana dɛɛniaa kɛndɛ le nda.

14. Le yɛɛ naŋ nɔ yɛ miŋ pɛŋgi yiyaŋ wɔɔŋndo nɔɔ?

¹⁴ Pɛŋgi yiyaŋ wɔɔŋndo nɔɔ. Te wana cho a kɔl tambɛiyo wo sina pɛ maa ŋ nɔ yiyaŋ wɔɔŋndo a ndu, koŋ tosa mbo hiu kɔllo tambu. Nduyɛ o wa ikala le miŋ mala ndu. “Diomnda wɔɔŋndaŋ dimioo, la yɔŋul waŋndo, nua wɔ ko mɛɛ nda lɔwa nuaa waŋndo a muɛi faŋnde yɛ. Kɛ diomnda kɔl kalula fula waŋndo o sondo laŋ ndaŋ, siŋgioo la siŋgi waŋndo ni.” (Pulɔwaa 12:​18) Mi che bɛɛ o ve yiyaŋ naa le wana cho a kɔl tambɛiyo wo suɛi wɔɔŋnde dimul te, kɛ miŋ chɔɔlu ndu kɔllo tɛɛmbuu te ŋ yiyaŋ fɛlɛŋ tuupa miŋ soo le. Le miŋ dɛɛniaa puaapilɛnɔ naa, ŋ nɔ miŋ mala ndu mbo sina maa ŋ cho kindiŋndo kpeekpei le miŋ bii bahawɛi ndɔɔ bila.—Maatiu 7:​12.

15. Nyɛm wali sɔvɛŋ kuɛɛ mala yɛ naa le acheleŋnda kɔltaŋ dɛɛniaa?

¹⁵ Soliŋ Diom Mɛlɛkaa kpeku le acheleŋnda kɔltaŋ dɛɛniaa. (Nuawɔ Luomaŋnda 15:​4, 5.) “Mɛlɛka, o ke wana kɔl biuwaŋndo wo, nduyɛ mbo dɛɛniaa waŋnda kɔltaŋ ndo” o ba Baabuiyo fula ni. Lelaŋ, kaamaa nɔ mbo bii naa le te ŋ saaluŋ pɛ sɔɔŋ kɔl dɛɛniaŋ o Diom ndɔɔ niŋ. Ŋ nɔ vɛlɛ “Watch Tower Publications Index” a Yau Yaasiaa ŋSɔɔ Seiyaa Chɛhowaa. Te ŋ soliŋ pɛ nyɛm walloŋ muŋ kpeku, ŋ tiuba miŋ saaluŋ bolii Baabuiye a yaula naŋ soliŋ kpeku le puaapiliaa a ndepiliaa naa kɔltaŋ dɛɛniaa wo.

16. Suliŋnda kuɛɛ mala yɛ naa le wana cho a kɔl tambɛiyo wo dɛɛniaa?

¹⁶ Chɔm buulaŋndo nduyɛ ma wa wana ikɛndɛ. Chɛhowa cho “Finya naa o tuiinuŋ naa inyiɛɛ wo ni. . . . Ndu cho Mɛlɛka o nyɔɔlu naa kɔltaŋ niŋ ndo ni.” Nduyɛ o cho “Mɛlɛka inyiɛɛ bɛndu bɛndu” le buɛiyaa nduaa. (Nuawɔ Kɔliŋtiaŋ Diiŋ Ndɔɔ 1:​3-6; Luku 1:​78; Luomaŋnda 15:​13, NW) Mi Pɔɔl kɛsi taamasi kɛndɔɔ o hei niŋ kanifuule, mbo tual taamasi Chɛhowaa kɔɔli. Mbo dimi aa, “Ŋ chɛl mi ŋ siiluu nya wolɔɔ o wolɔɔ lusulɛi le. Mi ŋ bii nya o kɛndɛ kɛndɛ mɛɛ kala chuaa bii chua ndɔɔ yɛ. Nduyɛ, le kaala naa ŋ kaala nya wo, o ve ko Yooŋgu Kɛndɛ Mɛlɛkaa le naa ŋ ke nya le. Yoomula naalaŋ bɛɛ ŋ wa a bɛɛndiaŋ le yɔŋgoo le nya. Kani fondole, ŋ kaala nya tau tau.” (Tɛsaloniaŋ Tasoo 2:​7, 8) Te ŋ chɔm pɛ buulaŋndo maa Chɛhowa, ŋ tiuba miŋ ke puaapilɛnɔɔ kɔl dɛɛniaa o cho Mɛlɛka piɛiyo le ndu wo!

17. Vɛɛ sinaa nyɛ puaapiliaa naa tiuba le tosaa wo mala yɛ naa le nda kɔltaŋ dɛɛniaa?

¹⁷ Wa kɔl maa puaapiliaa numnda tosa biondɔŋ te le. Sina nyɛ chaaŋ num tiuba le tosaa wo. Te a wa pɛ kɔl maa puaapiliaa numnda tosa biondɔŋ te, mɛɛ a cho mɛɛlu kɔl tambu. (Ikilisiaatii 7:​21, 22) Loonuŋ maa Chɛhowa ndu sina nyɛ naŋ tiuba le tosaa wo. Lelaŋ, ŋ nɔ miŋ biuwaŋ vellaa velle. (Ɛfisiaŋnda 4:​2, 32) Yɔŋi naŋ ke puaapiliaa naa yiyaŋndo maa a cho tosa tau o wali Chɛhowaa niŋ te, ɔɔ miŋ tuu nda a wanaa cheleŋnda, ŋ dɛɛniaa nda kɔltaŋ nduyɛ miŋ chɔm nda sɔɔŋ kɛndɛŋ nda cho tosaa woŋ. Hei mala nda le ma wa a kɔl kɛndɛ o Chɛhowa piɛiyo niŋ.—Kaleesiaŋnda 6:​4.

18. Le yɛɛ naŋ nɔ yɛ miŋ luei acheleŋnda yoomuaŋ a kaalaa?

¹⁸ Wana o wana cho Chɛhowa piɛiyo cho o sɔvɛ ndu o hɔl vɛlɛ a Chiisu. (Kaleesiaŋnda 2:​20, NW) Ŋ nɔ kaalaa tau le puaapiliaa a ndepiliaa naa. Lelaŋ, ŋ nɔ miŋ bii nda nyɛkɛndɛi. Miŋ kindiŋ le tosaa ‘sɔɔŋ huŋ a kɔl nyuloo, nduyɛ miŋ luei chaaŋaa naa kpaayaa’ woŋ. (Luomaŋnda 14:​19) Nuawɔ se yoomu naŋ cho lehɔl o Kpele Hɛnɛkiɔɔ niŋndo, a boondii wana o wana ve lɛ niŋ a kɔl tambɛi le wo! Naalaŋ a chɔulaŋ la cho lɛ wa le. Waŋnda cho lɛ wa piɔm sɔla le hakioo le. Nduyɛ nyɛpalaa, bahawɛila yuŋgoo, ɔɔ kɔlta tambɛilaŋ o yoomoo niŋ la cho lɛ wa le. O mɛɛlula wɔsila waa pilɛ laŋ, waŋchieeya kpou cho wa wanaa sandaa. Wanaa cho lo o tiindaŋ ndaa choo haaa a tofa mɛɛlaa wa, cho hunɔɔ simnɔŋ chuauwaa Mɛlɛkaa, nduyɛ a sɔla niŋ “naŋɔɔ mɛɛ i yɔŋnuŋ a chuauwaa Mɛlɛkaa yɛ.” (Luomaŋnda 8:​21) Lelaŋ, la ŋ chɔmnuŋ kaala luei acheleŋnda yoomuaŋ ndo, nduyɛ miŋ maaliaŋ vellaa velle, le miŋ tiuba le luɛiyɔɔ o chieeŋ sɛnɛi Mɛlɛkaa niŋ.