Nyɛsɔlaa Nda Cho Pisioo le Chɔuwo wo Cho o Biiliɔŋndaŋ o Biiliɔŋndaŋ Niŋ—Vɛɛ Nyɛsɔlaa Hoo Cho yɛ Bolle Pilɛ?

Nyɛsɔlaa pisiŋ niŋ le chɔulaŋ ndo cho bɔɔ.

• “Nyɛsɔlaa pisiŋ niŋ le nyɛm chɔuwoŋ chieeŋndo balɔɔ silɔ wo, cho le kaniŋ mapuuluŋ biiliɔŋndaŋ o biiliɔŋndaŋ niŋ ($2.2).”—The Washington Post, Doŋdoŋndo 13, 2024.

O cho ko nyɛsɔlaa le nda pisi le, kɛ nyɛm cheleŋ cho vɛlɛ o nyɛsɔlaa kɔɔli. Ŋ tofaŋndɔ tamaseliiyo: Chɔuwo Yukileŋ.

• Sovɛiya. Konaa dimi maa, naapum sovɛiya 500,000 nda dii ɔɔ yɔŋuluŋ o chɔuwo hoo ni o wɔsila tiɔɔŋnda hiou laŋ niŋ, chɔŋ a teleŋ chɔuwo hoo kanduŋndo.

• Wanaa Kue o Chɔu le Wa. A mɛɛ kɔɔna chieeŋndo dimi yɛ (UN) waŋnda hiouwɔɔ 28,000 nda dii ɔɔ yɔŋuluŋ o chɔuwo hoo ni. Mi wana bɛndoo pilɛ le kɔɔna hoo UN dimi aa: “O kpeekpei niŋ, te chɔuwo hoo hiou pɛ lachi, wana nɔla niŋ ma sina mɛɛ wanaa kue o chɔu le wa sɔla niŋ piɔmndo yɛ le.”a

Le mɛɛ chɔulaŋ a sɔŋgɔlaŋ la cho hiouwɔɔ lachi chieeŋndo balɔɔ silɔ yɛ cho tosaa ni, mi waŋchieeya wa saŋgaa tau.

• Chɔŋ a Tapioo wɔsi 2023 wanaa mal niŋ fondaŋ nda ndalaŋ chieeŋndo balɔɔ silɔ wa cho niŋ le miiliɔŋndaŋ 114.

• Wanaa yima bɛnduaŋ ma cho saaŋgiaa wa cho niŋ le miiliɔŋndaŋ 783 . “O nyɛm cho tosaa mi yima bɛnduaŋ ma wa woŋ tɛɛŋ, niilu latandaa cho nyɔɔ pilɛ o hiou wo. Te ŋ chɔm pɛ waŋ 100, o nda tɛɛŋ waŋ 70 cho saŋgaa a yiaŋ o lɛŋii chɔulaŋ a niilu latandaa cho ve niŋ ni.”—Kɔɔna Cho le Nyɛdiaa Piɔuwo Wo

Baa chɔulaŋ la chuu niŋ pa? Tiindaŋ yɛɛ naŋ nɔ yɛ le kɔl nyuloo? Baa teleŋ cho pa fuuluu mi lɛŋndeŋ le soli komɔɔla kɛndɛ kɛndɛlaŋ okoŋ mi yiaŋ a nyɛsɔlaa lepɛŋndo chuu? Yɛɛ Baabuiyo dimi yɛ?

Teleŋ la chɔuwo

Mi Baabuiyo dimi huului maa chɔulaŋ la cho wa ba o ba fee o chieeŋndo choo, a mɛɛ i cho i dimiaŋ a wanaa cho ichali o soo yau sɔɔŋ Chɔɔmaŋndoŋ soo a ndu okɔɔ wo yɛ.

• “Okoŋ, mi so cheleŋ fula. O wa o siaŋa yɔɔ maa leyiŋ. Mi dioo keŋnuŋ wana wa ichali lechoo wo le kɔl nyuloo faŋaa o chieeŋndo choo bau, le halikpeŋ mi waŋchieeya diuwaŋ vellaa velle. Nduyɛ ma ke ndu muɛi faŋii bɛnduei.”—Sɔɔŋ Chɔɔmaŋndoŋ 6:​4.

Mɛɛ wana wa ichali o soo hoo cho wo hiou, mi so waa ŋiɔɔŋ cheleŋ fulu. Nduyɛ a sim lewundu le yima bɛnduaŋ vɛlɛ a piɔmndo, kanifuule mi yiaŋ ma tosa mi waŋndo vi. (Sɔɔŋ Chɔɔmaŋndoŋ 6:​5-8) Le chɔɔloo sinaa a huuluŋ Baabuiyoŋ okɔɔ, nduyɛ a le sabu naŋ nɔ miŋ laalaŋ maa ŋ cho peelɔŋ o palɛi nɛi hei niŋndo, veelu diomndaŋ o suɛi lebolle hei bɛŋgu “Suaa Hiɔɔluaa Yau Sɔɔŋ Chɔɔmaŋndoŋ Soo a Nda Okɔɔ Wa—Yɛɛ Nda Sim yɛ Lewundu?”

Kɔl nyuloo o Chilaŋ niŋ

O chilaŋ niŋ, waŋnda soliŋ lɛ niŋ nyɛm cho o chieeŋndo choo woŋ kpeku le chɔuwo le. Nduyɛ o cho wana chiee le cho hei tosa le. Nyɛ Baabuiyo dimi wo:

• Mɛlɛka cho tosa mi “chɔulaŋ la chuu ba o ba fee o chieeŋndo choo”—Sam 46:​9.

• Mɛlɛka cho kpundɛla chɔulaŋ la cho hau mɛlioo laŋ chii. “O cho nda mamɛmɛ o mamɛmɛ wɔɔsuu o hɔl fo. Piɔm ve lɛ niŋ te, chaŋ ve lɛ niŋ te, kɔl tambɛi ve lɛ niŋ te, kɛlɛŋgaa mi nyɛ nɛiyaa wa, kanifuule nyɛ o nyɛ paandu chuu faŋaŋ.”—Sɔɔŋ Chɔɔmaŋndoŋ 21:​4.

• Mɛlɛka cho tosa mi kɔl nyulu fafɛɛŋndo wa le wana o wana. “Mɛlɛka wanaa nduaa a wanuŋ niŋ o fondaŋnda kɔl nyulula bɛndulaŋ, nduyɛ mi wana o wana o waŋnuŋ o ndulo chiɛi niŋ o ba ndɔɔ choo yɛlɛkɛlɛɛ, nduyɛ mbo wanuŋ o pɛŋgioo niŋ.”—Aisaya 32:​18.

A mɛɛ huuluŋ Baabuiyoŋ chɔm yɛ, chɔulaŋ vɛlɛ a sɔɔŋ naŋ cho hau chɔɔ woŋ chɔm maa teleŋ kɔl nyuloo cho niŋ kpɛɛluŋ.

Vɛɛ Mɛlɛka huŋ yɛ niŋ a kɔl nyulu waa nuaa o chilaŋ niŋ? O cho hei tosa sanaa a Masale ndɔleŋ o choo choo niŋ. (Maatiu 6:​10) Le sinaa yɛɛ cho yɛ Masaleŋ ndeŋ vɛlɛ a nyɛ le sim le numndo, tofa viduei biŋgioo hoo Yɛɛ Cho yɛ Masale Mɛlɛkaleŋ?