Baa Yooŋgu Cho o Baabuiyo Niŋndo Siŋgaŋ Niŋ Pa?
Sako. Te wana tuu Baabuila taselaŋ a laŋ waalioo pɛ, ma che kpendekele maa, mi che bɛɛ a hivi niŋ Baabuiyo teleŋnda bɔɔbɔɔ kɛ yooŋgu cho leniŋndo siŋgaŋ te.
Baa koŋ sim ni maa wanaa hivi Baabuiyo wa tosa biondɔŋ te?
A saaluŋ niŋ Baabuila tasela nda hivi laŋ o waalaŋ niŋ. Nduyɛ teŋgeŋndo nyɛɛmbɔ koni cho Baabuila tasela nda hivi laŋ tɛɛŋ a Baabuilaŋ waalioo ni. Hei chɔm maa, mi wanaa hivi Baabuilaŋ waalioo wa tosa biondɔŋndaŋ. Kɛ teŋgeŋ cho Baabuila taselaŋ tɛɛŋ a laŋ waalioo wo cho tau le, nduyɛ yooŋgu cho leniŋndo siŋgaŋ te. Waŋnda saaluŋ niŋ biondɔŋnda waŋnda tosa o Baabuiyo hivioo niŋndo. Nduyɛ biondɔŋndaŋ lapum, kpɛsɛkɛɛ nda tosalaŋ ni. Tofawɔ taamaseliilaŋ la tiɔɔŋ:
Chɔŋ Tasoo 5:7. O Baabuila paandu laŋ lapum niŋ ma hivi aa: “o choo choo niŋ, Finyaa, Diomndo, a Nyina Kasioo kpou waŋndo pilɛ nda cho ni.” Kɛ Baabuila taselaŋ la chɔm maa diomndaŋ ndaŋ la ve o Baabuiyo niŋ te, nduyɛ maa wanaa hivi Baabuila laŋ nda chɔɔlu diomndaŋ ndaŋ ni.a Le hei, mi wanaa hivi Baabuilaŋ waalioo wa faŋa diomnda la laŋ.
Diola kpeekpeila Mɛlɛkalaŋ la cho o waalaŋ niŋ o Baabuila taselaŋ niŋ. Kɛ mi wanaa bɔɔbɔɔ hivi Baabuiyo wa faŋa laŋ, okoŋ ma miŋgi “Masanɔɔ” ɔɔ “Mɛlɛka.”
Vɛɛ naŋ looku yɛ sina maa biondɔŋnda cheleŋ cho o Baabuiyo niŋ te?
A saaluŋ niŋ Baabuila taselaŋ tau, le hei i cho niŋ tɛtɛlɛ le biondɔŋndaŋ saalɔŋndo.b Te ŋ tuu pɛ Baabuila taselaŋ a laŋ waalioo, tonya kuɛɛ naŋ saaluŋ yɛ?
Mi wana sinaa dɛnɛ pilɛ diolaŋ William H. Green dimi a yaula maHibuluilaŋ okɔɔ aa: “Yau kɛ kɛ hiviŋ ndɔ mbo nɔ tonyaa leniŋ maa laŋ te.”
Mi wana sinaa dɛnɛ pilɛ diolaŋ F. F. Bruce dimi a yaula maKilikiilaŋ okɔɔ aa: “Sɔɔŋ tonyaŋ cho tau a yaula maKilikiilaŋ okɔɔ, mbo hiau yaula cheleŋndaŋ. Nduyɛ wana o wana sɛɛŋgiaa sɔɔŋ muŋ te.”
Mi Sir Frederic Kenyon, wana pilɛ pɛɛku a Baabuiyo okɔɔ tau wo dimi aa: “waa nɔla ma bii Baabuiyo o ba siooŋii ve num te kanifuule, a sina maa sɔɔŋ sɔviɔŋ cho leniŋ ni, mi che bɛɛ o chua niŋ wɔsilaŋ o kɛmɛlaŋ niŋ.”
Sabula cheleŋ kuɛɛ ke yɛ naa tiindaŋndo maa, mi wanaa hivi Baabuiyo wa poonyiaa sɔɔŋ tonyaŋ leniŋ?
Mi Chuuwa a Kilisiɔŋaa poonyiaa Baabuiyo wa chɔm biondɔŋnda wanaa Mɛlɛkaa tosalaŋ.c (Nɔmbaa 20:12; Saamiɛɛ Diiŋ Ndɔɔ 11:2-4; Kaleesiaŋnda 2:11-14) Ma chɔm vɛlɛ maa, mi kaaleŋ Isɔluɛi kɛɛ Mɛlɛka diikɔŋndo, nduyɛ ma tual pɛɛkula lachoowalaŋ kɔɔli. (Hoosiaa 4:2; Malakai 2:8, 9; Maatiu 23:8, 9; Chɔŋ Tasoo 5:21) Sɔɔŋ muŋ chɔm kpendekele maa, wanaa hivi Baabuiyo wa ndaa nɔ bɛɛle yiŋgoloŋndeŋ le Diom Mɛlɛkaa.
Baa i cho suɛi taasi le mi Mɛlɛka o ke waŋnda yooŋgu ndɔɔ wo tosa a sabu le ma poonyiaa sɔɔŋ tonyaŋ te?d (Aisaya 40:8; Pitɛ Tasoo 1:24, 25) Nduyɛ pɛŋ, o cho ko le mi wanaa wa o paandoo niŋnda sɔla tɔnɔɔ le, o tosa ma poonyiaa Baabuiyo le, kɛ le mi naa bɛɛ sɔla tɔnɔɔ leniŋ. (Kɔliŋtiaŋ Tasoo 10:11) Baabuiyo dimi pɛŋ aa: “Nyɛ o nyɛ poonyiaŋ sindɛ o Yau Mɛlɛkaa niŋ, a poonyiaa ndu le naa pɛɛkoo. Nduyɛ, la tosa mi ŋ sɔla kɔl biuwɔŋndo, nduyɛ mi la dɛɛniaa naa kɔltaŋ, o koŋ, mi la tosa mi ŋ wa lehɔl o nɛi.”—Luomaŋnda 15:4.
Mi Chiisu nda buɛiyaa nduaa soliŋ yaula maHibuluilaŋ kpeku, kɛ a dimi naa maa tonya ve leniŋ te le.—Luku 4:16-21; Walta Wanaa Chiisuaa 17:1-3.
a Diomndaŋ ndaŋ la cho o Baabuilaŋ ndaŋ niŋ te. “Codex Sinaiticus,” “Codex Alexandrinus,” “Vatican Manuscript 1209,” “Latin Vulgate,” “Philoxenian-Harclean Syriac Version,” ɔɔ “Syriac Peshitta.”
b Le taamaseliiyo, waŋnda saaluŋ niŋ yaula maKilikiila tasela nda poonyiaalaŋ hiouwɔɔ 5,000.
c Baabuiyo dimi naa maa, wanaa hivi Baabuiyo wa cho walaŋ te. O dimi kpendekele aa: “Wana o wana cho mbo kɛɛ yɔŋ wɔɔŋndo tosa le.”—Masaa Bɛnduaa Tasiaa 8:46-48.
d Baabuiyo dimi naa maa, Mɛlɛka wa suɛi mi waŋnda wa poonyiaa le. Kɛ sanaa a nyina ndɔ diandaa o mala nda ni ma poonyiaa yiyaŋnda ndɔlaŋ.—Timoti Diiŋ Ndɔɔ 3:16, 17; Pitɛ Diiŋ Ndɔɔ 1:21.