Diomndo hoo Alifa cho chomul tasoo le chomulta maKilikii laŋ ni, nduyɛ Omeka cho chomul mɛɛlaa le chomulta laŋ ni. Lelaŋ, dimioo hoo “Ya cho Alifa a Omeka ni” chɔm maa, te Chɛhowa kandu pɛ nyɛ tosa, mɛɛ mbo chii ndu tosa kpou. Mɛɛ Chɛhowa toosiaa Adam nda Ifi, mbo dimul nda aa: “La violu chuauwa, mi la kui mi la pɛ cha o lɛŋndeŋ choo, nduyɛ mi lɛŋndeŋ le wa nya o ba bɛŋgu.” (Chɛn. 1:28) O kpeekpei niŋ, dimioo Chɛhowa wa a teleŋ koŋ ni aa, “Alifa.” Mbo chɔm kpendekele maa teleŋ cho fuuluu, mi chuauwaa mamaa Adam nda Ifi wa simnuŋ walaŋ, ma pɛ cha o chieeŋndo choo, vɛlɛ ma siiŋguu lɛŋndeŋ Kpele Hɛnɛkiɔɔ o chilaŋ niŋ. A teleŋ koŋ, i wa niŋ ko maa dimioo Chɛhowa cho ni aa, “Omeka.” Mɛɛ o chii “choo choo, a lɛŋndeŋ, a nyɛ o nyɛ cho leniŋ toosiaa” mbo dimi nyɛ nɔla mbo ke naa tiindaŋndo maa, tuu o nɔ le waŋnda chieeya a le lɛŋndeŋ ndo cho peelɔŋ o paale ŋɔmmɛuleŋ mɛɛlulaŋndo.—Chɛn. 2:​1-3. w23.11 5 ¶13-14

Le mi Isɔluɛiya ndaa chɛŋ Babilɔŋ ma miiŋgu o lɛŋnde ndaleŋ niŋ, naapum paŋgoŋ ŋhiɔɔlu ndaa nɔ ni ma chua. Mi Chɛhowa dimi maa, o cho kpɔkɔsila kuuna niŋ nda miiŋgoo laŋ faaŋiaa nda lachi. Mi Isɔluɛiyaa ndaa nɔ laalaŋndo wa sina maa, te ndaa miiŋgu pɛ o lɛŋnde ndaleŋ niŋ, Chɛhowa wa nda salaa dɔwɔɔ mbo hiou bɛɛ nyɛm nda wa soliŋ sala woŋ. Nduyɛ sala bɛndu ndaa sɔla niŋndo wa a piɛile tonyaleŋ okɔɔ ni. Chiɛi Mɛlɛkaa opilɛ bɛɛ ve Babilɔŋ le Chɛhowa piɛi le. Chuuwa ndaa nɔ bandu luamaa lasala le sala sawa Mɛlɛka ndoo ke Muuse wo lomɔɔ lechoo le. Nduyɛ wanaa soliaa lasala ve a kɔɔnaa le laŋ lomɔɔ le. O faŋaŋ okoŋ kɔɔli, wanaa wa mɛlɛkaa lachoowaa piɛiyo wa, ndaa hiou poloŋ a Chuuwa. Waŋnda haa ndaa nɔ lebɛɛ le Chɛhowa vɛlɛ a sawala ndɔlaŋ te. Le hei, Chuuwaa ndaa nɔ siooŋii Mɛlɛkɛiya wa a yeemɛi kpeekpei, le ma miiŋgu o lɛŋnde ndaleŋ niŋ, okoŋ ma miŋgi piɛile tonyaleŋ pila. w23.05 14-15 ¶3-4

Ŋ yeema mala nyina diandaa Mɛlɛkaa le halikpeŋ miŋ hiou lachi a naapila biyɔɔ maa “chuauwaa nyɛ teŋgaa.” Le yɛɛ? Kanifuule, simullo pila i cho ni le hiouwɔɔ lachi a waa a diandaa o chieeŋ nɔɔlɛiyo hoo niŋ. (1 Tɛsa. 4:​3-5, 7, 8) Mi nyina diandaa mala naa le yiyaŋnda cho o chieeŋndo niŋndaŋ fafaŋndo, mɛɛ yiyaŋnda chɛlaŋ a la Mɛlɛkalaŋ te laŋ la cho nuaa yɛ. Mbo mala naa vɛlɛ “miŋ wa wanaa kɛndɛ o nɛi o nɛi niŋ, miŋ wa wanaa sakpuaa, nduyɛ miŋ kuɛ o nɛi tonyaa choo.” (Ɛfi. 5:9) Nɛiyo opilɛ o naŋ sɔla nyina diandaa wo cho piɛileŋ le ndu ni. Mi Chiisu dimi maa, Chɛhowa “tiuba mbo ke wanaa cho ndu nyunaa wa nyina ndɔ diandaa.” (Luku 11:13) Nduyɛ, te ŋ saŋgala ndu pɛ o bɔŋaŋnda naalaŋ, miŋ sɔla vɛlɛ nyina diandaa. (Ɛfi. 5:​19, 20) Mi kpaaya nyina diandaa nɔ naa choo wo mala naa, miŋ piɛi Mɛlɛka o nɛi o hini kɔllo choo. w24.03 23-24 ¶13-15