Chuuwaa wa fula Babilɔŋ ma miiŋgu o lɛŋnde ndaleŋ niŋnda wa simnɔŋ a diandaa Mɛlɛka ndaa o hɔl. (Ditɔ. 7:6) Kɛ keŋ sim nuaa maa ndaa nɔ lɛ ma siŋgaŋ le ma nɛŋi Chɛhowa kɔl te le. Chuuwa haa a bɔɔbɔɔ o Babilɔŋ niŋ ndaa veluŋ ni. Nduyɛ naapum ndaa dɛli niŋ a sɔɔŋ tosaa, mɛɛ Babiloniaŋnda ndaa tosa yɛ. Mɛɛ Chuuwa haa miiŋgu Isɔluɛi, wɔsiŋ bɔɔbɔɔ okoŋ kɔɔli, mi kɔndɔfillo bii Masa iBuŋgaa Nɛhimaya, mɛɛ o saaluŋ maa chuauwaa Isɔluɛiya apum ndaa chiee suɛi maŋgalɛi Chuuwa ndaa dimi ve le. (Ditɔ. 6:​6, 7; Nɛhi. 13:​23, 24) O Hibuluiye niŋ Diom Mɛlɛkaa wa o poonyiaa ni. Lelaŋ, vɛɛ chuaambuaa feleŋguaa kaŋ wa yɛ pɛɛku le Chɛhowa kaalaa, nduyɛ ma piɛi ndu, te ndaa chiee Hibuluiye le? (Ɛsi. 10:​3, 44) A tonya, Chuuwa haa ndaa nɔ ma tosa siŋgaŋndaŋ. Kɛ i wa tɛtɛlɛ le ma tosa siŋgaŋndaŋ o Isɔluɛi niŋ, naa piɛile tonyaleŋ le wa miiŋgoo o pɔmpɔmbɔ wa.—Nɛhi. 8:​8, 9. w23.05 15 ¶6-7

O kpeekpei niŋ, o yɔŋ bɛɛ miŋ nɔ yeemɛi le kpeleŋ naŋ kɛsi wo komallo, ɔɔ miŋ dɔu naapila o mandaa bɛŋgu, lepum mi simultaŋ la komal naa. Le tamaseliiyo, lepum mi sɔɔŋ naŋ ve kɔl te woŋ chua teleŋ naŋ nɔ miŋ soliŋ kpeku le kpeleŋ naa komallo wo. (Ikili. 9:11) Ɔɔ naapum mi simullo komal naa o tosa miŋ tambu kɔl, nduyɛ ŋ nɔ lɛ mayoomu le wo. (Polo. 24:10) Lepum vɛlɛ, le mɛɛ naŋ cho wanaa lahakiaa yɛ, miŋ tosa biondɔŋnda kuuna naa kpeleŋ naa komallo wo. (Luom. 7:23) Ɔɔ lepum yɛ, miŋ wa a saŋgɛiya. (Mat. 26:43) Yɛɛ mala yɛ naa miŋ tiu simultaŋ ndaŋ ba? Loonuŋ maa o yɔŋ bɛɛ mi simullo komal num, keŋ sim nuaa maa a sɔla batiuwaa le le. Baabuiyo dimi maa, lepum mi simultaŋ ɔɔ bahawɛilaŋ la tɔɔliaa naa komal. Kɛ o dimi vɛlɛ maa, ŋ tiuba miŋ komal kpeleŋnda naŋ kɛsi laŋ. A tonya, te ŋ kindiŋ pɛ kpoke le kpeleŋnda naalaŋ komallo o yɔŋ bɛɛ mi simultaŋ la komal naa, mi keŋ chɔm Chɛhowa kpendekele maa ŋ yeema miŋ nɛŋi ndu kɔllo. Nduyɛ, mbo naŋ kɔl tau te o che naa pɛ kindiŋndo le kpeleŋ naŋ kɛsi wo komallo. w23.05 30 ¶14-15

Mi puaapiliaa bɔɔbɔɔ kendu o Mɛlɛka piɛiyo niŋnda luɛi o wali lɔɔlɔɔ Mɛlɛkaa niŋ, teleŋ nda wa feleŋguaa wo. Mi kɔɔfaleŋ le mala puaapilɛnɔ feleŋgɔnɔɔ le mbo pɛɛku mɛɛ wana tosa wallo nyɛkɛndɛi a wanaa yɛ yiaa yɛ. Hei mala ndu vɛlɛ mbo chaa nyɛsɔlaa biyɔɔ, nduyɛ o pisi mbo hiou sɔla ndɔɔ le. (Filip. 4:​11-13) Kɔɔfale malalaŋndeŋ tosaa cho kpeleŋ tase wana komal le luɛiyɔɔ o wali lɔɔlɔɔ Mɛlɛkaa niŋndo ni. Nduyɛ mi keŋ mala wana le bɛɛndiaŋndo le kɔɔfale lɔɔlɔɔ leŋ tosaa. Mi kɔɔfaleŋ le kumbul waŋndo nɛiyo le luɛiyɔɔ o wali lɔɔlɔɔ Mɛlɛkaa niŋ, mɛɛ wali taŋgulaa ɔɔ kɔlaŋ o Bɛtɛɛl cho nuaa yɛ. Puaapiliaa kpou nɔ ma kindiŋ le ma komal suliŋnda mala nda, ma simnuŋ bɛnduaa kundaa le puaapiliaa a ndepiliaa ndaa malaa o kundaa niŋndo. Baabuiyo dimi maa te puaapilɛnɔɔ wa pɛ kindiŋndo le mbo simnuŋ wana chua chilaŋ o kundaa niŋndo, “mɛɛ wali kɛndɔɔ pila o yeema koŋ ni.” (1 Tim. 3:1) Kɛ, o nɔ fɛŋ mbo suliŋ le mbo wa buɛi malalaŋndo. Mi buɛiyaa malalaŋnda mala bɛnduaa kundaa o nɛila bɔɔbɔɔ niŋ. Mi bɛnduaa kundaa a buɛiyaa malalaŋnda mala puaapiliaa a ndepiliaa ndaa tau, nduyɛ ma nɔ dialuŋ fulaŋ le wali pollo tosaa. w23.12 28 ¶14-16