Isikiɛɛ
27 Mi Chɛhowa suaa vɛlɛ naa ya chua aa: 2 “Num po wanachioo, soli chondii imɔnɛi le Taaya.+ 3 Dimul ndu aa,
‘Num cho hoo ichali o pee mɛŋma ihɛllo kɔŋgɔ,
Nduyɛ ma wa yulanɔ bɛndoo le wanaa cho o lɛŋii mɛŋndaŋ ma balu ve wo,
Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
“Oo Taaya, numpila dimi aa, ‘I naŋ bɔɔ fɔ.’+
4 O pee mɛŋma ihɛllo kɔllo tandala numndaŋ la cho ni,
Nduyɛ mi wanaa taŋgul numnda tosa ma naŋ naŋɔɔ pila.
5 Pɛŋgɛŋ nda taŋgul numndoŋ kpou, yɔmii chunipa ve Sɛniɛɛ nda tɛɛndiaa ni.+
Num cho hoo maa dɛndɛ wo, yɔm vilɛi nda handu le kola numndo kindɔɔ wo, a yɔm sida wo Lebanɔŋ nda toosiaa ndu ni.
6 Boola nda kua a numndaŋ, a yɔmii oki ve Baasiaŋ nda toosiaa laŋ ni.
A yɔmii saipulɛsi ve nda toosiaa bolle numnde sɔlɔbɔlɔɔ leŋ ni, ma kumbu leŋ a chiŋuŋ kamaa fulaa o lɛŋii mɛŋndaŋ ma balu ve niŋ Kitim.+
7 A kolala kɛndɛ kɛndɛlaŋ Ichipi ndaa kindu kola kua a numndo ni.
Nduyɛ kolala nda kindu yɛkpɛ numndo laŋ, a kɛi buliiyo vɛlɛ a kɛi yim yimndo fulaa o lɛŋii mɛŋndaŋ ma balu ve niŋ Ilaisia nda toosiaa laŋ ni.+
8 Waŋnda Saidɔŋ a waŋnda Avadi+ ndaa kua a num ni.
Oo Taaya, puaa num aa taasiaa sina a mɛŋndaŋ okɔɔ wa wa wallo le num ni.+
9 Puaa Keba,+ a chaa nyɛ a laba wa* hɛɛnduu pɛŋgɛŋ numndoŋ nyɛkɛndɛi ni.+
Mi dɛndɛla mamɛŋndaŋ a wanaa balu leniŋ nda kpou ndaa hiŋ naa num chua le yulaleŋ tosaa.
10 Puaa Paasiaa, Ludi,+ a Puti wa o puaa num aa chɔuwa tɛɛŋ.
O num niŋ ndaa lɛɛnduu boola ndalaŋ vɛlɛ a mɔsilta ndala chɔulaŋ ni. Ma tosa ma sɔla bɛɛleŋ tau.
11 Puaa Avadi a wa puaa num aa chɔuwa tɛɛŋ nda wa isisi o kpakila numndaŋ balɔɔ silɔ,
Puaa hɔlaa vesɛiya wa ichali o chiɛila numnda choo choo laŋ ni le num mandaa,
Mi ndaa lɛɛnduu boola chɔula tiu tiu laŋ o kpakila numndaŋ balɔɔ silɔ,
Nduyɛ ma tosa ma naŋ naŋɔɔ pila.
12 “‘“Mi Taasi+ ndoo tosa yulaleŋ a num le mɛɛ num oo sul sullo pila yɛ.+ Mi ndaa chuu num kanii humbuei, chiliŋndoŋ, chiliŋii leemu leemuei, vɛlɛ a liiye, okoŋ mi la siŋgafila, ma ke nda nyɛm numndoŋ.+ 13 Mi Chavaŋ, Tubaa,+ a Misiɛki+ ndaa tosa yulaleŋ a num. Mi ndaa siŋgafila chiaa+ vɛlɛ a nyɛm nda toosiaa a chiliŋii siaŋɛi yoŋ,* mi num ke nda wɔŋgula numndaŋ. 14 Mi waŋnda Tokaama+ ndaa chuu num suaa, vɛlɛ a chɔluaa yɛyii muuliaŋ nda,* mi num ke nda nyɛm numndoŋ. 15 Mi waŋnda Dɛdaŋ+ ndaa tosa yulaleŋ a num. Mi num oo chua waŋnda o lɛŋii bɔɔbɔɔ mɛŋndaŋ ma balu ve niŋ, le ma tosal num yulaleŋ. Mi ndaa mal num paawaa* o ba a chiŋuŋ kamaa,+ vɛlɛ a yɔm tiŋi kala kalaa. 16 Mi Idɔm tosa yulaleŋ a num le mɛɛ num oo nɔ nyɛm kɛndɔŋ tau tau yɛ. Mi ndaa ke num pouta tɔkuɛɛsi laŋ, kɛi yim yimndo, kolala huauwaala kɔɔle kɛndɛ kɛndɛ laŋ, kolala kɛndɛ kɛndɛ laŋ, pouta baa kalalaŋ o peelo, vɛlɛ a pouta lɔbi laŋ, okoŋ mi la siŋgafila, ma ke nda nyɛm numndoŋ.
17 “‘“Mi waŋnda Chuda a waŋnda Isɔluɛi ndaa tosa yulaleŋ a num. Mi ndaa chuu num witiiyoŋ Miniti,+ nyɛdiaa kɛndɛ kɛndɔɔ, liaaŋ,+ chuɛiyaŋ, vɛlɛ a chuɛima baasam ndaŋ,+ okoŋ mi la siŋgafila, ma ke nda nyɛm numndoŋ.+
18 “‘“Mi Damasikɔɔ+ ndoo tosa yulaleŋ a num, le mɛɛ num oo nɔ nyɔɔŋ tau nduyɛ ma sul sullo pila yɛ. Mi ndaa chuu num muɛiyaŋ fulaa Hɛlibɔŋ, vɛlɛ a kɛiyo Sahaŋ.* 19 Mi Vadaŋ nda Chavaŋ fulaa Yusa ndaa chuu num diola ŋchiliŋndaŋ, kaasiaa,* a keŋ,* okoŋ mi la siŋgafila, ma ke nda nyɛm numndoŋ. 20 Mi Dɛdaŋ+ ndoo tosa yulaleŋ a num a kolala nda handu suaa o kɔɔ le kɔlaŋ a nda laŋ. 21 Ma chua Aluabuiya a laŋgbaa kalla Kidaa kpou,+ a ndaa tosa yulale saa fɔŋnduaa, saa konduaa, a chuiŋnda wa le ma wa wallo le num.+ 22 Wanaa leyulaa Siɛba a Luaama+ wa yulaleŋ tosaa a num. Mi ndaa chuu num chuɛima chuŋ kɛndɛma suu o suu, pouta baa kalalaŋ, a kooliiyoŋ, okoŋ mi la siŋgafila, ma ke nda nyɛm numndoŋ.+ 23 Mi Haluaŋ,+ Kanɛɛ,+ Idɛŋ, a wanaa leyulaa Siɛba,+ Asiɔɔ,+ a Kilimadi ndaa tosa yulaleŋ a num. 24 Mi ndaa pisi domala kɛndɛ kɛndɛlaŋ, domala bɛndula nda toosiaa a kɛi buliiyo nduyɛ ma huau laŋ a kɔlɛila yɛ yɛlaŋ ndaŋ, nyɛm nda pɛŋgɛliaa lɛŋ chiɛiniŋ mi la wa a kɔlɛila yɛ yɛlaŋ ndaŋ o lɔɔ numndo niŋ. Laŋ kpou, mi ndaa yii laŋ bɔndiila bɛndulaŋ.
25 Dɛndɛla mamɛŋndaŋ Taasi+ laa vili wɔŋgula numndaŋ ni,
Mi hei tosa ma pia cha nduyɛ ma lusul kpiliŋ* o pee mɛŋma ihɛllo kɔllo.
26 Mi wanaa kua a numnda yaa num naa pee mɛŋma ihɛllo cho yoŋgbaŋ yoŋgbaŋ nda,
Mi hueiyii fula ba paaleŋ le chaŋ ndo ve tosa ma kɔɔlu o pee mɛŋma ihɛllo kɔllo.
27 Sul numndo, nyɛm numndoŋ, wɔŋgula numndaŋ, wanaa tosa wallo o num niŋnda, a wanaa kua a numnda,
Wanaa kiindiaa tɛɛŋguŋ numndoŋ nda, yulaa numnda,+ a puaa num aa chɔuwa kpou,+
Wana o wana* cho o num niŋ,
Nda kpou cho hunɔɔ mɔɔwa o pee mɛŋma ihɛllo kɔllo o paale ŋ cho kɔɔlu leŋ choo.+
28 Te wanaa cho wallo o num niŋnda mal pɛ yioo, kɔŋgɔla pee mɛŋma ihɛllo la cho nyiiya.
29 Wanaa kuandu dɛndɛla pɔmbɔlaŋ nda, wanaa kua a dɛndɛla bɛndulaŋ nda, vɛlɛ a wanaa tosa wallo o dɛndɛlaŋ niŋnda,
Nda kpou cho fula o dɛndɛla ndalaŋ niŋ ma kɔ sim o pioo kɔŋgɔ.
30 A cho num wa koŋullo choo kpeleŋ a chaŋndo,+
Ma duaunuŋ chundoo o lebol, okoŋ ma wa yuuliaŋndo o pultaŋ niŋ.
31 A cho tembeltaŋ sendi, nduyɛ ma wounuŋ nyɛla labɛkilaŋ.
A cho koŋul kpeleŋ num choo a chaŋndo.
32 A teleŋ nda cho wa chaŋ imɔnɔɔ wo, a cho num chondii imɔnɛi solul aa:
‘O nɛɛnɛ cho yɛ maa Taaya, o cho niŋ o meiyaa kpili o pee mɛŋma ihɛllo tɛɛŋ ndo?+
33 Te nyɛm numndoŋ muŋ hiŋ pɛ o pee mɛŋma ihɛllo choo, mi wanaa bɔɔbɔɔ ndaa naŋ kɔl.+
Mi sul num bɛndoo a yulale numndeŋ le tosa mi masaa cho o lɛŋndeŋ choo wa sul.+
34 Kɛ nuawɔ niko mɛɛ ŋ kɔɔlu o pee mɛŋma ihɛllo tɛɛŋ, o mɛŋma yiŋgilɛiyaŋ niŋ yɛ.+
Yulale numndeŋ a wanaa numnda kpou mɔɔwa a num latulu.+
35 Wanaa cho o lɛŋii mɛŋndaŋ ma balu ve niŋnda kpou cho num wa nuaa mi kɔndɔfillo bii nda.+
Nduyɛ masaa ndaa kpou cho nyiiya a siooŋnde,+ ma tɛɛmbuu hɔlla pɛsɛkɛ.
36 Yulaa o lɛŋnde niŋ cho huiye hɔŋ a nyɛ cho num yɔŋnɔŋndo.
Mɛɛlula numndaŋ la cho hunɔɔ o lepilɛ niŋ kpe, nduyɛ la wɔu niŋ bɔɔ.
A cho tambei sɔla, nduyɛ fɛɛŋ a fɛɛŋ a ve lɛ niŋ te.’”’”+