Isikiɛɛ
29 O wɔsi tɔ wo niŋ paŋgii tɔ ve malɔ 12, mi Chɛhowa suaa naa ya chua aa: 2 “Po wanachioo, muli hɔlla kpeŋgii Feloo ve masaa le Ichipi, ma dimul ndu nyɛ cho ndu hunɔɔ yɔŋnɔŋndo, a nyɛ cho hunɔɔ Ichipi yɔŋnɔŋndo.+ 3 Dimul ndu aa: ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
“Num Feloo masaa le Ichipi, I cho num chiŋalaŋ.+
A cho ko maa visi tɔɔma bɛndu cho ihini o peela pɔmbɔla kɔ del o pioo Nail* choo laŋ niŋndo.+
A dimi aa: ‘Ya nɔ Pioo Nail ni.
Le yapila ya toosiaa ndu ni.’+
4 Kɛ I cho num doluŋndoŋ baa o yaalolaŋ, nduyɛ mi tosa mi suuwaa cho o pee numndo niŋ Nail wa lɛɛnduŋ o kɛkɛula numndaŋ.
Num a suuwaa lɛɛnduŋ kɛkɛula numndaŋ nda kpou, I cho nya soli o pioo Nail kɔŋgɔ.
5 Num a suuwaa cho o pee numndo niŋ Nail wa kpou, I cho nya malɔɔ o pollo niŋ.
La cho delɔɔ naa wakpaa. Wana o wana cho nya chua le, kɛlɛŋgaa niŋ te mbo chuuŋgiaa nya naapilɛ.+
La cho simnɔŋ nyɛdiaa le visiaa yonduaa o lɛŋndeŋ choo a youwaa balu choo choo wa.+
6 Waŋnda Ichipi kpou cho sina maa ya cho Chɛhowa ni.
Kanifuule a ve lɛ waŋnda Isɔluɛi mala le, a wa ko maa bilte vesɛi le nda.+
7 Mɛɛ nda saa num baa, ma chuiinuŋ,
Nduyɛ ma tosa mi choŋgu ndaa woosaŋ.
8 “‘Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “I cho num hinul a muɛi faŋnde,+ okoŋ mi diu diu waŋnda chieeya a visiaa kpou. 9 Lɛŋnde Ichipi leŋ le cho hunɔɔ tambu mi le simnuŋ pɔmndo.+ Okoŋ, a cho sina maa ya cho Chɛhowa ni. Kanifuule ma* dimi aa: ‘Ya nɔ Pioo Nail ni. Ya toosiaa ndu ni.’+ 10 Lelaŋ I cho num a pee numndo Nail chiŋalaŋ, nduyɛ mi tosa mi lɛŋnde Ichipi leŋ le tambu, mi le simnuŋ lɛŋnde vesɛi a pɔmndo,+ chɔŋ Mikidɔɔ+ kɔ Sayini+ haaa o pɛŋgulaŋ a Itoopiaa. 11 Waŋnda chieeya a visiaa pila lɛ pelei loŋ te,+ nduyɛ le wɔsilaŋ 40 wana o wana cho ichali loŋ te. 12 I cho tosa mi lɛŋnde Ichipi leŋ le simnuŋ pɔmndo mbo hiou lɛŋnde kɛ kɛ, nduyɛ mi chieeŋ ndɔŋ bɛndoŋ bɛɛ simnuŋ pɔmndo miŋ hiou chieeŋ bɛnduŋ kɛ kɛ le wɔsilaŋ 40.+ I cho Ichipiaŋnda puusiaa ma saŋnuŋ o lɛŋnde niŋ.”+
13 “‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Te wɔsila 40 laŋ la hiou pɛ, I cho Ichipiaŋnda soli naa nda cho wa a saŋnaŋ nda, mi miŋgi nda chuuŋgiaa naapilɛ.+ 14 I cho Ichipiaŋnda soli o biyɔɔ niŋ, mi miŋgi nda pila o ndalo o lɛŋnde Patɔlɔsi leŋ niŋ.+ Te a miiŋgu pɛ, masale ndaleŋ le nɔ lɛ niŋ kpaaya le. 15 Masaleŋ Ichipi le cho tolɔɔ toolo toolo mbo hiou masɛi cheleŋ, nduyɛ fɛɛŋ bɛɛ a nɔ lɛ niŋ kpaaya lɛŋii cheleŋnde choo le.+ I cho tosa ma dɔɔnaŋ, nduyɛ a nɔla lɛ niŋ ma tosa mi lɛŋii cheleŋnde wa nda o ba bɛŋgu le.+ 16 Fɛɛŋ bɛɛ Ichipi ve lɛ niŋ lɛŋnde waŋnda Isɔluɛi tiindaŋ le malaa sɔlaa wo le.+ Kɛ le cho wa Isɔluɛiya loonɔŋndo a biondɔŋ nda tosa le muliŋndo o Ichipiaŋnda lo le malaa wo. Nduyɛ a cho sina maa ya cho Chɛhowa, Mɛlɛka Kpuluŋguma Bɛndoo ni.”’”
17 O wɔsi 27 wo niŋ, paŋgii tasei malɔ le pilɛ, mi Chɛhowa suaa naa ya chua aa: 18 “Po wanachioo, mi Nɛbukanɛɛsa*+ masaa Babilɔŋ tosa mi puaa nduaa chɔuwa saŋga tau tau mɛɛ nda chiŋalaŋ Taaya.+ Mi tembeltaŋ la del nda, nduyɛ mi choŋgulaŋ la peeŋguŋ nda. Kɛ ndu nda puaa nduaa chɔuwa sɔla paawa* kɛ kɛ le kuɛi nda de le Taaya chiŋalaŋndo wo le.
19 “Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni, ‘I cho lɛŋnde Ichipi leŋ malɔɔ Nɛbukanɛɛsa* masaa le Babilɔŋ o ba,+ mbo chua sul ndɔɔ, okoŋ mbo puŋga nyɛm ndɔŋ mbo kuɛŋnuŋ a muŋ. Nyɛm muŋ o cho puaa nduaa chɔuwa paawa ni.’
20 “‘Le mɛɛ o chiŋalaŋ Taaya nduyɛ mbo saŋga tau yɛ, I cho ndu lɛŋnde Ichipi leŋ ke kanifuule le ya nda chiŋalaŋ leŋ ni.’+ Ya Chɛhowa, Mɛlɛka Kpuluŋguma Bɛndoo dimi lende ni.
21 “O paale leŋ choo, I cho tosa mi lioo vil le waŋnda Isɔluɛi,*+ nduyɛ mi ke num fondaa le ma soo o nda lo. Okoŋ, a cho sina maa ya cho Chɛhowa ni.”