Isikiɛɛ

4 “Nduyɛ num po wanachioo, chua kpilikiei ma kɛsiŋ ndi lachi, okoŋ ma tuuliaa Chulusalɛm lechoo. 2 Wou ndu o piŋndo niŋ,+ taŋgul kpakioo ma balu ndu silɔ,+ deŋgela puuloo o kpakioo hoo balɔɔ chɛ chɛ,+ taŋgul dɔɔŋgɔla yaamɔɔwa ndu ikɛi, nduyɛ ma balu ndu silɔ a nyɛla nda pesi kpakilaŋ ndaŋ.+ 3 Chua kpaŋkpaŋndo ma handu ndu mbo wa maa kpaki ichiliŋndo num tɛɛŋ a chioo. Okoŋ, ma tofa ndu a hɔlla ŋama ŋama. Tosa maa a bii chioo ma duau ndu o piŋndo niŋ. Tamasioo cho wa hoo ni le waŋnda Isɔluɛi.+

4 “A nɔ ma hini o ba num miallo choo ma handuŋ hakila waŋnda Isɔluɛi choo.+ Palɛi ŋ cho wa ihini o ba num miallo choo ve kpou, hakila ndalaŋ la cho num wa choo. 5 Nduyɛ le palɛi 390 ŋ cho wa ihini ni. Palɛi hei chɛlaŋ a wɔsila nda tosa hakioo laŋ.+ Nduyɛ hakila waŋnda Isɔluɛi tosa laŋ, num la cho wa choo ni. 6 A nɔ ma chii palɛi keŋ kpou ihini.

“Okoŋ a hini vɛlɛ o ba num kɛndɔɔ choo, le mi hakila waŋnda Chuda tosa laŋ la wa num choo+ le palɛi 40. Paaleŋ le pilɛ le sim le wɔsioo. Nduyɛ palɛi hei ya kɛɛsiaa le num ni. 7 A cho hɔlla muli o Chulusalɛm ŋ dɔu o piŋndo niŋndo,+ ma simbul doma numndo balaŋ, okoŋ ma dimi nyɛ cho ndu hunɔɔ yɔŋnɔŋ ndo.

8 “I cho num yii a yuei, a nɔla ma muliŋ kpeŋgii kɛ kɛ le, haaa ma chii palɛi ŋ dɔu Chulusalɛm o piŋndo niŋnde.

9 “A nɔ ma chua witiiyoŋ, baliiyoŋ, kawuŋ bɛndoŋ, kawuŋ pɔmbɔŋ, suaaŋ lawomndoŋ, a witiiŋ suu cheleŋ, ma dɔu muŋ naapilɛ o hɛŋgɛiyo niŋ, ma toosiaa beediiyo* le numpila. Palɛi 390 ŋ cho wa ihini o luŋgbuei choo ve, ndu ŋ cho wa dioo ni.+ 10 Nyɛdiaa ŋ nɔ ma de o paaleŋ niŋndo nɔ mbo wa lusullo siɛkɛlloŋ 20.* Lepaa o lepaa, a nɔ ma wa ndu dioo teleŋ pilɔɔ kpe.

11 “Mɛŋma ŋ nɔ ma kol laŋ bɛɛ, a nɔ ma tuu maŋ. Lepaa o lepaa, hiŋndo piɔuwo le ŋɔmpum* ŋ nɔ ni ma kol a teleŋ pilɔɔ kpe.

12 “A nɔ ma de ndu mɛɛ ŋ dia nuaa beedii nda toosiaa tiu tiu a baliiyoŋ ndo yɛ. Nduyɛ poola vesɛila waŋnda chieeya ŋ cho wa soliŋndo kpeku ni maa iyɔm le nda ndu lomɔɔ o hɔl kpendekele.” 13 Mi Chɛhowa hiau lachi a suɛi aa: “Nuaa Isɔluɛiya cho wa nyɛdiaa nɔɔlɛiyo dioo o lɛŋii ya cho nda saŋɔɔ ve niŋ ni.”+

14 Okoŋ mi dimi aa: “Kpou Chɛhowa, Mɛlɛka Kpuluŋguma Bɛndoo! Chɔŋ o feleŋgɔyɛi nii niŋ haaa a paale hauleŋ ndeŋ, I di wɔ visi vi o ba ndɔɔ choo wo ɔɔ visi visi biyaa diiyo le yapila nɔɔliaa le.+ Nduyɛ kani bɛɛ visii nɔɔlɛi lueiyɔ ya o sondo le.”+

15 Okoŋ mbo dimul la aa: “Awa, I cho num chɛlɔɔ ma soliŋ poola nau laŋ kpeku sɔŋgɔ poola wanachioo, le beedii numndo lomɔɔ lechoo.” 16 Okoŋ mbo dimul la aa: “Po wanachioo, I cho tosa mi nyɛdiaa dɔɔnaŋ Chulusalɛm.+ Tuuwo nda cho wa nyɛdiaa nda cho wa dioo wo ni,+ nduyɛ a wa niŋ ndu dioo o buulaŋ bɛndoo niŋ. Mɛŋma nda cho wa kolɔɔ waŋ bɛɛ, tuuwo nda cho wa maŋ ni.+ 17 Te hei yɔŋnuŋ pɛ mi nyɛdiaa a mɛŋma ve le, a cho wa nuaŋnaŋndo o kɔndɔfili bɛndoo niŋ, nduyɛ ma kua a nyauwo sɛɛŋ le hakila ndalaŋ.