Isikiɛɛ

5 “Kɛ num po wanachioo, chua muɛi faŋii luɛiyɛi ma sendi yiiŋii cho num o lebolle a siɛiye, okoŋ ma handu ndi o sekeleiyo choo le lusul ndɔɔ sinaa, nduyɛ ma piɔu ndi kundalaŋ layaa. 2 Te palɛi ŋ dɔu chioo o piŋndo niŋnde fuuluu pɛ o mɛɛlulaŋ,+ a chua yiiŋnde hei kundaa o pilɛ a lom ndi o chioo tɛɛŋ. Okoŋ a chua kunda cheleŋ a kili kili ndi a muɛi, a tiu ndi o chiee koŋ niŋ silɔ.+ Okoŋ kɔɔli, a chua kunda mɛɛlaa a sɛŋi ndi o hueiye niŋ. I cho muɛi faŋnde yɔŋ mi i tisa nda kɔɔli.+

3 “Nyɔla vɛlɛ yiiŋnde hei nyɛɛmbɔ ma yii ndi o bɔɔle doma numndo ikɛi. 4 Ma chua i tiŋ ma wuu ndi o yiŋndeŋ niŋ mi i ŋuɛ. Keŋ cho tosa ni mi yiŋndeŋ le kuɛ a pɛŋgɛlaŋndo, mi le tiu waŋnda Isɔluɛi choo silɔ.+

5 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Chulusalɛm cho hoo ni. I simi ndu lɛŋnde tɛɛŋ deŋ mi i balu ndu silɔ. 6 Kɛ o simul nɛila nila chɔmaalaŋ a sawala nilaŋ, mbo wa sɔɔŋ wɔɔŋndoŋ tosaa mbo hiau wanaa cho o lɛŋii balu ndu ve niŋnda kpou.+ Kanifuule a kɛɛ nɛila nila chɔmaalaŋ, nduyɛ a tosa nyɛ sawala nilaŋ la dimi wo le.’

7 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Le mɛɛ ŋ tosa bolle kalaleŋ maa lɛŋii balu numnde, ma kɛɛ sawala nilaŋ a nɛila nila chɔmaalaŋ tolɔɔ kɔɔli, okoŋ ma muliŋ nɛila chɔmaala lɛŋii balu numnde tolɔɔ kɔɔli yɛ,+ 8 nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Oo Chulusalɛm,+ I cho num chiŋalaŋ, nduyɛ mi kilul num yamɛi lɛŋnde o hɔl kpendekele.+ 9 Sɔɔŋ wɔɔŋ ŋ tosa woŋ kpou, nyɛ ya cho num tosal le muŋ ndo, kani bɛɛ I tosa wɔ ndu le, nduyɛ fɛɛŋ bɛɛ I tosa niŋ nyɛ waa lende le.+

10 “‘“Finyaa cho puaa ndaa dio,+ nduyɛ mi puaa de finyaa ndaa. I cho num yamɛi kilul, okoŋ mi sɛŋi a tuaa ba o ba fee.”’+

11 “‘Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Mɛɛ i cho kpendekele maa I cho yoomu yɛ, I cho nya kɛɛ le mɛɛ nya nɔɔliaa chiɛi nuu a piɔmaa nyaa nɔɔlɛiya vɛlɛ a sɔɔŋ nɔɔlɛi nya tosa woŋ kpou yɛ,+ nduyɛ kposoŋ bɛɛ I tuiinuŋ nya niŋ inyiɛɛ le, kɛlɛŋgaa niŋ te mi bii mɔnɛi le nya.+ 12 Naala taŋ waŋnda laŋ a yiaaŋ ma cho waŋnda kundaa o pilɛ diyɔɔ o chioo hoo niŋ, nduyɛ mi muɛi faŋnde dii kundaa o pilɔɔ.+ I cho kunda mɛɛlaa sɛŋi ba o ba fee, okoŋ mi yɔŋ muɛi faŋnde mi i tisa nda kɔɔli.+ 13 Te keŋ yɔŋnuŋ pɛ, I cho hini kɔl, nduyɛ mi tumbe ya dɔɔnuŋ ndo pɔlul.+ Te I chii pɛ tumbe dɔɔnɔŋ a nda o kala kala, a cho sina maa ya Chɛhowa, ya pilɛ kpe nda nɔ ni ma piɛi.+

14 “‘I cho num tɛɛmbuu nduyɛ ma simnuŋ nyɛ mamaa lɛŋii balu numnde tɛɛŋ, vɛlɛ a wana o wana wa pɛ hiouwɔɔ mbo che num.+ 15 A cho simnɔŋ nyɛ mamaa nduyɛ mi siɔmbulaŋ la tol num,+ okoŋ mi siooŋii bɛnduei bii lɛŋii balu numnde, te I kilul num pɛ yamɛi mi tusi num nyɛpalaa bɛndoo choo le mɛɛ ya dɔɔnuŋ tumbe a num o kala kala yɛ. Ya Chɛhowa soo ni.

16 “‘I cho yima bɛnduaŋ yɔŋ nda tɛɛŋ maa machiŋɔ le nda tɛɛmbuuwo. Chiŋɔma ya cho yɔŋ ndaŋ ma cho num tɛɛmbuu.+ I cho tosa mi yima bɛnduaŋ ma del num choo,* a sɔla lɛ nyɛdiaa bɔɔ le.+ 17 I cho yima bɛnduaŋ a visiaa biyaa nya yɔŋ tɛɛŋ,+ ma tɛɛmbuu chuauwaa numnda. I cho num tusi naala taŋ waŋnda laŋ choo, nduyɛ mi tosa mi koowaŋ ma tiu o num niŋ kpou. I cho num chiŋalaŋ a muɛi faŋnde.+ Ya Chɛhowa soo ni.’”