A Sina Pa?

Vɛɛ kpilikiŋ nda saaluŋ Babilɔŋ ndoŋ vɛlɛ a mɛɛ nda toosiaa muŋ yɛ chɔm yɛ maa, nyɛ Baabuiyo dimi wo cho tonya?

WANAA tuau nyɔɔŋ lɛŋ nda saaluŋ niŋ kpilikiŋ ndaa lom o Babilɔŋ niŋ sindɛ, nduyɛ ma soliŋ muŋ kpeku le chioo taŋgullo wo. Mi wana pilɛ o ndoo tuau nyɔɔŋ lɛŋ ndo diolaŋ Lɔbɔti Kodɛwe dimi maa, o nyɛ luamaa ŋkpilikioo niŋ ndaa luam kpilikiŋ waa nuaa ni, nduyɛ nyɛ luamaa ŋkpilikioo hoo wa “landaŋ a chioo, naa puulu kɛndɛ kɛndɔɔ a bɛŋsiiyaŋ . . . ma wa tau wa.”

Mi wanaa tuau nyɔɔŋ lɛŋ nda saaluŋ vɛlɛ maa, mi wanaa bɛnduaa wa o Babilɔŋ niŋ sindɛ wa ndaa soliŋ vɛlɛ nyɛ luamaa ŋkpilikioo kpeku le sɔɔŋ wɔɔŋndoŋ tosaa. Mi wana sinaa dɛnɛ bɛndu pilɛ diolaŋ Pɔɔl-Alɛŋ Booliu, o pɛɛku waŋnda a suɛi maŋgalɛi Asiiliaŋnda okɔɔ o sukuu bɛndoo niŋ Tolonto wo dimi aa: “Konala bɔɔbɔɔ cho a Babiloniaŋnda okɔɔ laŋ la chɔm maa, mi masaa o Babilɔŋ niŋ duau sawaa maa wana o wana kɛɛ ndu pɛ diikɔŋndo ɔɔ mbo kɛɛ sɔɔŋ mɛlɛkaa ndaa chuaa ŋ sɔvɛ, wana koŋ ndaa nɔ ma wou ndu o fondaŋ tuuwo niŋ.” Le tamaseliiyo, mi yau pilɛ nda poonyiaa a teleŋ Masaa Nɛbukanɛɛsa wo dimi aa: “La tɛɛmbuu nda, la lom nda, la tuɛi nda . . . o fondaŋ tuuwo niŋ, . . . la tosa mi kumii ndɛi hel. La tosa mi kaala ndala wɔɔŋndaŋ la mɛɛlu o yiŋnde tondoleŋ niŋ.”

Hei loonuŋ wanaa veelu diomndaŋ o Baabuiyo niŋnda a nyɛ Daaniɛɛ bolle 3 dimi wo okɔɔ. A mɛɛ bolle Baabuileŋ ndeŋ le dimi yɛ, mi Masaa Nɛbukanɛɛsa simi piɔm ŋkooliiyo o dɛŋgbɔɔ niŋ Dulua, nduyɛ dɛŋgbɔɔ hoo ve o chiee bɛndoo Babilɔŋ niŋ te. Mɛɛ puaa Hibuluiyaa yaawa haa Siɛdula, Mɛsiaki a Abɛniko kɛɛ le piɔm koŋ sooluuwo, mi Nɛbukanɛɛsa duaunuŋ tumbe. Okoŋ, mbo dimi maa a kɔ dɔu nda o tondo leyiŋndo niŋ, ma tosa mi tondo koŋ tuulu, “mbo hiou maa paandu sala ŋɔmmɛu.” Kɛ mi maalikɛinɔ kpaaya bɛndoo piŋi nda o kpundɛ koŋ niŋ.—Daan. 3:1-6, 19-28.

Kpilikii nda lom mi diola Nɛbukanɛɛsa laŋ la wa la poonyiaa lechoo wo

Kpilikiŋ nda saaluŋ Babilɔŋ ndoŋ toolu nyɛ Baabuiyo dimi hoo wo. Nduyɛ kpiliŋioŋ muŋ ŋ bɔɔbɔɔ, diomnda ndaa soliŋ kpeku le masaa saŋgalaa wo la cho la poonyiaa le choo. Mi poonyiaala laŋ opilɛ dimi aa: “Nɛbukanɛɛsa, Masaa le Babilɔŋ. . . . Chiɛi lemasaa, o ya pila masa bɛndoo taŋgullo. . . . Maa wanaa cho fula o pulale nileŋ choo wa, tosa masaleŋ o chiɛiyo hoo niŋ lefafɛɛŋ.” Nyɛ poonyiaa hoo dimi wo velaŋ tiŋ a nyɛ Daaniɛɛ 4:30 dimi wo. Loŋ, mi Nɛbukanɛɛsa saŋgalaŋ aa: “Tofa wɔ mɛɛ Babilɔŋ o cho chiee bɛndu yɛ se, chiee ni lemasa bɛndu ya I taŋgul a kpaaya ni bɛndoo wo. Chioo hoo chɔm maa I cho wana tɔɔ bɛndu.”