‘Yooŋgu Kɛndɔɔ Hoo Nɔ Mbo Dimiŋ!’
1. Vɛɛ naŋ looku yɛ sina maa nyɛ o nyɛ nɔla mbo kuuna wali dimiaa yooŋgu kɛndɔɔ le?
1 O kpeekpei niŋ, nyɛ o nyɛ cho mbo kuuna Chɛhowa le hɛnaŋ ndɔɔ tosaa le. (Ais. 14:24, NW) Mi che bɛɛ naa mi Kiidiɔŋ a puaa nduaa chɔuwaa 300 sɔla simul kala kalaa puaa chɔuwaa Midianaitiiya 135,000 o ba, kɛ mi Chɛhowa dimul ndu aa, “Kɔ sɔŋga a kpaaya numndo kpou ma piŋi Isɔluɛiya waŋnda Midiaŋ o ba. Yapila kpeekpei cho num viomɔɔ ni.” (Wkŋ. 6:14, NW) Wali suu kuɛɛ Chɛhowa pila cho yɛ hau tooloo? Mi Chiisu dimi aa, “Waŋnda cho yooŋgu kɛndɔɔ hoo dimi a Masale Mɛlɛkaleŋ okɔɔ ba o ba fee o chieeŋndo choo.” (Mat. 24:14) Wana o wana nɔla mbo kuuna wallo hoo tosaŋndo le!
2. Le yɛɛ naŋ nɔ yɛ tiindaŋndo maa Chɛhowa cho naa pilɛŋ pilɛŋnda mala o wali pollo niŋ?
2 Chɛhowa Mala Naa A Pilɛŋ Pilɛŋnda, Mɛɛ naŋ nɔ tiindaŋndo maa Chɛhowa tiuba mbo mala Seiyaa nduaa kundaa ma sɔla batiuwaa yɛ, ŋ nɔ vɛlɛ miŋ tiindaŋ maa o tiuba mbo mala naa a pilɛŋ pilɛŋnda. Boondii Pɔɔl ndoo yeema wana malaa wo, mi Chɛhowa mala ndu sanaa a Po ndɔɔ, Chiisu Kiliti. (Tim. Diiŋ Ndɔɔ 4:17) Ŋ nɔ tiindaŋndo maa lende koni Chɛhowa cho kindiŋ naa pilɛŋ pilɛŋnda cho le hɛnaŋ ndɔɔ tosaa wo sala dɔuwɔɔ ni.—Chɔŋ Tasoo 5:14.
3. Ɔɔ nɛila yɛ yɛla Chɛhowa tiuba mbo mala naa laŋ?
3 Baa makola ŋ tosalaŋ la tosa num ma saŋga tau a tiulɛ ba le kɔlaŋ o wali pollo niŋ te? “Wanaa cho a yɔkpɛiya, mbo ke nda dialluŋ kalaŋ.” (Ais. 40:29-31, NW) Baa tɔɔndaŋndo ɔɔ simullo cho num choo? “Chɔm Chɛhowa ba num hawɛiyo, o nɔla mbo mala num.” (Chon. 55:22, NW) A kiisaŋ pa lepum le nyɛ ŋ cho la kɔ dimi wo? “Kɔ, I cho num mala ma soo.” (Ɛs. 4:11, 12, NW) Baa kɛndiaa lepɛŋndo cho bahawɛi numndo ni a tiuba ma yɔŋguŋ tau o wali pollo niŋ te? Kɛsiŋ o kɔl maa o kɛ kɛ ŋ kindiŋ pɛ ma tosa o wa bɛɛ nyɛɛmbɔ kɛ te o wa pɛ a kɔl numndo kpou, Chɛhowa naŋ kɔl tau a num.—Kɔl. Tasoo 3:6, 9.
4. Vɛɛ tiindaŋndo dɔuwɔɔ o Chɛhowa niŋ piiliaŋ yɛ naa?
4 Chɛhowa siɛndi ba ndɔɔ nduyɛ, wana o wana cho mbo nɔla ndu tundɔɔ le. (Ais. 14:27, NW) Mɛɛ naŋ nɔ tiindaŋndo o Chɛhowa niŋ le naa malaa o wali pollo niŋ yɛ, maa ŋ hiounuŋ lachi fɔ a yooŋgu kɛndɔɔ dimioo a mayoomu sanaa a kpaaya Chɛhowa ke naa wo.—Walta Wa. 14:3.