Loonɔŋnda Bɔŋaŋ Bɛndoo

Teleŋ Bɔŋaŋndo Kanduŋ Niŋndo. Fondaŋ bɔŋaŋndo cho biinɔŋndo cho wa o kumbiaŋ a 8:​00 idiiyo. Palɛi yaa ve hei fau, nyɛchaa cho wa kandɔŋndo a 9:20. Le bɔŋaŋ naa kandɔɔ o nɛi lebɛɛ niŋ, o bɛnda te ŋ tuei dɔɔ pɛ nyɛchaa, ŋ kɔ chal. O Chimɛiyo choo a Ndaamaa, naapum a 5:​00 naŋ cho chii ni. Kɛ o Kuɛɛndoo choo, naapum a 4:00.

Ŋ Soliŋ Chondoŋ le Chɛhowa Saŋgalaa. Mi wanaa Mɛlɛkaa o sindɔɔ niŋ ndaa soli chondoŋ le Chɛhowa saŋgalaa. Nduyɛ hau bɛɛ chondoŋ cho bɔɔ nyɛ sɔvɛ o piɛile naaleŋ niŋ. (Sam 28:​7) O bɔŋaŋ naa bɛndoo, ŋ yaŋ fɛŋ nyɛchaa nilaŋ malaŋ pɛl o pɛl kanduŋ. O cho ko nyɛchaa le nyɛchaa leŋ te kɛ, nyɛchaa hoo toosiaŋ le naa malaa miŋ pɛɛku a Chɛhowa okɔɔ nduyɛ miŋ piɛi ndu. Lelaŋ, te wana cho bɔŋaŋndo kumbioo wo dimul naa pɛ maa o lo niŋ chobe mi nyɛchaa kanduŋ, mɛɛ teleŋndo cho koŋ ni miŋ kelu suukaŋndo okoŋ, miŋ kɔ chal miŋ yaŋ nilaŋ le balika melaa chɔmndo le nyɛchaa hoo. Te ŋ tosa hei pɛ, mɛɛ koŋ chɔm ni maa ŋ cho balika melaa chɔmndo le nyɛchaa kunda soliaa ŋchondoo toosiaa hoo wo. Lediiŋ o wɔsioo niŋ, mi puaapiliaa a ndepiliaa fula o lɛŋii yɛ yɛi niŋ ma kuɛ Patasiŋ Niu Yɔk, le halikpeŋ ma kɔ toosiaa chonduŋ kɛndɛŋ naŋ tuɛi muŋ yeela woŋ. Nyɛ o nyɛ nda pisi le kɔlaŋndo, ndapila paawa ndu ni. Te nyɛchaa tase naŋ yaŋ nilaŋndo chuu pɛ, naa kpou dɔu diomndaŋ naapilɛ miŋ soli chondoŋ le Chɛhowa saŋgalaa.

Naa Kɛsiaa Nyɛm Nyaanaŋndoŋ.Teleŋ o teleŋ waŋnda mal chiɛila ndalaŋ pɛ, mi viiya a wanaa wɔɔŋaa cheleŋ kɛsi nda hɔlteŋ kɔɔli le nda chiimbuu wo. Lelaŋ, mɔmbil numndo wa o baŋaa teleŋ o teleŋ nduyɛ, mɛi nyɛ o kɛsiaa leniŋ kpendekele o tosa mi waŋndo del kɔl le dioo piɔlɔɔ mbo chua wo le.

Naa chalaa Biyɔɔ. Idii o idii fondaŋ bɔŋaŋndo kumbiŋ pɛ, a yandii kua a lakil le naa chalaa ŋ hɛnaŋ nda biyɔɔ mɛɛ wana wa sɔŋga a chaaŋ num yɛ le. Sala naŋ soliŋ le yeemɛi acheleŋnda hivioo lachi wo chɔm ni kɛsɛ maa Kilisiɔŋaa tonyaa naŋ cho ni. Nduyɛ, hei tosa mi waŋnda saŋgala Mɛlɛka. (Chɔŋ 13:​34, 35; 1 Kɔliŋ. 13:​4, 5; 1 Pitɛ 2:​12) Bii naa chalaa kinɛi le wanaa nya cho chiɛiniŋnda, a nya hiŋ o mɔmbil numndo niŋnda, a pɛɛkula numndaŋ. Naa chalaa cho wa le bɛnduaa yuuwa a wanaa tiuba le nyɛ tosa a ba nda le wa. Mɛɛ fondaa hoo cho o bɔɔ le yɛ, wanaa ndaa malaa opilɛ ɔɔ a ŋiɔɔŋ kinɛi nɔ ni ma chal nda ikɛi.

Chuɛinuŋ Tuuleŋ. Chuɛiyɔŋ naa a teleŋ bɔŋaŋndo nɔ mbo wa nyɛkɛndɛi. Nduyɛ, o wa tuuleŋ. O nɔ mbo vel chuɛinɔŋ cho hau o chieeŋndo niŋndo le. (1 Timo. 2:​9) Koŋ tosa miŋ wa a kɔl kɛndɛ le yau pɔmbɔ bɔŋaŋndo landɔŋndo nduyɛ te ŋ sɔla pɛ fonda le yooŋgu kɛndɔɔ dimioo, siɔmbula ve naa le. Chuɛiyɔŋ naa a teleŋ bɔŋaŋndo vɛlɛ a kaa naa kɛndɔɔ tosa ko mi waŋnda chɛl yooŋgu kɛndɛ kiindiaa niŋ yoomula ndalaŋ o Baabuiyo niŋndo le, kɛ o nɛŋi vɛlɛ Chɛhowa kɔllo tau.—Sɛfa. 3:17.

Chɔm Kaa Kɛndɔɔ A Nyɛm maPuuloŋ. Ŋ chɔm kaa kɛndɔɔ teleŋ bɔŋaŋndo a nyɛm naŋ mapuuloŋ mɛɛ naŋ tosa ŋ bɔɔluu chandaa nilaŋ te yɛ. Te a yeema pɛ fotueiyo chuaa, diomndaŋ chuaa, ɔɔ ma nɔ nyɛ mapuulu cheleŋ ma yeema le ndu kpeku soliŋndo, a yandii paaliaŋ wanaa cho num ichali kɔɔli wa le. Ŋ chɔm vɛlɛ kaa kɛndɔɔ teleŋ bɔŋaŋndo a mɛɛ naŋ kɛɛ le yooŋgulaŋ yɔŋndo o nyɛ mapuuloo choo o fondofuu wo choo yɛ.

Teleŋ Pɛŋgi Pɔmbɔɔ. Yandii huŋ a nyɛdiaa o ba yɔŋii ŋ mal fondaŋ bɔŋaŋndo a teleŋ pɛŋgi pɔmbɔɔ ma kuɛ kela nyɛdiaa naa cheleŋ. Huŋ a nyɛdiaa o hɛŋgɛi kɛɛ sulɔɔ o kpeŋgbei ŋ cho wa ichali wo bɛŋgu le. Nduyɛ nyɛ o nyɛ cho nyɛ sani, huŋ a ndu o fondaŋ bɔŋaŋndo le.

Toolulaŋ. Mɛɛ naŋ chɔm balika melaa le kɛɛsiaala bɔŋaŋndo yɛ cho ni, tooloo yɔŋgoo le yooŋgu kɛndɔɔ hivioo lachi a teleŋ bɔŋaŋndo. A ke “Watch Tower” yauwo le mbo kɔ chua nyɛ num sɔlaa o chiɛi nda kɛsi nyɛsɔlaa wo niŋ.

Kooma Chiɔuwaŋ. Te wana chiɔuwaa chɔm num pɛ kooma ŋ nɔ le chuaa waŋ, yandii huŋ a maŋ o ba chalaŋ kanifuule, ma ve niŋ o fondaŋ bɔŋaŋndo le. Te a chii pɛ kpekoo soliŋ a siɛndima huawaŋ, wou maŋ o nyɛ nda kɛsi le billo dɔwɔɔ leniŋ o fondaŋ bɔŋaŋndo wo le. Kɔ viou maŋ naa wana yɔŋuluŋ te wa.

Silaa le Yɔŋulɔŋndaŋ. Madaŋ yɔŋii ŋ siɛɛla ɔɔ ma boŋ o tosa ma yɔŋuluŋndo. Wɔsi o wɔsi, mi yɔŋulɔŋndaŋ la tosaŋ o bɔŋaŋndo. Nyɛ tosa keŋndo cho samtala helaalaŋ ni. Lelaŋ, o bɛnda miŋ wounuŋ samtala letuula mala naa miŋ kuɛ nyɛkɛndɛi ŋ del te laŋ.

Soliŋ yau bɔmbɔɔ hoo Kpeku, Please Follow Up (Veuillez suivre l’intérêt) S-43. Te a wa pɛ seileŋ timbioo o baltaŋ niŋ a teleŋ bɔŋaŋndo mi waŋndo chɔm yeemɛi, soliŋ ndu kpeku ma poonyiaa diola ndɔlaŋ, fondaŋ ndɔɔ, a foŋ nɔmbɛi (nimbolo) ndɔɔ. Te a chii pɛ, a kɔ ke kunda cho le yaulaŋ o bɔŋaŋndo wo, ɔɔ a miiŋgu pɛ o kunda numndo niŋ, a ke wana poonyiaa.

Yɔŋgɔŋndo le Wallo. Te a yeema le malaa pɛ, kɔ dimul kunda cho le wallo o bɔŋaŋndo wo. Chuaambuaa fuuluu wɔ wɔsiŋ 16 te wa bɛɛ tosa wali kɛndɔɔ o hɔlte wana velu nda wa bɛŋgu, wana cho nda mandaa wa, ɔɔ kaasoŋnɔ cheleŋ wanaa ndaa chɛllo.