Mɛɛ Nya Pɛɛku Chua Nyaa Yɛ

Teleŋ Chɛhowa kila yuŋguleŋndo, kalaŋchuauwa o handu chuauwaa ndaa chilaŋ ni. (Kolosiaŋnda 3:​20) Num kala chuaa, kalaŋndo icho ni le ma pɛɛku chua numndo le Chɛhowa kaalaa. Nduyɛ, le mbo biiŋ bila le siɔdii ndɔ lachioo. (2 Timoti 1:​5; 3:​15) A nɔ ma sina nyɛ cho chua numndo o kɔl lo. Kɛ tamaselii numndo bɛɛ cho nyɛ sɔvɛ. Le ma pɛɛku chua numndo Diom Chɛhowaa nyɛkɛndɛi, mɛɛ mi numpila nɔ ndu fɛŋ o kɔl.—Sam 40:​8.

1 LA TOSA MI CHUAUWAA NYAA WA FƐƐSƐŊ LE SUƐI O NYALO

NYƐ BAABUIYO DIMI WO: “Va wana keleŋa isɔɔ lani yaŋɔɔ. Kɛ va wana soo chɔ chɔ le.” (Chemisi 1:​19) Chuauwa nɔ ma sina maa la cho o bɛɛndiaŋ le nda nilaŋ yaŋɔɔ te a yeema pɛ suɛi o nyalo. La tosa mi chiɛi nyaa wa fondaŋ kɔl nyulu le mi chuauwaa nyaa wa fɛɛsɛŋ le suɛi o nyalo. (Chemisi 3:​18) Te a sina pɛ maa la nɔ kɔl tuuwo, ɔɔ la kiisaŋ a nda, a ve fɛɛsɛŋ le nya sɔɔŋ dimullo le. La wa nda biunɔŋndo. Nduyɛ, la dimul nda lɔɔlɔɔ mɛɛ nya nɔ kaalaa le nda yɛ.—Maatiu 3:​17; 1 Kɔliŋtiaŋ 8:1.

NYƐ Ŋ NƆ MA TOSA WO:

• La nɔ teleŋndo te chuauwaa nyaa yeema pɛ suɛi o nya lo

• La dɔu baltaŋ a chuauwaa nyaa lɔɔlɔɔ, o cho ko teleŋ bahawɛilaŋ la wa wo le

2 LA KINDIŊ MILA SINA NYƐ NDA YIYAŊNDO

NYƐ BAABUIYO DIMI WO: “Wana chɔm taasioo o suɛi niŋndo, cho batiuwaa sɔla.” (Pɔlɔwaa 16:​20) Lepum, la nɔ mila chɔm taasioo o nyɛ chuauwaa nyaa wa suɛiyo le sinaa nyɛ cho nda o kɔllo. Lepum mi feleŋguaa dimi sɔɔŋ cheŋ nda o kɔl te woŋ. “Te waŋndo kelu pɛ yamɛi o suɛi niŋ tuupa mbo sina tonyaa, mɛɛ diɔmndo o cho ni.” (Pɔlɔwaa 18:​13) La tuulu kɔl chɔ chɔ le.—Pɔlɔwaa 19:​11.

NYƐ Ŋ NƆ MA TOSA WO:

• O yɔŋ bɛɛ mila hini kɔl a nyɛ nda wa dimioo wo le, la kialu nda suɛi o sondo, ɔɔ mi kɔllo hiu nya fula a nda le

• La keela kɔllo mɛɛ nya bɛɛ nyaa tosa boondii nda fuuluu ve yɛ, nduyɛ a nyɛ nyaa yeema tosaa wo

3 LA NƆ DIOMPILƆƆ O NDA SILAA NIŊ

NYƐ BAABUIYO DIMI WO: “Po nuu, yaŋ nilaŋ o sila finya numndo. Nduyɛ, kɛɛ sila kala numndo le.” (Pɔlɔwaa 1:​8) Chɛhowa ke finyaa nda kalaa dioo le ma wa chuauwa chilaŋ. La nɔ mila pɛɛku chuauwaa nyaa le nya diikɔŋndo. (Ɛfisiaŋnda 6:​1-3) Mi chuauwa sina te wanaa velu nda wa nɔ pɛ diompilɔɔ o yiyaŋnda ndalaŋ niŋ. (1 Kɔliŋtiaŋ 1:​10) Te la chɛlaŋ o sɔɔŋ pum choo le, la tosa mi chuauwaa nyaa sina le. Kanifuule, hei tosa a ke nya lebɛɛ le.

NYƐ Ŋ NƆ MA TOSA WO:

• La suukaŋ mɛɛ nya cho wa chuauwaa nyaa silaa yɛ

• Te num a wana nya cho o nɔɔ niŋndo nɔ yiyaŋnda pilɛ a mɛɛ nya sila chuauwaa nyaa yɛ le, mɛɛ kindiŋ ma che yiyaŋ ndɔɔ

4 LA TOSA KƐƐSIAA

NYƐ BAABUIYO DIMI WO: “Pɛɛku chua numndo a mɛɛ o bɛnda le ndu yɛ.” (Pɔlɔwaa 22:6) Le fulamakɔɔli kɛndɔɔ sɔlaa o chuauwa pɛɛkoo niŋ, o cho bale chuaa lɛŋ te. A nɔ ma tosa kɛɛsiaa kɛndɔɔ le nda pɛɛkoo, a nda silaa. (Sam 127:​4; Pɔlɔwaa 29:​17) Chuaa silaa cho ko ndu lɔɔ le. Kɛ pɛɛkoo ndu le mbo sina le sabu nya kɛsi sawalaŋ o yuŋgoo niŋndo. (Pɔlɔwaa 28:​7) Pɛɛku nda vɛlɛ le Diom Chɛhowaa kaalaa, nduyɛ ma sina sawala ndɔlaŋ lapɛŋgu. (Sam 1:​2) Hei mala nda ma sɔla kɔl iyama walaŋndo.—Hibuluiya 5:14.

NYƐ Ŋ NƆ MA TOSA WO:

• Tosa a sabu mi chuauwa che maa Mɛlɛka cho wana kpeekpei nda nɔ ma tiindaŋndo ni

• Mala nda le ma che kpundɛla cho o kaala nɔɔlɛilaŋ niŋndo, nduyɛ ma kpakpala laŋ. Le tamaseliiyo, mɛɛ chaŋyaŋ biyɔɔ o Intanɛtiiyo choo cho naa yɛ. La pɛɛku nda ma wa yekeŋ a wanaa kpuviaa