Tɔnɔ Kuɛɛ Chuuŋgiaŋndo a Chaaŋaa Naa Kilisɔŋnda Chuu yɛ Naa?

O yɔŋ o nɛila yondo ni, o piɔɔ bɛŋgu ni, paale wa fula ni, lɔɔ hiu naa miŋ kɛɛ kɔlaŋ o bɔŋaŋnda naala leKilisɔŋndaŋ te. Seiyaa Chɛhowaa nɔ bahawɛilaŋ tau. Lepum, ma wa a saŋgɛi yɔkɔ te a fula pɛ wallo. Kɛ a koŋ kpou, ma keeku o nɛi o nɛi niŋ le kɔlaŋ o bɔŋaŋndaŋ nda chaaŋaa ndaa wanaa laalaŋnda. Le yɛɛ nda tosa yɛ hei?

Chuuŋgiaŋndo mala naa miŋ biunuŋ kpɔkɔsila komal naalaŋ. Mi kiilanɔɔ Pɔɔl poonyiaa aa: ‘La ŋ puɛɛyaŋ vellaa velle le.’ A chaaŋaa naa wanaa laalaŋnda okɔɔ o wa suɛi ni. (Hibuluiya 10:24) Nyɛ Pɔɔl dimi hoo wo sim ni maa “ŋ nɔ miŋ wa yiyaŋ ndo a nda okɔɔ lɔɔlɔɔ,” ndu cho ni, le miŋ siiniaŋ vellaa velle. Lelaŋ, diomnda Pɔɔl dimi landaŋ la cho naa dɛɛniaa le miŋ nɔ buulaŋndo le opilɛ a o cheleŋndo. Te ŋ sina pɛ chaaŋaa naa Kilisɔŋnda o kundala cheleŋ niŋ, koŋ mala naa miŋ sina nyɛ kindilaa nda kei niŋndo. Hei mala naa miŋ biunuŋ nyɛ kindilaa cho naa cho wo. O hei niŋ, ŋ tiu ba miŋ maaliaŋ vellaa velle.

Chuuŋgiaŋndo tosa mi chaŋyɛi nɛi kendu poŋ. A chaaŋaa naa kpeekpei naŋ kua o bɔŋaŋnda naalaŋ ni. Teleŋndaŋ lapum, miŋ chuuŋgiaŋ naapilɛ le pisultaŋ. Tɔnɔ kuɛɛ pisultaŋ ndaŋ la chuu yɛ naa? O pisultaŋ ndaŋ choo, miŋ pɛɛku le wana o wana bɛɛleŋ kioo. Koŋ tosa mi kaala naa hiou lachi a kiondɔɔ poŋ. Te o yɔŋ pɛ mi chaaŋaa naa wanaa laalaŋnda sɔla bahawɛiyo, miŋ mala nda. Kanifuule naa kpou wanaa pilla naŋ cho ni o chaŋyɛi niŋ. (Pulɔwaa 17:17) Hunɔɔ naapilɛ naa wanaa naŋ cho o kundaa niŋ nda chɔm maa ŋ buulaŋ le opilɛ a o cheleŋndo. (Kɔliŋtiaŋ Tasoo 12:25, 26).

Ŋ cho num dɛɛniaa le ma tosa chaŋyɛi a wanaa cho hɛnaŋ Mɛlɛkaa tosaa wa. A saaluŋ chaŋyɛi waa naa Seiyaa Chɛhowaa tɛɛŋ. Yandii, chɛl mi nyɛ o nyɛ kuuna num chaŋyɛi tosaa a naa le.

• Yɛɛ ŋ cha yɛ te o yɔŋ pɛ ma kuɛ o bɔŋaŋnda Seiyaa Chɛhowaa?

• Teleŋ kuɛɛ num yeema yɛ ma kandu kɔlaŋ o bɔŋaŋnda Seiyaa Chɛhowaa?