Sɔɔŋ Tɛɛsiaŋndoŋ le Yoomu Naa a Wali Pollo Yau Wali Bɔŋaŋndo
© 2024 Watch Tower Bible and Tract Society of Pennsylvania
FUOO 3-9
NYƐM TƆƆMAŊ O DIOM MƐLƐKAA NIŊ POLOWAA 3
Chɔm Maa a Nɔ Tiindaŋndo o Chɛhowa Niŋ
ijwbv buŋgɛi 14 ¶4-5
Polowaa 3:5, 6—“Tiindaŋ Sina Num Pɛŋgoo Le”
“Tiindaŋ Chɛhowa a kɔl numndo kpou.” Ŋ Chɔm maa ŋ tiindaŋ Chɛhowa te ŋ tosa pɛ sɔɔŋ o nɛi o hɛnaŋndo choo. Ŋ nɔ miŋ tiindaŋ Chɛhowa a kɔl naa kpou. O Baabuiyo niŋ kɔllo sim le wana suu waŋndo cho o kɔllo niŋ kpeekpeiyo. O baa pilɔɔ choo, ‘kɔllo’ sim le yiyaŋnda naalaŋ, yeemaŋ naŋ, vɛlɛ a kɛɛsiaala naalaŋ. Lelaŋ, Mɛlɛka tiindaŋndo a kɔl naa kpou nɔ mbo hiou yeemaŋ naŋ. Kɛɛsiaa naapila tosa wo cho koŋ ni, kanifuule ŋ nɔ tiindaŋndo maa Wana Toosiaa sina nyɛ cho o kɛndɔɔ le naa wo.—Luomaŋnda 12:1.
“Tiindaŋ sina num pɛŋgoo le.” Ŋ nɔ miŋ tiindaŋ Mɛlɛka kanifuule, ŋ sina maa ŋ nɔla miŋ tiindaŋ yiyaŋnda naala lahakilaŋ te. Te o yɔŋ pɛ miŋ tiindaŋ naapila, ɔɔ miŋ chɛl mi yeemaŋ naŋ nyindu naa le sɔɔŋ pum tosaa, naapum o kandɔŋndo miŋ che muŋ maa sɔɔŋ kɛndɔŋ ŋ cho ni, kɛ o mɛɛlulaŋ miŋ sɔla fulamakɔɔlila wɔɔŋndaŋ. (Polowaa 14:12; Chɛluimaya 17:9) Taasi Mɛlɛkaa hiou taasi waŋnda chieeya poloŋ. (Aisaya 55:8, 9) Te ŋ chɛl pɛ mi taasi ndɔɔ manda naa ŋ cho batiuwaa sɔla o yoomoo niŋ.—Sam 1:1-3; Polowaa 2:6-9; 16:20.
ijwbv buŋgɛi 14 ¶6-7
Polowaa 3:5, 6—“Tiindaŋ Sina Num Pɛŋgoo Le”
“Nyɛ o nyɛ ŋ wa pɛ tosaa, puɛɛnuŋ a ndu le.” Ŋ nɔ miŋ kindiŋ le sinaa yiyaŋ Mɛlɛkaa o nyɛ o nyɛ naŋ wa pɛ tosaa o yoomoo niŋ, ɔɔ kɛɛsiaa kɛ kɛ naŋ wa pɛ tosaa. Ŋ tosa hei te ŋ wa pɛ piɛileŋ o ndulo, le mbo chɔm naa nɛila ndɔla chɔmaalaŋ, a le miŋ dɔu nyɛ naŋ pɛɛku o Baabuiyo niŋndo o wali niŋ.—Sam 25:4; 2 Timoti 3:16, 17.
O “cho tosa mi nɛila numndaŋ la wa sakpo.” Mi Mɛlɛka tosa mi nɛila naalaŋ la wa sakpo sanaa a naa malaa miŋ bii yoomu naa mbo wa o chɛlaŋ a sawala ndɔla diandaalaŋ. (Polowaa 11:5) Miŋ fafaŋ sɔɔŋ chuu naa kpundɔɔ woŋ tosaa, okoŋ miŋ wa a kɔl kɛndɛ o yoomoo niŋ.—Sam 19:7, 8; Aisaya 48:17, 18.
be 76 ¶4
Tosa Hiouwɔɔ Lachioo
Le mɛɛ sɔɔŋ bɔɔbɔɔ komal naa niŋ o yoomoo niŋ yɛ, naapum mi keŋ tosa mi waŋndo yiyaŋ maa: ‘Simul waa nuaa komalla niŋ paandu. I sina nyɛ ya cho tosa wo.’ Baa suɛi taasiei pa cho hei ni? Polowaa 3:7 sila naa aa: “Tiindaŋ taasi numndo le.” Mi sɔɔŋ yɔŋnuŋ naa o yoomoo niŋndoŋ mala naa le sɔɔŋ cheleŋ komal niŋ naa o chilaŋ niŋndo biuwɔŋndo. Kɛ te ŋ wa pɛ hiouwɔɔ lachioo tosaa o Mɛlɛka piɛiyo niŋ, sɔɔŋ yɔŋnuŋ naa woŋ nɔ miŋ loonuŋ naa maa, ŋ yeema salala Chɛhowa laŋ le miŋ sɔla batiuwaa. Mi waŋnda che hiouwɔɔ lachi naa kpendekele, te o yɔŋ pɛ miŋ tiindaŋ Chɛhowa le mbo chɔm naa nɛila chɔmaalaŋ o yoomoo niŋ, kɛ o cho tiindaŋndo dɔwɔɔ o naapila niŋ te. Hei chɔm vɛlɛ tiindaŋ naŋ nɔ wo maa, nyɛ o nyɛ komal naa mi Chɛhowa kɛɛ sina a ndi okɔɔ le. Nduyɛ tiindaŋ naŋ nɔ o Chɛhowa niŋndo chɔm mɛɛ kpɛ chaŋyɛi kɛndɛi cho naa tɛɛŋ yɛ.
Nyɛm Tɔɔmaŋ Mɛlɛkaŋ
w06 9/15 17 ¶7
Sɔɔŋ Kulloŋ le Yau Polowaa Wo
3:3. Ŋ nɔ miŋ che kaala lo lechoo wo a tonyaa maa nyɛ sɔvɛ bɛndu. Nduyɛ miŋ chɔm suliŋndaŋ ndaŋ o yoomu naa niŋ mɛɛ ko naŋ wounuŋ nuaa yɔlɔŋ baa kalaŋ o labolo yɛ. Nduyɛ miŋ poonyiaŋ suliŋndaŋ ndaŋ o la kɔl, le miŋ wa laŋ chɔmndo o yoomu naa niŋ teleŋ o teleŋ.
FUOO 10-16
NYƐM TƆƆMAŊ O DIOM MƐLƐKAA NIŊ POLOWAA 4
“Manda Kɔl Numndo”
Vɛɛ Ŋ Manda yɛ Kɔl Numndo?
4 Diomndo hoo ‘kɔllo’ o Polowaa 4:23 niŋ sim, le ‘wana suu waŋndo cho kpeekpei o kɔllo niŋndo.’ (Nuawɔ Sam 51:6) O baa pilɔɔ choo, ‘kɔllo’ sim le yiyaŋnda naalaŋ, yeemaŋ naŋ, vɛlɛ a kɛɛsiaala naalaŋ. O sim vɛlɛ le wanaa suu naŋ cho kpeekpei o kɔllo niŋnda, o cho ko mɛɛ waŋnda cha naa yɛ le.
Vɛɛ Ŋ Manda yɛ Kɔl Numndo?
10 Te ŋ sɔla niŋ pɛ batiuwaa le kɔlta naalaŋ mandaa, ŋ nɔ miŋ sina kpundɛlaŋ, nduyɛ miŋ keleŋa nyɛ tosa le naapila mandaa. Diomndo hoo “mandaŋ” o Polowaa 4:23 niŋ, yiyalaŋ naa a wali wana mɛŋgɛlaa tosa wo okɔɔ. O teleŋ Masaa Sɔlɔmɔŋ ndo niŋ, o kpaki chioo choo wanaa mɛŋgɛlaa ndaa sim ni nduyɛ te ndaa che dɔɔ pɛ yaamɔɔwaa hunɔɔ, a deŋi choo choo le mi waŋnda sina. Yiyaŋndo o hei choo mala naa miŋ sina nyɛ naŋ nɔ miŋ tosa wo le halikpeŋ Setana pɔsɔŋiaa yiyaŋnda naalaŋ te.
11 O sindɔɔ niŋ, mi wanaa mɛŋgɛlaa ndaa tosa wallo latulu a wanaa wa diola kpaki chioo mandaa wa. (2 Sam. 18:24-26) Nduyɛ, mi ndaa tosa a sabu le mi diola kpaki chioo la wa la kiindiaa te yaamɔɔwaa wa hunɔɔ pɛ. (Nɛhi. 7:1-3) Mi kɔl iyama naa tosa wallo maa wana mɛŋgɛlaa. Nduyɛ, mbo sila naa te Setana wa pɛ kindiŋndo le naa luɛiyɔɔ o lakɔl. Ndu cho ni, te o wa pɛ kindiŋndo le yiyaŋnda naalaŋ, yeemaŋ naŋ, vɛlɛ a kɛɛsiaala naalaŋ pɔsɔŋiaa. Te kɔl naa iyamaa chɔm naa pɛ maa kpundɔɔ cho hunɔɔ, ŋ nɔ miŋ yaŋ nilaŋ, nduyɛ miŋ tosa nyɛ o nyɛ le kpundɛ koŋ fafaŋndo.
Vɛɛ Ŋ Manda yɛ Kɔl Numndo?
14 Le miŋ manda kɔl naa, ŋ nɔ ko miŋ kɛɛ yiyaŋnda wɔɔŋndaŋ te, kɛ ŋ nɔ vɛlɛ miŋ chɛl yiyaŋnda kɛndɛlaŋ. Yiyaŋndɔ vɛlɛ a tamasi diola kpaki chioo naŋ soo suŋ a laŋ okɔɔ laŋ. Mi wana wa diola kpaki chioo mandaa wo ndoo kiindiaa diolaŋ te yaamɔɔwaa ndaa wa pɛ hunɔɔ. Nduyɛ a teleŋ cheleŋ, mi ndoo kumbi diola kpaki chioo le mi waŋnda ndaa luɛi a nyɛdiaa vɛlɛ a nyɛm cheleŋndoŋ o chioo niŋ. Te diola kpaki chioo laa kumbiŋ kposoŋ te, mɛɛ wanaa wa o chiee koŋ niŋnda wa wu a yiaŋ. O nɛi pilɛ koŋ choo, ŋ nɔ miŋ kumbi kɔlta naalaŋ teleŋ o teleŋ le yiyaŋnda Chɛhowa laŋ chɛlɔɔ.
w12 5/1 32 ¶2
“Manda Kɔl Numndo”
Le sabu yɛɛ naŋ nɔ yɛ miŋ manda kɔl naa? Mi Mɛlɛka tosa a sabu mi Sɔlɔmɔŋ poonyiaa diomndaŋ ndaŋ aa: “O nyɛm ŋ nɔ ma manda woŋ tɛɛŋ kpou, manda kɔl numndo. Kanifuule, lechoo yoomu wanachioo tɔlnuŋ ni.” (Polowaa 4:23) Yoomu naa suŋ suŋ vɛlɛ a o chilaŋ niŋ tɔlnuŋ a mɛɛ naŋ cho kɔl naa mandaa yɛ. Le yɛɛ? Kanifuule o kɔllo niŋ Mɛlɛka cha ni. (1 Saamiɛɛ 16:7) Mɛɛ kpeekpei naŋ cho o kɔllo niŋ yɛ Mɛlɛka cha naa wanaa sɔvɛ ni. Lelaŋ ‘naŋɔɔ naa nɔ mbo wa mɛɛ naŋ cho o kɔlta naalaŋ niŋ yɛ.’—1 Pitɛ 3:4.
Nyɛm Tɔɔmaŋ Mɛlɛkaŋ
A Cho Pa o Bɛɛndiaŋ le Chɛhowa Chumndo?
4 Polowaa 4:18 dimi aa, “Nɛi wanaa sakpuaa cho ko mɛɛ paaleŋ le fula nuaa idii, mi le lo helɔɔ a diondɔɔ haaa mi le fuuluu o bolleŋ choo di yɛ.” Bolle Baabuileŋ le chɔm kpendekele maa, o pɔmpɔmbɔ Chɛhowa chɔm buɛiyaa nduaa sɔɔŋ o tuu le tosaa woŋ ni. Le chɔm vɛlɛ mɛɛ Kilisiɔŋnɔɔ tosa siŋgaŋndaŋ o yoomu ndɔɔ niŋ, le halikpeŋ mbo tosa hiouwɔɔ lachioo o Mɛlɛka piɛiyo niŋ yɛ. Wana tosa hiouwɔɔ lachioo o Mɛlɛka piɛiyo niŋ luku luku le. Te ŋ pɛɛku pɛ Diom Mɛlɛkaa nyɛkɛndɛi, miŋ dɔu sila naŋ cho sɔlaa leniŋndo o wali niŋ, nduyɛ miŋ tol nɛi chɔmaa kɔɔna Chɛhowaa kɔɔli, keŋ cho naa mala miŋ nɔ suliŋnda Kiliti laŋ. Keŋ cho vɛlɛ naa mala miŋ chɔɔlu Mɛlɛka sina nyɛkɛndɛi. Ŋ yaasiaŋndɔ miŋ che mɛɛ Chiisu tuu hei yɛ.
FUOO 17-23
NYƐM TƆƆMAŊ O DIOM MƐLƐKAA NIŊ POLOWAA 5
Fafaŋ Kaa Ihini Nɔɔlɛiyo
w00 7/15 29 ¶1
Ŋ Tiuba Miŋ Wa a Diandaa o Chieeŋ nɔ Hoo Kaa Ihini Nɔɔlɛiyo wo Niŋ
Wana laasiaŋ yau Polowaa so a ndu okɔɔ wo cho wana lanɔ suundɛiyo ni. Diomnda o soliŋ kpeku le waŋnda huiyo laŋ la yeela naŋ chaa liaaŋ ni. Nduyɛ sondo ndɔɔ chuluka o hiou chuɛima ɔlifiiyaŋ. Baa o cho o nɛi waa nuaa choo le kaa ihini nɔɔlɛiyo kanduŋ te? Ŋ tofaŋndɔ tamaselii Ami cho wɔsilaŋ 27 wo. Wana poonyiaa o wa o fondaŋ wallo ni. Mbo dimi aa: “Mi poo o fondaŋ wallo kandu ya hɔlla mulullo, nduyɛ mi ndoo saŋgala ya teleŋ o teleŋ. Miŋ che bɛɛ naa miŋ naŋ kɔl tau te waŋndo saŋgala naa pɛ, kɛ mi cha kɛsɛ maa yeemɛi poo hoo ndoo nɔ o ya niŋnde wa le kaa ihini nɔɔlɛiyo tosaa ni. I chɛl le mbo hiou lachi a ya saŋgalaa o nɛi waa nuaa choo le.” Miŋ kuɛ le diomnda yeelɛila wanaa suundɛiya soliŋ kpekulaŋ hɛnaŋndo. Kɛ ŋ nɔ miŋ wa yekeŋ le sinaa tonya kpeekpei cho a laŋ okɔɔ wo. Sinapɛŋgoo mala naa ni le hei fafaŋndo.
w00 7/15 29 ¶2
A Nɔla Ma lo o Diandaa o Chieeŋ Nɔɔlɛiyo Hoo Niŋ
Fulamakɔɔlila kaa ihini nɔɔlɛiyo huŋ ndaŋ la lol naŋ chaa yɔm lolɛiyo ni, nduyɛ la luɛi naŋ chaa muɛi sondola tiɔɔŋnde ni. Mi wana sinaŋ nyɛ nɛiyaa ndɔɔ tau nduyɛ o mɛɛlulaŋ ma sɔla piɔmndo. Fulamakɔɔlila wɔɔŋ wɔɔŋnda naŋ sɔla laŋ la cho ni, kɔl iyama naa paaliaŋndo, foli naŋ ve kɔl te wo chuaa, a naala wɔɔŋ taŋ o kaa ihini nɔɔlɛiyo niŋndaŋ sɔlaa. Yiyaŋndɔ vɛlɛ mɛɛ wana nya cho o nɔɔ niŋndo sinaŋ yɛ, te a kɛɛ pɛ le lo lechoo wo chɔmndo. Kiɔɔ lo lechoo wo chɔmndo lepilɛ kpe, tɛɛmbuu naa kɔllo tau nduyɛ mi hei kuɛ haaa a yoomu naa mɛɛlulaŋ. A tonya, mi kaa ihini nɔɔlɛiyo tɛɛmbuu naa kɔllo tau.
w00 7/15 29 ¶5
A Nɔla Ma lo o Diandaa o Chieeŋ Nɔɔlɛiyo Hoo Niŋ
Ŋ nɔ miŋ kindiŋ le miŋ fafaŋ sɔɔŋ wanaa kaa ihini nɔɔlɛiya tosa ŋ vɛɛlu naa le balaŋ wouwo o kaa wɔɔŋndo hoo niŋndo. Baa o bɛnda pa miŋ chɛl le nɛila ndalaŋ soliŋndo kpeku, mɛɛ nilaŋ yaŋɔɔ o nyɛchaa nɔ diomnda nɔ kaa ihini nɔɔlɛiyo laŋ, yelelaŋ nɔɔlɛiyo tofaa ɔɔ miŋ yɔŋguŋ le fotueila tumfondolaŋ tofaa? (Polowaa 6:27; 1 Kɔliŋtiaŋ 15:33; Ɛfisiaŋnda 5:3-5) Nuawɔ se mɛɛ i cho suɛi diɔm te ŋ chɛl pɛ sɔɔŋ yeelɛi nda dimi woŋ ɔɔ miŋ wounuŋ nyɛla bɛnda le laŋ!—1 Timoti 4:8; 1 Pitɛ 3:3, 4.
Nyɛm Tɔɔmaŋ Mɛlɛkaŋ
w00 7/15 29 ¶7
Ŋ Tiuba Miŋ Wa a Diandaa o Chieeŋ nɔ Hoo Kaa Ihini Nɔɔlɛiyo wo Niŋ
Mi Sɔlɔmɔŋ kindila fulamakɔɔlila naŋ sɔla laŋ te ŋ chɛl pɛ le kaa ihini nɔɔlɛiyo tosaa. Mi kiɔɔ lo lechoo wo chɔmndo tosa, waŋnda nɔ lebɛɛ le naa le, nduyɛ ŋ nɔ lebɛɛ le naapila le. Baa i cho suɛi lasiɔmbu te ŋ tosa pɛ kaa ihini nɔɔlɛiyo le yeemaŋ naŋ peeloo ɔɔ le wana cheleŋ te? Te ŋ tosa pɛ kaa ihini nɔɔlɛiyo a wana naŋ cho o nɔ niŋ te wo, baa hei chɔm naa maa ŋ nɔ lebɛɛ le naapila le le?
FUOO 24-30
NYƐM TƆƆMAŊ O DIOM MƐLƐKAA NIŊ POLOWAA 6
Yɛɛ Naŋ Pɛɛku yɛ Sisiŋnda o Ba?
it-1 115 ¶1-2
Sisiŋndo
‘Taasi Sisiŋnda Nɔ Wo.’ Taasi sisiŋnda nɔ wo cho mɛɛ taasi wanaa sinaa dɛniaa cho yɛ le, kɛ o chɔm mɛɛ Wana Toosiaa nɔ taasioo le nyɔɔŋ toosiaa yɛ. Mi Baabuiyo suaa a sisiŋnda okɔɔ aa: “Ma nuuviaa nyɛdiaa a wɔɔleŋ, nduyɛ ma chuuŋgiaa ndu a teleŋ chiɔɔŋ kuauwaŋ.” (Po 6:8) Ŋ saaluŋ sisiŋnda suu wo pum o Palɛsitaŋ niŋ. Mi sisiŋnda haa chuuŋgiaa nyɛdiaa ndaa a wɔɔleŋ nduyɛ ma soliŋ ndu kpeku a sialteŋ, ɔɔ a teleŋ i wa ikala le nyɛdiaa sɔlaa wo. Miŋ saaluŋ sisiŋnda haa o fondaŋnda nda luaa witiiyoŋ ndaŋ, ɔɔ fondaŋnda kulloŋ a nyɛdiaa wa tau laŋ. Te piɔɔ sia pɛ tau nduyɛ mi nyɛdiaa ndaa liva, mi sisiŋnda haa soli nyɛdiaa ndaa o paaleŋ le mbo vesa. Sisiŋnda haa sina naa kulloŋ wul la, lelaŋ ma tɛɛmbuu fondaŋ ndalaŋ yɔŋii ŋ wul naa nda kɛsi muŋ nda. Te sisiŋnda haa wa pɛ kunda bɛndoo, ma toosiaa sooŋnda ndalaŋ nyɛkɛndɛi le halikpeŋ ma wa tɛfɛla nyɛdiaa nda dia wo solioo o bɛɛ.
Kalaa Kɛndɛla Sisiŋnda Nɔ Laŋ. Tɛɛsiaa biŋgi cho hoo a sisiŋnda okɔɔ wo dɛɛniaa naa tau. Mi Baabuiyo dimi aa: “Num wana siɛlɛiyo, kɔ ma kɔ pɛɛku sisiŋnda o ba. Mɛɛndaŋ mɛɛ nda tosa sɔɔŋ yɛ, okoŋ ma simnuŋ wana taasi.” (Po 6:6) O cho nyɛdiaa sisiŋnda bɛɛndiaa le chilaŋ ndo le tosa nda nyaa sɔvɛ le, kɛ lambaŋ ndaa a dialuŋ fulaa nda nɔ woŋ tosa nda nyaa sɔvɛ ni. Teleŋnda bɔɔbɔɔ ma chua wolɔɔla le kɔlaŋ a laŋ o yɔŋ bɛɛ mi la hiou nda lusullo. Ma tosa nyɛ o nyɛ nda tiuba le halikpeŋ ma sɔla batiuwaa o wali ndaa niŋ. Lepum, o yɔŋ bɛɛ ma del ɔɔ ma pimbul a wolɔɔlaŋ, a vi ŋdial le kɔlaŋ a laŋ te. Nyɛ sɔvɛ cho vɛlɛ a sisiŋnda okɔɔ wo cho ni maa, ma tosa wallo o diompilɔɔ niŋ, ma kɛsi fondaŋnda ndalaŋ la diandaa, nduyɛ ma chɔm buulaŋndo le chaaŋaa ndaa. Ma mala chaaŋaa ndaa yɔŋuluŋ nda nduyɛ ma miŋgi a wa a saŋgɛiya wa o sooŋnda nda laŋ niŋ.
w00 9/15 26 ¶3-4
Manda Diola Numndaŋ
Maa sisiŋnda, baa o bɛnda miŋ tosa wallo kalaŋ te? Wallo tosaa kalaŋ ɔɔ kindiŋndo le miŋ chaa wali naa tosaa cho bɔɔ nyɛ sɔvɛ le naa, o yɔŋ bɛɛ ma wa naa mɛɛndaŋndo o ndu tosaa niŋ ɔɔ miŋ wa kpeele. A tonya, o yɔŋ bɛɛ a o sukuu naŋ cho ni, fondaŋ naŋ tosa wallo wo ɔɔ miŋ wa sɔɔŋ iMɛlɛkayaŋ tosaa, ŋ nɔ miŋ tosa o naŋ tiuba wo nyɛkɛndɛi. Mɛɛ sisiŋnda sɔla nuaa tɔnɔɔ le wali ndaa yɛ, lende Mɛlɛka yeema naa ni miŋ ‘de saŋga naa kpou tɔnɔ.’ (Ikilisiaati 3:13, 22; 5:18) Kɔl iyama walaŋndo a kɔl hiniaa cho fanda naŋ sɔla le wali kala naŋ tosa wo ni.—Ikilisiaati 5:12.
Mi Sɔlɔmɔŋ nyuna nyunala la tiɔɔŋ, le wana siɛlɛiyo malaa mbo fafaŋ siɛlɛiye. Mbo nyuna aa: “Num wana siɛlɛiyo, vɛɛ kpɛ ŋ cho yɛ viouwɔɔ ihini? Teleŋ kuɛɛ ŋ cho yɛ tiondɔɔ o luaŋ ma chɛŋ?” Mi masaa hoo dimi suɛi mamɛi le ndu mamɔɔ mɛɛ o dimi aa: “Hiniŋ ma siɛndiŋ nyɛɛmbɔ, nduyɛ ma kafala balaŋ le pɛŋgioo nyɛɛmbɔ, lende koni bala fondolaŋ la cho num komal ni maa viinɔ, nduyɛ mi kuɛi tol num choo mɛɛ wana yekpandioo tual nuaa waŋndo choo yɛ.” (Polowaa 6:9-11) Mi wana siɛlɛiyo saŋga tau, mi bala fondolaŋ la komal ndu, o nɔ ko nyɛdiaa le, nduyɛ mbo wa mɛɛ wana yekpandioo tual nuaa waŋndo choo yɛ. Mi chiɛi wana siɛlɛiyo tosa ve simnuŋ billo kpu, nduyɛ tɔnɔ bɛɛ o sɔla le. (Polowaa 24:30, 31) Mi yulale ndɔleŋ le tambu o lepilɛ niŋ kpe. Le vɛɛ kpɛ wana ndɔ bɛndoo o wallo niŋ cho yɛ ndu chɛlɔɔ le mbo hiou lachi a hei tosaa? Baa sukuunɔ nɔ siɛlɛiye le pɛɛkoo wo tosa pa nyɛkɛndɛi o sukuu?
Nyɛm Tɔɔmaŋ Mɛlɛkaŋ
w00 9/15 27 ¶3
Manda Diola Numndaŋ
Mi yau Polowaa wo suaa a sɔɔŋ wɔɔŋndoŋ ŋɔmmɛu ŋ cho puundule sɔɔŋ wɔɔŋ cheleŋ kpou wo okɔɔ. “Tofa yoŋgaa,” a “sɔɔŋ wɔɔŋndoŋ tuunɔŋndo o kɔl le waŋndo,” cho hakila naŋ tosa o yiyaŋnda naalaŋ niŋndo ni. “Choolaŋ dimioo,” a “wana timbi seile lachoowaleŋ teleŋ o teleŋ ndo,” cho haki naŋ tosa o nyɛ naŋ suaa wo niŋ ni. “Wana tɛɛmbuu isɔɔ le wo diyɔɔ” a “wana nyaanuŋ hoo chɔ chɔ le dɛnɛ wɔɔŋndo tosaa wo,” cho kaala wɔɔŋ wanaa dɛnɛ wɔɔŋnda tosalaŋ ni. Nduyɛ haki Chɛhowa tul vɛlɛ leyɛ wo cho wana kindiŋ le kɔl nyulu chaanda tɛɛmbuuwo wo ni. Le mɛɛ sɔɔŋ muŋ chɔɔlu helɔɔ chɔŋ ŋɔmpum haaa ŋɔmmɛu yɛ, chɔm ni maa o cho sɔɔŋ muŋ koni le Chɛhowa tul leyɛ le. Kanifuule waŋnda chieeya cho hiouwɔɔ lachi a sɔɔŋ wɔɔŋ cheleŋ tosaa.
FUOO 31–NYAAKUƐIYO 6
NYƐM TƆƆMAŊ O DIOM MƐLƐKAA NIŊ POLOWAA 7
Fafaŋ Sɔɔŋ Luei Num o Tɔɔndaŋndo Niŋndo
w00 11/15 29 ¶5
“Bii Sawala Nilaŋ le Ma Wa Yoomu”
Windɛi Sɔlɔmɔŋ wa nuaa o chiɛi ndɔɔ wo, wanaa tiuba ma che le kɔɔli walaŋ. Naapum a yɔmnde ndaa toosiaa tuuliaala wa o windɛiyo hoo laŋ ni. Hei yɔŋnuŋ a paale delaaleŋ, a fitilioo, teleŋ nyumndaŋ ma kandu tolɔɔ wo. Mi Sɔlɔmɔŋ cha po feleŋgɔnɔɔ kelaa nduyɛ nyɛ o nyɛ ve ndu o ba le ndu manda le. Po feleŋgɔnɔɔ hoo ndoo nɔ kɔl kalu bɔɔ le, nduyɛ ndoo kindu kɔl te. Naapum ndoo sina fondaŋ suu o kuɛ wo vɛlɛ a nyɛ wa ndu yɔŋnɔŋ loŋ ndo. Mi po feleŋgɔnɔɔ hoo keeku o “kolo kolo” wana lanɔ suundɛiyo ikɛi, nduyɛ loŋ wanaa kei ni le kɔlaŋ o chiɛi chuaa hoo. Nɛɛ cho yɛ chuaa hoo? Wali yɛɛ chuaa hoo ndoo tosa yɛ?
w00 11/15 30 ¶4-6
“Bii Sawala Nilaŋ le Ma Wa Yoomu”
Mi chuaa hoo bɛɛndiaa chɔchɔŋ ndɔŋ nyɛkɛndɛi. Nduyɛ mbo suinuŋ nyɔɔ o hɔl. Mbo suaa o poo hoo lo a tiindaŋndo. Sɔɔŋ o dimi woŋ kpou wa le poo hoo huiyo. Mbo dimi maa, o soli salala kɔl nyulu laŋ o paaleleŋ choo, nduyɛ maa o chua buŋgɛi le peeloo. Mbo chɔm naŋ chaa wana sakpoo o cho ni, nduyɛ maa o nɔ bahawɛi o Mɛlɛka piɛiyo niŋ te. Salala kɔl nyulula ndaa soli o chiɛi Mɛlɛkaa niŋ Chulusalɛm ndaŋ la cho, visioŋ, kpeyaŋ kɛndɛ kɛndɔɔ, chuɛiyaŋ a muɛiyaŋ ni. (Lɛvitikɔɔ 19:5, 6; 22:21; Nɔmbaa 15:8-10) Le mɛɛ wana ndoo soli sala kɔl nyuloo wo ndoo sɔla o tiŋ le ndupila a yuŋgu ndɔɔ yɛ, lelaŋ chuaa hoo dimi ni maa o nɔ nyɛdiaa a muɛiyaŋ tau le kolɔɔ o ndu lo bɛɛ. Tɛɛsiaa hoo choŋnuŋ kpendekele. Kanifuule, po feleŋgɔnɔɔ hoo wa yoomoo tueiyɔɔ yeela tau o chuaa hoo lo. Le sabu kpeekpei o mal o ndu lo bɛɛ wo wa le poo hoo nuuviaa ni. Te waŋndo tuei pɛ bundɛi waa nuaa mi i pilaŋ ndu kɔllo tau. Mi wana pɛɛkaa Baabui pilɛ dimi maa, “I cho tonya maa chuaa hoo wa waŋndo nuuviaa, kɛ baa po hoo kpeekpei o wa nuuviaa ni? Naapum diɔmndo ɔɔ po nɔ hoo kɔl kalu bɔɔ le wo laalaŋ ndu ni.”
Mɛɛ o wounuŋ nyɛla kɛndɛ kɛndɛi laŋ, nduyɛ mbo soliŋ diomnda yeelɛilaŋ kpeku, mbo pilaŋ poo hoo, mbo sɔsa ndu chɔchɔŋ. Mi Poo tuɛi nyɛma chuŋ kɛndɛma chua suundɛiyo hoo chu chuŋ lekɔɔ waŋ chuŋ. Mi chuaa hoo dimi aa: “I pɛŋgɛla kola kɛndɛ kɛndɔɔ o kpele nuu choo, kola kɛndɛ kɛndɔɔ fulaa Ichipi. I chu chu nyɛm chuŋ kɛndɛ kɛndɔŋ muŋ o kpele nuu choo: mɔɔ, aloo, a sinamɔŋ.” (Polowaa 7:16, 17) Mbo toosiaa kpele ndɔɔ a kola kɛndɛ kɛndɔɔ fulaa Ichipi, nduyɛ mbo chu chu nyɛm chuŋ kɛndɛ kɛndɔŋ mɛɛ, mɔɔ, aloo, a sinamɔŋ cho nuaa yɛ.
“Lelaŋ huŋ miŋ kɔ chɔmaŋ kaalaa haaa mi paaleŋ le sɛ.” Mbo hiau lachi a dimioo aa: “Huŋ miŋ tuei kaala naa yeela diompilɛ.” O cho ko le nyɛdiaa yeelɛiyo dioo nda ŋiɔɔŋ kpeele le o wa ndu veeloo le. Kɛ le mi ndaa tosa kaa ihini nɔɔlɛiyo o dimi sɔɔŋ muŋ kpou ni. Le po feleŋgɔnɔɔ hoo, mbo yiyaŋ maa o cho yoomoo tueiyɔɔ yeela tau te o kuɛ pɛ loŋ. Mi chuaa hoo chɔɔlu ndu hiu a diomnda yeelɛila cheleŋ mbo dimi aa: “Kanifuule, pɔnɔ nuu cho o bɛɛ le. O kuɛ kelaa naa levil. Mɛɛ o wa kɔlaŋ, mbo kua a kanioŋ bɔlɔɔ cha. Nduyɛ o cho miiŋgu nanuŋ te haaa mi paŋgei piu.” (Polowaa 7:18-20) Mbo dimul ndu maa nyɛ o nyɛ cho ndu yɔŋnɔŋ te. Kanifuule pɔnɔ ndɔ kuɛ kelaa naa levil nduyɛ o cho yala hunɔɔ le. Nuawɔ se nɛila yɛ yɛla chuaa hoo soliŋ kpeku le po feleŋgɔnɔɔ hoo huiyo laŋ! “Mbo dimul ndu choolaŋ a sondo ndɔ yeelɛi bɛndoo. Nduyɛ, mbo hui ndu a sɔɔŋ yeelɛi o wa ndu dimullo woŋ.” (Polowaa 7:21) Mi Choosɛ soliŋ taasioo kpeku le kpundɛ waa nuaa fafaŋndo. (Chɛnɛsi 39:9, 12) Baa po feleŋgɔnɔɔ hoo ndoo tiu pa ba le i waa nuaa tosaa?
w00 11/15 31 ¶2
“Bii Sawala Nilaŋ le Ma Wa Yoomu”
Mi po feleŋgɔnɔɔ hoo cha ndi ikala le veelu chuaa hoo kiɔɔ. I wa ko maa taasioo o viou o hueiye niŋ ni mbo kua ndu kɔɔli mɛɛ nda kua nuaa a nau towaa le ndu diyɔɔ yɛ. Mɛɛ nda kua nuaa a waŋndo ma baŋ ndu o kpiɔɔ o nɔla hiɔlɔŋndo le yɛ. Mi poo hoo tosa hakioo. O chi kpundɛ wa o suɛi hei kɔɔli wo le, “haaa mi chiŋɔleŋ le buli ndu yemnde.” Hei sim ni maa, mbo tosa suɛi tɛɛmbuu ndu kɔllo ve haaa yoomu ndɔɔ mɛɛlulaŋ. Ndoo tiuba mbo sɔla piɔm kpeekpeiyo o hei niŋ kanifuule, ndoo nɔla mbo sɔla naala wɔɔŋnda taŋ waŋnda o kaa ihini nɔɔlɛiyo niŋndaŋ. Fulamakɔɔli cheleŋ o sɔla wo wa piɔmndo o Mɛlɛka piɛiyo niŋ ni. ‘Mi yoomu ndɔɔ luɛi o kpundɔɔ niŋ.’ Mi i piliaŋ nyɛ o nyɛ o tosa o yoomu ndɔɔ niŋ, nduyɛ mbo tosa haki wɔɔŋ wɔɔŋndo a Mɛlɛka. Mbo luei yoomu ndɔɔ o kpundɔɔ niŋ mɛɛ youwo kua nuaa sululu o yaŋɔɔleŋ niŋ yɛ.
Nyɛm Tɔɔmaŋ Mɛlɛkaŋ
w00 11/15 29 ¶1
“Bii Sawala Nilaŋ le Ma Wa Yoomu”
“Yiinuŋ ndaŋ o sooŋ num labaŋ,” mi Sɔlɔmɔŋ hiau lachi a dimi aa: “Ma poonyiaŋ ndaŋ o kɔl.” (Polowaa 7:3) Mɛɛ sooŋ a hɔlta naalaŋ la mala naa le sɔɔŋ bɔɔbɔɔ tosa yɛ, lende koni nyɛ naŋ pɛɛku o Baabuiyo ɔɔ kɔl kɔlu iMɛlɛkayaa loonuŋ naa teleŋ o teleŋ a sawala Mɛlɛkalaŋ okɔɔ ni. Nduyɛ mi la chɔm naa nɛiyo te ŋ wa pɛ nyɛ o nyɛ tosaa o yoomoo niŋ. Ŋ nɔ miŋ poonyiaŋ ndaŋ o kɔl le mi la wa a naa latulu teleŋ o teleŋ.
NYAAKUƐIYO 7-13
NYƐM TƆƆMAŊ O DIOM MƐLƐKAA NIŊ POLOWAA 8
Yaŋ Taasi Chiisu Kiliti wo Nilaŋ
cf 131 ¶7
“I Kaala Finya Nuu”
7 O sɔɔŋ 22 niŋ, mi taasioo dimi aa: “Ya fɛŋ Chɛhowa toosiaa o kandɔŋndo. Lɔɔpa mbo toosiaa nyɛ o nyɛ sindɛ, ya fɛŋ o toosiaa.” O cho a taasi yɔŋaa okɔɔ le bolle Baabuileŋ ndeŋ le cho suɛi le, kanifuule Chɛhowa cho le teleŋ o teleŋ, nduyɛ taasi ndɔɔ cho le fɛɛŋ a fɛɛŋ. Mɛɛ hei chɔm ni maa, o cho suliŋndo hoo le Chɛhowa toosiaa o “kandɔŋndo le.” (Sam 90:2) Po Mɛlɛkaa, “ndu fɛlɛŋ Mɛlɛka toosiaa a nyɛ o nyɛ fee.” Ndu cho wana tase Chɛhowaa toosiaa wo ni. (Koloosiaŋnda 1:15) A mɛɛ yau Polowaa wo dimi yɛ, Chiisu wa niŋ tuupa mi Mɛlɛkaa toosiaa choo choo a lɛŋndeŋ. Nduyɛ ndu wa Diomndo ɔɔ sondo suaa le Mɛlɛka ni. Mbo chɔm o nɛi walaŋndo choo mɛɛ taasi Chɛhowaa cho yɛ.—Chɔŋ 1:1.
cf 131-132 ¶8-9
“I Kaala Finya Nuu”
8 Yɛɛ Po Mɛlɛkaa wa yɛ tosaa tuupa mi nyɛm cho choo choo woŋ a ŋ cho o lɛŋndeŋ choo woŋ toosiaŋ? Sɔɔŋ 30 dimul naa maa, o wa Mɛlɛka ikɛi maa wana “chaa wallo nyɛkɛndɛiyo.” Yɛɛ hei sim yɛ? Koloosiaŋnda 1:16 dimul naa aa: “Ndu Mɛlɛka soliŋ kpeku ni le nyɛm cheleŋndoŋ kpou toosiaa. Muŋ o choo choo niŋ, a muŋ o lɛŋndeŋ choo. . . . O ndu niŋ sanaa nyɛm cheleŋndoŋ kpou toosiaŋ ni, nduyɛ le ndu ŋ cho ni.” Mi Chɛhowa Wana Toosiaa soliŋ Po ndɔɔ kpeku maa Wana Chaa Wallo Nyɛkɛndɛiyo le nyɛ o nyɛ fee toosiaa. Chɔŋ a nyaa yoomaa cho choo choo niŋnda, nyɛm cho o chieeŋndo choo woŋ, waŋnda chieeya, tɔlɔɔla yɛyɛlaŋ a visiaa suu o suu naŋ cho hau chɔɔ. O baa pilɔɔ choo, ŋ tuu diompilɛ wa Finyaa tɛɛŋ nda Po ndɔɔ wo mɛɛ wana taŋgulaa tosa wallo a wana tuuliaa nyɔɔŋ o pei choo wo yɛ. Te wana tuuliaa nyɔɔŋ ndoŋ tuuliaa nyɔɔ pɛ, wana taŋgulaa ndu soliŋ tuuliaa koŋ kpeku o taŋgul nyɛ koŋ kpendekele. Te o yɔŋ pɛ mi nyɛm naŋ cha woŋ pilaŋ naa kɔllo, mɛɛ Wana Tuuliaa Bɛndoo naŋ wa koŋ balikaa mello ni. (Sam 19:1) Lelaŋ, ŋ nɔ miŋ loonuŋ teleŋ o teleŋ mɛɛ Wana Toosiaa wa a kɔl kɛndɛ le wallo tosaa nda wana “chaa wallo nyɛkɛndɛiyo” yɛ.
9 Te wanaa lahakiaa a ŋiɔɔŋ tosa pɛ wallo diompilɛ, mi kɛɛ sinapɛŋgoo luɛi nda tɛɛŋ teleŋnda bɔɔbɔɔ. Kɛ, o cho lende le i wa a Chɛhowa nda Po ndɔɔ le. Mi Poleŋ le tosa wallo a Finya ndɔ latulu, nduyɛ mbo dimi aa: “Teleŋ o teleŋ, mi yaa dɔɔnuŋ nyaale ndu lachi.” (Polowaa 8:30) A tonya, mi ndoo naŋ kɔl tau le wallo tosaa nda Finya ndɔ latulu. O kpeekpei niŋ, teleŋ Poleŋ la wa latulu nda Finya ndɔ wo, mbo pɛɛku tau le suliŋnda Mɛlɛka laŋ tolɔɔ kɔɔli. Le sabu koŋ Poleŋ le wa chaŋyɛi kɛndɛi tueiyɔɔ yeela nda Finya ndɔ ni, nduyɛ mi chaŋyɛi ndɛi kiandu poŋ. O chieeŋndo choo kpou, chaŋyɛi ndɛi ndii hiou viouwɔɔ, nduyɛ ndi hiou wa ikala poŋ.
w09 4/15 31 ¶14
Nɔ Balika Melaa le Chiisu—Wana Hiou Deeve a Sɔlɔmɔŋ Ndo
14 Waŋndo opilɛ kpe ndoo hiou Sɔlɔmɔŋ taasioo o chieeŋndo choo ni, ndu cho Chiisu Kiliti ni, o Baabuiyo dimi a ndu okɔɔ wo aa: “wana hiou Sɔlɔmɔŋ ndo cho nanuŋ.” (Mat. 12:42) Mi Chiisu dimi sɔɔŋ “tosa mi wana sɔla yoomu fafɛɛŋndo” wo. (Chɔŋ 6:68) Le tamaseliiyo, teleŋ Chiisu wa Waŋnda Pɛɛkoo o Pembei Choo Wo, mbo soliŋ talela Sɔlɔmɔŋ dimi laŋ lapum kpeku le sawala mandaalaŋ chɔɔloo tɛɛsiaa. Mi Sɔlɔmɔŋ suaa a sɔɔŋ bɔɔbɔɔ ŋ tosa mi wanaa cho Chɛhowa piɛiyo wa wa a kɔl kɛndɛ wo. (Polo. 3:13; 8:32, 33; 14:21; 16:20) Mi Chiisu kindila maa miŋ sɔla kɔl nyulu kpeekpeiyo te buŋgaŋ Mɛlɛka chua woŋ peeluŋ pɛ, a te ŋ soliŋ pɛ nyɛm naŋ sɔla o ndu piɛiyo niŋndoŋ kpeku. Nyɛ koŋ o dimi ni aa: “Kɔl kɛndɔɔ cho le wanaa landuŋ kɔl le suɛi Mɛlɛkɛiya, kanifuule le nda Masale Mɛlɛkaleŋ le cho ni.” (Mat. 5:3) Wanaa duau sawala mandaala cho a pɛɛkula Chiisu laŋ okɔɔ wa cho Chɛhowa sɔɔŋguuwo ikɛi kpɛɛluŋ, “wana yɔŋgu yoomoo wo.” (Sam 36:9; Polo. 22:11; Mat. 5:8) Chiisu sim lewundu le “kɔl kalu Mɛlɛkaa” ni. (1 Kɔl. 1:24, 30) Le mɛɛ Chiisu cho Mɛsayanɔɔ yɛ, ndu cho “nyina nɔ taasioo wo ni”—Aisa. 11:2.
Nyɛm Tɔɔmaŋ Mɛlɛkaŋ
g 5/14 ¶16
‘Taasioo Cho Veeloo Choo Choo Kpeleŋ’—A Cho Ndu pa Tueiyɔɔ?
▪ A mɛɛ yau tɛɛsiaa ŋsɔɔ pilɛ dimi yɛ, “o chieeŋndo choo kpou yau wanaa bɔɔbɔɔ nɔ wo cho Baabuiyo ni.” “A hivi ndu niŋ teleŋnda bɔɔbɔɔ, nduyɛ o sɔɔŋ maŋgalaŋ bɔɔbɔɔ niŋ mbo hiau yaula cheleŋndaŋ kpou.” Baabuiyo cho niŋ hau kpou ɔɔ nyɛɛmbɔ o sɔɔŋ maŋgalaŋ sɔŋgɔ 2,600 niŋ. O chieeŋndo choo kpou te a chɔm pɛ ŋwaŋ 100 waŋnda 90 nɔ niŋ ndu ni.
▪ O dimi niŋ ‘Taasioo cho hiouwɔɔ lachi a veeloo choo choo kpeleŋ.’ Mi Maatiu 24:14 dimi aa: “Nduyɛ, yooŋgu kɛndɔɔ hoo a Masale Mɛlɛkaleŋ okɔɔ cho dimiŋ ba o ba fee o chieeŋndo choo, le mi waŋnda kpou tuei. Okoŋ, mi mɛɛlula [chieeŋ naŋ cho hoo niŋndo] la fuuluu.”
NYAAKUƐIYO 14-20
NYƐM TƆƆMAŊ O DIOM MƐLƐKAA NIŊ | POLOWAA 9
Wa Wana Taasi Kɛ o Cho Wana Mamaa Le
‘Yaŋ Nilaŋ Nyɛ Kɛndɛ Kɛndɛ, Ma Tuei Sɔɔŋ Wanaa Taasiaa Dimi Woŋ’
4 Wana dimi isɔɔ a tonya, miŋ che ndi ikala te waŋndo hiŋ pɛ sakpo o naa lo le naa silaa. Lepum, mi keŋ tɛɛmbuu naa kɔllo. Le yɛɛ? Mi che bɛɛ ŋ sina maa wanaa lahakiaa naŋ cho ni, kɛ lepum te waŋndo che pɛ biondɔŋ naŋ tosa wo, nduyɛ mbo sila naa, mi i wa lepum simullo le ndi chɛlɔɔ. (Nuawɔ Ikilisiaati 7:9.) Nduyɛ lepum, miŋ kandu nɛilaŋ nuuviaa le kafɛilaŋ yɔŋgoo ɔɔ miŋ nɔ yiyaŋ wɔɔŋndo a wana ke naa silaa wo okɔɔ, nduyɛ a mɛɛ o ke naa ndu yɛ. Naapum, miŋ pɛɛsa wana koŋ, okoŋ miŋ nyunaŋ aa: ‘Nɛɛnɛ ke yɛ ndu dioo le mbo sila ya? Ndu bɛɛ mbo benduŋ.’ Nduyɛ mi hei tosa, ŋ chue sila nda ke naa wo le, te koŋ te miŋ nyuna wana cheleŋ le mbo sila naa ɔɔ mbo dimul naa sɔɔŋ naŋ yeema tueiyɔɔ woŋ.
‘Yaŋ Nilaŋ Nyɛ Kɛndɛ Kɛndɛ, Ma Tuei Sɔɔŋ Wanaa Taasiaa Dimi Woŋ’
12 Yɛɛ mala yɛ naa miŋ chɛl silaa? Ŋ nɔ miŋ nɔ kaa tusiaŋndo, nduyɛ miŋ loonuŋ maa wanaa lahakiaa naŋ cho ni. Lepum miŋ tosa sɔɔŋ bɛnda le woŋ. A mɛɛ naŋ yaasiaa suŋ yɛ, Choobu ndoo nɔ yiyaŋnda wɔɔŋndaŋ a sɔɔŋ ŋpum okɔɔ. Kɛ o mɛɛlulaŋ, mbo siŋga yiyaŋ ndɔɔ, nduyɛ mi Chɛhowa duau ndu sala. Le yɛɛ? Kanifuule Choobu wa wana tusiaŋ. Mbo chɔm maa wana tusiaŋndo o wa ni, sanaa a sila Ɛlihu ke ndu wo chɛlɔɔ, mi che bɛɛ ndoo chuu ndu okɔɔ. (Choobu 32:6, 7) Kaa tusiaŋndo mala naa miŋ dɔu sila nda ke naa wo o wali niŋ, o yɔŋ bɛɛ miŋ yiyaŋ maa, ndaa nɔ ma ke naa sila koŋ te ɔɔ maa ŋ cho wana ke naa silaa wo bɛndu. Mi bɛndu kunda pilɛ o lɛŋnde Kanada leŋ niŋ dimi aa: “Le mɛɛ naapila chiŋuŋ mɛɛ acheleŋnda cha naa yɛ le, vɛɛ naŋ tiu yɛ ba miŋ tosa hiouwɔɔ lachioo te waŋndo sila naa le?” Naa kpou nɔ miŋ nɔ suliŋnda nyina Mɛlɛkaa, le halikpeŋ miŋ chaa waŋnda yooŋgu kɛndɔɔ dimullo a nda pɛɛkoo.—Nuawɔ Sam 141:5.
13 Chɔ silaa maa nɛiyo opilɛ o Mɛlɛka chɔm num kaalaa wo cho koŋ ni. Nyɛ cho o kɛndɔɔ wo Chɛhowa yeema le naa ni. (Polo. 4:20-22) Te o sila naa pɛ sanaa a Diom ndɔɔ, yaula naalaŋ ɔɔ Kilisiɔŋnɔ kendu o ndu piɛiyo niŋndo, mɛɛ kaalaa o wa naa koŋ chɔmndo ni. Nduyɛ a mɛɛ Hibuluiya 12:9, 10 dimi yɛ, “le tɔnɔ naa o sila naa ni.”
14 Handu kɔllo o sila nda ke numndo choo, o cho a mɛɛ nda ke num ndu yɛ le. Lepum miŋ yiyaŋ maa, o cho o nɛi kɛndɛ choo kposoŋ te nda ke naa silaa le. I cho tonya maa, ŋ nɔ miŋ tosa a sabu le mi i wa tɛtɛlɛ le mi waŋndo chɛl sila naŋ ke ndu wo. (Kale. 6:1) Kɛ te o yɔŋ pɛ maa naa nda ke silaa ni, ŋ nɔ miŋ handu kɔllo o sila koŋ choo, o yɔŋ bɛɛ miŋ yiyaŋ maa, wana koŋ ndoo nɔ mbo soliŋ nɛi bɛnda wo kpeku le naa ndu kioo. Ŋ nɔ miŋ nyunaŋ aa: ‘Mi che bɛɛ waŋndo hoo soliŋ nɛi bɛnda wo kpeku le ya silaa le, kɛ baa tonyaa cho pa o nyɛ o dimi wo niŋ? Baa I tiu pa ba mi faŋa kɔllo o nɛi o ke ya silaa wo choo, nduyɛ mi sɔla tɔnɔɔ o sila o ke ya hoo wo niŋ?’ I wa bɔɔ suɛi taasi te ŋ nuuviaa pɛ nɛila naŋ tiuba, miŋ sɔla tɔnɔɔ o sila nda ke naa wo niŋ.—Polo. 15:31.
w01 5/15 30 ¶1-2
‘Mi Taasioo Tosa Miŋ Nɔ Yoomu Vilɛiyo’
Te a sila pɛ wana taasioo, mɛɛ o tosa sɔɔŋ yɛ cho teŋgeŋ a wana maŋ waŋnda wo. Mi Sɔlɔmɔŋ dimi aa: “Te a miŋgi pɛ wana nɔ taasioo wo o nɛi, o cho num kaala. Sila wana nɔ taasioo wo, le mbo chɔɔlu taasioo sɔla.” (Polowaa 9:8b, 9a) Wana nɔ taasioo wo sina maa: “Te a sila pɛ waŋndo, o niŋ kɔl o foofo koŋ choo le. Palaa pila sila koŋ pala ndu ni. Kɛ te teleŋ tiŋ hiou pɛ, mi wanaa dɔu sila koŋ o wali niŋnda sɔla kɔl nyuloo. Koŋ cho ni, ma wa sakpo.” (Hibuluiya 12:11) Mi che bɛɛ mi sila nda ke naa lepum ndo pala naa tau, kɛ le yɛɛ naŋ nɔ yɛ miŋ dɔɔnuŋ tumbe ɔɔ miŋ simul wana sila naa wo le, te ŋ sina pɛ maa sila koŋ cho tosa miŋ wa wanaa taasi?
Mi Sɔlɔmɔŋ hiau lachi a dimioo aa: “Pɛɛku wana cho sakpo wo, le mbo chɔɔlu sinapɛŋgoo sɔla.” (Polowaa 9:9b) Wana o wana hiu teleŋ pɛɛkaa le. I cho bɔɔ suɛi kɛndɛ le sinaa maa o yɔŋ bɛɛ mi waŋndo wa o yuuwɛi, o nɔla mbo pɛɛku a Chɛhowa okɔɔ nduyɛ mbo yɔŋgu yoomu ndɔɔ o ndu lo. Maa naa kpou kɛɛsiaŋ o kɔl le hiouwɔɔ lachi a pɛɛkoo nduyɛ miŋ wa yiyaŋndo o nyɛ naŋ cho pɛɛkoo wo choo.
w01 5/15 30 ¶5
‘Mi Taasioo Tosa Miŋ Nɔ Yoomu Vilɛiyo’
Naapila nɔ ni miŋ dɔu sɛmbɔɔ le taasioo sɔlaa. Mi Sɔlɔmɔŋ kindila tonya cho a hei okɔɔ wo mɛɛ o dimi aa: “Te a simnuŋ pɛ wana taasi, a cho tɔnɔɔ sɔla o taasi numndo niŋ. Kɛ te a simnuŋ pɛ wana mam waŋnda wo, num cho saŋga ni.” (Polowaa 9:12) Mi wana taasioo sɔla tɔnɔɔ o taasi ndɔɔ niŋ, kɛ wana maŋ wana wo ndupila sɔla saŋgaa ni. A tonya kulii naŋ saŋnde ndi naŋ kuau ni. Maa naa kpou tosa o naŋ tiuba wo le “nilaŋ yaŋɔɔ nyɛkɛndɛi o sɔɔŋ taasioŋ.”—Polowaa 2:2.
Nyɛm Tɔɔmaŋ Mɛlɛkaŋ
w06 9/15 17 ¶5
Sɔɔŋ Kulloŋ le Yau Polowaa Wo
9:17—Yɛɛ cho yɛ “mɛŋma levii yaŋ”, nduyɛ le yɛɛ ma “yeela” yɛ? Baabuiyo tuu mɛɛ pɔnɔɔ a lanɔɔ tuɛi chiɛiniŋndo yeela o nɔ ndaa niŋ yɛ a mɛŋma kɛndiaŋ. Kɛ mɛŋma leviiyaŋ ma sim lewundu le kaa ihini nɔɔlɛiyo tosaa o sɔɔsɔɔyɛi niŋ a wana nya cho o nɔ niŋ te wo. (Polowaa 5:15-17) Le mɛɛ waŋndo tosa hei o sɔɔsɔɔyɛi niŋ yɛ tosa ni, mi mɛŋma maŋ ma yeela.
NYAAKUƐIYO 21-27
NYƐM TƆƆMAŊ O DIOM MƐLƐKAA NIŊ POLOWAA 10
Yɛɛ Tosa yɛ Miŋ Sul o Yoomoo Niŋ?
w01 7/15 25 ¶1-3
‘Salalaŋ la Cho le Wana Sakpoo’
Mi wana sakpoo sɔla salalaŋ o nɛila cheleŋ niŋ. “Siɛlɛiye, bala fondolaŋ i chuu wana ni. Kɛ wana tosa wallo wo, o sullo niŋ o mɛɛlu ni. Mi po nɔ taasioo wo kou tɔlɔɔla ndɔlaŋ a wɔɔleŋ. Kɛ po hiniŋ hoo a teleŋ nda kuau tɔlɔɔlaŋ ndo, mi siɔmbulaŋ la bii ndu.”—Polowaa 10:4, 5.
Mi wanaa tosa wallo wa che mɛɛ diomndaŋ ndaŋ la cho la sɔvɛ yɛ a teleŋ kuauwaa. Teleŋ kuauwaa cho teleŋ wana tosa isiɛlɛi le. Teleŋ wana viau wallo tosaa nduyɛ ma dɔu sɛmbɔɔ tau wo o cho ni. A tonya, teleŋ wallo wa choŋ choŋndo teleŋ kuauwaa cho ni.
Kɛsiŋ o kɔl maa o cho a kulloŋ okɔɔ le Chiisu wa suɛi le, kɛ a waŋnda chieeya okɔɔ. Lelaŋ, mbo dimul buɛiyaa nduaa aa: “Chiɛi vesa tau le kouwɔɔ, kɛ wanaa kuauwaa bɔɔ cho le. Lelaŋ, la nyɔɔlu wana ichiɔɔ [Chɛhowa Mɛlɛka] mbo yɔŋ waŋ walla o chiɛi nduɛi niŋ.” (Maatiu 9:35-38) A wɔsi 2000, waŋnda hiouwɔɔ miiliɔŋndaŋ 14 bii bɔŋaŋndo le Loonɔŋndo a piɔm Chiisu wo okɔɔ ni, nduyɛ nɔmbɛiyo hoo ndoo chua Seiyaa Chɛhowaa bɛmbɔɔ le diiŋ kpulukuu a teleŋ koŋ. Nɛɛ sɛɛŋgiaa yɛ maa chiɛi vesa wɔ le kowɔɔ le? (Chɔŋ 4:35) Kilisiɔŋaa tonyaa nyuna niŋ Wana Ichiɔɔ o piɛileŋ niŋ le mbo ke nda wanaa walla tau. Nduyɛ a cho wallo tosaa o piɛile ndaleŋ choo sanaa a mɛɛ nda cho a tuandaŋ le waŋnda siiŋguuwo buɛiya yɛ. (Maatiu 28:19, 20) Nuawɔ se mɛɛ Chɛhowa dɔu sɛmbɛ ndaa sala yɛ! A teleŋ wɔsi naa wallo le wɔsi 2000, waŋnda hiouwɔɔ 280,000 sɔla yiŋɔɔ ni. Mi wanaa sɛnɛiya haa bɛɛ duau sɛmbɔɔ tau le simnɔŋndo wanaa chaa Diom Mɛlɛkaa pɛɛkoo wa. Maa naa kpou hiounuŋ lachi a kɔl kɛndɛ naŋ cho sɔlaa o wali kuauwaa hoo niŋndo tueiyɔɔ yeela.
w01 9/15 24 ¶3-4
Kɔ o ‘Nɛi Sakpoo Choo’
Mi Sɔlɔmɔŋ chɔm le sabu i cho suɛi sɔvɛ le waa wana sakpo wo. Mbo dimi aa: “Wana sulaa, chiee ndɔ bɛndu kala kalaa cho sul ndɔɔ ni. Kɛ wanaa bala fonduaa, mi kuɛi luei nda o nyɛpalaa niŋ. Mi sɔɔŋ wana cho sakpo wo tosa woŋ ke wana yoomoo. Kɛ mi sɔɔŋ wana dɛnɛ wɔɔŋndo tosa woŋ luei wana o hakioo niŋ.”—Polowaa 10:15, 16.
Mi sullo manda naa te sɔɔŋ pum yɔŋnuŋ naa pɛ o yoomoo niŋ teleŋndaŋ lapum, mɛɛ saasa kala kalaa manda nuaa wanaa wa o chioo niŋnda yɛ. Nduyɛ mi kuɛi saaŋgiaa naa te sɔɔŋ naŋ ve kɔl te woŋ yɔŋnuŋ naa pɛ o yoomoo niŋ. (Ikilisiaati 7:12) A koŋ kpou, mi Sɔlɔmɔŋ chɔm fulamakɔɔlila wɔɔŋnda wana sɔla te o yɔŋ pɛ ma wa wana sulaa ɔɔ ma wa o kuɛi niŋ. Mi wana sulaa dɔu tiindaŋ ndɔɔ o nyɛm kɛŋ ndɔŋ niŋ, nduyɛ mbo yiyaŋ maa sul ndɔɔ cho ko maa, “kpaki kala kala manda chioo wo.” (Polowaa 18:11) Nduyɛ wana cho o kuɛi niŋndo mbo yiyaŋ maa le mɛɛ o cho wana bala fondo yɛ, mɛɛ o nɔ lɛ tiindaŋ o tiindaŋ le chilaŋ te. Mi sɔɔŋ muŋ tosa nda ŋiɔɔŋ kpou a nɔ diola kɛndɛ a Mɛlɛka le.
it-1 340
Salalaŋ
Chɛhowa Cho Waŋchieeya Salaa Dɔwɔɔ. “Sala Chɛhowa—duau wana wo tosa ni ma sul, nduyɛ o hendu nyɛ nɛiyaa o nyɛ nɛiyaa lechoo le.” (Po 10:22) Mi Chɛhowa dɔu wana o hini kɔlla sala, mbo manda nda, mbo tosa ma sul, mbo ke nda nɛi chɔmaa, mbo tosa ma sɔla batiuwaa, nduyɛ mbo ke nda nyɛm nda hauba woŋ a sɔɔŋ cheleŋ chuu nda tɔnɔɔ tau woŋ.
Nyɛm Tɔɔmaŋ Mɛlɛkaŋ
w06 5/15 30 ¶18
Kɔl Kɛndɛ Wana Sɔla le Lo Lechoo Wo Chɔmndo Wo
18 “Sala Chɛhowa duau wana wo” cho nyɔɔ opilɛ o cho hau wanaa nduaa mandaa o ndu piɛiyo niŋndo ni. Nduyɛ ŋ nɔ laalaŋndo maa “o hendu nyɛ nɛiyaa o nyɛ nɛiyaa lechoo le.” (Polowaa 10:22) Mɛɛ le yɛɛ simultaŋ a sɔɔŋ paalaŋ bɔɔbɔɔ komallɛ wanaa Mɛlɛkaa ŋ tosa ma saŋga a nyɛ nɛiyaa tau wo? Le sabulaŋ la yaa simultaŋ a sɔɔŋ paalaŋ komal naa ni. (1) Le mɛɛ naŋ cho wanaa lahakiaa yɛ. (Chɛnɛsi 6:5; 8: 21; Chemisi 1:14, 15) (2) Setana a nyinaa nduaa wɔɔŋnda. (Ɛfisiaŋnda 6:11, 12) (3) Chieeŋ dɛnɛ wɔɔŋ naŋ cho niŋndo. (Chɔŋ 15:19) Mi che bɛɛ, mi Chɛhowa chɛl mi sɔɔŋ wɔɔŋndoŋ komal naa, kɛ o cho ndu le cho puundule sɔɔŋ wɔɔŋndoŋ te. Lelaŋ pɛŋ Baabuiyo dimi ni aa: “Nyɛ o nyɛ kɛndɛ naŋ sɔla, Mɛlɛka ke naa ndu ni. Ndu toosiaa nyɛm yɔŋgu paŋgeloo o choo choo niŋndoŋ ni.” (Chemi. 1:17) Salala Chɛhowa duau wanaa nduaa laŋ la nɔ nyɛ nɛiyaa o nɛiyaa le.
NYAAKUƐIYO 28–BUKULOO 4
NYƐM TƆƆMAŊ O DIOM MƐLƐKAA NIŊ POLOWAA 11
Nyɛ Ŋ Nɔ Ma Dimi Le Wo!
w02 5/15 26 ¶4
Mi Lo Lechoo wo Mala Wana Cho Sakpo Wo
Mi lo lechoo wana sakpoo chɔmndo vɛlɛ a nyɛ wana dɛnɛ wɔɔŋndo tosa wo piliaŋ acheleŋnda. Mi masaa le Isɔluɛi dimi aa: “Mi wana simul tonyaa wo tusi wana nda chiɛɛliaŋ ndo nyɛpalaa choo a sondo, kɛ mi kɔl kaloo piŋi wana cho sakpo wo.” (Polowaa 11:9) Nɛɛ cho yɛ sɛɛŋgiaa maa kaa mulu muluaŋndo, choŋgula wɔɔŋndaŋ, sɔɔŋ nɔɔlɛiyoŋ a sɔɔŋ nɔ tɔnɔ leniŋ te woŋ dimioo paaliaŋ acheleŋnda le? O baa pilɔɔ choo, diomnda wana sakpoo dimilaŋ la naŋ, mbo yiyaŋ fɛlɛŋ malaŋ o suaa, nduyɛ mi waŋnda hini kɔl a laŋ. Mi sinapɛŋgoo chiindiaa ndu, kanifuule mi kaala kɛndɛlaŋ vɛlɛ a mɛɛ o yiyaŋ o sɔɔŋ choo yɛ, chɔm maa choolaŋ nda cho ndu nyiinduu wo ni.
w02 5/15 27 ¶2-3
Mi Lo Lechoo wo Mala Wana Cho Sakpo Wo
Te wanaa cho o chioo niŋnda tol pɛ sila wana sakpoo kɔɔli, mi keŋ tosa ma nɔ kɔl nyuloo o chiee koŋ niŋ, nduyɛ ma mala wanaa bɔɔbɔɔ. Mi hiouwɔɔ lachioo wa o chiee waa lende niŋ nduyɛ ma sɔlaa batiuwaa o sɔɔŋ bɔɔbɔɔ niŋ. Wanaa dimi choolaŋ nda nɔ yɛletulaaleŋ, ma tosa sɔɔŋ wɔɔŋ huŋ a wooluŋ wooluŋ ndo woŋ, ma tosa waŋnda ve a kɔl kɛndɛ le, diompilɛ ve nda tɛɛŋ te, nduyɛ pɛŋ ma tosa sɔɔŋ mɛli kpundɛlaŋ ndoŋ. Mi hei yɔŋnuŋ taama taama te waŋnda haa wa pɛ o foofola nda nyindu acheleŋnda le sɔɔŋ tosaa laŋ. Mi chiee waa nuaa saŋga tau kanifuule mi sɔɔŋ wa laasi laasi, kafalaŋ, kaala wɔɔŋndaŋ, a bahawɛi nyɛ sɔlaa.
Sawa mandaa cho o Polowaa 11:11 niŋndo chɔm mɛɛ kpeŋ kpeŋndo cho wanaa Chɛhowaa tɛɛŋ nduyɛ ma wa chaŋyɛi kɛndɛi tueiyɔɔ yeela o kunda leKilisiɔŋndo niŋ yɛ. Te kunda leKilisiɔŋndo nɔ pɛ wanaa kendu o Mɛlɛka piɛiyo niŋnda, mi kaala ndala kɛndɛlaŋ la tosa mi kundaa wa a kɔl kɛndɛ, ma nɔ dialuŋ fulaŋ, ma maaliaŋ vellaa velle, nduyɛ mi keŋ tosa mi Chɛhowa sɔla saŋgalaa. Mi Chɛhowa dɔu kunda waa nuaa sala nduyɛ ma tosa hiouwɔɔ lachioo o ndu piɛiyo niŋ. Waŋnda apum cho ma nɔ bolle kalaleŋ, a nɔ kɔl hiniaa le, ma kindiŋ le biondɔŋndaŋ nuuviaa chaaŋaa ndaa o ŋdial, nduyɛ ma dimi sɔɔŋ wɔɔŋndoŋ a chaaŋaa ndaa okɔɔ wa cho ko maa “puundule lolɛileŋ.” Mi puundule lolɛileŋ ndeŋ le paaliaŋ wanaa nɔ kaa wɔɔŋ te wa. (Hibuluiya 12:15) Wanaa waa nuaa kaala bɔɔ foofola bɛndulaŋ, nduyɛ ma chɔm maa nda hiou wa wanaa sɔvɛ. Ma keeliaa sɔɔŋ cho tonya le woŋ, hɛliaŋ le kaa wo, ma hɛnaŋ a waŋnda apum o kundaa niŋ, ɔɔ bɛnduaa kundaa apum. Mi nyɛ nda dimi wo hiŋ a piɔuviaŋndo o kunda leKilisiɔŋndo niŋ. Baa o bɛnda miŋ fafaŋ waŋnda haa nilaŋ yaŋɔɔ okoŋ miŋ kindiŋ le waa wanaa kendu o Mɛlɛka piɛiyo niŋ a huŋ a kɔl nyuloo a diompilɔɔ o kundaa leKilisiɔŋndo niŋnda le?
w02 5/15 27 ¶5
Mi Lo Lechoo wo Mala Wana Cho Sakpo Wo
Nuawɔ se suɛi kpundɛ te wana “nɔ kɔl kalu bɔɔ le” wo kilul pɛ chaŋndɔ yamɛi o kafalaŋ choo, ɔɔ mbo hiou lachi a sɔɔŋ fondoŋ dimioo le chaanda tɔɔ tɛɛmbuuwo ɔɔ sɔɔŋ viaŋnaŋndo dimioo. Bɛnduaa kundaa nɔ ma tosa a sabu le wana waa nuaa kuunaa yɔŋii o hiou lachi a muŋ dimioo. Wana nɔ sinapɛŋgoo wo cho maa wana nɔ “kɔl kalu bɔɔ le” wo le, kanifuule wana nɔ sinapɛŋgoo wo sina teleŋ o nɔ mbo meiyo. O soli sɔɔŋ viaŋnaŋndoŋ te, kɛ mbo veŋ muŋ, kanifuule o sina maa te o dimi pɛ sɔɔŋ viaŋnaŋndoŋ keŋ cho kpundɔɔ malɔɔ. Wana nɔ sinapɛŋgoo wo cho “wana wana nɔla ma tiindaŋ ndo” ni. Mbo chɔm lo lechoo wo o chaaŋaa nduaa lo le kiɔɔ acheleŋnda dimullo a sɔɔŋ ndaŋ viaŋnaŋndo okɔɔ. Nuawɔ se sala bɛndu le nɔɔ wanaa waa nuaa o kunda leKilisiɔŋndo niŋ!
Nyɛm Tɔɔmaŋ Mɛlɛkaŋ
g20.1 11, kɔfoo
Vɛɛ Naŋ Chɔulaba yɛ Buulaŋndo
“CHƆULAB A BUULAŊNDO SANAA A KƐNDƐI TOSAA”
“Mi wana kɛndɔɔ sɔla tɔnɔɔ le ndupila. Kɛ mi wana dɛnɛ wɔɔŋndo veeluŋ kpundɔɔ choo.”—POLOWAA 11:17.
Yauwo hoo, “Mɛɛ Wana Chɔulaba Buulaŋndo Yɛ” nɔ suɛi lebolle hei “Chɔulaba Buulaŋndo Sanaa a Kɛndɛi Tosaa.” Mi Tiŋ Kaŋtɔfi wana pɛɛku a kɛndiaa okɔɔ wo dimi maa, kɛndɔŋ waŋnda tosallo tosa mi waŋndo wa a kɔl kɛndɛ, nduyɛ mbo chɔɔlu kɛndiaa ndɔɔ. O baa pilɔɔ choo, wana nɔ hoo ikɛndɛi le wo, ve a kɔl kɛndɛ le nduyɛ mbo fafaŋ acheleŋnda holnɔŋndo.
Ŋ tiuba miŋ chɔulaba buulaŋ naa te ŋ tosal pɛ acheleŋnda kɛndɛi. Le tamaseliiyo, ŋ nɔ miŋ bii naapila ŋuasu ŋuasu le ɔɔ miŋ kindiŋ le nyɔɔŋ nɔɔ tau ŋ nɔ tɔnɔ le woŋ te. Ŋ nɔ miŋ chelnuŋ naapilɛ maa ŋ cho wana sɔvɛ le le. Mi Chiisu dimi aa: “A nɔ ma kaala wana nya chiɛɛliaŋ ndo mɛɛ ŋ kaala numpila yɛ.”—Maki 12:31.