YOOŊGULA CHƆƆLAALAŊ
Batiuwaa Sɔlaa le Kiɔɔ Pisultaŋ a Labɛŋguniŋndo
Pisultaŋ a labɛŋguniŋndo, kaa nɔɔlɛiyo o cho Mɛlɛka o hɔl ni. Kaa hoo nɔɔliaa yiyaŋ waŋndo, nduyɛ mbo tosa mi waŋndo wa tuŋ yiyaŋndo le ndupila kɔllo nɛŋioo. Wana pisul a labɛŋguniŋndo wo mbo yiyaŋ vɛlɛ maa wana o wana fee bɛnda le hiniei tosaa a ndu halikpeŋ mbo hini yeemɛi nduɛi kɔl.a Wana waa naa sina pɛŋ maa hiniei a kaalaa nyɛ pilɔɔ le nda cho le. Yeemɛi nduɛi tuŋ o landuŋ kɔl ni. Kɛ, le teleŋ bɛŋgi kani yeemɛi hei cho ni. O kɛsɛ kɛsɔɔ niŋ, kaa hoo tosa, waŋndo soli balaŋ o yeemaŋ wanaa cho le chieeŋndo hoo wa niŋ te. Muŋ cho ni, “suunda nya wana nya cho o nɔ niŋ te wo, niilu nɔɔlɛiyo, a yeemɛi suundɛi bɛnduei nɔɔ.” Kɛ chɔɔloo o chɔɔlu yeemaŋ muŋ ni.—Kolosiaŋnda 3:5.
Mi kiilanɔɔ Pɔɔl poonyiaa aa, “Chaaŋaa niaa kaalaa, mɛɛ Mɛlɛka o chuel naa buŋgaŋ muŋ yɛ, la tosa niko mi la sɔla dindioo Mɛlɛka o hɔl. Koŋ cho ni maa, nyɛ o nyɛ tosa mi dialuŋ wana chioo a nyina ndɔɔ ŋ simnuŋ nyɛ nɔɔlɛi Mɛlɛka o hɔl, la mal muŋ waŋ waŋ. Nduyɛ, haaa mi ŋ nɔ siooŋii Mɛlɛkɛi, la ŋ vaŋnuŋ maa wanaa cho a yɔŋaŋ kpou o Mɛlɛka lo.” (Kɔliŋtiaŋ Diiŋ Ndɔɔ 7:1) Te a wa pɛ fafalaa le diomnda Baabuiyo dimi laŋ ndaŋ tosaa, tambu kɔl te. Chɛhowa “cho o bɛɛndiaŋ le na malɔɔ le yɔŋnda naala wɔɔŋndaŋ.” Nduyɛ mbo mala naa. (Sam 86:5; Luku 11:9-13) A tonya mi kɔl numndo pɛɛsa num, nduyɛ ma wa wɔ kaa hoo tosaa lepum mi che bɛɛ a cho sɛmbɔɔ dɔuwɔɔ le ndu malɔɔ. Mɛɛ hoo chɔm ni maa a nɔ yiyaŋ kɛndɔɔ. Kɛsiŋ o kɔl maa “Mɛlɛka ndu hiou a kɔlta naalaŋ, nduyɛ ndu ndu sina nyɛ o nyɛ fee.” (Chɔŋ Tasoo 3:20) O cho haki naa le Chɛhowa nua le, kɛ kɔl naa. Sinapɛŋgu o nɔ hoo wo tosa ni mbo yaŋ naa nilaŋ, nduyɛ mbo chɔm naa nyɛiye. Lelaŋ wu ŋdial le muliŋndo o Mɛlɛka lo o piɛileŋ niŋ te. O cho ko mɛɛ chuaambɔɔ kua naa o finya ndɔ lo yɛ te kpundɔɔ komal ndu pɛ. Chɛhowa cho num salaa dɔuwɔɔ a kɔl iyama walaŋndo. (Sam 51:1-12, 17; Aisaya 1:18) Kɛ a nɔ ma hiou lachi a wallo tosaa kalaŋ le nyɛ ŋ piɛi le ndu wo. Le taamaseliiyo, a nɔ ma kindiŋ ma faŋaŋ chaŋyaŋ wɔɔŋndoŋ kɔɔli, a nyɛ o nyɛ cho wunduma tumfonduaŋ.b
Kɛ te o yɔŋ pɛ ma wa wɔ tuŋ lambaŋndo pisultaŋ a labɛŋguniŋ numndo, a yandii, dimul wanaa velu numnda, te koŋ te, wana nɔ kaasoŋyɛi o Mɛlɛka piɛiyo niŋ, nduyɛ mbo buulaŋ a numndo.c—Pulɔwaa 1:8, 9; Tɛsaloniaŋ Tasoo 5:14; Taitɔɔ 2:3-5.
a Pisultaŋ a labɛŋguniŋndo cho ni, labɛŋguniŋ numndo ɔɔ o waŋndo yiiliaa tei mi yeemɛi la hiniei bii num.
b Le hei dɔuwɔɔ o wali niŋ, mi yuŋgulaŋ lapum kɛsi ɔdinatɛɛloo ɔɔ kɔmpitɛiyo naa wana o wana fee cha wa. Le handɔɔ lechoo, mi yuŋgulaŋ lapum wou nyɔɔ pum o maasi koŋ niŋ o kuuna sɔɔŋ nɔɔlɛiyoŋ luɛiyɔɔ wo. Kɛ ŋ nɔ miŋ tiindaŋ nyɛ suu waa naa le.
c Le sinaa nyɛ ŋ nɔ ma tosa le batiuwaa sɔlaa le kiɔɔ pisultaŋ a labɛŋguniŋndo wo, tofa suɛi lebolle hei, “Nyuna Feleŋguaa . . . Vɛɛ Ya Tiu yɛ Kaa Hoo Ba?” o “Tiondoo!” hoo niŋ, Bɛŋgufɔnɔɔ 2006. A yauwo hoo, Questions Young People Ask—Answers That Work, Volume 1, o pei 178-182.