Mɛɛ Baabuiyo Che Piɔuwaŋndo a Kɛyaŋndo o Nɔɔ Niŋ Yɛ

Chɛhowa yeema wanaa chal o nɔɔ niŋnda ma lo o sandei choo o kpema nɔ ndaa niŋ. Mɛɛ Chɛhowa wa wana pɔnɔɔ a wana lanɔ tasoo mɔɔsaa naapilɛ o nɔɔ niŋ, mbo dimi aa, “Le saboo hoo poo . . . chalnuŋ nda laa ndɔ ni, ma simnuŋ dialle i pilɛ.” Okoŋ kɔɔli, mi Chiisu bɛɛ chɔɔlu lediom handɔɔ o nyɛ Finya ndɔ dimi hoo wo choo aa, “Lelaŋ, te Mɛlɛka mɔɔsa wana lanɔɔ nda wana pɔnɔɔ naa pilɛ o nɔɔ niŋ pɛ, mɛɛ wana chiee piɔu nda tɛɛŋ te.” (Chɛnɛsee 2:​24; Maatiu 19:​3-6) Le hei,Chɛhowa nda Chiisu che nɔɔ maa nyɛ nɔ mbo wa lefafɛɛŋndo o cho ni, mɛɛ piɔmndo mbo piɔu nda tɛɛŋ. (Kɔliŋtiaŋ Tasoo 7:​39) Le mɛɛ nɔɔ cho nyɛ sɔvɛ yɛ, ŋ nɔ pɛŋ miŋ chua kɛyaŋndo nyɛ lamamɔɔ le. Le saboo hoo, Chɛhowa tul kɛyaŋndo leyɛ, taama taama o Baauiyo chɛl te wo.—Malakai 2:​15, 16, NW.

Yɛɛ tosa yɛ mi waŋnda kɛyaŋ a mɛɛ Baabuiyo dimi yɛ? Chɛhowa tul kaa ihinii nɔɔlɛiye a suundaa leyɛ. (Chɛnɛsee 39:​9; Saamiɛɛ Diiŋ Ndɔɔ 11:​26, 27; Sam 51:​4) Le mɛɛ Chɛhowa kuisiŋ kaalaŋ ndaŋ o kɔllɛ, te wanaa chal o nɔɔ niŋnda opilɔɔ luei pɛ balaŋ leniŋ, Chɛhowa chɛl mi waŋndo opilɔɔ kɛɛ chaŋ ndɔ o nɛiyo hoo choo. (Te a yeema pɛ ma chɔɔlu sina nyɛ cho kaa ihinii nɔɔlɛiye wo, miiŋgu o Buŋgɛi 9, pɛl 7. A tɛɛsiaa nyɛ suundaa simndo loŋ.) O nɔɔ niŋ, Chɛhowa ke wana suunda le wo dioo le mbo kɛɛsiaa a ba ndɔ te o kɛɛ niŋ wana suunda wo, ɔɔ o kɛɛ niŋ ndu le. (Maatiu 19:​9) Te wana suunda le wo kɛɛsiaa pɛ le mbo kɛɛ wana nda cho o nɔɔ niŋndo, o tɛɛmbuu sawa Mɛlɛka le. O baa pilɔɔ choo, kunda leKilisiɔŋndo nɔ mbo dɛɛniaa wana o wana le mbo kɛɛ wana nda chal o nɔɔ niŋndo le. Lepum pɛŋ mi wana suunda hoo le wo chɛl le ma wa nda wana tɛɛmbuu koŋ sawaa wo, taama taama te o wookuŋ pɛ a kɔl ndɔɔ fau. O wa bɛɛ lende, te waŋndo nɔ pɛ dioo le kiɔɔ wana nda cho o nɔɔ niŋndo a mɛɛ Baabuiyo dimi yɛ, ndupila nɔ ni mbo kɛɛsiaa a ba ndɔ, nduyɛ mbo bɛɛndiaŋ le fula makɔɔli cho wa o kɛɛsiaa ndɔɔ kɔɔli wo.—Kaleesiaŋnda 6:​5.

O teleŋnda kala kala laŋ lapum niŋ, mi Kilisiɔŋnda apum kɛɛsiaa le kɛyaŋndo ɔɔ piɔuwaŋndo nda wana nda chal o nɔɔ niŋndo mi che bɛɛ naa waŋndo opilɔɔ suunda le. O hei niŋ, Baabuiyo dimi maa, “mɛɛ chua lɛ wana pɔnɔ cheleŋ te. Te koŋ te, mɛɛ miiŋgu niko pɔnɔ num ŋ kɛɛ koŋ ndo o ba.” (Kɔliŋtiaŋ Tasoo 7:​11) Kilisiɔŋnɔ waa lende, o nɔ di o di le mbo nuuviaa wana cheleŋ le ma chal o nɔɔ niŋ te. (Maatiu 5:​32) Ŋ yaasiaŋndɔ sɔɔŋ ŋpum ŋ waŋnda che maa ŋ bɛnda le piɔuwaŋndo woŋ.

Kiɔɔ yuŋgoo malaa a siɛlɛi fuu. Lepum mi pɛŋndeŋ le susa yuŋgoo nyɛkɛndɛi, kanifuule, poo kɛɛ kpoŋ a siɛlɛi fuu le nda mandaa. Nduyɛ, o nɔla sɔlaa. Baabuiyo dimi aa, “Wana o wana cho wana laalaŋ, te o kɛɛ le wanaa nduaa mandaa pɛ, taama fau yuŋgu ndɔɔ, mɛɛ tiindaŋ wanaa laalaŋnda nɔ o Mɛlɛka niŋ ndo ndu o mal koŋ ni. Wana waa lende o wɔu mbo hiau bɛɛ wana cho wana laalaŋ te wo.” (Timoti Tasoo 5:​8) Te poo kɛɛ pɛ kpoŋ le siŋgaŋndo, nduyɛ mi chuaa che maa o nɔ mbo manda yoomu ndɔɔ vɛlɛ a yoomu chuauwaa nduaa, o hei niŋ, chuaa kua o lemasa le mi masaleŋ le piɔu nda tɛɛŋ nda pɔnɔ ndɔ, mi che bɛɛ naa o cho lende le Baabuiyo dimi le. Kɛ wanaa chua chilaŋ o kundaa niŋnda nɔ ma wa yekeŋ, te wana lanɔ cho o nɔɔ wo bii pɛ seiyo o ndalo maa pɔnɔ ndɔ kɛɛ le yuŋgoo mandaa. Te waŋndo kɛɛ pɛ kpoŋ le yuŋgu ndɔɔ mandaa, mbo sɔla solioo le keŋ.

Te waŋndo opilɔɔ wa pɛ ŋua ŋua. Waŋndo opilɛ o nɔɔ niŋ wa pɛ ŋua ŋua, mbo tosa mi kɛndiaa waŋndo opilɔɔ a yoomu ndɔɔ wa o kpundɔɔ niŋ. Wana cho hoo ŋua ŋua wo, te Kilisiɔŋnɔɔ o cho ni, wanaa chua chilaŋ o kundaa niŋnda nɔ ma yaasiaa suɛi kalɛi vɛ vɛ le sinaa te tonya i cho ni. Waŋndo sɔla solioo po o kunda leKilisiɔŋndo niŋ le kɔl tuu bɛndoo.—Kaleesiaŋnda 5:​19-21.

Te Mɛlɛka piɛiyaa Kilisiɔŋnɔɔ wa pɛ o kpundɔɔ niŋ. Mi waŋndo opilɛ o nɔɔ niŋ kindiŋ o nɛi o nɛi niŋ le mbo kuuna wana nda cho o nɔɔ niŋndo Mɛlɛka piɛiyo. Te koŋ te, o nɛilaŋ lapum niŋ, mbo baŋ wana nda cho o nɔɔ niŋndo le sawa Mɛlɛkaa tɛɛmbuu wo. O hei niŋ, wana yoomu ndɔɔ cho o kpundɔɔ niŋndo kɛɛsiaa a bandɔ te o che pɛ maa nyɛ o nyɛ cho le mbo tosa “nyɛ Mɛlɛka dimul naa” le tosaa wo le, mɛɛ o kua o masaleŋ le ma piɔwaŋ.—Walta Wanaa Chiisuaa 5:​29.

O nɛila naŋ yaasiaa laŋ ndaŋ niŋ kpou, wana o wana nɔ mbo kindila wana cho o kpundɔɔ niŋndo le mbo piɔuwaŋ ɔɔ mbo wa diompilɛ nda wana nda cho o nɔɔ niŋndo le. Chaaŋaa nduaa laalaŋ kendu o Mɛlɛka piɛiyo niŋnda vɛlɛ a wanaa chua chilaŋ o kundaa niŋnda mala ndu, nduyɛ ma sila ndu o Baabuiyo niŋ. A sina kpede nyɛ o nyɛ yɔŋnuŋ pɔnɔɔ a lanɔɔ tɛɛŋndo le. Chɛhowa ndupilɛ kpe sina ni. A tonya, Kilisiɔŋaa cho o nɔɔ niŋnda chɔm Mɛlɛka bɛɛleŋ kposoŋ te, te a wa pɛ nɛilaŋ nuuviaa halikpeŋ ma piɔuwaŋ nda wana nda cho o nɔɔ niŋndo. Tuu o tuu waŋndo nɔ pɛ le piɔuwaŋndo nda wana nda cho o nɔɔ niŋndo, Chɛhowa sina, mɛɛ mɛɛ o kindiŋ le ndu vioŋɔɔ. A tonya, “nyɛ o nyɛ Mɛlɛka toosiaa o pilɛ bɛɛ cho mbo venuŋ ndu le.” (Hibuluiya 4:​13) Kɛ te suɛi wɔɔŋ wɔɔŋnde yɔŋnuŋ pɛ, wana o wana nɔ mbo pɛɛsa kɛɛsiaa Kilisiɔŋnɔɔ tosa le piɔuwaŋndo nda wana nda cho o nɔɔ niŋndo le. “Kani fondole, paale cho fuuluu naa kpou mi ŋ sim Mɛlɛka o hɔl mbo kɔɔsa a naa.”—Luomaŋnda 14:​10-12.