SUƐI LEBOLLE O KƆƆ | CHIISU BAŊA NAA O YƐƐ?
Sabu Naŋ Nɔ Miŋ Sɔla Pioŋɔɔ Wo
“Wanachioo veluŋ pɛ o viu achal te. Nduyɛ nyɛpalaa komal ndu o yoomu ndɔɔ niŋndo o cho bɔɔ. Mɛɛ bil puiyaa o cho naa yɛ wanachioo cho ni. Te o veluŋ pɛ, o nɛi sulɔɔ le, nduyɛ o nɛi vɛlɛ wuŋnɔŋ te. Mɛɛ wunduleŋ le lo wana chi leŋ te yɛ, lende wanachioo lo ni.”—Choobu 14:1, 2, NW.
Chɔŋ o sindɔɔ niŋ pa, waŋnda sɔl niŋ luaŋ mɛɛ i wa niŋ suɛi kɔndɔfili le loo feleŋgɔnɔ, nduyɛ ma wa kɛndiaa lefafɛɛŋ yɛ. Kɛ icho suɛi imɔnɔ le sinaa maa miŋ vi. Diomnda Choobu soo laŋ amaluaŋ ndaŋ la hiou niŋ wɔsioŋ waalaŋ la yaa. Nduyɛ hau bɛɛ la cho peelɔŋndo.
Waŋchieeya chieeŋndo balɔɔ silɔ nɔ yeemɛi ikala poŋ le waa achal lefafɛɛŋ. Baabuiyo dimul naa maa Mɛlɛka dɔu naa yeemɛi hei o lakɔl, nduyɛ le miŋ sina ndi lapɛŋgu. (Ikilisiate 3:11, NW) Te keŋ wa pɛ lende, baa o bɛnda pa miŋ yiyaŋ maa Mɛlɛka kaalaa nɔla mbo dɔu naa yeemɛi naŋ nɔla sɔla le ve o lakɔl? Te muli numndo cho ni aa sako, mɛɛ a chaa muli. Diom Mɛlɛkaa veelu piɔmndo aa yaamɔɔnɔɔ, nduyɛ mbo dimul naa maa “yaamɔɔnɔ Mɛlɛka mɛɛlu niŋ tɛɛmbuu kpɔŋ ndo, ndu cho piɔmndo ni.”—Kɔliŋtiaŋ Tasoo 15:26.
Kiisaŋ cho naa le sinaa maa yaamɔnɔɔ le piɔmndo cho le. Wana o wana kɔlkalu cho mbo ke ndu naa chalaa le. Te kpundɔɔ wa naa pɛ sɔɔŋgoo ikɛi, miŋ kpakpala ndu, miŋ yifaŋ, ɔɔ miŋ basulaŋ. Te ŋ naa pɛ, miŋ nuuviaa nɛilaŋ le kɛndiaa sɔlaa. Miŋ kei o nɛi o nɛi niŋ le kpakpalaa nyɛm tosa naa miŋ sɔla piɔmndo woŋ.
Baa saboo cho pa le laalaŋndo maa yaamɔnɔ paandoo hoo cho tambei sɔla? Ei, saboo cho. Chɛhowa Mɛlɛka, Wana Toosiaa waŋchieeya wo, toosiaa nda le ma wa achal le wɔsiŋ biŋgi koni ma vi le. Piɔm wanachioo ve sabu tase Mɛlɛka le. Ndoo yeema waŋchieeya le ma wa achal o chieeŋndo choo lefafɛɛŋ, nduyɛ nyɛ o nyɛ o dimi pɛ, o nɔla mbo tosa ndu.—Aisaiya 55:11, NW.
Kɛ, vɛɛnɛ piɔmndo cho yɛ tambei sɔla? Chɔŋ a teleŋ piɔmndo kanduŋndo, waŋnda cho kindi kindiŋndo le piɔmndo faŋaa, kɛ a tiu wɔ ba le. Nduyɛ hau bɛɛ, yeemɛi hei cho wɔ kɛ. Wanaa sinaa dɛniaa bɛnduaa tosa niŋ makeetiilaŋ a koowaŋ le naalaŋ lapum dɔɔniaa. A tɛɛsiaa niŋ vɛ vɛ mɛɛ yoomu nyaa yoomaa cho yɛ. O lɛŋii bɔɔbɔɔ niŋ, waŋnda cho tiŋ viouwɔɔ achal mbo hiau o wɔsiŋ kɛmɛ hiou woŋ niŋ. Kɛ a koŋ kpou, a nɔla piɔmndo faŋa le. Baabuiyo dimi aa, “Naa kpou cho miiŋgoo o puulu naŋ fula niŋndo.”—Ikilisiate 3:20, NW.
Yooŋgu kɛndɔɔ cho ni maa, ŋ nɔ miŋ tiindaŋ kɔlkalu iwanachieeyaa le bahawɛi cho niŋ hoo le lɔɔ levil lo solioo le. Chɛhowa Mɛlɛka tosa niŋ kɛɛsiaa le naa baŋaa piɔmndo o ba. Nduyɛ, Chiisu Kiliti o hɛli ni le hei tosaa.