Pɛɛku Bɛndoo A Nyɔŋ Okɔɔ Nɔ Naa o Kunduŋ Nda

O wɔsiŋ biŋgiŋ hiou woŋ niŋ, yaula wanaa dimi maa Mɛlɛka cho le wa cho tiuwo silɔ. Wanaa bɔɔbɔɔ sina a yaulaŋ ndaŋ okɔɔ, nduyɛ la cho hunɔɔ a kɛɛ diompilɔɔ waŋnda tɛɛŋ. Mi Deeve Ikumaŋ, wana sinaa dɛnɛ bɛndu pɛɛku a hullaŋ vɛlɛ a faluŋ yɛ yiɔŋ okɔɔ wo poonyiaa aa, “Wanaa nua diomndaŋ o yaulaŋ ndaŋ niŋnda apum yiyaŋ maa wanaa pɛɛku a nyɔŋ okɔɔ wa sina sɔɔŋ kpou.” Mbo hiau lachi a dimioo aa, “Le mi wanaa pɛɛku a nyɔŋ okɔɔ wa wa wanaa kɛndɛ, a nɔ ma kumbi yiyaŋnda ndalaŋ, nduyɛ wali ndaa cho ni, le sɔɔŋ sɛnɛiyoŋ a ŋ nda ve kɔl te woŋ saalɔŋndo.”

Kani ma sindɛ, wanaa kendu kɔllo tau le pɛɛkoo a nyɔŋ okɔɔ wa sina niŋ sɔɔŋ wana ve nda bɛɛ kɔl te woŋ o yaasiaa ndaa niŋ, le saalɔŋndo mulilaŋ le nyunala kɔndɔfiltaŋ a nyɛm Mɛlɛka toosiaa woŋ okɔɔ. Kɛ, mi apum tosa biondɔŋndaŋ tau o yaasiaa hoo niŋ. Aisaki Niutiŋ wa wana ndoo pɛɛku a nyɔŋ okɔɔ tau wo ni. Mbo chɔm maa nyɔɔ pum cho maa kado, kpaaya nyɔɔ hoo bii chieeŋndo, looŋ, a looŋ kpuŋkpaŋ diompilɛ ni. Mbo toosiaa nɛi teŋgeŋndo opum mɛɛ wana chɔm yɛ. Hoo mala le sinaa mɛɛ nyɔŋ siŋgaŋ yɛ. Chɔmndo hoo nda soliŋ kpeku ni le kɔmpitɛiyo (ɔdinatɛɛloo) toosiaa, kelaa choo choo, nduyɛ, le pɛɛkoo le sinaa mɛɛ nyɔŋ pum tosa wallo diompilɛ yɛ. Niutiŋ ndoo nɔ bɔɔ yeemɛi o pɛɛkoo pum niŋ. Ndu cho ni, muuliaŋndo nyɔŋ a maŋgalaa. Sabu pɛɛkoo hoo wa ni, le chiliŋuŋ yɔŋaŋ muŋ siiŋgoo kooliiye.

Ndoo hiou wɔsilaŋ 1,500 tuupa mi Niutiŋ vialuŋ, mi Kilikiinɔ pɛɛku a looŋ okɔɔ wo diolaŋ Tɔlɛmi tofa choo choo a lehɔl. Mbo kindiŋ vɛlɛ le sinaa mɛɛ chieeŋndo a nyɛm cheleŋndoŋ o halaa niŋ tosa wallo yɛ, nduyɛ hei mala ndu ni mbo tiuba le mapiiyo (katioo) toosiaa. Kɛ ndoo nɔ laalaŋndo maa chieeŋndo cho nyɛ o nyɛ fee tɛɛŋ ni. Mi Kaal Sagaŋ wana sinaa dɛnɛ bɛndu pɛɛku a looŋ okɔɔ wo poonyiaa a Tɔlɛmi okɔɔ aa, “Nyɛ Tɔlɛmi dimi hoo wo hui waŋnda le wɔsioŋ 1,500. Hoo chɔm maa mɛɛ mɛɛ waŋndo nɔ kɔlkalu sinaa isɔɔ, mɛɛ mbo dimi choolaŋ.”

Hau, wanaa pɛɛku a nyɔŋ okɔɔ wa cho simulta ndaŋ komallo o sɔɔŋ nda cho pɛɛkoo woŋ niŋ. A tiu pa ba ma sɔla sinapɛŋgu walaŋndo a chieeŋndo okɔɔ? Ŋ yil wanaa cho haa pɛɛkoo a nyɔŋ muŋ okɔɔ wa balikaa le hiouwɔɔ lachi nda cho tosaa wo, a tɔnɔla nda chuu naalaŋ. Kɛ o bɛnda vɛlɛ miŋ sina naa pɛɛku ndaa kunduŋ nda. Mi wana sinaa dɛnɛ bɛndoo Pɔɔl Deevis dimi aa, “O kendu le miŋ sɔla tɛɛsiaa ke naa kɔlkaloo, mbo chɛlaŋ nyɛkɛndɛi a chieeŋndo okɔɔ wo.” Tonyaa Deevis dimi ni. Waŋchieeya nɔla ma sɔla sinapɛŋgu walaŋndo a chieeŋndo okɔɔ le. Lelaŋ, te waŋnda dimi pɛ maa wanaa pɛɛku a nyɔŋ okɔɔ wa nɔla ma tɛɛsiaa nyɛ o nyɛ Mɛlɛka toosiaa, o bɛnda miŋ hiu laalaŋndo dɔuwɔɔ o nyɛ nda dimi wo niŋ te.

Baabuiyo soo a mɛɛ nyɛm Mɛlɛka toosiaa woŋ nɔ kaamaa yɛ. Mbo dimi aa, “Nuawɔ! Sɔɔŋ Mɛlɛka tosa woŋ, ŋ hiou bɛɛ muŋ. Nyɛ pɔmbuiinii koni naŋ tuei a sɔɔŋ bɛnduŋ o tosa woŋ okɔɔ ni.” (Choobu 26:​14, NW) Sɔɔŋ cho tau ŋ kɔlkalu wanachioo nɔla mbo sina le woŋ. Diomnda kiilanɔɔ Pɔɔl poonyiaa le wɔsioŋ 2,000 niŋndaŋ la cho wɔ tonya. Mbo dimi aa, “Mɛlɛka cho wana . . . kɔl kalu bɛndu bɛndu. Nduyɛ nyɛ o nyɛ fee o sina. Wana o wana sɔla sina pɛŋgu a mɛɛ o tosa sɔɔŋ ndɔŋ yɛ le.”—Luomaŋnda 11:33.