Bɛɛndiaŋ Suŋ Suŋ le Yoomu cho Wa o Chieeŋ Sɛnɛiyo Niŋndo

1, 2. (a) O salala ŋ cho lehɔl o nɛi o Kpele Hɛnɛkiɔɔ niŋ o lɛŋndeŋ choo laŋ tɛɛŋ, o kuɛɛ ŋ hiou yɛ hɛnaŋ? (Tofa fotueiyo o peeleŋ ndeŋ choo.) (b) Salala kuɛɛ cho yɛ wa o chieeŋ sɛnɛiyo niŋ a Mɛlɛka okɔɔ?

“YOOMU KPEEKPEIYO.” Le naa bɔɔbɔɔ, diomndaŋ la loonuŋ naa a tiindaŋ naŋ nɔ le yoomu fafɛɛŋndo o Kpele Hɛnɛkiɔɔ niŋ o lɛŋndeŋ choo wo. Lelaŋ pɛŋ kiilanɔɔ Pɔɔl tuu “yoomu fafɛɛŋndo” ni a “yoomu kpeekpeiyo.” (Nuawɔ Timoti Tasoo 6:​12, 19.) Ŋ cho lehɔl o nɛi le yoomu cho wa lefafɛɛŋndo, o chuu naa niŋ kɔl hiniaa a nyaaloo wo. Teleŋ cho fuuluu idii o idii naŋ chɛŋ pɛ, kɛndiaa naa ŋdiallo, a yiyaŋnda naalaŋ kpou cho waŋnɔŋ walaŋ. Ŋ laalaŋ niŋ pɛŋ a hei le. (Aisaya 35:​5, 6) Yiyaŋndɔ mɛɛ i wa niŋ suɛi kɛndɛ le waa diompilɛ a wanaa naŋ kaala wa, chaaŋaa naa, vɛlɛ a wanaa fula niŋ o sɛilaŋ niŋnda yɛ! (Chɔŋ 5:​28, 29; Walta. 24:​15) Ŋ nɔ niŋ vɛlɛ fondaa le kɔl kalu naa chɔɔloo chiɛɛŋaa a dɛnɛ sinaa bɛndoo okɔɔ, nyɛchaa, taŋgultaŋ, ɔɔ dɛnɛ sinaa cheleŋ.

² Mi che bɛɛ ŋ cho nyɛm kɛndɔŋ muŋ kpou lehɔl, kɛ sala cho mbo hiau laŋ kpou o chieeŋ sɛnɛiyo niŋndo cho pɛɛkoo a Mɛlɛka okɔɔ ni. Ŋ cho bɔɔ wa a kɔl hiniaa le sinaa maa diola Chɛhowalaŋ la sɔla diondɔɔ, nduyɛ maa kpuluŋgumayɛi nduɛi i sɔla tɔɔ! (Maa. 6:​9, 10) Kɔllo cho naa wa wuye wuye le chɔɔ sabu tase Chɛhowaa le waŋchieeya a chieeŋndo o peelɔŋndo. Nduyɛ, yiyaŋndɔ mɛɛ i wa niŋ tɛtɛlɛ le Chɛhowa sɔɔŋgoo ikɛi yɛ! Kanifuule, ŋ cho lo walaŋyɛi sɔɔgoo ikɛi haaa miŋ mɛɛlu ndi sɔla yɔɔfɛɛ.—Sam 73:​28; Chemi. 4:8.

3. Le yɛɛ naŋ nɔ yɛ miŋ bɛɛndiaŋ suŋ suŋ?

³ Salalaŋ ndaŋ la cho wa le naa. Kanifuule, Chiisu ke naa tiindaŋndo maa “Mɛlɛka ndu nɔla mbo tosa nyɛ o nyɛ.” (Maa. 19:​25, 26) Kɛ te ŋ nɔ pɛ o kɔl le waa o chieeŋ sɛnɛi koŋ niŋ, nduyɛ miŋ yeema le waa achal o Wɔsila Waapilɛ Kiliti cho wa o Masaleŋ choo laŋ, mɛɛ ŋ nɔ miŋ tosa nyɛ suŋ suŋ le miŋ “sɔla” yoomu fafɛɛŋndo. Ŋ nɔ miŋ wa lehɔl o nɛi le mɛɛlula chieeŋ dɛnɛ wɔɔŋndo hoo. Nduyɛ, ŋ nɔ miŋ tosa kɛɛsiaala kɛndɛlaŋ suŋ suŋ le bɛɛndiaŋndo le waa o chieeŋ sɛnɛiyo niŋ. Mɛɛ naŋ cho wɔ naa o chieeŋ wɔɔŋndo niŋ yɛ, vɛɛ naŋ tosa yɛ hei?

MƐƐ NAŊ LOOKU MIŊ BƐƐNDIAŊ YƐ

4. Chɔmndɔ tamaseliiyo a mɛɛ naŋ looku miŋ bɛɛndiaŋ le waa o chieeŋ sɛnɛiyo niŋ yɛ.

⁴ Vɛɛ naŋ bɛɛndiaŋ yɛ niko suŋ suŋ le yoomoo o chieeŋ sɛnɛi Mɛlɛkaa niŋ? Mɛɛ ŋ dimi wɔ maa ŋ cho kɛɛsiaa tosaa le kɔlaŋ o lɛŋnde cheleŋ niŋ. Vɛɛ naŋ bɛɛndiaŋ yɛ le kɔlaŋ ndaŋ? Ŋ kandu suɛi maŋgalɛi nda dimi loŋnde pɛɛkoo. Pɛɛkoo a naamula ndalaŋ okɔɔ mala naa. Ŋ kandu nyɛdiaa nda dia loŋndo dioo. Lepum, o bɛnda miŋ kandu sɔɔŋ tosaa mɛɛ wana yɔŋ aa o lɛŋnde kala leŋ niŋ naŋ cho niŋ ni. Nduyɛ lende naŋ nɔ ni miŋ wa te ŋ fuuluu pɛ loŋ. Mɛɛ lende koni, te ŋ yeema pɛ miŋ wa o chieeŋ sɛnɛiyo niŋ, suŋ suŋ naŋ nɔ ni miŋ bɛɛndiaŋ. O hei niŋ, tofawɔ tamaseliila cho lachi laŋ.

5, 6. Vɛɛ diikɔŋ naa o nɛi chɔmaa naŋ sɔla o Mɛlɛka piɛiyo niŋndo pɛɛku yɛ naa le waa o chieeŋ sɛnɛiyo niŋ?

⁵ O chieeŋ sɛnɛiyo niŋ di Mɛlɛka nɔ le waa Masa wo cho peelɔŋ ni. Teŋgeŋndo wa niŋ bɔɔ te a tuu pɛ mɛɛ waŋchieeya choŋnuŋ a ba nda o masale chieeŋ Setanaa hoo bɛŋgu yɛ! Waŋnda apum a yeema ma waŋnuŋ o ba ndaa choo, nduyɛ ma baŋ sɔɔŋ tosaa mɛɛ nda hɛnaŋ yɛ. Kɛ yɛɛ cho yɛ fulamakɔɔlioo? Kiɔɔ nɛi chɔmaa Mɛlɛkaa tolɔɔ kɔɔli hiŋ niŋ hau a saŋgaa, nyɛpalaa, a kpundɛlaŋ. (Chɛlui. 10:​23) Nuawɔ se mɛɛ naŋ cho a yeemɛi le chɔɔ teleŋ waŋchieeya kpou wa niŋ o kpuluŋgumayɛi Chɛhowɛi bɛŋgu yɛ!

⁶ I wa niŋ bɔɔ suɛi kɛndɛ bɛndu le waa o kɛɛsiaa Chɛhowaa bɛŋgu o chieeŋ sɛnɛiyo niŋ. Ndu cho ni, wallo tosaa le chieeŋndo nɛŋioo nyɛkɛndɛi, wanaa miiŋgu niŋ yoomu wa pɛɛkoo, vɛlɛ a hɛnaŋ Chɛhowaa le waŋchieeya tosaa. Kɛ te o yɔŋ yɛ ma dimul naa le wallo opum tosaa o naŋ hɛnaŋ te wo? Ŋ nɔ pa miŋ yɔŋguŋ o nɛi chɔmaa koŋ ba bɛŋgu le tosaa nyɛ bɛnda miŋ tuei wali koŋ yeela wo? Mi naa bɔɔbɔɔ muli aa ei! Kɛ suŋ suŋ yɛ, ŋ cho pa yɔŋgɔŋndo o nɛi chɔmaa cho o kɔɔna Mɛlɛkaa niŋndo o ba bɛŋgu? Te ŋ wa pɛ tosaa lende, mɛɛ ŋ cho bɛɛndiaŋndo le yoomoo o Masale Chɛhowaleŋ bɛŋgu.

7, 8. (a) Le yɛɛ naŋ nɔ yɛ miŋ nɔ kaa diompilɔɔ? (b) Siŋgaŋnda kuɛɛ komallɛ Kilisiɔŋnda apum? (c) Nduyɛ yɛɛ naŋ nɔ yɛ miŋ wa kɔl a yoomoo okɔɔ o lɛŋndeŋ choo o chieeŋ sɛnɛiyo niŋ?

⁷ Bɛɛndiaŋndo le waa o chieeŋ sɛnɛiyo niŋ cho ko yɔŋgɔŋndo o kɛɛsiaala cho suŋ suŋ o kɔɔna Chɛhowaa niŋndaŋ te, kɛ wallo tosaa le miŋ nɔ kɔl hiniaa a kaa diompilɔɔ. Te ŋ nɔ pɛ diompilɔɔ a wanaa cho chilaŋ chuaa hau wa, miŋ nɔ kɔl hiniaa a nyaaloo o wali sɛnɛi nda ke naa le tosaa wo niŋ, mɛɛ kaa pilɛ koŋ kpe naŋ cho nɔ o chieeŋ sɛnɛiyo niŋ ni. (Nuawɔ Hibuluiya 13:​17, NW.) Mɛɛ Isɔluɛiya luɛi o Lɛŋnde Mɛyaaleŋ niŋ, ma piɔu leŋ a buŋgaŋ. (Nɔm. 26:​52-56; Chɔɔ. 14:​1, 2) Ŋ sina wɔ suŋ suŋ naa kpeekpei wana o wana cho sɔla buŋgɛi o chieeŋ sɛnɛiyo niŋnda le. Kɛ, balaŋ dɔuwɔɔ diompilɛ chuu naa kɔl hiniaa a nyaaloo le hɛnaŋ Chɛhowaa tosaa ba o ba naŋ wa o lɛŋndeŋ choo a teleŋ koŋ.

⁸ Le miŋ sɔla dioo le waa o Masale Mɛlɛkaleŋ bɛŋgu, mɛɛ miŋ dɔu sɛmbɔɔ le waa diompilɛ o kɔɔna Chɛhowaa niŋ, nduyɛ miŋ wa walta nda ke naalaŋ tosaa. I cho tonya maa mɛɛ teleŋndo hiau fau, lende ko sɔɔŋ kua a siŋgaŋndo ni. Le tamaseliiyo, ma yɔŋ waŋnda apum o wali pollo niŋ o yuŋgoo Bɛtɛl cho Amɛlika wo niŋ le yooŋgu kɛndɔɔ dimioo. Nduyɛ, a cho salalaŋ tueiyɔɔ yeela la hɔbɛi o wali lɔɔlɔɔ cheleŋndo hoo niŋ. Apum wa buɛile ibuŋgaleŋ paandu. Kɛ le mɛɛ nda cho niŋ yuuwaa yɛ, ɔɔ le sabula cheleŋ, ma miŋgi nda wali lekɔɔfa teŋgeŋndo tosaa. Te ŋ nɔ pɛ kɔl hiniaa, miŋ piɛi o Mɛlɛka lo le malaa, nduyɛ miŋ tosa nyɛ naŋ tiuba le tosaa wo o wali ndɔɔ niŋ, ŋ cho wa a kɔl kɛndɛ, nduyɛ miŋ sɔla salalaŋ tau mi che bɛɛ ŋ cho o palɛi mɛɛlɛi niŋ. (Nuawɔ Pulɔwaa 10:22.) Kɛ a chila naalaŋ okɔɔ yɛ? Kɛlɛŋgaa miŋ sina dɔɔ naa naŋ yeema waa o chieeŋ sɛnɛiyo niŋnda. Kɛ ma dimul naa le miŋ faŋaŋ loŋ le kɔlaŋ naa cheleŋ. Ba o ba naŋ wa a teleŋ koŋ, nduyɛ nyɛ o nyɛ naŋ tosa, ŋ cho saboo nɔ le balikaa malɔɔ a kɔl hiniaa nɔɔ. Nduyɛ nyaaloo cho naa wa o piaa cha o lakɔl.—Nɛhi. 8:10.

9, 10. (a) A sɔɔŋ kuɛɛ okɔɔ naŋ nɔ yɛ miŋ nɔ kaa biuwaŋndo o chieeŋ sɛnɛiyo niŋ? (b) Vɛɛ naŋ chɔm yɛ maa wanaa biuwaŋnda naŋ cho ni?

⁹ O chieeŋ sɛnɛiyo niŋ, teleŋnda bɔɔbɔɔ cho wa miŋ chɔm kaa biuwaŋndo. Le tamaseliiyo, miŋ tuei maa waŋnda apum miiŋgu yoomu mi wanayaŋ ndaŋ a chaaŋaa ndaa wa a nyaale. Kɛ, naa bɛɛ nɔ miŋ chum le mi wanaa naa naŋ kaala wa bɛɛ miiŋgu yoomu. Te o wa pɛ lende, ŋ tosa pa kɔl kɛndɔɔ a wanaa cheleŋnda latulu nduyɛ miŋ chum? (Luomaŋ. 12:​15) Te ŋ pɛɛku pɛ suŋ suŋ le miŋ chum Mɛlɛka le sɔɔŋ o dimi woŋ peeloo, koŋ nɔla mbo mala naa le miŋ biunuŋ o chieeŋ sɛnɛiyo niŋ.—Ikili. 7:8.

¹⁰ Ŋ bɛɛndiaŋ vɛlɛ le waa o chieeŋ sɛnɛiyo niŋ te ŋ biunuŋ pɛ le tonya cho o Baabuiyo niŋndo chɔɔloo sinaa. Baa ŋ cho pa wanaa nɔla pɛɛkoo, nduyɛ miŋ chum le chɔɔloo sinapɛŋgoo sɔlaa a tonya Baabui cho hoo tɛɛsiaŋndo o pɔmpɔmbɔ wo? Te o wa pɛ lende, mɛɛ o chieeŋ sɛnɛiyo niŋ bɛɛ, i ve niŋ suɛi kala le chumndo miŋ che mɛɛ Chɛhowa wa niŋ waŋchieeya sawala ndɔlaŋ chɔmndo yɛ le.—Pulɔ. 4:​18; Chɔŋ 16:12.

11. Yɛɛ Chɛhowa cho yɛ naa pɛɛkoo suŋ suŋ a chaŋyɛi naa chaaŋaa naa waŋchieeya okɔɔ? Nduyɛ vɛɛ hei cho yɛ naa mala o chieeŋ sɛnɛiyo niŋ?

¹¹ Suiliŋ cheleŋ mala naa miŋ wa o chieeŋ sɛnɛiyo niŋndo cho kaa malaa hakioo ni. O Wɔsila Waapilɛ Chiisu cho wa o Masaleŋ choo wo, o cho chua teleŋndo tau le mi wanaa sandaa a wanaa sendu le wa mal kaalaŋ lapum. (Walta. 24:​15) Ŋ biuwaŋ niŋ pa teleŋ koŋ vellaa velle a kaalaa? Te ŋ pɛɛku pɛ le hakilaŋ malnaŋndo fasɛi, nduyɛ miŋ fafaŋ piɔuviaŋndaŋ kɔɔli, i cho wa tɛtɛlɛ le naa o chieeŋ sɛnɛiyo niŋ.—Nuawɔ Kolosiaŋnda 3:​12-14.

12. Tɛɛsiaa wɔ mɛɛ nyɛ naŋ cho lehɔl o chilaŋ niŋndo cho nyɛ pilɛ a kaa naa suŋ suŋ yɛ.

¹² Te ŋ huŋ wa pɛ o chieeŋ sɛnɛiyo niŋ, koŋ chɔm naa maa teleŋ o teleŋ ŋ yeema nyɔɔ pɛ, ŋ sɔla bɛɛ ndu le. Kɛ, waa o chieeŋ sɛnɛi koŋ niŋ cho ni, balika melaa chɔmndo vɛlɛ a kɔl hiniaa nɔɔ o nyɛ o nyɛ niŋ, a mɛɛ naŋ cho salalaŋ sɔlaa le yɔŋgɔŋndo o kpuluŋgumayɛi Chɛhowɛi o ba bɛŋgu yɛ. O chɔm vɛlɛ maa ŋ nɔ miŋ dɔu o wali niŋ suiliŋnda Chɛhowa cho naa pɛɛkoo suŋ suŋ ndaŋ. Te ŋ pɛɛku pɛ suŋ suŋ mɛɛ naŋ nɔ miŋ wa o chieeŋ sɛnɛiyo niŋ yɛ, ŋ cho suiliŋnda naŋ soliŋ niŋ kpeku lefafɛɛŋndaŋ sɔla. Nduyɛ, laalaŋ naa naŋ cho koŋ kindioo ni maa chieeŋ Mɛlɛka dimi le hunɔɔ wo cho tonya. (Hibu. 2:​5; 11:​1) Le handɔɔ lechoo, chɔmndo naŋ cho koŋ ni maa ŋ nɔ yeemɛi le chɔɔ sɔɔŋ yɔŋnɔŋndo o nɛi sakpo sakpo o chieeŋ sɛnɛiyo niŋ yɛ. A tonya, ŋ cho bɛɛndiaŋndo le yoomu fafɛɛŋndo o chieeŋ sɛnɛiyo niŋ.

MULI HƆLLA SUŊ SUŊ O SƆƆŊ MƐLƐKAŊ CHOO

13. Sɔɔŋ suu kuɛɛ cho yɛ wa nyɛ tasoo peŋ o chieeŋ sɛnɛiyo niŋ?

¹³ Chɔɔlu wɔ tofa nɛiyo opilɛ o naŋ bɛɛndiaŋ le yoomu cho naa lachi wo. Mɛlɛka mɛi lediom maa nyɛdiaa cho wa o hɔbɛi, vɛlɛ a nyɛm cheleŋndoŋ o chieeŋ sɛnɛiyo niŋ. Kɛ ŋ cho tɔnɔ hiou nyɛm muŋ kpou wo sɔla, te ŋ landuŋ pɛ kɔl le sɔɔŋ iMɛlɛkayaŋ. (Maa. 5:​3) Sɔɔŋ iMɛlɛkayaŋ cho wa nyɛ tasoo ni. Nduyɛ ŋ cho chɔm maa ŋ cho kɔl nyuloo sɔla o Chɛhowa niŋ. (Sam 37:​4) Te ŋ kɛsi pɛ suŋ suŋ sɔɔŋ iMɛlɛkayaŋ nyɛ tase peŋ, mɛɛ ŋ cho bɛɛndiaŋndo le yoomu kpeekpeiyo o chilaŋ niŋ.—Nuawɔ Maatiu 6:​19-21.

14. Kpeleŋnda kuɛɛ mala yɛ feleŋguaa o Mɛlɛka piɛiyo niŋ le ma wa yoomu fafɛɛŋndo lehɔl o nɛi?

¹⁴ Vɛɛ naŋ chɔɔlu yɛ kɔl kɛndɔɔ sɔla o walta iMɛlɛkaya laŋ niŋ? O tasoo cho ni, kpeleŋndaŋ kɛsioo o Mɛlɛka piɛiyo niŋ. Te feleŋgɔnɔɔ ŋ cho ni, nduyɛ ma wa yiyaŋndo a ndi okɔɔ tau le wallo tosaa o wali Mɛlɛkaa niŋ, mɛɛ keeku wɔ hɔlteŋ o yaulaŋ lapum niŋ.Yaulaŋ ndaŋ la toosiaŋ le num chɔmndo pɛlta yɛ yɛla cho o wali lɔɔlɔɔ Mɛlɛkaa niŋndaŋ. Te a saaluŋ pɛ laŋ, chua opilɛ ma kɛsi ndu maa kpeleŋ.a A suukaŋ a wanaa viou niŋ tau o wali lɔɔlɔɔ Mɛlɛkaa niŋnda. Te a chua pɛ wali Mɛlɛkaa maa wali num, mɛɛ bɛɛndiaŋndo ŋ cho koŋ ni le chɔɔloo wallo tosaa le Mɛlɛka o chieeŋ sɛnɛiyo niŋ. Pɛɛku ŋ sɔla wo, a dɛnɛ ŋ sina o wali Mɛlɛkaa niŋndo cho wa nyɛ sɔvɛ bɛndu.

15. Kpeleŋnda kuɛɛ wanaa dimiaa yooŋgu kɛndɛ leMasaa nɔla yɛ ma kɛsi?

¹⁵ Naa wanaa dimiaa yooŋgu kɛndɛ leMasaa, kpeleŋnda kuɛɛ naŋ kɛsi yɛ le naapila? Ŋ kɛsi kpeleŋndo le naapila chɔɔloo chiɛɛŋaa naa naŋ vi tiŋ ŋdial o wali pollo niŋnda. Ɔɔ ŋ kindiŋ le chɔɔloo sinapɛŋgoo sɔlaa a sawalaŋ lapum okɔɔ o Baabuiyo niŋ, vɛlɛ a mɛɛ naŋ duau laŋ o wali niŋ yɛ. Le chɔɔloo diomndaŋ chaa veeloo faŋgaa tɛɛŋ a chaa suɛi yɔŋgoo, ɔɔ le nyunalaŋ mulioo o bɔŋaŋndaŋ yɛ? O fula wɔ o muŋ kɔɔli, numpila bɛɛ yiyaŋ a sɔɔŋ cheleŋ okɔɔ. Suɛi kɔlle cho ni maa, te a kɛsi pɛ kpeleŋndaŋ o Mɛlɛka piɛiyo niŋ, o chɔɔlu num yoomuaŋ luei le walta iMɛlɛkaya laŋ tosaa. Nduyɛ koŋ mala num ma bɛɛndiaŋ le waa o chieeŋ sɛnɛiyo niŋ.

Ŋ KANDU NIŊ TƆNƆLAŊ TUEIYƆƆ YEELA!

16. Le yɛɛ Chɛhowa piɛiyo cho yɛ suɛi kɛndɛ bɛndu o yoomu naa niŋ?

¹⁶ Baa te ŋ wa pɛ teleŋndo chuaa le bɛɛndiaŋndo le chieeŋ sɛnɛi Mɛlɛkaa, koŋ chɔm ni maa ŋ nɔ miŋ puɛɛnuŋ a suɛi sɔvɛi o yoomoo niŋ hau? Pɛ pɛ bɛɛ! Chɛhowa piɛiyo cho suɛi sɔvɛ bɛndu o yoomoo niŋ mbo hiau nyɛ o nyɛ. O cho naa maa kindila le nda cho naa le halikpeŋ miŋ hiou palɛi nyɛpalaa bɛndu cho naa lachi ve le. Lende Mɛlɛka toosiaa naa ni, nduyɛ o nɛi koŋ choo kinɛi naŋ tiuba ni miŋ wa a kɔl kɛndɛ. Chɛhowa chɛlɔɔ mbo chɔm naa nɛiyo vɛlɛ a kɛndɛi nduɛi kaalɛi sinaa kinɛi cho nɛi sɔviɔɔ ni mbo hiau waŋnɔŋndo o ba naa choo. (Nuawɔ Sam 63:​1-3.) O cho naa maa mɛɛ mi chieeŋ sɛnɛiyo fuuluu fɛŋ malaŋ naŋ tuɛi salala Mɛlɛkalaŋ yeela o ndu piɛiyo niŋ a kɔl naa kpou le. Kɛ la cho naa nuaa suŋ suŋ mɛɛ naŋ suaa naa yɛ! Naa pumnda cho niŋ pɛŋ salalaŋ ndaŋ tueiyɔɔ yeela le wɔsila bɔɔbɔɔ. Nduyɛ, ŋ che kpendekele maa yoomu cheleŋ cho mbo ke wana kɔl hiniaa mbo hiau hoo le.—Sam 1:​1-3; Aisaya 58:​13, 14.

17. Fonda kuɛɛ yeemaŋ naŋ cho yɛ wa o Kpele Hɛnɛkiɔɔ niŋ?

¹⁷ Yeemaŋ naŋ cho nɔ fonda ndɔɔ o chieeŋ sɛnɛiyo niŋ.Nduyɛ, te Chɛhowa ndoo yeema naa miŋ tuei nyɛ naŋ tosa wo yeela nyɛkɛndɛi le, mɛɛ le yɛɛ niko mbo toosiaa naa a yeemɛi keŋ? (Ikili. 2:​24) O nɛi o nɛi niŋ, Chɛhowa cho “tosa mi wana o wana hini kɔl” le lɔɔlɔɔ. (Sam 145:​16) Yelelaŋndo a pɛŋgioo nɔ fondaa o ndɔɔ. Kɛ le laŋ tueiyɔɔ yeela nyɛkɛndɛi, mɛɛ miŋ kɛsi fɛŋ chaŋyɛi nɛi a Chɛhowa nyɛ tase. Lende koni i cho wa o Kpele Hɛnɛkiɔɔ niŋ o chieeŋndo choo ni. I cho bɔɔ suɛi taasi le miŋ kɛsi yeemaŋ naŋ o fonda ndɔɔ, miŋ landuŋ ndɔ fɛŋ kɔl le Masale Mɛlɛkaleŋ, nduyɛ miŋ kɛsi kɔllo o salala wanaa Chɛhowaa nɔ suŋ suŋ ndaŋ choo!—Maa. 6:33.

18. Vɛɛ naŋ chɔm yɛ maa ŋ cho bɛɛndiaŋndo le yoomu fafɛɛŋ cho wa o Kpele Hɛnɛkiɔɔ niŋndo?

¹⁸ O Kpele Hɛnɛkɛ cho hunɔɔ wo niŋ, ŋ cho nyaaloo sɔla o hɔbɛi o naŋ sɔla wɔ paale pilɛ bɛɛ le wo. Ŋ chɔmnuŋ maa ŋ nɔ yeemɛi ikala kala le yoomu kpeekpeiyo a mɛɛ naŋ cho bɛɛndiaŋndo le ndu suŋ suŋ yɛ. Ŋ nɔŋnuŋ suiliŋnda iMɛlɛkaya laŋ, nduyɛ miŋ wa a kɔl kɛndɛ le wali dimiaa yooŋgu kɛndɛ leMasa keŋnuŋ naa wo dimioo a dialuŋ fulaa. Maa yeemɛi wa naa le kiltaŋ nyɛm iMɛlɛkayaŋ kɔɔli fɔ. A tiindaŋ naŋ nɔ o mɛila Chɛhowalaŋ niŋndo, maa ŋ biunuŋ miŋ chum le yoomu cho wa o chieeŋ sɛnɛiyo niŋndo!