Mɛɛ Mɛlɛka Ndoo Che Chɔuwo O WƆSIŊ KƐMƐ TASOŊ NIŊ YƐ

Yɛɛ ndoo yɔŋnuŋ yɛ? Le yɛɛ Mɛlɛka chɔulaba le Chuuwa mɛɛ o tosa o sindɔɔ niŋ yɛ le? Ɔɔ le yɛɛ o chɛllɛ nda ma tosa chɔuwo le halikpeŋ ma fula o nyɛkindilaa koŋ bɛŋgu le? Baa mɛɛ Mɛlɛka ndoo che chɔuwo yɛ siŋgaŋ ni? Sako. Kɛ siŋgaŋ bɛndu cheleŋ ndoo yɔŋnuŋ a Chuuwa okɔɔ ni. Ma kɛɛ Chiisu, Po Mɛlɛkaa, maa ndu cho Mɛsaya ni. (Walta Wanaa Chiisuaa 2:​36, NW) Lelaŋ, mi kaale Chuuwa tɛɛmbuu chaŋyɛi teŋgeŋ wa nda tɛɛŋ nda Mɛlɛka waa ve.—Maatiu 23:​37, 38.

Kaale Chuuwa a Lɛŋnde Mɛyaale ndɔleŋ tui lɛ manda Mɛlɛkaa yeela le. Nduyɛ ndaa nɔ lɛ di kposoŋ le balaŋ lueiyo o chɔu Mɛlɛka ve nda kɔɔli le wo niŋ te. A mɛɛ Chiisu ndoo dimi yɛ, mi Mɛlɛka puu salala ndaa nɔ teleŋ ba ndɔɔ wa nda choo wo mbo ke kaale sɛnɛileŋ, o Baabuiyo veelu aa, Isɔluɛi Mɛlɛkaa wo. (Kaleesiaŋnda 6:​16; Maatiu 21:​43) Kunda Kilisiɔŋaa pɔyaŋnda chɔm maa nda cho Isɔluɛi Mɛlɛkaa hoo ni. Mi Mɛlɛka dimul nda kpendekele o wɔsiŋ kɛmɛ tasoŋ niŋ aa, “Nya cho Mɛlɛka wanaa nduaa ni.”—Pitɛ Tasoo 2:​9, 10. Naapila piimiaa ndu diki diki ni.

Baa le mɛɛ Kilisiɔŋnda wa niŋ “wanaa Mɛlɛkaa” o wɔsiŋ kɛmɛ tasoŋ niŋ yɛ Mɛlɛka ndoo nɔ mbo chɔulaba le nda solioo o nyɛkindilaa Luomaŋnda bɛŋgu ni? Baa mi Mɛlɛka ndoo chɛl nda pa le ma chɔulaba wanaa wa nda nyɛkindilaa tuisioo choo wa? Pɛ pɛ bɛɛ. Le yɛɛ? Te o hiŋ pɛ a chɔu Mɛlɛka handu baa choo wo okɔɔ, Mɛlɛka ndupilɛ kpe chɔm teleŋ chɔu waa lende nɔ mbo tosaŋndo ni. Mɛlɛka tosa lachɔu le Kilisiɔŋnda o wɔsiŋ kɛmɛ tasoŋ niŋ te, nduyɛ o chɛl nda le ma tosa chɔula chieeŋ te. A tonya, wɔsiŋ kɛmɛ tasoŋ ve teleŋ Mɛlɛka le chɔuwo tosaa le dɛnɛ wɔɔŋndo faŋaa a wanaa tuisi acheleŋnda nyɛkindilaa choo wa le.

Maa wanaa Mɛlɛkaa o sindɔɔ niŋ, Kilisiɔŋnda o wɔsiŋ kɛmɛ tasoŋ niŋ ndaa nɔ ma chum teleŋ Mɛlɛka dimi le dɛnɛ wɔɔŋndo faŋaa a wanaa tuisi acheleŋnda nyɛkindilaa choo wa. O teleŋ koŋ bɛŋgu, ndaa nɔ di le ma kɔ chɔulaba yaamɔɔwaa ndaa a ba nda le. Mi Chiisu chɔm hei kpendekele o pɛɛkula ndɔlaŋ niŋ. Le tamaseliiyo, o dimul buɛiyaa nduaa le ma tosa chɔuwo le, kɛ mbo dimul nda aa, “La kaala wanaa tul nya leyɛ wa. Nduyɛ mi la piɛi Mɛlɛka le mbo dɔu wanaa tuisi nya nyɛ palaa choo wa sala.” (Maatiu 5:​44) Mɛɛ Chiisu wa buɛiyaa nduaa dimullo a teleŋ puaa chɔuwaa Luomaŋnda cho hunɔɔ Chulusɛlɛm delɔɔ choo a chɔuwo o wɔsiŋ kɛmɛ tasoŋ niŋndo okɔɔ, mbo dimul nda maa a sim le chɔulabaa le, kɛ a nyaaŋnuŋ. Nduyɛ ma tosa lende.—Luku 21:​20, 21.

Mi Mɛlɛka dimul vɛlɛ kiilanɔɔ Pɔɔl le mbo poonyiaa aa, “La wa wanaa miŋgiaa maa le. . . . Mɛlɛka dimi o yau ndɔɔ niŋ aa, “Ya Mɛlɛka ya cho wana miŋgiaa maa ni.” (Luomaŋnda 12:​19) Pɔɔl wa sondoo miŋgioo o nyɛ Mɛlɛka ndoo dimi le wɔsiŋ bɔɔbɔɔ wo choo o Lɛvitikɔɔ 19:​18, a Ditɔnɔmii 32:​35 niŋ. A mɛɛ naŋ che o buŋgɛi naŋ hiou ve niŋ yɛ, nɛiyo opilɛ, o Mɛlɛka ndoo chɔulaba le wanaa nduaa o sindɔɔ niŋndo cho malaa nda le yaamɔɔwaa ndaa chɔulabaa ni. Lelaŋ, diomnda Pɔɔl taŋ la chɔm maa mɛɛ Mɛlɛka che chɔuwo yɛ siŋgaŋ ndɔ le. O wɔsiŋ kɛmɛ tasoŋ niŋ, Mɛlɛka ndoo che chɔuwo maa nɛi sɔviɔɔ cho koŋ ni le wanaa nduaa kiindiaa. Nduyɛ le nyɛkindilaa suu o suu faŋaa a dɛnɛ wɔɔŋndo. Kɛ, a mɛɛ i wa o sindɔɔ niŋ yɛ, Mɛlɛka ndupilɛ kpe ndoo chɔm teleŋ chɔu waa lende ndoo nɔ mbo tosaŋndo ni, a wanaa nɔ ma tosa ndu wa.

I cho kpendekele maa Mɛlɛka ndoo chɛl Kilisiɔŋnda o wɔsiŋ kɛmɛ tasoŋ niŋ le ma tosa chɔulaŋ te. Kɛ hau niŋ yɛ? Baa Mɛlɛka chɛl pa waŋnda apum hau le chɔuwo tosaa? Ɔɔ teleŋ Mɛlɛkaa cho hoo ni le mbo tosa chɔuwo le buɛiyaa nduaa? Kɛ vɛɛ Mɛlɛka che yɛ hau chɔuwo? Buŋgɛi mɛɛlɛi cho nyunalaŋ ndaŋ muli a suɛi hei okɔɔ.